Ebꞌnaj issoldado yaꞌ David
12
Hayet lanhan yekꞌ yaꞌ David yebꞌano isbꞌa tet yaꞌ Saúl iskꞌahol naj Cis, ay hunbꞌulan ebꞌnaj winaj kaw helan yinh howal to iskutxbꞌa isbꞌa iskꞌatanh yaꞌ David bꞌey Siclag, haꞌ xin ebꞌnaj kolwa yinta yaꞌ David tuꞌ yaqꞌni howal. 2 Ebꞌnaj tuꞌ iqꞌbꞌil islitꞌ ebꞌnaj yebꞌ xin ula. Chaqꞌ ebꞌnaj yu iswatxꞌ, chaqꞌnipaxo ebꞌnaj yu ismek. Xol ebꞌnaj ayto yuh isbꞌa yebꞌ yaꞌ Saúl, ebꞌnaj titna yinh yaꞌ Benjamín, haꞌ ebꞌnaj tiꞌ kolwa yinh yaꞌ David: 3 Naj Ahiezer, naj kaw iswiꞌehal yebꞌ naj Joás, ebꞌnaj kawanh tiꞌ iskꞌahol naj Semaa ah Gabaa ye ebꞌnaj. Naj Jeziel yebꞌ naj Pelet, ebꞌnaj tiꞌ iskꞌahol naj Azmavet ye ebꞌnaj, naj Beraca, yebꞌ yaꞌ Jehú anatotita, 4 naj Ismaías gabaonita, haꞌ naj kaw helan xol ebꞌnaj 30 (lahonhebꞌ iskawinaj), yebꞌ xin haꞌ naj iswiꞌehal yinh ebꞌnaj tuꞌ; naj Jeremías, naj Jahaziel, naj Johanán, naj Jozabad gederatita, 5 naj Eluzai, naj Jerimot, naj Bealías, naj Semarías, naj Sefatías, harufita naj, 6 naj Elcana, naj Isías, naj Azareel, naj Joezer, naj Jasobeam, ebꞌnaj tuꞌ coreíta ebꞌnaj. 7 Naj Joela yebꞌ naj Zebadías, ebꞌnaj tuꞌ iskꞌahol naj Jeroham ah Gedor.8 Aypaxo xin ebꞌnaj titna yinh yaꞌ Gad elkanh, isto iskꞌatanh yaꞌ David bꞌey yul chꞌen nhachꞌen sat txꞌotxꞌ desierto. Ebꞌnaj tuꞌ kaw helan ebꞌnaj yaqꞌni howal yu kuywina ebꞌnaj yokniko escudo yebꞌ lanza, haꞌ sat ebꞌnaj tuꞌ kaw how jilni hakaꞌ sat noꞌ bꞌalam, kaw helan ebꞌnaj yekꞌ yinh anhe iswiꞌla witz hakaꞌ noꞌ miꞌe sajche. 9 Ebꞌnaj tuꞌ haꞌ ton ebꞌnaj tiꞌ: Naj Ezer, haꞌ naj bꞌabꞌel, naj Abdías, haꞌ naj iskabꞌ, naj Eliab, haꞌ naj yox, 10 naj Mismana, haꞌ naj iskanh, naj Jeremías, haꞌ naj ishoꞌ. 11 Naj Atai, haꞌ naj iswaj, naj Eliel, haꞌ naj ishuj 12 naj Johanán, haꞌ naj iswajxa, naj Elzabad, haꞌ naj isbꞌalonh, 13 naj Jeremías, haꞌ naj islahonh, naj Macbanai, haꞌ naj ishunlahonh. 14 Haꞌ hunteqꞌan ebꞌnaj titna yinh yaꞌ Gad tuꞌ ok yahawilo yinh ebꞌnaj soldado. Ebꞌnaj hanikꞌnhe soldado, ayko yalanh yip 100 (hokꞌal) isbꞌisil ebꞌnaj, haxa ebꞌnaj niman ayko yalanh yip, huneꞌ mil isbꞌisil ebꞌnaj. 15 Haꞌ ebꞌnaj tuꞌ qꞌaxponikꞌto haꞌ Jordán yinh bꞌabꞌel ixahaw yul habꞌil yet kaw chichꞌibꞌkanh haꞌ, kat ismalilo haꞌ yul isbꞌeh, hayet tuꞌ elkanh anma ayayo sat akꞌal istiꞌ haꞌ tet ebꞌnaj, anma ayayo yetkꞌulal bꞌay chiꞌahilo tzꞌayik yebꞌ anma ayayo yetkꞌulal bꞌay chito tzꞌayik.
16 Aypaxo hunteqꞌan ebꞌnaj winaj titna yinh yaꞌ Benjamín yebꞌ yinh yaꞌ Judá, to iskꞌatanh yaꞌ David bꞌay ewan yaꞌ bꞌey chꞌen nhachꞌen. 17 Hayet lanhan yapni ebꞌnaj tuꞌ yelti yaꞌ David ischahno ebꞌnaj, yalni yaꞌ tet ebꞌnaj:
—Tato aqꞌankꞌulal nabꞌil heyu yebꞌ ta yu hekolwa winhan yuxin chexhuli, chisje heyok wetbꞌihojan, yajaꞌ ta yu kinheyanikojan yul isqꞌabꞌ yaꞌ ayko ishowal winhan yuxin makexhuli machi xin inmulan, haꞌojabꞌ Komam Dios, isDiosal jichmam chiꞌilni tzet chexelkanikoj, yebꞌ xin haꞌ chꞌanayo isyaꞌtajil teyibꞌanh, xhi yaꞌ. 18 Yul Yespíritu Komam Dios yinh naj Amasai, naj yahaw yeko yinh ebꞌnaj 30 (lahonhebꞌ iskawinaj), yalni naj hakaꞌ tiꞌ:
«¡Hach mam David, iskꞌahol yaꞌ Isaí! Hawu yuxin makonhtitanh yu jokanh hawetbꞌihoj.
Ayojabꞌ aqꞌankꞌulal tawet yebꞌ aqꞌankꞌulal tet ebꞌnaj chikolwa tawinh,» xhi naj.
Hak tuꞌ yu ischahni yaꞌ David tuꞌ ebꞌnaj yetbꞌihoj yaniko yaꞌ ebꞌnaj xol ebꞌnaj yahawil yinh issoldado.
19 Aypaxo hunteqꞌanxa ebꞌnaj titna yinh yaꞌ Manasés ok yetbꞌiho yaꞌ David yet isto yaꞌ xol ebꞌnaj filisteo yu yaniko howal yinh yaꞌ Saúl, (yaj xin matxa yaqꞌ howal yaꞌ David yinta ebꞌnaj filisteo yuto hayet iskutxbꞌan isbꞌa ebꞌnaj yahaw ebꞌnaj soldado filisteo islahtiꞌnhen isbꞌa ebꞌnaj ta mach chikolwa yaꞌ David tuꞌ yinh ebꞌnaj, yalni ebꞌnaj hakaꞌ tiꞌ: «Kꞌuxantaxka ispakꞌiko naj jinh, kat konhismaqꞌnikamo naj, kat ismeltzoko naj yetbꞌiho yaꞌ Saúl yahawil,» xhi ebꞌnaj.) 20 Haꞌ ebꞌnaj titna yinh yaꞌ Manasés ok yetbꞌiho yaꞌ David yet yapni yaꞌ bꞌey Siclag, haꞌ ton ebꞌnaj tiꞌ: Naj Adnas, naj Jozabad, naj Jediael, naj Micael, naj Jozabad, naj Eliú yebꞌ naj Siletai, ebꞌnaj tuꞌ yahawil ye ebꞌnaj yinh hunun mil ebꞌnaj soldado xol ebꞌnaj yikꞌal yinh yaꞌ Manasés. 21 Haꞌ ebꞌnaj tuꞌ kolwa yinh yaꞌ David, yaqꞌni howal yinh hunbꞌulan ebꞌnaj soldado elqꞌom, yuto sunil ebꞌnaj tuꞌ kaw helan ebꞌnaj yaqꞌni howal, haꞌ xin ebꞌnaj ok yahawilo yinh issoldado yaꞌ David. 22 Kaw xin hunun tzꞌayik yapni ebꞌnaj soldado kolwaho yinh yaꞌ David, hak tuꞌ xin yu ischꞌibꞌ isbꞌisil issoldado yaꞌ David, lahanxa isbꞌisil hakaꞌ isbꞌisil issoldado Komam Dios satkanh.
23 Hak tiꞌ isbꞌisil ebꞌnaj soldado kaw helan yinh howal apni iskꞌatanh yaꞌ David bꞌey Hebrón, yu iskolwa yinh yaꞌ David, yok reyal selelo yaꞌ Saúl, hakaꞌtikꞌa yu yalni Komam Jahawil. 24 Xol ebꞌnaj Judá 6,800 ebꞌnaj winaj kaw helan yinh howal, ebꞌnaj tuꞌ iqꞌbꞌil yescudo yebꞌ islanza ebꞌnaj yu. 25 Xol ebꞌnaj Simeón, 7,100 ebꞌnaj winaj kaw helan yinh howal yebꞌ kaw ay yip yanma. 26 Xol ebꞌnaj Leví 4,600 ebꞌnaj. 27 Xol ebꞌnaj titna yinh yaꞌ Aarón 3,700 ebꞌnaj, haꞌ xin yaꞌ Joiada, yahawil yinh ebꞌnaj. 28 Yebꞌ yaꞌ Sadoc, tzeh kaw helan yebꞌ kaw hinan, 22 (kabꞌ iskawinaj) ebꞌnaj yikꞌalnhe isbꞌa, yahawil yekoj ebꞌnaj. 29 Haꞌ xol ebꞌnaj titna yinh yaꞌ Benjamín, yichmam yaꞌ Saúl, oxebꞌ mil ebꞌnaj winaj ok yetbꞌiho yaꞌ David, haxa hunteqꞌanxa ebꞌnaj yet Benjamín kan ebꞌnaj yetbꞌiho iskꞌahol yaꞌ Saúl, masanta yet istzꞌayikal bꞌay ok yaꞌ David isreyalo sunil konhobꞌ Israel. 30 Haꞌ xol ebꞌnaj Efraín 20,800 ebꞌnaj soldado kaw helan yebꞌ kaw bꞌinakano xol yikꞌal. 31 Haꞌ xol yikta majan ebꞌnaj Manasés ay 18 mil ebꞌnaj soldado, ebꞌnaj tuꞌ bꞌislax ebꞌnaj yinh istxolal yu isto ebꞌnaj yanoko yaꞌ David reyal. 32 Haxa xol ebꞌnaj Isacar ay 200 ebꞌnaj yahawil, ebꞌnaj tuꞌ kaw ay yitzꞌatil iswiꞌ ebꞌnaj, kaw xin yohta ebꞌnaj tzet yilal iswatxꞌen Israel, haꞌ xin tzet chal ebꞌnaj, haꞌ chisyije sunil yet konhobꞌ ebꞌnaj. 33 Haꞌ xol ebꞌnaj Zabulón ay 50 (lahonh yoxkꞌal) mil ebꞌnaj soldado kaw helan chiꞌelto yinh howal, ay xin sunil ischꞌen ebꞌnaj yet howal, kaw xin hinan ebꞌnaj isto yinh howal iskolwal yinh yaꞌ David, machi kabꞌkon yanma ebꞌnaj. 34 Haꞌ xol ebꞌnaj Neftalí ay mil ebꞌnaj capitán, yok 37 (hujlahonhebꞌ iskawinaj) mil ebꞌnaj soldado ay yescudo yebꞌ islanza. 35 Haꞌ xol ebꞌnaj Dan ay 28,600 ebꞌnaj soldado kaw hinan isto yinh howal. 36 Haꞌ xol ebꞌyaꞌ Aser ay 40 (iskawinaj) mil ebꞌnaj soldado kaw helan yebꞌ hinan isto yinh howal. 37 Haxa xol ebꞌnaj ay isqꞌaxebꞌikꞌto haꞌ Jordán, haꞌ ton ebꞌnaj rubenita, ebꞌnaj gadita yebꞌ yikta majan ebꞌnaj Manasés, ay 120 mil ebꞌnaj soldado ay sunil ischꞌen yet howal. 38 Sunil ebꞌnaj soldado tuꞌ kaw helan yinh howal yebꞌ kaw hinan ebꞌnaj isto yinh howal. Ebꞌnaj tuꞌ kaw tohol yanma ebꞌnaj, apni ebꞌnaj bꞌey Hebrón yu yaniko ebꞌnaj yaꞌ David reyal yinh sunil Israel, hakpax tuꞌ sunil ebꞌnaj Israel ayko yinh isnabꞌal ebꞌnaj yaniko yaꞌ David isreyalo Israel. 39 Oxebꞌ tzꞌayik ehayo ebꞌnaj tuꞌ iskꞌatanh yaꞌ David, iswaꞌ ebꞌnaj, yukꞌni ebꞌnaj tzet chukꞌ yibꞌanh tzet isloh, yuto yet konhobꞌ ebꞌnaj watxꞌen tzet chislo yulbꞌal oxebꞌ tzꞌayik. 40 Hakpax tuꞌ ebꞌnaj ayayo iskawilal ebꞌnaj masanta bꞌey ebꞌnaj Isacar, ebꞌnaj Zabulón, yebꞌ ebꞌnaj Neftalí, yiti ebꞌnaj tzet chilolax yibꞌanh isburro, iscamello, ismula yebꞌ yibꞌanh iswakax. Txꞌiꞌal tzet chilolax yiti ebꞌnaj, yiti ebꞌnaj ixim harina, teꞌ higo watxꞌebꞌil qꞌoyehal, teꞌ tajin uva, vino, yebꞌ aceite, yinipaxti ebꞌnaj noꞌ wakax yebꞌ noꞌ meꞌ kꞌuxlaxoj, kaw xin txꞌiꞌal noꞌ yiti ebꞌnaj yuto kaw tzalahilal ye ebꞌnaj Israel tuꞌ.