Mach isyije yaꞌ Saúl tzet yal Komam Dios
15
Ay huneꞌ tzꞌayik tiꞌ yal yaꞌ Samuel tet yaꞌ Saúl hakaꞌ tiꞌ:—Haꞌ Komam Jahawil kinchejnihan kach wanikojan isreyalo iskonhobꞌ Israel, yuxin haꞌ tinanh kaw hajbꞌa hatxikin hawabꞌen tzet chiyal Komam Jahawil tawet. 2 Komam Yahawil, kaw aykano yip, chihalni hakaꞌ tiꞌ: “Hanintiꞌan chiwayojan isyaꞌtajil yibꞌanh ebꞌnaj Amalec, yu yako ebꞌnaj howal yinh ebꞌnaj Israel yet ayko ebꞌnaj yinh isbꞌel yet yel ebꞌnaj bꞌey konhobꞌ Egipto. 3 Yuxin as ako howal yinh ebꞌnaj Amalec tuꞌ, kat hatanhtzenkanilo ebꞌnaj yebꞌ sunil tzet aya. Machojabꞌ chitzꞌay hakꞌul yinh hunteqꞌan anma tuꞌ. Chapotxꞌkamo ebꞌnaj winaj, yebꞌ ebꞌix ix yebꞌ nixhte unin yebꞌ nixhte neneꞌ chitotxutxwi. Chiwaqꞌnipaxo kamo iswakax ebꞌnaj, ismeꞌ, iscamello yebꞌ isburro ebꞌnaj,” xhi Komam, xhi yaꞌ Samuel tet yaꞌ Saúl.
4 Iskutxbꞌaniko yaꞌ Saúl ebꞌnaj Israel, isbꞌisni yaꞌ ebꞌnaj bꞌey Telaim. Bꞌislax kabꞌ ciento mil ebꞌnaj soldado chito yinh howal yu yoj, isbꞌislaxpaxo 10 (lahonhebꞌ) mil ebꞌnaj Judá. 5 Isto yaꞌ Saúl yebꞌ issoldado tuꞌ bꞌey iskonhobꞌ naj Amalec; haxa yet yapni ebꞌnaj bꞌey tuꞌ yebꞌanto isbꞌa ebꞌnaj bꞌey huneꞌ akꞌal. 6 Yalni yaꞌ Saúl tet ebꞌnaj ceneo ay bꞌey tuꞌ hakaꞌ tiꞌ:
«Pohwelo hebꞌa xol ebꞌnaj Amalec tiꞌ, haxinwal mach chextanhilo yinta ebꞌnaj, yuto hex tiꞌ kꞌulchꞌan heyute hekꞌul yinh ebꞌnaj jichmam Israelanh yet yel ebꞌnaj bꞌey Egipto,» xhi yaꞌ.
Hak tuꞌ yu ispohnilo isbꞌa ebꞌnaj ceneo xol ebꞌnaj Amalec. 7 Yicheniko yaꞌ Saúl yaniko howal yinh ebꞌnaj Amalec bꞌey konhobꞌ Havila masanta bꞌey Shur yinh ismohonal txꞌotxꞌ Egipto bꞌay chito tzꞌayik, yaqꞌni aykꞌayo yaꞌ Saúl tuꞌ ebꞌnaj. 8 Istzabꞌnayo yaꞌ Saúl tuꞌ naj Agag, isreyal ebꞌnaj Amalec, wal sunil konhobꞌ xin ispotxꞌkamo ebꞌnaj Israel tuꞌ yu espada kaw ay ye. 9 Yajaꞌ wal yaꞌ Saúl yebꞌ issoldado mach ispotxꞌkamo ebꞌnaj naj rey Agag. Mach ispotxꞌpaxo ebꞌnaj noꞌ meꞌ kaw saqꞌal yebꞌ noꞌ wakax kaw bꞌaqꞌich yebꞌ noꞌ winaj meꞌ. Mach ispotxꞌ ebꞌnaj sunil hunteqꞌan noꞌ tuꞌ, yajaꞌ wal sunil tzet mach kꞌuloj yebꞌ mach istohol, istanhtzekanilo ebꞌnaj.
10 Lahwi tuꞌ istzotel Komam Jahawil tet yaꞌ Samuel, yalni hakaꞌ tiꞌ:
11 «Majaltam mach wakojan yaꞌ Saúl tiꞌ reyal, yuto maspohilo isbꞌa yaꞌ winhan, machi xin masyije yaꞌ yinh tzet walan,» xhi Komam.
Hayet yabꞌen yaꞌ Samuel tzet yal Komam tuꞌ, yok bꞌiskꞌulal yinh iskꞌul yaꞌ; mach xin way yaꞌ huneꞌ aqꞌbꞌal tuꞌ yu istxahli tet Komam Jahawil. 12 Haxa yet hunxa tzꞌayik kaw sahabꞌ ah yaꞌ, isto yaꞌ tzotelo tet yaꞌ Saúl, yajaꞌ ay mak halni hakaꞌ tiꞌ: «To yaꞌ Saúl bꞌey Carmel, yu iswatxꞌenkanh huneꞌ yechel bꞌey tuꞌ yu yok ismay yaꞌ, yekꞌ yaꞌ ishoyno Carmel, yapni yaꞌ bꞌey Gilgal,» xhi tet yaꞌ Samuel. 13 Yapni yaꞌ Samuel bꞌay ay yaꞌ Saúl, yalni yaꞌ Saúl tuꞌ tet yaꞌ Samuel:
—Mamin, kaw saqꞌal hawet yu Komam Jahawil. Hanintiꞌan, kinbꞌeyan inyijehan chejbꞌanile yal Komam Jahawil wetan, xhi yaꞌ.
14 Yalni yaꞌ Samuel tet yaꞌ:
—¿Tzet xin ye noꞌ meꞌ chiꞌel yaw chiwabꞌehan, yebꞌ noꞌ wakax chimuꞌlahi? xhi yaꞌ.
15 Istaqꞌwi yaꞌ Saúl:
—Haꞌ noꞌ tuꞌ jilojanh tet ebꞌnaj Amalec. Haꞌ ebꞌnaj soldado pohnilo noꞌ meꞌ yebꞌ noꞌ wakax kaw bꞌaqꞌich yu yaltelax noꞌ yinh xahanbꞌal tet Komam Jahawil, koDiosal, wal sunil tzet yal Komam tuꞌ kotanhtzelojanh, xhi yaꞌ.
16 Yalni yaꞌ Samuel tet yaꞌ Saúl:
—Abꞌe tzet chiwalan, yuto chiwalan tawet tzet yal Komam Dios wetan yet qꞌani, xhi yaꞌ. Yalni yaꞌ Saúl:
—Hala, xhi yaꞌ.
17 Yalni yaꞌ Samuel:
—Waxanhka kaw machi hawelapno hawalni yet yalanhtokanoj, yajaꞌ kach yako Komam Jahawil iswiꞌehalo hunun majan ebꞌnaj Israel, kach yaniko reyalil yinh konhobꞌ Israel. 18 Komam Jahawil kach aniti yinh huneꞌ hamunil tiꞌ, yalnipaxo tawet: “Asiꞌ, tanhtzelo ebꞌnaj mulum Amalec, kat xin hawaniko howal, kat hatanhtzenkanilo ebꞌnaj yinh hunelnhe,” xhi. 19 ¿Tzet yinh xin hamanhkꞌo yinh tzet halbꞌil yu Komam, hawiniti tzetaj ye tuꞌ yet ebꞌnaj Amalec? Kaw txꞌoj tzet chawatxꞌe sat Komam, xhi yaꞌ Samuel.
20 Istaqꞌwi yaꞌ Saúl:
—Wal xin hanintiꞌan inyijehan tzet yal Komam Jahawil, kinbꞌeyan waqꞌaꞌkojan howal yinh ebꞌnaj Amalec, winitijan naj rey Agag preso, wal ebꞌnaj Amalec tuꞌ xin intanhtzekanilojan ebꞌnaj sunil. 21 Haꞌ ebꞌnaj soldado pohnilo noꞌ meꞌ yebꞌ noꞌ wakax, noꞌ kaw bꞌaqꞌich, noꞌ tꞌinhanxatikꞌa istanhtzelaxkaniloj, yiniti ebꞌnaj noꞌ yu yok noꞌ xahanbꞌalil tet Komam Jahawil bꞌey Gilgal, xhi yaꞌ Saúl.
22 Yalni yaꞌ Samuel hakaꞌ tiꞌ:
—¿Tom ekꞌbꞌalto kaw chitzala Komam Jahawil yinh xahanbꞌal chinhuslax tet Komam sata koyijen tzet chal Komam?
Kaw yeli haꞌ koyijen tzet chal Komam kaw ekꞌbꞌalto kꞌul sata jaqꞌni xahanbꞌal tet.
Kaw ekꞌbꞌalto kꞌul jabꞌen tzet chal Komam, sata jaqꞌni noꞌ meꞌ xahanbꞌalil.
23 Haꞌ mak manhkꞌom tet Komam lahan ismul hakaꞌ anma ahbꞌelom;
haxa mak mach chiyijen tzet chal Komam, lahan ismul hakaꞌ mak chiyiyo isbꞌa tet tioxh.
Wal xin hakaꞌ yu hayahni ischejbꞌanil Komam Jahawil, hak tuꞌ yu kach isyahni Komam;
yuxin chachyilo Komam isreyalo ebꞌnaj Israel, xhi yaꞌ Samuel.
24 Istaqꞌwi yaꞌ Saúl tet yaꞌ Samuel:
—Hoꞌ kaw wako inmulan, inmanhkꞌonan ischejbꞌanil Komam Jahawil yebꞌ tzet hawala, wal xin kinxiwan tet konhobꞌ Israel, yuxin inyijehan tzet yala. Aqꞌ nimankꞌulal yinh inmultiꞌan tinanh. 25 Titanh inkꞌatanhan kat janiko ismay Komam Jahawil, xhi yaꞌ Saúl.
26 Istaqꞌwi yaꞌ Samuel tet yaꞌ Saúl:
—Mach chintohan yebꞌ hach, yuto hamanhkꞌo Istzotiꞌ Komam Jahawil, yuxin chachyilo Komam isreyalo konhobꞌ Israel, xhi yaꞌ.
27 Hayet ismeltzonto isbꞌa yaꞌ Samuel yet ispaxtoj, yok tzabꞌno yaꞌ Saúl yinh istiꞌ xil isqꞌap yaꞌ hukaniko yinh, istzilmoto qꞌap. 28 Yalni yaꞌ Samuel:
—Hakaꞌ mayu hatzilnito istiꞌ xil inqꞌaptiꞌan hak tuꞌ chu istzilnito Komam hamunil yinh reyalil yinh konhobꞌ Israel. Mayilo Komam huneꞌ munil tiꞌ tawet, mayaqꞌni tet huneꞌxa jet konhobꞌ kꞌul tasataj. 29 Komam chiꞌaniko ismay konhobꞌ Israel, haꞌ chihalni, Komam tuꞌ mach chako leqꞌtiꞌal. Mach isnah isbꞌa Komam ismeltzo hunelxa, mach lahano Komam hakaꞌ anma, xhi yaꞌ Samuel.
30 Yalnipaxo yaꞌ Saúl:
—Yeli wako inmulan, yajaꞌ yeloj tato ay welapnojan yul hasat sata ebꞌnaj ichamta winaj Israel yebꞌ sata konhobꞌ Israel tiꞌ. Titanh inkꞌatanhan yu winayo hinbꞌahan sata Komam Jahawil, haDiosal, xhi yaꞌ Saúl.
31 Isto yaꞌ Samuel tuꞌ yinta yaꞌ Saúl, yaniko yaꞌ Saúl tuꞌ ismay Komam Jahawil. 32 Lahwi tuꞌ yalni yaꞌ Samuel hakaꞌ tiꞌ:
«Iweti naj Agag, naj isreyal ebꞌnaj Amalec insatajan,» xhi yaꞌ.
Kaw xin tzala iskꞌul naj rey Agag yet yul naj sata yaꞌ Samuel. Haꞌ yute istxumni naj ta xakolchalo naj yul isqꞌabꞌ isyaꞌilal kamikal.
33 Yalni yaꞌ Samuel:
«Hakaꞌ yu hawanikano txꞌiꞌal ebꞌix ix manh uninal yu hawespada, hak tuꞌ chu iskankano hamiꞌ manh uninal xol yet ixal tinanh,» xhi yaꞌ Samuel tet naj.
Ispotxꞌni yaꞌ Samuel naj Agag tuꞌ, kaw xin kokꞌ ayiko isnimanil naj yu yaꞌ sata Komam Dios bꞌey Gilgal. 34 Lahwi tuꞌ ismeltzo yaꞌ Samuel bꞌey konhobꞌ Ramá, hakpax tuꞌ yaꞌ Saúl meltzo yaꞌ bꞌey konhobꞌ Gabaa, yuto haꞌ tuꞌ ay iskonhobꞌ yaꞌ. 35 Istaqꞌbꞌal xin yilkano yaꞌ Samuel yaꞌ Saúl yinh hunelnhe. Wal yaꞌ Samuel tuꞌ xin, kaw oqꞌ yaꞌ yinh yaꞌ Saúl, kaw xin ok bꞌiskꞌulal yinh iskꞌul yaꞌ yinh yaꞌ Saúl tuꞌ, yu matxa isje Komam Jahawil yok yaꞌ Saúl isreyalo konhobꞌ Israel.