—¿Bꞌaqꞌinh chabꞌej hawoqꞌ yinh yaꞌ Saúl? Hankawhinan yahnhekanilo yaꞌ, matxa chiꞌok yaꞌ isreyalo anma Israel. Wal xin as nohtze yukꞌaꞌ noꞌ wakax yu teꞌ aceite, yuto chachinchejtojan iskꞌatanh yaꞌ Isaí bꞌey konhobꞌ Belén. Xol ebꞌnaj iskꞌahol yaꞌ, saybꞌilxalo huneꞌ naj chiꞌok reyal wuhan, xhi Komam.

2 Istaqꞌwi yaꞌ Samuel:

—¿Tzet chu intohan, hawalni? yuto ta chiyabꞌelo yaꞌ Saúl, chinispotxꞌkamojan yaꞌ, xhi yaꞌ.

Istaqꞌwi Komam Jahawil tet yaꞌ:

—Ito hunu noꞌ qꞌopo wakax, kat hawalni tato chaxhto hawalteꞌ xahanbꞌal wetan. 3 Yet chachapni xin, kat hawawten yaꞌ Isaí takꞌatanh yet chawalten xahanbꞌal tuꞌ. Hanan chiwalan tawet yinh tzet chawatxꞌe, kat xin hajobꞌnayo aceite yibꞌanh iswiꞌ naj chiwalan tawet, yu yok naj reyal, xhi Komam.

4 Wal yaꞌ Samuel, isyije yaꞌ hakaꞌtikꞌa yu yalni Komam Jahawil. Hayet yapni yaꞌ bꞌey konhobꞌ Belén, yelti ebꞌnaj ichamta winaj ay yul konhobꞌ tuꞌ ischahno yaꞌ, isqꞌambꞌen ebꞌnaj tet yaꞌ:

—¿Tzet yinh chachhuli? ¿tom aqꞌankꞌulal chachhul hawalaꞌ? xhi ebꞌnaj.

5 Istaqꞌwi yaꞌ Samuel:

—Hoꞌ hak tuꞌ yehi, chinhulan waltehan xahanbꞌal tet Komam Jahawil. Watxꞌewe hebꞌa kat hetit inkꞌatanhan, xhi yaꞌ.^a

Yaqꞌni sajnheno yaꞌ Samuel yaꞌ Isaí yebꞌ ebꞌnaj iskꞌahol. Yalni yaꞌ tato chihul yaꞌ Isaí yebꞌ iskꞌahol iskꞌatanh yaꞌ yet chaniko yaꞌ isxahanbꞌal tet Komam Jahawil. 6 Haxa yet yapni yaꞌ Isaí yebꞌ ebꞌnaj iskꞌahol, yet yilni yaꞌ Samuel naj Eliab, istxumni yaꞌ hakaꞌ tiꞌ: «Yinh kaw yeli haꞌ naj tiꞌ saybꞌilxalo yu Komam Jahawil yu yok reyal,» xhi yaꞌ.

7 Istaqꞌwi Komam Jahawil tet yaꞌ Samuel:

—Maxhtaj yinh tzet jilni hunu mak chachok tꞌanhnoj maka yinh hanta hun istel, yuto chinyahan huneꞌ tuꞌ. Yuto hanintiꞌan yet chinsikꞌlenilojan hunu maka, mach lahano insaynihan hakaꞌ issayni anma, yuto anma, haꞌ yinh tzet jilni, yinh tuꞌ chꞌok tꞌanhnoj; yajaꞌ wal hanintiꞌan, haꞌ iskꞌulchꞌanil yanma chiwilan, xhi Komam.

8 Lahwi tuꞌ, yawten yaꞌ Isaí naj Abinadab, yaniko yaꞌ naj sata yaꞌ Samuel, yalni yaꞌ Samuel:

—Maxhtaj naj tiꞌ saybꞌilpaxilo yu Komam Jahawil, xhi yaꞌ.

9 Yanipaxiko yaꞌ Isaí naj Sama sata yaꞌ Samuel, yalni yaꞌ tet yaꞌ Isaí:

—Maxhtajpaxo naj tiꞌ saybꞌililo yu Komam Jahawil, xhi yaꞌ.

10 Hujwanh xin ebꞌnaj iskꞌahol yaꞌ Isaí tuꞌ yako sata yaꞌ Samuel, yajaꞌ xin yal yaꞌ Samuel tet yaꞌ Isaí tuꞌ:

—Machi hunu ebꞌnaj tiꞌ saybꞌiliko yu Komam yok reyal, xhi yaꞌ.

11 Isqꞌambꞌen yaꞌ Samuel tet yaꞌ Isaí:

—¿Tom hanhe ebꞌnaj tiꞌ hakꞌahol? xhi yaꞌ.

Istaqꞌwi yaꞌ Isaí:

—Ayto huneꞌxa naj, haꞌ ton naj islahobꞌal, naj chitanhen inmeꞌan, xhi yaꞌ.

Yalni yaꞌ Samuel tet yaꞌ Isaí:

—Ato yawtemal naj, yuto mach chu jok tzꞌonhno waꞌoj tato mach chul naj, xhi yaꞌ Samuel.

12 Yanito yaꞌ Isaí yawtemal naj, lahwi tuꞌ yul naj. Wal naj xin, kaw kaj chimchonhe naj, kaw kꞌulchꞌan jilni isbꞌaqꞌ sat naj, yebꞌ kaw kawla winaj naj.

Yalni Komam Jahawil tet yaꞌ Samuel:

«Haꞌ ton naj tiꞌ, ahanhwanoj, kat hawanayo aceite yibꞌanh iswiꞌ naj,» xhi Komam.

13 Yiniti yaꞌ Samuel yukꞌaꞌ noꞌ wakax bꞌay ayayto teꞌ aceite, yanayo yaꞌ teꞌ yibꞌanh iswiꞌ naj yinh sat sunil yuxhta naj. Hak tuꞌ yu yaqꞌnikano yaꞌ Samuel ismunil yaꞌ David yinh reyal. Haꞌ yinh huneꞌ tzꞌayik tuꞌ, hul Yespíritu Komam Jahawil yinh yaꞌ David, wal yaꞌ Samuel ahwano yaꞌ ispaxto yaꞌ bꞌey konhobꞌ Ramá.

14 Wal Yespíritu Komam Jahawil el yinh yaꞌ Saúl, yaniko Komam huneꞌ espíritu matzwalil yinh yaꞌ, wal xin kaw ekꞌyaꞌ yaꞌ yu. 15 Yuxin yal ebꞌnaj ischejabꞌ yaꞌ Saúl tet hakaꞌ tiꞌ:

—Mamin, kaw chawila tato ay huneꞌ espíritu matzwalil chiꞌaqꞌni ekꞌoyaꞌ hawanma yu Komam Dios. 16 Yuxin hanhonh konhhachejabꞌ honhtiꞌanh hal jetanh yunhe kotohanh kosaynojanh hunu mak chiꞌaniko teꞌ arpa, haxinwal yet chiꞌok huneꞌ espíritu matzwalil yu Komam Dios, kach yetani, kat yaniko naj teꞌ arpa, yaqꞌlobꞌal hakꞌul, xhi ebꞌnaj.

17 Istaqꞌwi yaꞌ Saúl tet ebꞌnaj ischejabꞌ tuꞌ:

—As sayweti hunu mak tinanh xin, hunu mak kaw kꞌul yaniko teꞌ arpa, kat heyiniti naj inkꞌatanhan, xhi yaꞌ.

18 Xol ebꞌnaj ischejabꞌ yaꞌ Saúl tuꞌ ay huneꞌ naj halni hakaꞌ tiꞌ:

—Xol ebꞌnaj iskꞌahol yaꞌ Isaí ay bꞌey konhobꞌ Belén, ay huneꞌ naj tiꞌ kaw helan yaniko teꞌ arpa yebꞌ kaw ay yip yanma naj, yebꞌ kaw kawla winaj naj, ayko xin Komam Jahawil yetbꞌiho naj, xhi naj.

19 Ischejnito yaꞌ Saúl hunteqꞌan ebꞌnaj iskꞌatanh yaꞌ Isaí, yalnito yaꞌ hakaꞌ tiꞌ: «Chejti naj hakꞌahol inkꞌatanhan, naj chitanhen hameꞌ,» xhito yaꞌ. 20 Ischejnito yaꞌ Isaí yaꞌ David iskꞌatanh yaꞌ Saúl. Yanipaxto yaꞌ huneꞌ noꞌ burro ijnito ixim pan, yebꞌ huneꞌ noꞌ tzꞌum bꞌay ayayto vino, yebꞌ huneꞌ noꞌ nichꞌan chiw. 21 Hak tuꞌ yu isto yaꞌ David yapni yaꞌ sata yaꞌ Saúl, iskankano yaꞌ bꞌey tuꞌ. Kaw xin xahan yil yaꞌ Saúl yaꞌ David, yok yaꞌ kolwaho yinh yaꞌ Saúl. 22 Yalnito yaꞌ Saúl tet yaꞌ Isaí: «Chinqꞌanan tawet, kanojabꞌkano yaꞌ David inkꞌatanhan, yuto kaw chintzalahan yinh yaꞌ,» xhito yaꞌ. 23 Yuxin hayet chiꞌok huneꞌ espíritu matzwalil yetano yaꞌ Saúl yu Komam Dios, kat yiniti yaꞌ David yarpa, kat yok yaꞌ yanoko teꞌ, hak tuꞌ xin chu yaqꞌlo iskꞌul yaꞌ Saúl, kat iswatxꞌilo iskꞌul yaꞌ, kat xin yel huneꞌ espíritu matzwalil tuꞌ yinh yaꞌ.