2 Haꞌ ebꞌnaj iskꞌahol yaꞌ David Pitzkꞌa bꞌey Hebrón, haꞌ ton ebꞌnaj tiꞌ: naj bꞌabꞌel, haꞌ ton naj Amnón yunin ix Ahinoam, ix ah Jezreel. 3 Naj iskabꞌ, haꞌ ton naj Quileab yunin ix Abigail, ix yixalbꞌen naj kamom Nabal ah Carmel. Naj yox haꞌ ton naj Absalón yunin ix Maaca, iskutzꞌin naj Talmai, isreyal Gesur. 4 Naj iskanh, haꞌ ton naj Adonías, yunin ix Haguit, naj ishoꞌ haꞌ ton naj Sefatías, yunin ix Abital. 5 Naj iswaj, haꞌ ton naj Itream, yunin ix Egla, huneꞌxa yixal yaꞌ David tuꞌ. Haꞌ ebꞌnaj tuꞌ iskꞌahol yaꞌ David Pitzkꞌa bꞌey Hebrón.

6 Hayet ayleko howal xol ebꞌnaj issoldado iskꞌahol yaꞌ kamom Saúl yebꞌ ebꞌnaj issoldado yaꞌ David, haꞌ xin naj Abner, kaw yiqꞌ yip naj xol ebꞌnaj iskꞌahol yaꞌ Saúl. 7 Haꞌ yaꞌ kamom Saúl tuꞌ ay huneꞌ iskabꞌ yixal yaꞌ chiyij Rizpa, iskutzꞌin naj Aja. Ay huneꞌ tzꞌayik tiꞌ xin yal naj Is-boset tet naj Abner:

—¿Tzet yinh xin kaxhway yebꞌ ix iskabꞌ yixal inmaman? xhi naj.

8 Yajaꞌ kaw tit ishowal naj Abner yabꞌen yinh tzet yal naj Is-boset. Istaqꞌwi naj:

—¿Tom txꞌiꞌ hinan chawila? ¿Tom lahan hinan hakaꞌ ebꞌnaj winaj txꞌoj ay bꞌey Judá? Hanintiꞌan kaw kꞌul chiwute hinbꞌahan yinh yuninal hamam Saúl yebꞌ yinh mak ay yu hamam, yebꞌ yinh yamigo hamam, machi xin kach wakojan yul isqꞌabꞌ yaꞌ David tinanh. ¿Tzet yinh xin chabꞌaliko huneꞌ mule tiꞌ wibꞌanhan yebꞌ ix ix tuꞌ? 9 Yaqꞌabꞌayo Komam Dios isyaꞌtajil wibꞌanhan ta mach chinwatxꞌehan hakaꞌ tzet yalkano Komam Jahawil tet yaꞌ David, 10 tato chiyilo Komam ismunil yaꞌ Saúl yebꞌ iskꞌahol yok isreyalo Israel. Chiyakaniko Komam yaꞌ David reyalo isseleloj. Haꞌ xin yaꞌ David tuꞌ chiꞌok reyalo yinh ebꞌnaj Israel yebꞌ yinh ebꞌnaj Judá, chiꞌichiti bꞌey Dan masanta bꞌey Beerseba, xhi naj Abner tuꞌ.

11 Wal naj Is-boset tuꞌ matxa hunu tzotiꞌ yaqꞌ naj ispajo tet naj Abner, yuto chixiw naj tet naj. 12 Lahwi tuꞌ yanito naj Abner tzotiꞌ tet yaꞌ David hakaꞌ tiꞌ: «¿Mak ay yet txꞌotxꞌ Israel tiꞌ tinanh? Wal xin ta chaje kotꞌinhbꞌakano kotzotiꞌ, hak tuꞌ xin chinokan walaꞌan tet sunil ebꞌnaj Israel ta chiꞌoktzujno ebꞌnaj tawintaj,» xhito naj. 13 Istaqꞌwi yaꞌ David:

—Kꞌultikꞌa, chiko tꞌinhbꞌakano kotzotiꞌ, yajaꞌ ay huneꞌ tzet ye tuꞌ chinqꞌanayojan tawet, mach tonhe chaxhhul ilwal winhan, wal xin yilal chawiti ix Mical, ix iskutzꞌin yaꞌ kamom Saúl, xhi yaꞌ.

14 Yalnipaxto yaꞌ David tuꞌ tzotiꞌ tet naj Is-boset hakaꞌ tiꞌ: «Aqꞌ meltzoho ix Mical wetan, ix bꞌay kinmohyihan yet winitojan 100 (hokꞌal) iswiꞌ iswinajil ebꞌnaj filisteo tet hamam,» xhito yaꞌ.

15 Hak tuꞌ yu ischejni naj Is-boset yilaxolo ix Mical tet yichamil, haꞌ ton naj Paltiel, iskꞌahol naj Lais. 16 Yajaꞌ hayet yilaxto ix tuꞌ, isto tzujtzun naj Paltiel yinta ix, yaj kaw chꞌoqꞌ naj masanta apnikano naj bꞌey Bahurim. Haꞌ bꞌey Bahurim tuꞌ yal naj Abner tet naj Paltiel hakaꞌ tiꞌ: «¡Asiꞌ, meltzohantoj!» xhi naj Abner. Ismeltzo naj.

17 Lahwi tuꞌ istzotel naj Abner tet ebꞌnaj icham winaj yet Israel, yalni naj hakaꞌ tiꞌ: «Payxa kexichiko heyochen yok yaꞌ David tiꞌ hereyaloj, 18 yuxin wal tinanh maꞌapni istzꞌayikal yok yaꞌ isreyalo Israel, yuto haꞌ Komam Jahawil halnikano tet yaꞌ ta haꞌ yaꞌ chikolnilo iskonhobꞌ Komam tiꞌ yul isqꞌabꞌ ebꞌnaj filisteo yebꞌ yul isqꞌabꞌ hunteqꞌanxa konhobꞌ ayko ishowal jinh,» xhi naj.

19 Istzotelpaxo naj Abner tuꞌ tet ebꞌnaj benjaminita, lahwi tuꞌ isto naj yalno tet yaꞌ David bꞌey Hebrón yinh tzet yu yalni ebꞌnaj Israel yebꞌ ebꞌnaj benjaminita yinh huneꞌ tuꞌ. 20 Hayet isto naj yilno yaꞌ David bꞌey Hebrón, tzujan 20 (hunkꞌalwanh) ebꞌnaj soldado yinta naj. Hayet yapni ebꞌnaj bꞌey tuꞌ, yekꞌtzen yaꞌ David huneꞌ qꞌinh yu ischahni yaꞌ naj Abner yebꞌ ebꞌnaj tzujan yintaj. 21 Lahwi tuꞌ yalni naj Abner tet yaꞌ David hakaꞌ tiꞌ:

—Wal tinanh yilal inmeltzohan, chintohan inkutxbꞌanokojan sunil ebꞌnaj Israel yu yalnikano ebꞌnaj tawet ta chachokkano isreyal ebꞌnaj, hakaꞌ choche hawanma, xhi naj Abner.

Hak tuꞌ yu istaqꞌlikano naj Abner tet yaꞌ David tuꞌ, ispaxto naj yinh tzalahilal.

22 Lahwi tuꞌ yapni naj Joab yebꞌ ebꞌnaj issoldado yaꞌ David ispeto ebꞌnaj yinh huneꞌ howal, kaw xin txꞌiꞌal tzet ye tuꞌ yilo ebꞌnaj tet ebꞌnaj bꞌay bꞌey yaqꞌaꞌ howal tuꞌ, iqꞌbꞌil xin sunil tuꞌ yu ebꞌnaj. Hayet yapni ebꞌnaj tuꞌ matxa naj Abner iskꞌatanh yaꞌ David bꞌey Hebrón, yuto hayet istaqꞌli ebꞌnaj tet hunun ispaxti naj Abner tuꞌ yinh tzalahilal. 23 Kaw lanhantotikꞌa yapni naj Joab bꞌey Hebrón yebꞌ ebꞌnaj soldado yal-lax tet naj tato bꞌeykꞌo naj Abner, iskꞌahol naj Ner, tzotelo tet yaꞌ rey David, tzujan istaqꞌli ebꞌnaj tet hunun, ispaxti naj Abner tuꞌ yinh tzalahilal. 24 Hayet yabꞌen naj Joab huneꞌ tuꞌ isto naj iskꞌatanh yaꞌ rey David, yalni naj tet yaꞌ:

«¿Tzet huneꞌ maxawu? Tolabꞌ hulikꞌo naj Abner tzotelo tawet, ¿tzet yinh xin hachahto naj? 25 Mam rey, kaw hawohta naj Abner, iskꞌahol naj Ner, tonhe hulikꞌo naj kach yaqꞌaꞌ subꞌchahoj, yebꞌ tonhe hulikꞌo naj yilaꞌ bꞌaytuꞌwal chachekꞌi yebꞌ tzet chawatxꞌe,» xhi naj.

26 Lahwi tuꞌ yel naj Joab sata yaꞌ rey David, ischejnito naj ischejabꞌ saywal yinh naj Abner, yajaꞌ wal yaꞌ rey David mach yohtajo yaꞌ huneꞌ tuꞌ, haꞌ xin haꞌ bꞌay huneꞌ kꞌuh chiyij Sira haꞌ tuꞌ meltzo naj Abner yu ebꞌnaj. 27 Haxa yet yapni naj Abner bꞌey Hebrón yijbꞌanto naj Joab naj yintalto ispultahil konhobꞌ tuꞌ yu istzotel ebꞌnaj iskawanhil yinh ewantajil. Haꞌ bꞌey tuꞌ xin ishopchakto naj Joab chꞌen espada yul iskꞌul naj Abner, yinh ishowebꞌ isbꞌajil ismotx naj yehkanh low chꞌen, iskam naj xin. Hak tuꞌ yu ispajtzen naj Joab tet naj Abner yuto haꞌ naj potxꞌnikamo yuxhta naj, haꞌ ton naj Asael. 28 Haxa yet yabꞌenilo yaꞌ rey David yinh tzujaniloxa tato kam naj Abner, yalni yaꞌ hakaꞌ tiꞌ: «Haꞌ sata Komam Jahawil, hanintiꞌan yebꞌ ebꞌnaj inchejabꞌan, mach komulojanh iskamikal naj Abner, iskꞌahol naj Ner. 29 Wal xin aykꞌayojabꞌ ismul naj Joab tuꞌ yibꞌanh, yebꞌ yibꞌanh makta ay yul yatut ismam naj. Ayojabꞌ yabꞌil xol makta ay yul yatut naj, matxahojabꞌ chislinhbꞌa isbꞌa yekꞌ hunteqꞌan yabꞌil xol yikꞌal naj, ay xin ebꞌix ix matxahojabꞌ chilinhi yay istxꞌawobꞌal, kat yul yabꞌil lepra yinh, kat yekꞌ kotxlahi, hayet chiꞌekꞌi chiyikꞌo isqꞌojoch. Ay ej mak ay yul yatut naj Joab tuꞌ xin chimaqꞌlaxkamo yu chꞌen espada, aypaxo mak chꞌaqꞌlen wahil,» xhi yaꞌ.

30 Haꞌ naj Joab yebꞌ yuxhta Abisai potxꞌni naj Abner yuto haꞌ naj Abner potxꞌni naj Asael, naj yuxhta ebꞌnaj yet yok howal bꞌey Gabaón.

31 Lahwi tuꞌ yalni yaꞌ rey David tet naj Joab yebꞌ tet sunil issoldado: «Wal tinanh tzilwelo xil heqꞌap, kat heyaniko xil heqꞌap chiyenilo bꞌiskꞌulal, kat heyok oqꞌo yinh naj Abner,» xhi yaꞌ. Tzujan xin yaꞌ rey David yinta anma to mujnokano isnimanil naj Abner tuꞌ. 32 Hayet ismujlax naj Abner bꞌey konhobꞌ Hebrón, yok yaꞌ rey David oqꞌoj, yaniko yip yul isnuqꞌ yaꞌ bꞌay mujlax naj Abner tuꞌ, hakpax tuꞌ sunil anma Israel ok oqꞌo yinh naj. 33 Yaniko yaꞌ rey David huneꞌ bꞌit yet bꞌiskꞌulal yinh naj Abner, yalni yaꞌ hakaꞌ tiꞌ:

Lahwi tuꞌ yokpaxo sunil anma oqꞌo bꞌay mujlax naj Abner tuꞌ. 35 Isto ebꞌnaj chejabꞌ yalno tet yaꞌ David tato chiwaꞌ yaꞌ yalanhto maxhto chiꞌay numna yinh huneꞌ tzꞌayik tuꞌ, yajaꞌ yaqꞌ bꞌinaho yaꞌ isbꞌi Komam Dios yalni yaꞌ hakaꞌ tiꞌ: «Yaqꞌabꞌayo Komam Dios isyaꞌtajil wibꞌanhan tato chinwaꞌan maka ta chinlohan hunu tzet ye tuꞌ yalanhto maxhto chito tzꞌayik,» xhi yaꞌ.

36 Sunil anma Israel abꞌenilo tzet yal yaꞌ rey David tuꞌ, kaw xin ischah iswiꞌ ebꞌnaj yinh tzet yal yaꞌ; yebꞌ xin sunil tzet iswatxꞌe yaꞌ rey David tuꞌ kaw tzala anma yinh. 37 Istxumnilo sunil anma Israel yinh huneꞌ tzꞌayik tuꞌ tato machi ismul yaꞌ David yinh iskamikal naj Abner, iskꞌahol naj Ner. 38 Lahwi tuꞌ yalnipaxo yaꞌ rey David tet ebꞌnaj Issoldado: «¿Tom mach heyohtajoj tato makam huneꞌ naj kaw helan, naj iswiꞌehal yeko yinh konhobꞌ Israel tiꞌ? 39 Haꞌ Komam Dios kinsaynikojan isreyalo Israel tiꞌ, yajaꞌ chiwabꞌehan ispax wipan yu yip istxꞌojal iswatxꞌe ebꞌnaj yunin ix Sarvia tiꞌ. ¡Haꞌojabꞌ Komam Jahawil chipajtzen tet ebꞌnaj watxꞌen huneꞌ istxꞌojal tiꞌ!» xhi yaꞌ.