«Ekꞌojonhto isqꞌaxebꞌikꞌto haꞌ Jordán, kat janiko howal yinh iscampamento ebꞌnaj filisteo,» xhi yaꞌ.

Yajaꞌ machi yaqꞌ yaꞌ yohtanhelo ismam yinh huneꞌ tuꞌ. 2 Wal yaꞌ Saúl ay iscampamento yaꞌ iskawilal Gabaa, yich huneꞌ teꞌ granado ay bꞌey Migrón, wajebꞌ ciento ebꞌnaj soldado ayko iskꞌatanh yaꞌ Saúl tuꞌ. 3 Wal yaꞌ Ahías ayko yaꞌ iskꞌatanh yaꞌ Saúl, ayiko xilqꞌape yet ebꞌnaj sacerdote yinh yaꞌ. Yaꞌ Ahías tuꞌ, iskꞌahol yaꞌ Ahitob ye yaꞌ, yaꞌ Ahitob yuxhta isbꞌa yaꞌ yebꞌ naj Icabod, iskꞌahol naj Finees, haꞌ xin yaꞌ Elí, ok sacerdotehal bꞌey konhobꞌ Silo, haꞌ ismam naj Finees.

Yajaꞌ wal ebꞌnaj Israel mach yohtajo ebꞌnaj ta to yaꞌ Jonatán yaqꞌaꞌko howal yinh ebꞌnaj filisteo tuꞌ. 4 Wal yaꞌ Jonatán ayko yinh isnabꞌal yaꞌ yapni bꞌey iscampamento ebꞌnaj filisteo, haꞌ xin bꞌay chiꞌekꞌto yaꞌ tuꞌ ay kabꞌebꞌ chꞌen nime chꞌen, nimej yekanh istel, huneꞌ chꞌen chiyij Boses, hunxa chꞌen xin chiyij Sene. 5 Huneꞌ chꞌen aykanh yetkꞌulal norte satakꞌti Micmas, hunxa chꞌen xin aykanh yinh yetkꞌulal sur satakꞌti Gabaa. 6 Yalni yaꞌ Jonatán tet naj iqꞌnhe chꞌen yet howal:

—Wal tinanh ekꞌojonhto isqꞌaxebꞌikꞌto chꞌen tiꞌ bꞌay ay iscampamento ebꞌnaj filisteo, ebꞌnaj mach circuncisión yinh, kat janiko howal yinh ebꞌnaj, kꞌuxantaxka iskolwa Komam Dios jinh, yuto yul sat Komam Dios mach yaꞌtajo konhiskolni, machi yok yinh ta nimanonh maka hun kawanhonhnhe, xhi yaꞌ.

7 Istaqꞌwi naj iqꞌnhe chꞌen yet howal tet yaꞌ Jonatán:

—Watxꞌe tzet chiyal hawanma, hanintiꞌan ayinikojan hawetbꞌihoj, chinyijehan tzet chawala, xhi naj.

8 Yalni yaꞌ Jonatán tet naj:

—Ekꞌojonhto bꞌay ay ebꞌnaj filisteo tuꞌ, kat koyeni kobꞌa tet ebꞌnaj, 9 yajaꞌ ta chiyal ebꞌnaj jet hakaꞌ tiꞌ: “Echmawe japnihanh tekꞌatanh bꞌey tuꞌ,” ta xhi ebꞌnaj. Haꞌ tuꞌ chonhkan linhnoj, mach chonhahto bꞌay ay ebꞌnaj tuꞌ. 10 Yajaꞌ ta chiyal ebꞌnaj jet hakaꞌ tiꞌ: “Ahanhweti bꞌay ayonh tiꞌanh,” ta xhi ebꞌnaj, chalilo chal tuꞌ tato haꞌ Komam Dios chiꞌaniko ebꞌnaj yul koqꞌabꞌ, haꞌ xin chiꞌok yechelo jet, xhi yaꞌ Jonatán.

11 Isyeni isbꞌa ebꞌnaj iskawanhil tet ebꞌnaj filisteo tuꞌ, yuxin hayet yil-lax ebꞌnaj yu ebꞌnaj filisteo, yalni ebꞌnaj: «Ilwetoj lah, lanhanla yelti ebꞌnaj Israel yulaj chꞌen chꞌen bꞌay ebꞌabꞌil isbꞌa,» xhi ebꞌnaj. 12 Yalni ebꞌnaj filisteo tet yaꞌ Jonatán yebꞌ tet naj tzujan yintaj:

«Ahanhweti kokꞌatanhanh, ay huneꞌ tzet chijalanh teyet,» xhi ebꞌnaj. Yalni yaꞌ Jonatán tet naj iqꞌnhe ischꞌen yet howal tuꞌ:

«Okanh tzujno wintajan kat jahtoj, yuto haꞌ Komam Dios chiꞌaniko ebꞌnaj filisteo tiꞌ yul koqꞌabꞌ, hanhonh Israelonh tiꞌ,» xhi yaꞌ.

13 Yahto motxmon yaꞌ Jonatán chitzabꞌi yaꞌ yu isqꞌabꞌ yebꞌ yu yoj, tzujaniko naj iqꞌnhe chꞌen yet howal yintaj yaꞌ, haꞌ xin ebꞌnaj filisteo chiꞌelto pakꞌo yu yaꞌ Jonatán, haꞌ naj iqꞌnhe chꞌen yet howal tuꞌ, haꞌ naj chilahkꞌon kamo ebꞌnaj. 14 Haꞌ yinh huneꞌ bꞌabꞌel howal tuꞌ, aymi 20 (hunkꞌalwanho) ebꞌnaj filisteo ismaqꞌkamo yaꞌ Jonatán yebꞌ naj tzujan yinta tuꞌ. Hanikꞌnhechꞌan xin bꞌay bꞌelwito ebꞌnaj yet ispotxꞌnikamo ebꞌnaj ebꞌnaj filisteo tuꞌ. 15 Sunil ebꞌnaj soldado filisteo ay yul campamento, yebꞌ ebꞌnaj pujanto xol ebꞌnaj Israel yu yinilo tzetaj ay ebꞌnaj, ok huneꞌ niman xiwkilal yinh ebꞌnaj. Yinhnhena tuꞌ yekꞌ huneꞌ niman txixkabꞌ isbꞌili txꞌo txꞌotxꞌ yu, yaniko Komam huneꞌ niman xiwkilal yinh ebꞌnaj filisteo.

16 Wal ebꞌnaj soldado ayko majwal yu yaꞌ Saúl bꞌey Gabaa yul yet Benjamín yil ebꞌnaj yelkanh ebꞌnaj soldado filisteo yinh hunta bꞌulan, matxa chitxumcha yu ebꞌnaj bꞌay kaw istohi. 17 Yalni yaꞌ Saúl tet ebꞌnaj soldado ayko iskꞌatanh:

«Ilwej tato tzꞌajan ebꞌnaj soldado, kꞌuxantaxka ay ebꞌnaj mach ayokꞌoj,» xhi yaꞌ. Hayet isbꞌislax ebꞌnaj tuꞌ, yilni ebꞌnaj tato machi yaꞌ Jonatán yebꞌ naj iqꞌnhe ischꞌen yaꞌ yet howal. 18 Hayet huneꞌ tiempo tuꞌ ayikꞌo isKaxhahil istrato Komam Dios xol ebꞌnaj Israel bꞌey tuꞌ, yuxin yal yaꞌ Saúl tet yaꞌ sacerdote Ahías hakaꞌ tiꞌ:

«Iti isKaxhahil istrato Komam Dios,» xhi yaꞌ.

19 Yajaꞌ hayet lanhan istzotel yaꞌ Saúl tet yaꞌ sacerdote Ahías tuꞌ, yabꞌen ebꞌnaj Israel yahkanh iswejcha ebꞌnaj soldado filisteo, yuxin yal yaꞌ Saúl tet yaꞌ Ahías: «Maxhtonhe chawitij isKaxhahil istrato Komam,» xhi yaꞌ.

20 Iskutxbꞌaniko yaꞌ Saúl issoldado, isto ebꞌnaj bꞌey iscampamento ebꞌnaj filisteo tuꞌ. Hayet yapni ebꞌnaj, yilni ebꞌnaj tato haꞌtikꞌa xol ebꞌnaj filisteo tuꞌ lanhan ispotxꞌnikamo yet soldadohal yu yespada, yuto somchalo yul isnabꞌal ebꞌnaj. 21 Ay xin ebꞌnaj Israel ayxako yetbꞌiho ebꞌnaj filisteo yet yalanhtokanoj, tzujan xin ebꞌnaj yinta ebꞌnaj yul iscampamento ebꞌnaj filisteo tuꞌ, yuxin hayet yilni ebꞌnaj huneꞌ tuꞌ yel ebꞌnaj xol ebꞌnaj filisteo, yok ebꞌnaj yetbꞌiho ebꞌnaj soldado Israel tzujan yinta yaꞌ Saúl yebꞌ yinta yaꞌ Jonatán. 22 Haxa ebꞌnaj Israel yebꞌato isbꞌa bꞌey chewal txꞌotxꞌ yul yet yaꞌ Efraín, yet yabꞌen ebꞌnaj tato elkanh ebꞌnaj filisteo tuꞌ, yelti ebꞌnaj bꞌay ebꞌabꞌil isbꞌa, yok tzujno ebꞌnaj yinta ebꞌnaj filisteo tuꞌ, yaniko ebꞌnaj howal yinh ebꞌnaj. 23 Yok tzujno ebꞌnaj Israel yinta ebꞌnaj filisteo masanto bꞌey Bet-avén, hak tuꞌ yu iskolnilo Komam Jahawil ebꞌnaj Israel yinh huneꞌ tzꞌayik tuꞌ.

24 Yajaꞌ wal ebꞌnaj Israel tuꞌ kaw machi yip ebꞌnaj yinh huneꞌ tzꞌayik tuꞌ yuto machi nichꞌano tzet isloh ebꞌnaj, yuto yaꞌ Saúl yaqꞌ bꞌinaho yaꞌ isbꞌi Komam Dios, yet yalanhto hakaꞌ tiꞌ: «Tato ay mak chiwaꞌi yalanhto maxhto chꞌay numnahi, yalanhto maxhto chitanhilo ebꞌnaj filisteo ju, haꞌ mak tuꞌ chiꞌay istzꞌaktiꞌ Komam Dios yibꞌanh,» xhi yaꞌ. 25 Lahwi tuꞌ yapni ebꞌnaj soldado Israel xol huneꞌ qꞌebꞌtalaj, yilni ebꞌnaj huneꞌ noꞌ ajan, chꞌay tꞌuhla iskabꞌil sat txꞌotxꞌ. 26 Hakaꞌ yekꞌ yojomal ha haꞌ, hak tuꞌ yekꞌ noꞌ kabꞌ tuꞌ sat txꞌotxꞌ; yajaꞌ xin machi hunu ebꞌnaj soldado Israel loni noꞌ, yuto chixiw ebꞌnaj yinh tzet yal yaꞌ Saúl yabꞌeꞌ Komam Dios. 27 Yajaꞌ wal yaꞌ Jonatán mach yohtajo yaꞌ tzet yal ismam, yuxin yato yaꞌ iswiꞌ huneꞌ te teꞌ iqꞌbꞌil yu xol noꞌ kabꞌ tuꞌ, islohni yaꞌ noꞌ, yok yip isbꞌaqꞌ sat yaꞌ yu noꞌ.

28 Yalni huneꞌ naj soldado tet yaꞌ:

—Yaqꞌ bꞌinaho hamam isbꞌi Komam Dios yalni hakaꞌ tiꞌ: “Tato ay hunu mak chiwaꞌi yalanhto maxhto chiꞌay numnahi yinh huneꞌ tzꞌayik tiꞌ, chikankano yalanh istzꞌaktiꞌ Komam Dios,” xhi yaꞌ. Wal ebꞌnaj soldado tiꞌ, lanhan ispaxilo yip ebꞌnaj yu wahil, xhi naj. 29 Istaqꞌwi yaꞌ Jonatán:

—Haꞌ inmamtuꞌan, qꞌannheti huneꞌ isyaꞌtajil yibꞌanh konhobꞌ Israel tiꞌ. Abꞌe tzet chiwalan, yuto hayet manlonihan hanikꞌ noꞌ kabꞌ tiꞌ, kaw mawabꞌehan yok wipan, 30 kaw aymi yip sunil ebꞌnaj soldado tiꞌ tinanh tato masloh ebꞌnaj tzet mayilo tet ebꞌnaj filisteo, hak tuꞌ xin ekꞌbꞌal tom makonhqꞌoji yinh ebꞌnaj, xhi yaꞌ.

31 Haꞌ yinh huneꞌ tzꞌayik tuꞌ qꞌoji ebꞌnaj Israel yinh ebꞌnaj filisteo, yako ebꞌnaj howal yinh ebꞌnaj bꞌey Micmas masanta bꞌey Ajalón, yajaꞌ wal ebꞌnaj Israel tuꞌ matxa yip ebꞌnaj yu wahil. 32 Yuxin yinh haꞌmataj ok ebꞌnaj ispotxꞌoꞌ no noqꞌ yilo tet ebꞌnaj filisteo; noꞌ meꞌ, yebꞌ noꞌ wakax yebꞌ noꞌ tzehla wakax, iskꞌuxni ebꞌnaj noꞌ, aytoko xin ischikꞌil noꞌ yinh yet iskꞌuxni ebꞌnaj noꞌ, yuto matxa yechma ebꞌnaj yel ischikꞌil noꞌ. 33 Yajaꞌ xin ay hunteqꞌan ebꞌnaj halni tet yaꞌ Saúl hakaꞌ tiꞌ:

—Ebꞌnaj soldado lanhan yaniko ebꞌnaj ismul yul sat Komam Dios, yuto lanhan iskꞌuxni ebꞌnaj noꞌ chibꞌe ayko ischikꞌil yinh, xhi ebꞌnaj.

Istaqꞌwi yaꞌ Saúl:

—Maxeyako hemul yul sat Komam Dios, bꞌalweti hunu chꞌen niman chꞌen bꞌey tiꞌ tinanh, 34 kat heto heyalno tet sunil anma Israel ta chiyiti hunun anma tuꞌ iswakax yebꞌ ismeꞌ bꞌey tiꞌ, kat hepotxꞌnikamo noꞌ kat hewaꞌi. Mach xin cheyako hemul sata Komam chekꞌuxni chibꞌe ayko ischikꞌil yinh, xhi yaꞌ.

Hayet huneꞌ aqꞌbꞌal tuꞌ, hunun anma Israel yiti iswakax, ispotxꞌni ebꞌnaj noꞌ bꞌey tuꞌ, yaniko ebꞌnaj noꞌ xahanbꞌalil, iskꞌuxnipaxo ebꞌnaj noꞌ. 35 Lahwi tuꞌ islatzꞌbꞌankanh yaꞌ Saúl huneꞌ ismexhahil xahanbꞌal tet Komam Dios Jahawil, haꞌ huneꞌ ismexhahil xahanbꞌal tuꞌ, haꞌ bꞌabꞌel iswatxꞌekanh yaꞌ Saúl tet Komam Jahawil.

36 Yalni yaꞌ Saúl hakaꞌ tiꞌ:

—Tonhwe jaqꞌaꞌko howal yinh ebꞌnaj filisteo huneꞌ aqꞌbꞌal tiꞌ, kat jinilo sunil tzet ay ebꞌnaj masanto yet chisajbꞌiloj, kat kopotxꞌnikamo ebꞌnaj, machi xin hunu ebꞌnaj chikolchakanoj, xhi yaꞌ.

Istaqꞌwi sunil ebꞌnaj soldado tet yaꞌ:

—Yubꞌojabꞌ tzet chal hakꞌul, xhi ebꞌnaj.

Tzujan tuꞌ yalni naj sacerdote:

—Hitzojonhweko iskꞌatanh Komam Dios bꞌey tiꞌ, xhi yaꞌ.

37 Isqꞌambꞌen yaꞌ Saúl tet Komam Dios hakaꞌ tiꞌ: «Mamin ¿chimkonhtohanh jaqꞌaꞌkojanh howal yinh ebꞌnaj filisteo? ¿Chimhawako ebꞌnaj yul koqꞌabꞌanh hanhonh Israelonh tiꞌanh?» xhi yaꞌ.

Yajaꞌ mach taqꞌwi Komam Dios tet yaꞌ huneꞌ aqꞌbꞌal tuꞌ. 38 Yuxin yal yaꞌ Saúl tet ebꞌnaj Israel hakaꞌ tiꞌ:

—Sunil hex yahaw hex yinh ebꞌnaj soldado tiꞌ hitzanhweti bꞌey tiꞌ, kat heyilni mak ay ismul koxol tiꞌ. 39 Chiwaqꞌ bꞌinahojan isbꞌi Komam Dios Jahawil, Iskolomal anma Israel, yinh ta haꞌ mak aniko ismul, waxanhka naj Jonatán inkꞌaholan, chikami, xhi yaꞌ.

Yajaꞌ machi hunu mak xol ebꞌnaj soldado tuꞌ taqꞌwi, 40 yuxin yal yaꞌ Saúl tet sunil ebꞌnaj Israel tuꞌ:

—Ekꞌanhweti hesunil isqꞌaxebꞌikꞌti tiꞌ, haxa hinan yebꞌ naj Jonatán, inkꞌaholan chonhekꞌtojanh qꞌaxepxakꞌto tuꞌ, xhi yaꞌ.

Istaqꞌwi ebꞌnaj soldado:

—Kꞌultikꞌa, yubꞌojabꞌ hakaꞌ chawoche tiꞌ, xhi ebꞌnaj.

41 Yalni yaꞌ Saúl hakaꞌ tiꞌ:

—Mamin, koDiosal hanhonh Israelonh tiꞌanh, yeloj, kat hayeni mak ay ismul, xhi yaꞌ. Yaykꞌay huneꞌ suerte tuꞌ yibꞌanh yaꞌ Jonatán yebꞌ yaꞌ Saúl, hak tuꞌ yu isyenilo isbꞌa tato maxhtaj konhobꞌ tuꞌ ay ismul.

42 Lahwi tuꞌ yalnipaxo yaꞌ Saúl:

—Wal tinanh xin ilwe suerte wibꞌanhan yebꞌ yibꞌanh yaꞌ Jonatán, kat yilchalo mak ay ismul, xhi yaꞌ. Yaykꞌay suerte tuꞌ yibꞌanh yaꞌ Jonatán. 43 Yalni yaꞌ Saúl tet yaꞌ Jonatán:

—Halilo hamul wetan tinanh, xhi yaꞌ.

Istaqꞌwi yaꞌ Jonatán:

—Yinh kaw yeli inlabꞌaytojan iswiꞌ te teꞌ iqꞌbꞌil wuhan xol noꞌ kabꞌ, inlonihan hanikꞌ noꞌ, yuxin ayinan lah, hinan inkaman, xhi yaꞌ.

44 Istaqꞌwi yaꞌ Saúl:

—Jonatán, yaqꞌabꞌayo Komam Dios niman isyaꞌtajil wibꞌanhan tato mach chachkami, xhi yaꞌ.

45 Yajaꞌ yal konhobꞌ Israel tet yaꞌ Saúl hakaꞌ tiꞌ:

—Machoj, mach chu iskam yaꞌ tiꞌ, yuto haꞌ yaꞌ kolnilo konhobꞌ Israel yul isqꞌabꞌ ebꞌnaj filisteo. Chijaqꞌbꞌinaho isbꞌi Komam itzitznhetikꞌa chijalni tato machi hunu xil iswiꞌ yaꞌ Jonatán tiꞌ chiꞌaykꞌay sat txꞌotxꞌ. Ayko Komam Dios yetbꞌiho yaꞌ, yuxin qꞌoji yaꞌ yinh ebꞌnaj filisteo, xhi ebꞌnaj.

Hak tuꞌ yu iskolnilo ebꞌnaj Israel yaꞌ Jonatán yul isqꞌabꞌ kamikal. 46 Isbꞌejni yaꞌ Saúl yaniko howal yinh ebꞌnaj filisteo, ispaxto ebꞌnaj filisteo sat istxꞌotxꞌ bꞌay aya.

47 Hayet yalaxiko yaꞌ Saúl isreyalo Israel, yako yaꞌ howal yinh konhobꞌ ayko yinhla ishoyanil Israel tuꞌ; haꞌ ton hunteqꞌan konhobꞌ tiꞌ: konhobꞌ Moab, konhobꞌ Amón, konhobꞌ Edom; yanipaxiko yaꞌ howal yinh ebꞌnaj isreyal konhobꞌ Soba, yebꞌ yinh ebꞌnaj filisteo, wal xin isqꞌoji yaꞌ yinh hunteqꞌan konhobꞌ tuꞌ. 48 Hayet hunel iskutxbꞌako yaꞌ Saúl tuꞌ issoldado, yaniko yaꞌ howal yinh ebꞌnaj Amalec, iskolnilo yaꞌ konhobꞌ Israel tet ebꞌnaj, isbꞌejni ebꞌnaj yapni yelqꞌanoti tzet ay ebꞌnaj Israel.

49 Haꞌ xin ebꞌnaj iskꞌahol yaꞌ Saúl tuꞌ, haꞌ ton ebꞌnaj tiꞌ: Yaꞌ Jonatán, naj Isúi yebꞌ naj Malquisúa. Aypaxo kawanh iskutzꞌin yaꞌ, haꞌ ix bꞌabꞌel, Merab isbꞌi ix, haxa ix iskabꞌ, Mical isbꞌi ix. 50 Haxa ix yixal yaꞌ Saúl tuꞌ, Ahinoam isbꞌi ix, iskutzꞌin naj Ahimaas ye ix. Haꞌ xin naj Abner ayko yahawilo yinh ebꞌnaj issoldado yaꞌ Saúl tuꞌ. Naj Abner tuꞌ, iskꞌahol naj Ner ye naj, naj Ner tuꞌ yuxhta isbꞌa naj yebꞌ naj ismam yaꞌ Saúl. 51 Yuto naj Cis, ismam yaꞌ Saúl yebꞌ naj Ner, ismam naj Abner, iskꞌahol naj Abiel ye ebꞌnaj.

52 Haꞌ yulbꞌal istiempohal ok yaꞌ Saúl isreyalo Israel tuꞌ, kaw yiqꞌkanokanh yip howal xol konhobꞌ Israel yebꞌ ebꞌnaj filisteo, yu tuꞌ yuxin sunil ebꞌnaj tzeh kaw ay yip yanma yebꞌ kaw helan yinh howal ok soldadohal yu yaꞌ Saúl.