—Mamin, ¿chimyu intohan yul hunu konhobꞌ yul ismajul txꞌotxꞌ Judá? xhi yaꞌ.

Istaqꞌwi Komam Jahawil tet yaꞌ:

—Hoꞌ asiꞌ, xhi Komam.

Isqꞌambꞌenpaxo yaꞌ David:

—¿Tzet konhobꞌal xin bꞌay chintohan? xhi yaꞌ.

Istaqꞌwi Komam tet yaꞌ:

—Asiꞌ bꞌey Hebrón, xhi Komam.

2 Hak tuꞌ yu isto yaꞌ David bꞌey konhobꞌ Hebrón yinito yaꞌ kawanh yixal, ix Ahinoam ah Jezreel, yebꞌ ix Abigail yixalbꞌen naj Nabal ah Carmel. 3 Yinipaxto yaꞌ David ebꞌnaj tzujantikꞌa yintaj, yebꞌ yixal yebꞌ yuninal ebꞌnaj, yehayo ebꞌnaj bꞌey Hebrón. 4 Lahwi tuꞌ yapni ebꞌnaj Judá bꞌey konhobꞌ Hebrón, yaniko ebꞌnaj yaꞌ David isreyalo ebꞌnaj Judá. Yalni ebꞌnaj tet yaꞌ David hakaꞌ tiꞌ:

—Ebꞌnaj ah Jabes-galaad mujni yaꞌ rey Saúl, xhi ebꞌnaj.

5 Ischejnito yaꞌ David haywanh ischejabꞌ yalno tet ebꞌnaj ah Jabes-galaad hakaꞌ tiꞌ: «Yaqꞌabꞌayo Komam Jahawil isyaxil teyibꞌanh, yuto tzꞌay hekꞌul yinh yaꞌ rey Saúl, hemujni isnimanil yaꞌ. 6 Kaw kꞌulojabꞌ chiyute iskꞌul Komam Jahawil teyinh yebꞌ nanhexnhetikꞌa yu, haxa hanintiꞌan xin xahan chexwilan yu huneꞌ iskꞌulal hewatxꞌe tiꞌ. 7 Yajaꞌ wal tinanh xin mach chexxiwi, aweko yip heyanma, xakam yaꞌ Saúl koreyal, yajaꞌ wal ebꞌnaj Judá kinyakojan ebꞌnaj isreyaloj,» xhi yaꞌ David tuꞌ.

8 Yajaꞌ wal naj Abner, naj iskꞌahol naj Ner, yahawil yinh ebꞌnaj issoldado yaꞌ kamom Saúl, yito naj naj Is-boset, iskꞌahol yaꞌ Saúl bꞌey konhobꞌ Mahanaim, 9 yaniko naj naj Is-boset tuꞌ isreyalo Galaad, yebꞌ Gesuri, yebꞌ Jezreel, yebꞌ Efraín, yebꞌ Benjamín, yebꞌ isreyalo hunteqꞌanxa txꞌotxꞌ Israel. 10 40 (Kawinaj) habꞌil naj Is-boset, iskꞌahol yaꞌ kamom Saúl yet yok naj reyal yinh ebꞌnaj Israel, kabꞌnhe habꞌil ok naj reyal. Wal yaꞌ David, hanhe ebꞌnaj Judá ok tzujno yinta yaꞌ. 11 Hujebꞌ habꞌil yok wajebꞌ ixahaw ok yaꞌ David tuꞌ reyal bꞌey Hebrón, ayko yul ismajul Judá.

12 Lahwi tuꞌ yel naj Abner, iskꞌahol naj Ner bꞌey Mahanaim, isto naj bꞌey Gabaón yebꞌ ebꞌnaj issoldado naj Is-boset, naj iskꞌahol yaꞌ kamom Saúl. 13 Hakpax tuꞌ naj Joab, yunin ix Sarvia, el naj bꞌay aya, isto naj yebꞌ ebꞌnaj issoldado yaꞌ David, ischahni isbꞌa ebꞌnaj yebꞌ ebꞌnaj issoldado naj Is-boset bꞌey bꞌay ay ha haꞌ yet Gabaón, iskan linhno huneꞌ majan ebꞌnaj isqꞌaxepal haꞌ, haxa hunxa majan ebꞌnaj xin kan yinh huneꞌxa isqꞌaxepal haꞌ.^a 14 Yalni naj Abner tet naj Joab hakaꞌ tiꞌ:

—Elojabꞌti haywanho ebꞌnaj tzeh kat yaniko howal kosataj, xhi naj.

Istaqꞌwi naj Joab:

—Kꞌultikꞌa, xhi naj.

15 Yelti ebꞌnaj yaqꞌleno howal tuꞌ, lahan xin isbꞌisil ebꞌnaj elti yinh hunun majan, 12 (kabꞌlahonhwanh) ebꞌnaj benjaminita elti xol ebꞌnaj issoldado naj Is-boset, iskꞌahol yaꞌ Saúl, yok 12 (kabꞌlahonhwanh) ebꞌnaj elti xol ebꞌnaj issoldado yaꞌ David. 16 Yok tzabꞌno hunun ebꞌnaj soldado tuꞌ yinh iswiꞌ hunun, ishopchanikto ebꞌnaj yespada yul ismotx, yaykꞌay ebꞌnaj, iskamilo ebꞌnaj elti xol issoldado naj Is-boset yebꞌpaxo ebꞌnaj elti xol issoldado yaꞌ David, yuxin Helcat-hazurim^b ok isbꞌiho huneꞌ txꞌotxꞌ tuꞌ. Haꞌ xin yul ismajul Gabaón yu huneꞌ tuꞌ. 17 Kaw xin yiqꞌkanokanh yip howal yinh huneꞌ tzꞌayik tuꞌ, isqꞌoji ebꞌnaj issoldado yaꞌ David yinh naj Abner yebꞌ ebꞌnaj soldado Israel. 18 Haꞌ xol howal tuꞌ ayko oxwanh yunin ix Sarvia, haꞌ ton naj Joab, naj Abisai yebꞌ naj Asael. Naj Asael tuꞌ, kaw helan naj isbꞌelwi yinh anhe, lahan isbꞌelwi naj hakaꞌ noꞌ miꞌe sajche. 19 Isto naj Asael tuꞌ istzujnoyo naj Abner, machi xin bꞌay ishekꞌilo isbꞌa naj yinh iswatxꞌ yebꞌ yinh ismek. 20 Haxa yet istꞌanhxiti naj Abner tuꞌ yintaj, yalni naj:

—¿Ham hach tiꞌ Asael hach? xhi naj.

Istaqꞌwi naj:

—Hoꞌ haninan, xhi naj.

21 Yalni naj Abner tet naj:

—Kꞌul hahekꞌni habꞌa yinh hawatxꞌqꞌabꞌ maka hamekqꞌabꞌ, kat hapotxꞌnikamo hunu ebꞌnaj winaj, kat hawinilo tzet aya, xhi naj. Yajaꞌ mach isje naj Asael isbꞌejaꞌ istzumbꞌen naj Abner tuꞌ. 22 Yuxin yal naj Abner tet naj Asael hunelxa:

—Bꞌej kinhatzumbꞌenan. ¡Lowta inqꞌabꞌan tawinh! Ta hak tuꞌ, ¿tzettaxka kinchihan chinok linhnojan tzotelo tet hawuxhta Joab? xhi naj Abner.

23 Yajaꞌ mach isje naj Asael isbꞌejaꞌ istzumbꞌen naj Abner tuꞌ, yuxin isqꞌojto naj Abner yoj islanza yinh naj Asael tuꞌ isqꞌaxpon chꞌen yul ismotx naj, yelapno chꞌen yintalto istel yichinh naj Asael tuꞌ, yaykꞌay naj, iskam naj. Sunil ebꞌnaj ekꞌto bꞌey tuꞌ ok linhno yilni naj Asael. 24 Yajaꞌ wal naj Joab yebꞌ naj Abisai to ebꞌnaj istzujuyo naj Abner tuꞌ, haxa yet yah aqꞌbꞌal yapni ebꞌnaj bꞌey witz Amma satakꞌti Gía bꞌay chitokano isbꞌelal txꞌotxꞌ desierto yet Gabaón. 25 Iskutxbꞌaniko isbꞌa ebꞌnaj benjaminita iskꞌatanh naj Abner, hunxanhe yute isbꞌa ebꞌnaj sunil, isto ebꞌnaj iswiꞌ huneꞌ witz tuꞌ. 26 Yahwi naj Abner yinh kaw ip tet naj Joab hakaꞌ tiꞌ:

—¿Tom machi bꞌaqꞌinh chitanh huneꞌ howal koxol tiꞌ? ¿Tom mach chawohtajo tato yinh islahobꞌal ay bꞌiskꞌulal? ¿Bꞌaqꞌinh chakach ebꞌnaj hasoldado tiꞌ isbꞌejni istzumbꞌenikꞌo ebꞌnaj yuxhtaj? xhi naj.

27 Istaqꞌwi naj Joab hakaꞌ tiꞌ:

—Chiwaqꞌ bꞌinahojan isbꞌi Komam Dios chiwalnihan tato machi makaxhawi hakaꞌ tiꞌ, ebꞌnaj insoldadotiꞌan chistzumbꞌe ebꞌnaj yuxhtaj tiꞌ sunilbꞌal aqꞌbꞌal masanto yet chisajbꞌiloj, xhi naj.

28 Hak tuꞌ yu yok naj Joab yoqꞌtzeno yukꞌaꞌ noꞌ wakax, yu yok linhno ebꞌnaj soldado, isbꞌejni ebꞌnaj istzumbꞌen yet Israelal tuꞌ, matxa islahiko howal. 29 Wal naj Abner yebꞌ sunil issoldado tuꞌ bꞌelwito ebꞌnaj yinh sunilbꞌal aqꞌbꞌal yul yakꞌalil txꞌotxꞌ Arabá, isqꞌaxpon ebꞌnaj haꞌ Jordán, yekꞌto ebꞌnaj bꞌey Bitrón masanta apni ebꞌnaj bꞌey Mahanaim.

30 Hak tuꞌ yu isbꞌejni naj Joab istzumbꞌen naj Abner, iskutxbꞌaniko isbꞌa sunil ebꞌnaj issoldado naj Joab tuꞌ, haxa yet isbꞌisni naj issoldado tuꞌ yilni naj ta matxa tzꞌajano ebꞌnaj issoldado yaꞌ David tuꞌ, 19 (bꞌalonhlahonhwanh) ebꞌnaj kam yinh howal, iskampaxo naj Asael. 31 Walpaxo ebꞌnaj issoldado yaꞌ David 360 ebꞌnaj benjaminita yebꞌ ebꞌnaj issoldado naj Abner ispotxꞌkamo ebꞌnaj.

32 Lahwi tuꞌ yinikanh ebꞌnaj isnimanil naj Asael, yinito ebꞌnaj, ismujlax naj bꞌay mujan ismam naj, bꞌey Belén. Isbꞌelwito naj Joab yebꞌ issoldado sunilbꞌal aqꞌbꞌal, hata bꞌey Hebrón sajbꞌilo yinh ebꞌnaj.