Ok yinh isnabꞌal yaꞌ David yinito isKaxhahil istrato Komam Dios bꞌey Jerusalén
13
Lahwi tuꞌ istzotel yaꞌ rey David yebꞌ ebꞌnaj capitán yinh hunun mil ebꞌnaj soldado, yebꞌ ebꞌnaj yahawil yinh 100 (hokꞌal) ebꞌnaj soldado, yebꞌ sunil ebꞌnaj iswiꞌehal konhobꞌ. 2 Yalni yaꞌ David tuꞌ tet sunil konhobꞌ Israel: «Hex wet konhobꞌ ta cheyoche, yebꞌ ta hak tuꞌ chꞌel yinh iskꞌul Komam Jahawil chiwawtekojan sunil jet Israelal ay sat txꞌotxꞌ Israel tiꞌ, ebꞌnaj kantokano sat txꞌotxꞌ Israel tiꞌ, yebꞌ ebꞌyaꞌ sacerdote, yebꞌ ebꞌnaj levita ayko iskꞌatanh ebꞌnaj yulaj iskonhobꞌ, yebꞌ bꞌay chilow isnoqꞌ ebꞌnaj, kat iskutxbꞌaniko isbꞌa ebꞌnaj kokꞌatanh. 3 Chijiti isKaxhahil istrato Komam Dios kokꞌatanh, yuto hatax yulbꞌal istiempohal ayko yaꞌ Saúl reyalil, hatax tuꞌ matxa chikam kokꞌul yinh isKaxha Komam,» xhi yaꞌ.4 Haꞌ tzet yal yaꞌ David tuꞌ kaw ischah iswiꞌ konhobꞌ, yuxin yal konhobꞌ ta chiꞌilaxti Kaxha yet istrato Komam.
Yet yilaxto isKaxha Komam Dios yu yaꞌ David
5 Iskutxbꞌaniko yaꞌ rey David sunil ebꞌnaj Israel, ichiti bꞌey Sihor, ismohonal Egipto masanta bꞌay chonhokapno bꞌey Hamat, ishekꞌni ebꞌnaj isKaxha isTrato Komam bꞌey Quiriat-jearim. 6 Yahto yaꞌ David yebꞌ sunil ebꞌnaj Israel bꞌey Baala yet Quiriat-jearim ay yul ismajul txꞌotxꞌ Judá, yu ishekꞌni ebꞌnaj isKaxhahil istrato Komam Dios, Komam ayiko xol ebꞌnaj querubín, Komam chꞌaqꞌlax bꞌinaho isbꞌi yu kaxha tuꞌ. 7 Yinilti ebꞌnaj isKaxha Komam tuꞌ yul yatut naj Abinadab, yinito ebꞌnaj yul huneꞌ carruaje akꞌto, haꞌ xin naj Uza yebꞌ naj Ahío, chiꞌinikꞌo huneꞌ carruaje tuꞌ. 8 Kaw xin chitzala yaꞌ David yebꞌ konhobꞌ Israel sata Komam Dios yinh sunil yanma, chaniko ebꞌnaj bꞌit tet Komam yebꞌ teꞌ arpa, teꞌ salterio, teꞌ tamboril, cimbalo yebꞌ trompeta. 9 Yajaꞌ hayet yapni ebꞌnaj bꞌay chiwatxꞌelaxilo istrigo naj Quidón, istxaqꞌmo noꞌ wakax nhikꞌnhe carruaje bꞌay ayahto Kaxha tuꞌ, yuxin yato isqꞌabꞌ naj Uza yibꞌanh teꞌ Kaxha tuꞌ yunhe machi aykꞌay teꞌ, 10 yajaꞌ tit ishowal Komam Dios yinh naj Uza, yuto istzabꞌ naj isKaxha Komam tuꞌ; iskam naj Uza sata Komam bꞌey tuꞌ.a
11 Yok bꞌiskꞌulal yinh iskꞌul yaꞌ David, yuto kam naj Uza yu Komam Dios, yuxin yako naj Pérez-uza isbꞌiho bꞌay kam naj Uza tuꞌ, hakto tuꞌ xin isbꞌi tinanh. 12 Hayet huneꞌ tzꞌayik tuꞌ kaw xiw yaꞌ David tet Komam Dios, yuxin yal yaꞌ hakaꞌ tiꞌ: «¿Tzetto chu winitojan isKaxha Komam Dios tiꞌ watutan?» xhi yaꞌ. 13 Yuxin matxa yito yaꞌ isKaxha Komam bꞌey iskonhobꞌ yaꞌ David, wal xin haꞌ bꞌey yatut naj Obed-edom geteo yito yaꞌ. 14 Hak tuꞌ yu iskankano isKaxha Komam bꞌey yatut naj Obed-edom oxebꞌ ixahaw, yanayo Komam Dios Jahawil isyaxil yibꞌanh naj Obed-edom tuꞌ yebꞌ yuninal yebꞌ yibꞌanh sunil tzet ay naj.