Ischejto naj Hiram ischejabꞌ iskꞌatanh yaꞌ David
14
Naj Hiram isreyal Tiro, ischejto naj ischejabꞌ iskꞌatanh yaꞌ David, yanipaxto naj teꞌ aqꞌinteꞌ cedro tet yaꞌ David, yanipaxto naj ebꞌnaj albañil, yebꞌ ebꞌnaj carpintero yu iswatxꞌenkanh ebꞌnaj ispalacio yaꞌ. 2 Hak tuꞌ yu istxumnilo yaꞌ David tato haꞌ Komam Dios aniko yaꞌ isreyalo Israel, yaqꞌni chꞌibꞌo Komam ismunil yaꞌ yinh reyal tuꞌ yibꞌanh konhobꞌ Israel, iskonhobꞌ Komam.Ebꞌnaj iskꞌahol yaꞌ David pitzkꞌa bꞌey Jerusalén
3 Yiqꞌnipaxo yaꞌ rey David hunteqꞌanxa ebꞌix yixalo bꞌey Jerusalén, yuxin ayto iskꞌahol yaꞌ yebꞌ iskutzꞌin yaꞌ pitzkꞌa yebꞌ ebꞌix tuꞌ. 4 Hak tiꞌ isbꞌi ebꞌnaj iskꞌahol yaꞌ pitzkꞌa bꞌey Jerusalén: naj Samúa, naj Sobab, naj Natán, yaꞌ Salomón, 5 naj Ibhar, naj Elisúa, naj Elpelet, 6 naj Noga, naj Nefeg, naj Jafía, 7 naj Elisama, naj Eliada yebꞌ naj Elifelet.
Qꞌoji yaꞌ David yinh ebꞌnaj filisteo
8 Hayet yabꞌen ebꞌnaj filisteo tato ok yaꞌ David reyal yinh sunil txꞌotxꞌ Israel, isto sunil ebꞌnaj filisteo tuꞌ saywal yinh yaꞌ. Hayet yabꞌen yaꞌ David huneꞌ tuꞌ yelti yaꞌ howal yinh ebꞌnaj. 9 Yapni ebꞌnaj filisteo tuꞌ, ispujnato ebꞌnaj sat akꞌal Refaim, 10 yuxin isqꞌambꞌe yaꞌ David tet Komam Dios hakaꞌ tiꞌ:
—Mamin, ¿kꞌulmi chintohan waqꞌaꞌkojan howal yinh ebꞌnaj filisteo tiꞌ? ¿Chimhawako ebꞌnaj yul inqꞌabꞌan? xhi yaꞌ. Istaqꞌwi Komam tet yaꞌ:
—Ahanhto hawaqꞌako howal yinh ebꞌnaj yuto chiwakojan ebꞌnaj yul haqꞌabꞌ, xhi Komam.
11 Hak tuꞌ yu yahapno yaꞌ David yebꞌ issoldado bꞌey Baal-perazim isqꞌoji yaꞌ yinh ebꞌnaj filisteo bꞌey tuꞌ, yuxin yal yaꞌ David hakaꞌ tiꞌ: «Hakaꞌ chiyu ispolnikto isbꞌa haꞌ niman elomaꞌ, hak tuꞌ yu ispohni Komam bꞌeh xol ebꞌnaj ayko ishowal winhan,» xhi yaꞌ. Yuxin Baal-perazim ok isbꞌiho bꞌay qꞌoji yaꞌ yinh ebꞌnaj filisteo tuꞌ. 12 Isbꞌejnikano ebꞌnaj filisteo istioxh bꞌey tuꞌ, yalni yaꞌ David tato chisnhuskanto ebꞌnaj issoldado yaꞌ hunteqꞌan tioxh tuꞌ.
13 Yajaꞌ apnipaxo yaqꞌbꞌilxa ebꞌnaj filisteo hunelxa, ispujnato ebꞌnaj sat akꞌal. 14 Yuxin isqꞌambꞌepaxo yaꞌ David tet Komam Dios hunelxa tato chiyako yaꞌ howal yinh ebꞌnaj; istaqꞌwi Komam tet yaꞌ: «Mach chachahto yinta ebꞌnaj hawaqꞌako howal, wal xin yet chexapno satakꞌti teꞌ bálsamo, kat hehoynayo ebꞌnaj. 15 Haxa yet chawabꞌen isbꞌili ischon teꞌ bálsamo tuꞌ, kat heyelti howal yinh ebꞌnaj, yuto haninan chinokan tasataj kat intanhtzenilojan ebꞌnaj soldado filisteo tuꞌ,» xhi Komam.