—Walibꞌ, kꞌul ta chinsayan hunu hawichamil, yunhe kꞌul chiꞌekꞌ hawilaꞌ. 2 ¿Tom mach ayto yu isbꞌa yaꞌ Booz yebꞌ wichamilan xin? Yaꞌ ay ischejabꞌ ebꞌix hun chaxhmunla yebꞌi. Wal xin ayto yu isbꞌa. Yinh huneꞌ aqꞌbꞌal tiꞌ chitoj yaꞌ kanokano xol iscebada yu isxunilo yaꞌ isqꞌal ixim. 3 Yuxin wal tinanh, axhnanh, kat hawaniko anh kaw xuqꞌ sam tawinh, kat hawaniko xil haqꞌap kaw kꞌul, kat hato iskꞌatanh yaꞌ bꞌay ay ismunil; yajaꞌ xin mach chaye habꞌa tet yaꞌ yet yalanhto maxhto chiwaꞌ yaꞌ yebꞌ yukꞌni yaꞌ tzet chukꞌu. 4 Kam chawil bꞌay chikan yaꞌ wayoj; haxa yet chiwaykanh yaꞌ tuꞌ, kat hato hawinolo yenhel yoj yaꞌ, kat haway hilno yojtabꞌal yaꞌ tuꞌ. Haxa yaꞌ xin chihalni tawet yinh tzet chiꞌeliko huneꞌ tuꞌ yet chaxhyilno yaꞌ, xhi ix Noemí.

5 Istaqꞌwi ix Rut:

—Kꞌultikꞌa, chinyijehan sunil tzet chawala, xhi ix.

6 Hak tuꞌ yu isto ix Rut bꞌay chimunla yaꞌ Booz, isyijen ix sunil hakaꞌ tzet yal ix Noemí, ix alibꞌe.

7 Haxa yet lahwi iswaꞌilo yaꞌ Booz yukꞌni yaꞌ tzet yukꞌuꞌ; kaw chitzala yaꞌ isto yaꞌ wayo bꞌay tenanto ixim cebada. Haxa yet lanhan isway yaꞌ Booz tuꞌ, yapni motxmon ix Rut yinh nanhkꞌulal, yinilo ix yenhel yoj yaꞌ, yay hilno ix yojtabꞌal yaꞌ. 8 Haxa yet chuman aqꞌbꞌal yet chiway yaꞌ ismeltzon isbꞌa yaꞌ, yilniti yaꞌ tato ay huneꞌ ix hilanayo yojtabꞌal yaꞌ.

9 Isqꞌambꞌen yaꞌ:

—¿Mak hach anmahil? xhi yaꞌ.

Istaqꞌwi ix:

—Hanintiꞌan Rut hinan, hachejabꞌ. Aqꞌ hanikꞌo istiꞌ hatxow yenhelo hachejabꞌ. Hach tiꞌ yilal hakolwa winhan, yuto ayto hawu habꞌa yebꞌ kamom wichamilan, xhi ix tet yaꞌ.^a

10 Istaqꞌwi yaꞌ Booz tet ix:

—Rut, kaw saqꞌal hawet yu Komam Jahawil. Wal tinanh chintxuman tato kaw kꞌul hakꞌul yuto huneꞌ iskabꞌebꞌ iskꞌulal hawatxꞌe tiꞌ yu mach hasay hawichamil kaw tzehto, waxanhka naj mebꞌaꞌ maka qꞌalom; wal xin mach hako tuꞌ hatxumni. 11 Matzet chal hakꞌul, sunil yul konhobꞌ tiꞌ chibꞌinahi tato kꞌul habꞌeybꞌal, yuxin chinyijehan tzet chawala. 12 Yeli ayto wuh hinbꞌahan yebꞌ naj kamom hawichamil, yajaꞌ xin ay huneꞌ mak ekꞌbꞌalto ayto yu isbꞌa yebꞌ naj kamom hawichamil insatajan. 13 Kananhkano huneꞌ aqꞌbꞌal bꞌey tiꞌ, hayet hekal chiwalan tet naj tato chimohyi naj yebꞌ hach, hakaꞌ yalni ley. Ta chisje naj, kꞌultikꞌa, taka mach xin chiwaqꞌ bꞌinahojan isbꞌi Komam Jahawil, chiwalnihan tato haninan chinmohyihan yebꞌ hach. Xewanh, hato yet sahabꞌ chaxhtohi, xhi yaꞌ.

14 Hak tuꞌ yu iskankano ix wayo yojtabꞌal yaꞌ huneꞌ aqꞌbꞌal tuꞌ. Ayto xin issajbꞌi yahwano ix Rut yet qꞌejtoholo yunhe machi mak chiꞌilchanti ix, yuto yal yaꞌ Booz tet ix: «Machojabꞌ chiꞌohtanhelaxiloj tato ay huneꞌ ix ix mahulikꞌo xol inmuniltiꞌan,» xhi yaꞌ.

15 Lahwi tuꞌ yalni yaꞌ tet ix:

«Ilo hapix tiꞌ, kat halebꞌanayoj,» xhi yaꞌ.

Istzabꞌni ix istxam ispix tuꞌ, yanayo yaꞌ ekꞌbꞌal kabꞌ arroba ixim cebada yibꞌanh, iskolwa yaꞌ yanikanh ixim yibꞌanh iswixikꞌ ix, isto ix yul konhobꞌ.

16 Hayet yapni ix Rut yatut yalibꞌ, isqꞌambꞌen ix Noemí tet ix:

—Walibꞌ, ¿hanikꞌ maꞌeliko huneꞌ hachejbꞌanil mabꞌey hawubꞌ? xhi ix.

Yalni ix Rut sunil tzet yal yaꞌ Booz tet ix. 17 Yalnipaxo ix tet ix Noemí:

—Mayaqꞌ yaꞌ wajebꞌ mal ixim cebada wetan, mayalni yaꞌ: “Mach chaxhmeltzoto yatut hawalibꞌ ta matzet chawitoj,” xhi yaꞌ wetan, xhi ix Rut.

18 Yalni ix Noemí tet ix:

—Walibꞌ, tonhe chawechma tzet chiꞌeliko huneꞌ tiꞌ, wal yaꞌ Booz tuꞌ, mach chikan yanma yaꞌ yinh aqꞌankꞌulal tato mach chil yaꞌ tzet chiꞌeliko huneꞌ tiꞌ tinanh, xhi ix Noemí.