3 Yapni sunil ebꞌnaj ichamta winaj Israel iskꞌatanh yaꞌ David bꞌey Hebrón, istꞌinhbꞌankano yaꞌ rey David tuꞌ istzotiꞌ yebꞌ ebꞌnaj sata Komam Jahawil, isjobꞌnayo ebꞌnaj aceite yibꞌanh iswiꞌ yaꞌ David, yokkano yaꞌ isreyalo Israel, yijnikano isbꞌa tzet yalkano Komam Jahawil tet yaꞌ Samuel.

4 Hak tuꞌ yu isto yaꞌ rey David yebꞌ sunil ebꞌnaj Israel bꞌey Jerusalén, konhobꞌ chiyijpaxo Jebús, haꞌ xin ebꞌnaj jebuseo ay yul konhobꞌ tuꞌ. 5 Yalni ebꞌnaj jebuseo tuꞌ tet yaꞌ rey David: «Mach chachokti yul kokonhobꞌ tiꞌanh,» xhi ebꞌnaj. Yajaꞌ xin qꞌoji yaꞌ David yinh konhobꞌ Sión tuꞌ, yuxin chihal-laxi ta iskonhobꞌ yaꞌ David yehi. 6 Wal yaꞌ David xayal yaꞌ yet yalanhtokanoj: «Haꞌ mak bꞌabꞌel chiqꞌoji yinh ebꞌnaj jebuseo tiꞌ, iswiꞌehal chukoj,» xhi yaꞌ. Haꞌ xin naj Joab, yunin ix Sarvia, haꞌ naj bꞌabꞌel qꞌoji yinh konhobꞌ tuꞌ, yuxin haꞌ naj ok iswiꞌehalo yinh ebꞌnaj issoldado yaꞌ David. 7 Lahwi tuꞌ iswatxꞌenikto isbꞌa yaꞌ David yul cuartel ay yul konhobꞌ tuꞌ, yehayo yaꞌ bꞌey tuꞌ, yuxin chihal-laxi Iskonhobꞌ yaꞌ David yinh. 8 Yuxin iswatxꞌe yaꞌ David hunteqꞌanxa nha yinhla ishoyanil cuartel, ichiti bꞌey Milo masanta bꞌay aykanh chꞌen kꞌubꞌ. Haꞌ xin naj Joab watxꞌenkanh hunteqꞌanxa teꞌ nha yul konhobꞌ tuꞌ. 9 Kaw xin ahkanokanh yip yaꞌ David, yuto ayko Komam Jahawil yetbꞌiho yaꞌ, Komam Yahawil yinh sunil.

10 Haꞌ ebꞌnaj tiꞌ, kaw ay yelapno xol ebꞌnaj issoldado yaꞌ David, kaw helankano ebꞌnaj yinh howal; haꞌ ebꞌnaj xin yebꞌ sunil yet Israelal aniko yaꞌ David reyal yinh sunil ismajul txꞌotxꞌ Israel, hakaꞌtikꞌa yu yalnikano Komam. Haꞌ xin ebꞌnaj kolwa yinh yaꞌ David yet ayko yaꞌ reyal tuꞌ.

11 Haꞌ tiꞌ isbꞌisil ebꞌnaj issoldado yaꞌ David, ebꞌnaj kaw helankanoj: Naj Jasobeam, iskꞌahol naj Hacmoni, naj yahawil yinh 30 (lahonhebꞌ iskawinaj) ebꞌnaj soldado kaw helankanoj. Hayet hunel ismaqꞌkamo naj Jasobeam 300 ebꞌnaj winaj yu islanza. 12 Haxa hunxa naj soldado kaw helan, haꞌ ton yaꞌ Eleazar, iskꞌahol naj Dodo, naj ahohíta. Yaꞌ Eleazar tuꞌ haꞌ hun yaꞌ xol ebꞌnaj oxwanh soldado kaw helan. 13 Haꞌ yaꞌ xin ayko iskꞌatanh yaꞌ David bꞌey Pas-damim yet iskutxbꞌaniko isbꞌa ebꞌnaj filisteo yu yaniko howal yinh yaꞌ David, iskawilal huneꞌ tzꞌunubꞌ bꞌay ay ixim cebada. Hayet yelkanh ebꞌnaj Israel tet ebꞌnaj filisteo, 14 yok yaꞌ Eleazar yebꞌ hunteqꞌanxa ebꞌnaj soldado xol ixim cebada tuꞌ yu iskolnilo yaꞌ txꞌotxꞌ yul isqꞌabꞌ ebꞌnaj filisteo. Isqꞌoji yaꞌ yinh ebꞌnaj filisteo, yuto haꞌ Komam Jahawil kolwa yinh yaꞌ Eleazar tuꞌ.

15 Ay xin oxwanh ebꞌnaj xol ebꞌnaj 30 (lahonhebꞌ iskawinaj) issoldado yaꞌ David kaw helan tuꞌ to ilno yaꞌ David bꞌey chꞌen nhachꞌen bꞌey Adulam; hayet hunel tuꞌ ay iscampamento ebꞌnaj filisteo bꞌey akꞌal Refaim. 16 Haꞌ yaꞌ David tuꞌ ay yaꞌ bꞌey chꞌen nhachꞌen, wal ebꞌnaj filisteo xin ay iscampamento ebꞌnaj istiꞌ ispultahil konhobꞌ Belén. 17 Yochen yaꞌ David yukꞌni ha haꞌ, yalni yaꞌ hakaꞌ tiꞌ: «Ayxikꞌa ay hunu mak chꞌaqꞌni ha haꞌ ay bꞌey ukꞌbꞌal haꞌ ay istiꞌ ispultahil Belén wukꞌuꞌan,» xhi yaꞌ. 18 Isto ebꞌnaj oxwanh soldado kaw helan tuꞌ, yokto ebꞌnaj yul iscampamento ebꞌnaj filisteo iqꞌo haꞌ bꞌey ukꞌbꞌal haꞌ bꞌey istiꞌ ispultahil konhobꞌ Belén, yiniti ebꞌnaj haꞌ tet yaꞌ David. Yajaꞌ xin mach isje yaꞌ David tuꞌ yukꞌuꞌ haꞌ, wal xin isjobꞌayo yaꞌ haꞌ isyebꞌalqꞌabꞌo tet Komam Jahawil.^a 19 Yalni yaꞌ hakaꞌ tiꞌ: «Kꞌubꞌa hinan Mamin, haxinwal mach chinwatxꞌehan huneꞌ tiꞌ. Yuto ta chiwukꞌan haꞌ tiꞌ lahan ta haꞌ ischikꞌil ebꞌnaj mabꞌey inoti haꞌ chiwukꞌan, yuto ishin isbꞌa ebꞌnaj yaqꞌnikamo isbꞌa isbꞌey yinoti haꞌ,» xhi yaꞌ. Yuxin mach yukꞌ yaꞌ David haꞌ; haꞌ huneꞌ tuꞌ iswatxꞌe ebꞌnaj oxwanh soldado kaw helan tuꞌ. 20 Naj Abisai, yuxhta naj Joab, haꞌ naj yahaw xol ebꞌnaj 30 (lahonhebꞌ iskawinaj) soldado kaw helan. Naj Abisai tuꞌ ismaqꞌkamo naj 300 ebꞌnaj winaj yu islanza, yuxin kaw bꞌinakano naj xol ebꞌnaj oxwanh. 21 Naj Abisai tuꞌ, haꞌ naj kaw ekꞌna bꞌina xol ebꞌnaj 30 (lahonhebꞌ iskawinaj) yebꞌ xin haꞌ naj ok yahawilo ebꞌnaj, yajaꞌ xin mach lahano naj hakaꞌ ebꞌnaj oxwanh bꞌabꞌel.

22 Naj Benaía, iskꞌahol yaꞌ Joiada huneꞌ naj kaw helan ah konhobꞌ Cabseel. Txꞌiꞌal tzet iswatxꞌe naj. Ismaqꞌkamo naj kakꞌonh noꞌ bꞌalam bꞌey Moab, ismaqꞌnipaxokamo naj huneꞌ noꞌ bꞌalam yul huneꞌ xabꞌ yinh istiempohal yet ayayo chꞌen chew. 23 Haꞌ naj maqꞌnikamo huneꞌ naj Egipto kaw nimajal istel, hanikꞌxanhe mach yikta isyox metro istel naj, haꞌ islanza naj lahan istel yebꞌ teꞌ yet chembꞌal; yajaꞌ wal naj Benaía tuꞌ huneꞌ qꞌojoch iqꞌbꞌil yu naj yet yapni naj yinh naj Egipto, yinilo naj islanza naj, haꞌtikꞌa islanza naj tuꞌ maqꞌnikamo naj yu naj. 24 Haꞌ tuꞌ iswatxꞌe naj Benaía, iskꞌahol yaꞌ Joiada, haꞌ hun naj chibꞌinakano yinta ebꞌnaj oxwanh soldado kaw helan. 25 Haꞌ naj xin kaw helan elkaniko xol ebꞌnaj 30 (lahonhebꞌ iskawinaj), yajaꞌ mach apni naj hakaꞌ ebꞌnaj oxwanh bꞌabꞌel. Haꞌ naj Benaía tuꞌ yahawil yuko naj xol ebꞌnaj chitanhen yaꞌ David.

26 Haꞌ ebꞌnaj helan xol issoldado yaꞌ David tuꞌ haꞌ ebꞌnaj tiꞌ: naj Asael yuxhta naj Joab, naj Elhanán, iskꞌahol naj Dodo ah Belén, 27 naj Samot harodita, naj Heles, pelonita, 28 naj Ira iskꞌahol naj Iques, tecoíta, naj Abiezer anatotita, 29 naj Sibecai, naj husatita, naj Ilai, naj ahohíta 30 naj Maharai, netofatita, naj Heled, iskꞌahol naj Baana, netofatita, 31 naj Itai, iskꞌahol naj Ribai ay bꞌey Gabaa, naj Itai tuꞌ titna naj yinh iskꞌahol naj Benjamín, naj Benaía, piratonita, 32 naj Hidai ay istiꞌ haꞌ Gaas, naj Abiel arbatita, 33 naj Azmavet, bahurimita, naj Eliaba saalbonita, 34 ebꞌnaj iskꞌahol naj Jasén, gizonita, naj Jonatán, iskꞌahol naj Sage, ararita, 35 naj Ahíam, iskꞌahol naj Sacar, ararita, naj Elifal iskꞌahol naj Ur, 36 naj Hefer, mequeratita, naj Ahías pelonita, 37 naj Hezrai, carmelita, naj Naarai, iskꞌahol naj Ezbai, 38 naj Joel, yuxhta naj Natán, naj Mibhar, iskꞌahol naj Hagrai, 39 naj Selec amonita, naj Naharai, berotita, haꞌ naj chiꞌinikꞌo ischꞌen naj Joab yet howal, naj Joab tuꞌ, yunin ix Sarvia ye naj. 40 Naj Ira itrita, naj Gareb itrita, 41 naj Urías hitita, naj Zabad, iskꞌahol naj Ahlai, 42 naj Adina iskꞌahol naj Siza rubenita, haꞌ naj tuꞌ kaw yahawil xol ebꞌnaj rubenita, 30 (lahonhebꞌ iskawinaj) ebꞌnaj rubenita tuꞌ. 43 Naj Hanán iskꞌahol naj Maaca, naj Josafat mitnita, 44 naj Uzías astarotita, naj Sama yebꞌ naj Jehiel, ebꞌnaj iskꞌahol naj Hotam, aroerita, 45 naj Jediael, iskꞌahol naj Simri, yebꞌ naj Joha, ebꞌnaj kawanh tiꞌ yuxhtanhe isbꞌa ebꞌnaj, tizita ebꞌnaj. 46 Yebꞌ naj Eliel, mahavita, naj Jerebai yebꞌ naj Josavía, ebꞌnaj iskꞌahol naj Elnaam, naj Itma moabita. 47 Naj Eliel, naj Obed, yebꞌ naj Jaasiel sobaita.