2. YET YOK YAꞌ DAVID REYAL
(10:1–29:30)
Iskamikal yaꞌ Saúl yebꞌ ebꞌnaj iskꞌahol
10
Ebꞌnaj filisteo ok ebꞌnaj howal yinh ebꞌnaj Israel, yelkanh ebꞌnaj Israel tet ebꞌnaj, kaw xin niman ebꞌnaj Israel tuꞌ kam bꞌey witz Gilboa. 2 Yok tzujno ebꞌnaj filisteo yinta yaꞌ Saúl yebꞌ ebꞌnaj iskꞌahol, ismaqꞌnikamo ebꞌnaj filisteo tuꞌ ebꞌnaj iskꞌahol yaꞌ Saúl, haꞌ ton yaꞌ Jonatán, naj Abinadab yebꞌ naj Malquisúa. 3 Yiqꞌni yip howal yinh yaꞌ Saúl, istzabꞌcha yaꞌ yu islitꞌ ebꞌnaj filisteo yok islahwilal yaꞌ, 4 yuxin yal yaꞌ Saúl tet naj issoldado iqꞌnhe ischꞌen yet howal: «Ihti hawespada, kat kinatejnikamojan yu chꞌen, yuto mach chiwochehan chintzabꞌchahan yu hunteqꞌan ebꞌnaj manhcircuncisión tiꞌ, kat xin yok ebꞌnaj bꞌuchwal winhan,» xhi yaꞌ.Yajaꞌ mach isje naj soldado tuꞌ ispotxꞌoꞌkamo yaꞌ Saúl yuto chixiw naj; yuxin yihti yaꞌ Saúl tuꞌ yespada, yay pajno yaꞌ yibꞌanh isxixiꞌal iswiꞌ chꞌen. 5 Hayet yilni naj issoldado yaꞌ Saúl tato ispotxꞌkamo isbꞌa yaꞌ, yinipaxahti naj yespada istejnikamo isbꞌa naj. 6 Hak tuꞌ yu iskam yaꞌ Saúl yebꞌ oxwanh iskꞌahol, iskampaxo sunil mak ay yu yaꞌ. 7 Hayet yilni sunil ebꞌnaj Israel ay sat akꞌal tato elkanh ebꞌnaj soldado Israel tet ebꞌnaj filisteo yebꞌ tato kam yaꞌ Saúl yebꞌ oxwanh iskꞌahol, isbꞌejnikano ebꞌnaj ej iskonhobꞌ, yelkanh ebꞌnaj, yapni ebꞌnaj filisteo yehayo ebꞌnaj yul iskonhobꞌ ebꞌnaj Israel tuꞌ.
8 Haxa yet hunxa tzꞌayik yet isto ebꞌnaj filisteo yinolo tzetaj iqꞌbꞌil yu ebꞌnaj soldado Israel ismaqꞌkamoj, yilni ebꞌnaj ta kamomxa yaꞌ Saúl yebꞌ ebꞌnaj iskꞌahol pakꞌponbꞌato bꞌey witz Gilboa. 9 Hayet lahwi yinilo ebꞌnaj xil isqꞌap yaꞌ Saúl yet howal ayko yinh yebꞌ ischꞌen yaꞌ yet howal, yinilo ebꞌnaj iswiꞌ yaꞌ Saúl, ischejnito ebꞌnaj yal-laxo huneꞌ tuꞌ tet sunil anma ay sat txꞌotxꞌ filisteo yebꞌ tet mak ay istioxh yul ej iskonhobꞌ ebꞌnaj. 10 Yanikto ebꞌnaj ischꞌen yaꞌ Saúl yet howal yul yatut istioxh, istꞌunhbꞌankanh ebꞌnaj iswiꞌ yaꞌ Saúl tuꞌ yul yatut tioxh Dagón.
11 Haxa yet yabꞌen ebꞌnaj ah Jabes ay yul ismajul Galaad tzet utelax yaꞌ Saúl yu ebꞌnaj filisteo tuꞌ, 12 isto sunil ebꞌnaj winaj kaw helan yinh howal ah Jabes, yinoti isnimanil yaꞌ Saúl, yebꞌ isnimanil ebꞌnaj iskꞌahol yaꞌ, ismujni ebꞌnaj bꞌey Jabes yich huneꞌ teꞌ hih, hujebꞌ tzꞌayik xin mach waꞌ ebꞌnaj yu bꞌiskꞌulal yinh yaꞌ Saúl.
13 Hak tuꞌ yu iskam yaꞌ Saúl yu istxꞌojal, yuto mach isyije yaꞌ ischejbꞌanil Komam Jahawil, yuto isqꞌambꞌepaxo isbꞌa yaꞌ tet huneꞌ ix ahbꞌe. 14 Maxhtaj xin tet Komam Jahawil isqꞌambꞌe isbꞌa yaꞌ, yuxin hak tuꞌ yu iskam yaꞌ yu Komam Dios, yanikaniko Komam ismunil yaꞌ yet reyal yul isqꞌabꞌ yaꞌ David, iskꞌahol yaꞌ Isaí.