Islahobꞌal tzotiꞌ yal yaꞌ rey David
23
Haꞌ tiꞌ islahobꞌal tzotiꞌ yal yaꞌ rey David,yaꞌ David iskꞌahol yaꞌ Isaí, yaꞌ kaw aykano yelapno elkanikoj.
Haꞌ Komam Dios, isDiosal yaꞌ Jacob sikꞌnheko yaꞌ isreyalo Israel.
Haꞌ yaꞌ kaw chiꞌ isbꞌitni xol ebꞌnaj Israel, chalni yaꞌ hakaꞌ tiꞌ:
2 «Haꞌ Yespíritu Komam Dios Jahawil chitzotel winhan.
Haꞌ Istzotiꞌ Komam ayko sat waqꞌan.
3 Tzotel Komam Dios isKolomal Israel.
Haꞌ Komam Dios, Komam hakaꞌ chꞌen chꞌen tzotel wetan, yalni hakaꞌ tiꞌ:
“Haꞌ mak chꞌok yahawilo anma haꞌ chiꞌijbꞌali yinh istoholal, kat isxiw wetan,” xhi Komam.
4 Yalnipaxo Komam Dios: “Lahan hakaꞌ issajilqꞌinal yet chisajmatxiloj,
lahanpaxo hakaꞌ istzejtzon yoj tzꞌayik yet kaw hajan.
Haꞌ huneꞌ mak tuꞌ lahanpaxo hakaꞌ haꞌ nhabꞌ chiꞌaqꞌni chꞌibꞌo tzꞌunubꞌ sat txꞌo txꞌotxꞌ,” xhi Komam.
5 Yuxin haꞌ Komam Dios chiꞌanayo iskꞌulal yibꞌanh wuninalan,
yuto istꞌinhbꞌakano Komam istrato wetan,
huneꞌ machi bꞌaqꞌinh chilahwi, kaw tinanh yehi, inkolbꞌanilan yebꞌ tzet chiwochehan.
6 Wal ebꞌnaj txꞌoj lahan ebꞌnaj hakaꞌ teꞌ txꞌix chihokꞌlaxkanh, machi hunu mak chihitziko isqꞌabꞌ yinh.
7 Tato ay hunu mak chiyoche istzabꞌaꞌ teꞌ txꞌix tuꞌ,
chisqꞌan hunu chꞌen hierro maka hunu isteꞌal lanza yunhe isqꞌojnito teꞌ xol qꞌaꞌ,
kat istzꞌakanto yinh hunelnhe,» xhi yaꞌ David.
Hunteqꞌan ebꞌnaj issoldado yaꞌ rey David kaw helan
8 Haꞌ hunteqꞌan ebꞌnaj winaj tiꞌ kaw helan xol ebꞌnaj issoldado yaꞌ rey David: Naj Joseb-basebet tacmonita, naj kaw yahawil yeko xol ebꞌnaj oxwanh issoldado yaꞌ rey David kaw helan. Ay hunel tiꞌ ismaqꞌkamo naj 800 ebꞌnaj winaj yu islanza. 9 Haxa naj iskabꞌ xol ebꞌnaj oxwanh helan tuꞌ, haꞌ ton yaꞌ Eleazar, iskꞌahol naj Dodo, naj ahohíta, haxanhe yaꞌ tuꞌ kankano iskꞌatanh yaꞌ rey David yet iskutxbꞌaniko isbꞌa ebꞌnaj filisteo yu yaqꞌni howal, yajaꞌ wal sunil hunteqꞌanxa ebꞌnaj Israel elkanh ebꞌnaj. 10 Haꞌ xin yaꞌ Eleazar tuꞌ yaqꞌ yaꞌ howal yinh ebꞌnaj filisteo; ismaqꞌnikamo yaꞌ ebꞌnaj masanto sikilo yaꞌ, kaw kꞌoliko isqꞌabꞌ naj yinh yespada. Hayet huneꞌ tzꞌayik tuꞌ kolwa Komam Dios Jahawil yinh yaꞌ Eleazar yet isqꞌoji yinh ebꞌnaj filisteo. Tzujan tuꞌ xin ismeltzo issoldado yaꞌ rey David, yok ebꞌnaj iskutxbꞌanokanh tzet ay ebꞌnaj tanhilo yu yaꞌ Eleazar.
11 Haxa naj isyox, haꞌ ton naj Sama, iskꞌahol naj Age ararita. Hayet hunel xin iskutxbꞌako isbꞌa ebꞌnaj filisteo bꞌey Lehi, bꞌay tzꞌunbꞌil teꞌ lenteja, yu yaniko howal yinh yaꞌ rey David, yajaꞌ xiwkanh ebꞌnaj Israel, yelkanh ebꞌnaj. 12 Yajaꞌ wal naj Sama bꞌey naj islinhbꞌakto isbꞌa yiktabꞌanil huneꞌ tzꞌunubꞌ tuꞌ, yaqꞌni howal naj yebꞌ ebꞌnaj filisteo. Iskolwa Komam Dios Jahawil yinh naj ismaqꞌnikamo naj ebꞌnaj filisteo.
13 Haxa yet hunel yinh istzꞌayikal iskꞌuplax ixim trigo ay oxwanh ebꞌnaj xol ebꞌnaj 30 (lahonhebꞌ iskawinaj) iswiꞌehal kaw helan, to ilno yaꞌ David yul chꞌen nhachꞌen bꞌey Adulam. Wal ebꞌnaj filisteo xin ayayo iscampamento ebꞌnaj bꞌey akꞌal Refaim. 14 Yet ayikto yaꞌ David yul huneꞌ chꞌen nhachꞌen, aypaxo xin huneꞌxa majan ebꞌnaj filisteo bꞌey Belén. 15 Hayet yapni ebꞌnaj oxwanh tuꞌ iskꞌatanh yaꞌ David yalni yaꞌ tzet kaw choche iskꞌul tet ebꞌnaj, yalni yaꞌ yinh kaw ip: «¡Ayxikꞌa ay hunu mak chiꞌaqꞌni nichꞌano ha haꞌ ay yul kꞌuh ay istiꞌ ispultahil konhobꞌ Belén wukꞌuꞌan!» xhi yaꞌ.
16 Hayet yabꞌen ebꞌnaj oxwanh soldado kaw helan yalni yaꞌ David hakaꞌ tuꞌ, isto ebꞌnaj. Yokto ebꞌnaj yul iscampamento ebꞌnaj filisteo, yinahti ebꞌnaj ha haꞌ yul kꞌuh ay istiꞌ ispultahil Belén. Ismeltzo ebꞌnaj iskꞌatanh yaꞌ David, yaqꞌni ebꞌnaj haꞌ tet yaꞌ, yajaꞌ mach isje yaꞌ yukꞌuꞌ haꞌ, wal xin isjobꞌayo yaꞌ rey haꞌ sat txꞌotxꞌ hakaꞌ hunu yebꞌalqꞌabꞌe tet Komam Dios Jahawil. 17 Yalni yaꞌ David: «Mamin, mach chu wukꞌnihan huneꞌ haꞌ tiꞌ. ¿Chimisje wukꞌnihan haꞌ hakaꞌtanhe ischikꞌil ebꞌnaj bꞌey iqꞌno haꞌ chiwukꞌan? Machoj, yuto ebꞌnaj tiꞌ ishin isbꞌa ebꞌnaj tet kamikal yet isbꞌey yiqꞌno haꞌ,» xhi yaꞌ David. Matxa xin yukꞌ yaꞌ haꞌ.
Haꞌ huneꞌ tiꞌ iswatxꞌe ebꞌnaj oxwanh soldado kaw helan.
18 Haꞌ xin naj Abisai, yuxhta naj Joab, yunin ix Sarvia, haꞌ naj kaw kankano ye xol ebꞌnaj 30 (lahonhebꞌ iskawinaj) soldado kaw helan. Yet hunel ismaqꞌkamo naj 300 ebꞌnaj winaj yu islanza, yuxin kaw chito bꞌinakano naj hakaꞌ ebꞌnaj oxwanh. 19 Haꞌ naj Abisai tuꞌ kaw bꞌinakano xol ebꞌnaj 30 (lahonhebꞌ iskawinaj) soldado kaw helan, yok naj iswiꞌehalo yinh ebꞌnaj tuꞌ, yajaꞌ xin ayto machi eliko yu naj hakaꞌ ebꞌnaj oxwanh bꞌabꞌel.
20 Hakpax tuꞌ naj Benaía, ah konhobꞌ Cabseel, iskꞌahol naj Joiada, haꞌ naj tuꞌ kaw helan naj, txꞌiꞌal tzet ye tuꞌ iswatxꞌe naj. Haꞌ naj potxꞌnikamo kakꞌonh noꞌ bꞌalam bꞌey Moab. Haxa yet hunel yet kaw chiꞌay chꞌen chew, yokto naj yul huneꞌ holan ismaqꞌnikamo naj huneꞌ noꞌ bꞌalam ayikto bꞌey tuꞌ. 21 Ismaqꞌnipaxokamo naj huneꞌ naj ah Egipto kaw nimajalkano istel. Ayko xin islanza naj ah Egipto yul isqꞌabꞌ, yajaꞌ ismaqꞌilo naj Benaía chꞌen lanza yul isqꞌabꞌ naj yu huneꞌ te teꞌ. Yinikanh naj islanza naj, yaqꞌni naj chꞌen yinh naj. Haꞌtikꞌa xin islanza naj tuꞌ aqꞌni kamoj. 22 Haꞌ huneꞌ tuꞌ yu naj Benaía, iskꞌahol naj Joiada. Chibꞌinakano naj yinta ebꞌnaj oxwanh kaw helan. 23 Hak tuꞌ yu isbꞌinakano naj Benaía xol ebꞌnaj 30 (lahonhebꞌ iskawinaj), yajaꞌ xin ayto mach chiꞌeliko yu naj hakaꞌ ebꞌnaj oxwanh bꞌabꞌel. Wal xin yako yaꞌ David naj Benaía tuꞌ iswiꞌehalo yinh ebꞌnaj soldado chitanheni.
24 Haꞌ ebꞌnaj 30 (lahonhebꞌ iskawinaj) soldado kaw helan tuꞌ, haꞌ ton ebꞌnaj tiꞌ: Naj Asael, yuxhta naj Joab, naj Elhanán iskꞌahol naj Dodo ay bꞌey Belén, 25 naj Sama, ay bꞌey Harod, naj Elica ay bꞌey Harodpaxoj. 26 Naj Heles ay bꞌey Palti, naj Ira iskꞌahol naj Iques ay bꞌey Tecoa. 27 Naj Abiezer ay bꞌey Anatot, naj Mebunai ay bꞌey Husah, 28 naj Salmón ahohíta, naj Maharai ay bꞌey Netofa. 29 Naj Heleb iskꞌahol naj Baana, ay bꞌey Netofa, naj Itai iskꞌahol naj Ribai ay bꞌey Gabaa, ay yul ismajul ebꞌnaj Benjamín. 30 Naj Benaía ay bꞌey Piratón, naj Hidai ay istiꞌla ha haꞌ Gaas. 31 Naj Abi-albón ay bꞌey Arba, naj Azmavet ay bꞌey Bahurim. 32 Naj Eliab ay bꞌey Saalbón, naj Jonatán, huneꞌ iskꞌahol naj Jasén. 33 Naj Sama ay bꞌey Ara, naj Ahíam, iskꞌahol naj Sarar aypaxo bꞌey Ara. 34 Naj Elifelet iskꞌahol naj Ahasbai ay bꞌey Maaca, naj Eliam iskꞌahol naj Ahitofel ay bꞌey Gilo, 35 naj Hezrai ay bꞌey Carmel, naj Paarai ay bꞌey Arba, 36 naj Igal iskꞌahol naj Natán ay bꞌey Soba, naj Bani ay bꞌey Gad, 37 naj Selec ay bꞌey Amón, naj Naharai ay bꞌey Beerot, haꞌ naj yiqꞌomal ismunlabꞌal naj Joab yet howal, naj yunin ix Sarvia, 38 naj Ira, ay bꞌey Itri, naj Gareb ay bꞌey Itripaxoj, 39 yebꞌ naj Urías, naj heteo, 37 (hujlanhwanh iskawinaj) isbꞌisil ebꞌnaj tuꞌ yinh sunil.