Isbꞌit yaꞌ rey David yu qꞌoji yaꞌ yinh howal
22
Isbꞌitnhe yaꞌ rey David huneꞌ bꞌit yu iskolilo Komam Dios Jahawil yaꞌ yul isqꞌabꞌ yaꞌ Saúl, yebꞌ tet sunil ebꞌnaj ayko ishowal yinh yaꞌ. 2 Yalni yaꞌ yinh isbꞌit tet Komam Dios hakaꞌ tiꞌ:«Mamin, tawinh chitit wipan, yuxin kaw chintzalahan tawinh.
3 Mamin, lahan hach hakaꞌ hunu chꞌen chꞌen bꞌay chinkolinbꞌahan.
Hach inkolomalan, hach inDiosalan. Tawinh chitit wipan, yuxin tawinh chikawxi inkꞌulan.
Chinhakolan hakaꞌ chu ispahni chꞌen escudo flecha. Kaw ay yip huneꞌ kolbꞌanile chitit tawinh, kaw aykano yelapnoj.
4 Mamin, hach tiꞌ hatzan yal-lax kꞌul-la tzotiꞌ tawinh.
Hayet chiꞌahwawan tawet chinhakolan tet ebꞌnaj ayko ishowal winhan.
5 Yoche naj kamikal kinyaqꞌaꞌ aykꞌayojan yul islatzꞌabꞌ,
kaw kinxiwan tet yip naj aqꞌomkamo anma tuꞌ.
6 Kinishojnayojan naj, yunhe waykꞌayan yul istxꞌanh naj chiꞌinito anma yinh kambꞌal.
7 Yinh ej isyaꞌtajil tuꞌ ah wawan tet Komam Jahawil, inqꞌannihan iskolwal inDiosalan winhan,
yabꞌen Komam wawihan bꞌey yatut, apni yul innuqꞌan yul istxikin Komam.
8 Yekꞌ huneꞌ niman txixkabꞌ kaw how, isbꞌilikanh isxeꞌ nimeta witz,
yu ishowal Komam.
9 Elti nhubꞌ yul istxam Komam,
yelti qꞌaꞌ yul istiꞌ yelpaxti tzaqꞌaqꞌ yul istiꞌ Komam.
10 Ishajni isbꞌa satkanh,
yayiloj nimeta qꞌej moyan ayko yalanh yoj Komam.
11 Ayahto yibꞌanh huneꞌ querubín yekꞌ xol jaqꞌeqꞌ.
12 Yebꞌanto isbꞌa xol qꞌejholo hoyaniko yinh,
yebꞌ nimeta qꞌej moyan iqꞌbꞌil nhabꞌ yu.
13 Istzejlalti sata Komam, istit nimeta tzaqꞌaqꞌ kaj nhatxnhonhe qꞌaꞌ yinh.
14 Isnhirla yul satkanh yu Komam,
yabꞌelax yul isnuqꞌ Komam kaw aykano yelapnoj.
15 Isqꞌojnito Komam islitꞌ yinh ebꞌnaj ayko ishowal yinh, yelkanh ebꞌnaj,
yaniti Komam kꞌuh istanhkanilo ebꞌnaj.
16 Hak tuꞌ yu yixtanhwati yich haꞌ mar,
yixtanhwipaxo isxeꞌ txꞌo txꞌotxꞌ yu ishowal Komam yebꞌ yu yip isxobꞌ istiꞌ Komam.
17 Yaniti Komam isqꞌabꞌ wetan yul satkanh,
kinyinahtijan xol ha haꞌ kaw nimej yich.
18 Kiniskolan Komam tet ebꞌnaj kaw ay yip ayko ishowal winhan,
ebꞌnaj chichiwa iskꞌul winhan. Hunteqꞌan ebꞌnaj tuꞌ kaw ekꞌbꞌal yip ebꞌnaj insatajan.
19 Hunteqꞌan ebꞌnaj tuꞌ ok bꞌulna ebꞌnaj winhan yet kaw ayinikojan yinh ej isyaꞌtajil,
yajaꞌ xin haꞌ Komam kolwa winhan.
20 Kiniskolilojan Komam,
yaqꞌ Komam inkolbꞌanilan yuto xahan ay hinan yu.
21 Haꞌ Komam aqꞌni ispaj selel istoholal chinwatxꞌehan,
machi inmulan yuxin hak tuꞌ yu ispajtzen Komam wetan.
22 Hanintiꞌan ayinnhetikꞌakojan yul isbꞌeh Komam.
Machi hunelo tiꞌ chinmanhkꞌohan tzet chal inDiosalan.
23 Aynhetikꞌako ischejbꞌanil Komam yinh innabꞌalan,
maxhtikꞌa hunelo tiꞌ chiwintanhenkaniltojan ischejbꞌanil Komam.
24 Machi nichꞌano intxꞌojalan sata Komam, xaꞌinpohilo hinbꞌahan yinh istxꞌojal.
25 Haꞌ Komam aqꞌni iskꞌulal ispaj selelo wetan,
yu machi nino istxꞌojal chiꞌekꞌ yinh innabꞌalan.
26 Mamin, haꞌ mak chitzꞌay iskꞌul yinh yet anmahil, chitzꞌaypaxo hakꞌul yinh.
Haꞌ mak chiwatxꞌen istoholal, istoholal chawatxꞌepaxo yinh.
27 Haꞌ mak chiwatxꞌen iskꞌulal, haꞌ iskꞌulal chawatxꞌepaxo yinh.
Wal mak chiwatxꞌen istxꞌojal how chawute habꞌa yinh.
28 Haꞌ mak chewchotanhe chute isbꞌa,
chaxhkolwa yinh, yajaꞌ wal mak chiyikanh isbꞌa chawilo ispixan.
29 Mam Wahawil, hach inDiosalan, hach chawaqꞌ sajilqꞌinal wetan xol qꞌejholoj.
30 Yu hakolwal chintanhtzelojan ebꞌnaj ayko ishowal winhan,
kat inpalkꞌonan satakꞌto iskꞌubꞌal iskonhobꞌ ebꞌnaj.
31 Kaw toholkano isbꞌeybꞌal Komam, sunil tzet chalte Komam yet ay janiko yipo kokꞌul.
¡Sunil mak chikawxi iskꞌul yinh Komam Dios, chiskol Komam!
32 ¿Aymi hunuxa dios yibꞌanhilo Komam Dios?
¿Mak hunuxa dios chu konhiskolni?
33 Haꞌ Komam Dios chiꞌaqꞌni wipan.
Haꞌ Komam chiwatxꞌen inbꞌehan.
34 Haꞌ Komam chiꞌaqꞌni yip wojan inbꞌelwihan yinhla witz yinh anhe,
hakaꞌ isbꞌelwi noꞌ miꞌe sajche.
35 Haꞌ Komam chinkuynihan inkolni hinbꞌahan yinh howal.
Haꞌ chiꞌaqꞌni yip inqꞌabꞌan inqꞌojnitojan chꞌen litꞌ nabꞌa bronce.
36 Mamin, hach chinhawilan yebꞌ hach chinhakolan,
hawatxꞌqꞌabꞌ iqꞌnhe hinan. Yu iskꞌulchꞌanil hakꞌul chawaqꞌ iskꞌulal wetan.
37 Hach anheinikojan yul huneꞌ bꞌeh nimejal sat,
yuxin mach chinaykꞌayan.
38 Chintzumbꞌehan ebꞌnaj ayko ishowal winhan,
istzujchayo ebꞌnaj wuhan, masanta chikam ebꞌnaj sunil wuhan kat xin inmeltzohan.
39 Kaw chinxitkantojan ebꞌnaj,
hak tuꞌ xin matxa chu yahwano ebꞌnaj, kat iskankano ebꞌnaj yalanh wojan.
40 Hach hawaqꞌ wipan inqꞌojihan yinh ebꞌnaj.
Yaypaxo jahno ebꞌnaj manhkꞌom yinh insatan.
41 Yelpaxokanh ebꞌnaj chichiwa iskꞌul winhan yinh insatan.
Hak tuꞌ yu intanhtzenilojan ebꞌnaj ayko ishowal winhan.
42 Isqꞌan ebꞌnaj tato ay mak chikolwa yinh, yaj machi mak kolni ebꞌnaj.
Eliko yaw ebꞌnaj yinh Komam, yaj mach ispajtze Komam tet ebꞌnaj.
43 Kaw kokꞌ wuteyojan ebꞌnaj hakaꞌ pojoj chiyijto jaqꞌeqꞌ.
Inxanhnayojan ebꞌnaj hakaꞌ koxanhnayo tzꞌotzꞌew yulaj bꞌeh.
44 Mamin, kinhakolan tet ishowal anma ay yul konhobꞌ.
Kinhawanikojan yahawilo yinh ej konhobꞌ, chisyijen anma tzet chiwalan, anma mach ohtabꞌilo wuhan.
45 Hayet chiyabꞌen anma tuꞌ tzet chiwalan, chisyijen wetan.
Anma nan konhobꞌal kꞌul istzotel winhan.
46 Anma nan konhobꞌal paxilo yip isluylunkanh, yelkanh bꞌay ebꞌabꞌil isbꞌa.
47 ¡Itzitz Komam Dios! ¡Hal-laxojabꞌ tzotiꞌ kꞌul yinh Komam!
Ilaxojabꞌkanh isbꞌi Komam Dios Kokolomal.
48 Chaqꞌ Komam isyaꞌtajil tet mak ayko ishowal winhan,
kat yinayo isbꞌa ej konhobꞌ wetan yu Komam.
49 Haꞌ Komam chinkolnilojan tet ebꞌnaj ayko ishowal winhan.
Chiniskolan Komam tet ebꞌnaj txꞌoj chiꞌahwejna winhan. Mamin,
hach chinhakolan tet ebꞌnaj chiswatxꞌe istxꞌojal, ebꞌnaj mach isnimankꞌulal.
50 Yuxin chiwalan kꞌul-la tzotiꞌ tawinh yulaj nime konhobꞌ, kat inbꞌitnhenan habꞌi Mam Wahawil.a
51 Hach chachkolwa winhan inqꞌojihan yinh ebꞌnaj ayko ishowal winhan.
Hanin rey intiꞌan sikꞌbꞌil inilojan hawu.
Kaw chayekanilo iskꞌulal hakꞌul winhan hanin David intiꞌan,
yebꞌ tet anma chipohchalto winhan yinh sunilbꞌal ej tiempo,» xhi yaꞌ David yinh isbꞌit.