4 Yabꞌen anma Israel yal-lax hakaꞌ tiꞌ: «Mastanhtzelo yaꞌ Saúl iscampamento ebꞌnaj filisteo,» xhi. Yu huneꞌ tuꞌ, yuxin tit ishowal ebꞌnaj filisteo yinh ebꞌnaj Israel. Iskutxbꞌaniko isbꞌa ebꞌnaj Israel yinta yaꞌ Saúl bꞌey Gilgal. 5 Hakpax tuꞌ ebꞌnaj filisteo iskutxbꞌako isbꞌa ebꞌnaj yu yaniko howal yinh ebꞌnaj Israel. 30 (lahonhebꞌ iskawinaj) mil iscarruaje ebꞌnaj yet howal, yebꞌ 6 mil ebꞌnaj soldado ayahto yibꞌanh cheh, wal hunteqꞌanxa yetbꞌi ebꞌnaj soldado filisteo tuꞌ xin kaw nimankano isbꞌisil ebꞌnaj, lahan hakaꞌ isbꞌisil arena ay istiꞌ haꞌ mar. Istit ebꞌnaj filisteo tuꞌ, iswatxꞌenkanh ebꞌnaj iscampamento bꞌey Micmas yinh yetkꞌulal bꞌay chito tzꞌayik yinh Bet-avén.^a

6 Hayet yilni ebꞌnaj Israel tato kaw ay ismay, etza matxa chu iskolni isbꞌa ebꞌnaj, yuto kawilxa yeko ebꞌnaj filisteo yinh ebꞌnaj; yebꞌanto isbꞌa ebꞌnaj yulaj chꞌen nhachꞌen, yulaj nime holan, xolaj chꞌen nime chꞌen yebꞌ yulaj sanja, yebꞌ yulaj kꞌuh bꞌay machi haꞌ. 7 Aypaxo xin ebꞌnaj Israel tuꞌ qꞌaxponikꞌto haꞌ niman Jordán, yekꞌapno ebꞌnaj sat txꞌotxꞌ Gad yebꞌ Galaad, yajaꞌ yaꞌ Saúl kankano yaꞌ bꞌey Gilgal. Wal sunil issoldado yaꞌ tzujaniko yinta tuꞌ toxanhe chiluylun ebꞌnaj yu xiwkilal. 8 Haꞌ bꞌey tuꞌ yechma yaꞌ Saúl hujebꞌ tzꞌayik hakaꞌtikꞌa yu yalni yaꞌ Samuel tet yaꞌ, yajaꞌ xin mach apni yaꞌ Samuel tuꞌ, yuxin ichiko ispaxto ebꞌnaj soldado yatut. 9 Yuxin yal yaꞌ Saúl hakaꞌ tiꞌ:

—Iweti noꞌ xahanbꞌal chinhuslax tet Komam Dios yebꞌ yebꞌalqꞌabꞌe yet aqꞌankꞌulal, xhi yaꞌ. Yalten yaꞌ Saúl xahanbꞌal tuꞌ tet Komam Dios.

10 Hayet lahwi yalten yaꞌ Saúl xahanbꞌal tuꞌ, yapni yaꞌ Samuel, yelti yaꞌ Saúl chawal yinh yaꞌ, istioxhli yaꞌ tet yaꞌ. 11 Yalni yaꞌ Samuel tet yaꞌ Saúl tuꞌ:

—¿Tzet maxawatxꞌe? xhi yaꞌ.

Istaqꞌwi yaꞌ Saúl tuꞌ:

—Hayet wilnihan yichiko ispaxto ebꞌnaj soldado, yuto mach chaxhhuli hakaꞌtikꞌa hawalni, yebꞌ yu kutxanxako ebꞌnaj filisteo bꞌey Micmas, 12 waniko wetan innhusnihan xahanbꞌal yunhe inqꞌannihan tet Komam ta chikolwa jinhanh, yuto intxuman tato chiꞌayilo ebꞌnaj filisteo tuꞌ yaqꞌaꞌko howal jinhanh bꞌey Gilgal, xhi yaꞌ Saúl.

13 Yalni yaꞌ Samuel tet yaꞌ Saúl:

—Haꞌ huneꞌ maxawatxꞌe tiꞌ mach kꞌuloj yul sat Komam Jahawil. Tato maxayije ischejbꞌanil Komam Dios, koDiosal, yalkano tawet, chaxhkan reyalil yinh konhobꞌ Israel yinh hunelnhe. 14 Tinanh xin, matxa chachnahatli hawok reyal, yuto xaꞌissikꞌilo Komam Jahawil huneꞌ yaꞌ hakaꞌ chal yanma Komam chiꞌok isreyalo iskonhobꞌ, yuto machi maxayije chejbꞌanile yal Komam tawet, xhi yaꞌ Samuel.

15 Lahwi tuꞌ yel yaꞌ Samuel bꞌey Gilgal, isto yaꞌ yinh isbꞌel. Wal hunteqꞌanxa ebꞌnaj soldado ok tzujno ebꞌnaj yinta yaꞌ Saúl, yu isto yinh howal, yel ebꞌnaj bꞌey Gilgal, yapni ebꞌnaj bꞌey Gabaa yul ismajul yaꞌ Benjamín. Haꞌ bꞌey tuꞌ xin isbꞌis yaꞌ Saúl issoldado, yilni yaꞌ tato 600 xanhe ebꞌnaj. 16 Yaꞌ Saúl tuꞌ, tzujan iskꞌahol yaꞌ, haꞌ ton yaꞌ Jonatán, yebꞌpaxo ebꞌnaj issoldado, iskankano ebꞌnaj bꞌey Gabaa. Walpaxo ebꞌnaj filisteo xin ay ebꞌnaj yul iscampamento bꞌey Micmas. 17 Istit ebꞌnaj filisteo tuꞌ, oxebꞌ majan yute isbꞌa ebꞌnaj, huneꞌ majan ebꞌnaj to yul isbꞌehal txꞌotxꞌ Ofra yul ismajul txꞌotxꞌ Sual. 18 Haxa hunxa majan ebꞌnaj xin to bꞌey Bet-horón, haxa yox majan ebꞌnaj xin to bꞌey qꞌehan yibꞌanhahto akꞌal Zeboim, bꞌay chiꞌichiko txꞌotxꞌ desierto.

19 Sunil yul ismajul txꞌotxꞌ Israel tuꞌ, machi hunu ebꞌnaj chakꞌom chꞌen, yuto ebꞌnaj filisteo halni hakaꞌ tiꞌ: «Yunhe mach chu iswatxꞌen ebꞌnaj Israel chꞌen espada yebꞌ chꞌen lanza,» xhi ebꞌnaj. 20 Yuxin hayet chiyinati ebꞌnaj Israel yeh chꞌen arado chitꞌokni txꞌo txꞌotxꞌ, yebꞌ yeh yasarón, yebꞌ ye chꞌen eche, yebꞌ chꞌen kꞌupom trigo, haꞌ tet ebꞌnaj filisteo chito ebꞌnaj yiqꞌati ye ismunlabꞌal tuꞌ. 21 Kabꞌebꞌ yox majan plata chisqꞌan ebꞌnaj filisteo tet ebꞌnaj Israel yahbꞌalti yeh chꞌen arado yebꞌ chꞌen asarón; haxa yahbꞌalti ye chꞌen eche yebꞌ istoholbꞌanhelax iswiꞌ chꞌen qꞌaqꞌiꞌ iswiꞌ chiyohni noꞌ wakax, huneꞌ yox majan chꞌen plata chisqꞌan ebꞌnaj. 22 Yuxin ebꞌnaj soldado tzujaniko yinta yaꞌ Saúl yebꞌ yinta yaꞌ Jonatán, machi yespada yebꞌ islanza ebꞌnaj iqꞌbꞌil yu yet yok howal, hanhe yaꞌ Saúl yebꞌ yaꞌ Jonatán ay yet. 23 Wal ebꞌnaj soldado filisteo ay yul destacamento tit ebꞌnaj, yok majno yul isbꞌehal Micmas.