—Wuxhtaj, kata, ayanh tzꞌonhno bꞌey tiꞌ, xhi yaꞌ.

Yapni naj iskꞌatanh yaꞌ Booz, yay tzꞌonhno naj. 2 Yawten yaꞌ Booz 10 (lahonhwanh) ebꞌnaj xol ebꞌnaj ichamta winaj ay yul konhobꞌ, yalni yaꞌ tet ebꞌnaj tato chiꞌay tzꞌonhno ebꞌnaj.

Hayet yay tzꞌonhno ebꞌnaj tuꞌ, 3 yalni yaꞌ Booz tet naj yuxhtato isbꞌa yebꞌi:

—Haꞌ ix Noemí paxnati bꞌey txꞌotxꞌ Moab, chistxonhto ix istxꞌotxꞌ yichamil, naj kamom Elimelec, naj juxhtato kobꞌa yebꞌi. 4 Yuxin chiwaqꞌan hawohtanheloj tato chawoche chu haloqꞌnikanikꞌo txꞌotxꞌ yinh sat sunil ebꞌnaj kutxaniko tiꞌ yebꞌ yinh sat ebꞌnaj ichamta winaj ay yul konhobꞌ tiꞌ. Hach tiꞌ yinh kaw yeli, ekꞌbꞌalto ayto hawu habꞌa yebꞌ naj kamom Elimelec tuꞌ, yuxin chu haloqꞌnikꞌo txꞌotxꞌ; yajaꞌ ta mach chaloqꞌ txꞌotxꞌ xin, haliloj, yuto hanintiꞌan ayto wuhpaxo hinbꞌahan yebꞌ naj, yuxin ta mach chaloqꞌiko txꞌotxꞌ, haninan chinloqꞌan txꞌotxꞌ, xhi yaꞌ Booz.

Istaqꞌwi naj tuꞌ tet yaꞌ Booz:

—Kꞌultikꞌa, chinloqꞌan txꞌotxꞌ, xhi naj.

5 Yalni yaꞌ Booz tet naj:

—Haꞌtikꞌa istzꞌayikal chaloqꞌ istxꞌotxꞌ ix Noemí tuꞌ, kat hawiqꞌnipaxo ix Rut ah Moab, yixal naj kamom Mahlón, yunin ix Noemí tuꞌ, yunhe isbꞌinakano isbꞌi yichamil ix tuꞌ yinh txꞌotxꞌ, xhi yaꞌ.

6 Hayet yabꞌen naj hakaꞌ tuꞌ, yalni naj:

—Ta hak tuꞌ yehi, mach chinloqꞌan txꞌotxꞌ chal tuꞌ, yuto aytaxka tzet chꞌeliko inmajulan yu; yuxin ta chawoche haninan chiwalan tawet, loqꞌikꞌo txꞌotxꞌ inselelojan, xhi naj.

7 Haꞌ yinh huneꞌ tiempohal tuꞌ, haꞌ anma Israel yet chisloqꞌnikꞌo hunu tzet ye tuꞌ, maka yet chistꞌinhbꞌankano hunu istrato, haꞌ mak chisje yinh hunu trato tuꞌ, chiyilo isxanhabꞌ yinh yoj, kat yaqꞌni tet mak bꞌay lanhan istꞌinhbꞌankano istrato tuꞌ; haꞌ xin chihalniloj tato chiwatxꞌikanayo huneꞌ trato tuꞌ. Hak tuꞌ isbꞌeybꞌal ebꞌnaj Israel yinh huneꞌ tiempohal tuꞌ. 8 Yalni naj ayto yu isbꞌa yebꞌ yaꞌ Booz hakaꞌ tiꞌ:

—Loqꞌikꞌo txꞌotxꞌ hach tiꞌ, xhi naj.

Yinilo naj isxanhabꞌ xin.

9 Yalni yaꞌ Booz tet ebꞌnaj yahawil konhobꞌ tuꞌ yebꞌ ebꞌnaj kutxaniko tuꞌ:

—Hesunil hex tiꞌ, testigo hex yinh huneꞌ tzꞌayik tiꞌ tato chinloqꞌkanikꞌojan tet ix Noemí istxꞌotxꞌ naj Elimelec, naj Quelión yebꞌ istxꞌotxꞌ naj Mahlón. 10 Kat wiqꞌnipaxojan ix Rut ah Moab, ix yixal naj kamom Mahlón, yunhe isbꞌinakano isbꞌi naj yinh istxꞌotxꞌ, hak tuꞌ xin mach chitanhilo isbꞌi naj yul konhobꞌ tiꞌ, yuxin testigo hex yinh huneꞌ tiꞌ tinanh, xhi yaꞌ Booz.

11 Istaqꞌwi ebꞌnaj yahawil konhobꞌ yebꞌ ebꞌnaj kutxaniko tuꞌ:

—Hoꞌ, chijaqꞌ kobꞌahanh yinh. Lahanojabꞌ chiꞌeliko ix chiꞌapni yul hawatut yu Komam Jahawil hakaꞌ ix Raquel yebꞌ ix Lea, ebꞌix bꞌay titnajonh, hanhonh Israelonh tiꞌ. Wal hachpaxo xin, nimanojabꞌ hawelapno yul sat anma bꞌey txꞌotxꞌ Efrata, kat habꞌina yul konhobꞌ Belén tiꞌ. 12 Nimanojabꞌ hawuninal chiyaqꞌ Komam Jahawil yebꞌ huneꞌ ix ix tiꞌ, kat ispohchakanh hakaꞌ yu ispohkanh yuninal naj Fares, iskꞌahol yaꞌ Judá, yunin ix Tamar, xhi ebꞌnaj.

13 Hak tuꞌ yu yiqꞌni yaꞌ Booz ix Rut, yok ix yixalo yaꞌ, yanayo Komam Jahawil isyaxil yibꞌanh ix, ispitzkꞌati nichꞌan unin yinh ix, haxa yet yapni istiempohal xin ispitzkꞌa nichꞌan yunin ix, winaj naj.

14 Yalni ebꞌix ay bꞌey konhobꞌ Belén tuꞌ tet ix Noemí hakaꞌ tiꞌ: «Hal-laxojabꞌ Kꞌul-la tzotiꞌ yinh Komam Jahawil, yuto mayaqꞌ Komam nichꞌan yuninal hawunin. Haꞌ naj chaxhilni bꞌaqꞌinh; nimanojabꞌ yelapno naj yul konhobꞌ Israel tiꞌ. 15 Haꞌ naj chiꞌok yipo hakꞌul bꞌaqꞌinh, kat kaxhyilni naj yet ixnam hachxa, yuto yunin hawalibꞌ ye naj, ix hawalibꞌ kaw xahan kaxhyila. Ekꞌbꞌal yelapno ix yul hasat hakaꞌto hujwanh hawunin chipitzkꞌahi,» xhi ebꞌix tet ix.

16 Lahwi tuꞌ, ischahnilo ix Noemí naj nichꞌan. Yanayo ix naj sat isbꞌul, yok ix yaqꞌno chꞌibꞌo naj. 17 Hayet yilni ebꞌix, ayayo iskawilal ix Noemí, yalni ebꞌix hakaꞌ tiꞌ: «Hakaꞌto mapitzkꞌa huneꞌ yunin ix Noemí tiꞌ,» xhi ebꞌix.

Yaniko ebꞌix Obed isbꞌiho naj nichꞌan tuꞌ, Obed yijkano isbꞌi. Haꞌ yaꞌ Obed, ismam yaꞌ Isaí, yaꞌ Isaí, ismam yaꞌ rey David.

18 Haꞌ ebꞌnaj tiꞌ yichmam yaꞌ rey David, chiꞌichiti istxolal yinh naj Fares. Naj Fares tuꞌ, haꞌ naj ismam naj Hezrón. 19 Naj Hezrón, haꞌ naj ismam naj Ram; naj Ram haꞌ naj ismam naj Aminadab. 20 Naj Aminadab, haꞌ naj ismam naj Naasón, naj Naasón, haꞌ naj ismam yaꞌ Salmón. 21 Yaꞌ Salmón, haꞌ yaꞌ ismam yaꞌ Booz. Yaꞌ Booz, haꞌ yaꞌ ismam yaꞌ Obed. 22 Yaꞌ Obed, haꞌ yaꞌ ismam yaꞌ Isaí, yaꞌ Isaí, haꞌ yaꞌ ismam yaꞌ rey David.