2 Lahwi tuꞌ yawten yaꞌ rey David ebꞌnaj ah Gabaón yu istzotel yaꞌ tet ebꞌnaj. Ebꞌnaj Gabaón tuꞌ, mach Israelo ebꞌnaj, yikꞌal ebꞌnaj amorreo ye ebꞌnaj. Yet yalanhtokanoj yalnikano ebꞌnaj Israel yaqꞌni bꞌinaho ebꞌnaj isbꞌi Komam Dios, tato mach chiskꞌaytzelo ebꞌnaj ebꞌnaj Gabaón; yajaꞌ wal yaꞌ Saúl xin yaqꞌle yaꞌ iskꞌaytzelo ebꞌnaj yu iskꞌulal yinh ebꞌnaj Israel yebꞌ ebꞌnaj Judá. 3 Isqꞌambꞌen yaꞌ rey David tet ebꞌnaj ah Gabaón:

—¿Tzet cheyoche chinwatxꞌehan teyinh tinanh, yunhe istzala hekꞌul jinhanh, kat heqꞌanni iskꞌulal Komam Dios Jahawil jibꞌanhanh hanhonh konhiskonhobꞌonh tiꞌanh? xhi yaꞌ.

4 Istaqꞌwi ebꞌnaj ah Gabaón:

—Mach yuho chꞌen melyu yuxin okkano kꞌas yaꞌ Saúl tuꞌ jetanh, mach chijochepaxojanh tato ay kamikal chiꞌok texol, hex Israel hex tiꞌ, xhi ebꞌnaj. Istaqꞌwi yaꞌ rey David tet ebꞌnaj:

—Wal xin haꞌ bꞌaytet cheqꞌana, chiwaqꞌan, xhi yaꞌ.

5 Istaqꞌwi ebꞌnaj ah Gabaón:

—Haꞌ yaꞌ Saúl, haꞌ yaꞌ maqꞌnikamo jet konhobꞌanh, yuxin yoche yaꞌ konhiskꞌaytzelojanh, yunhe matxa hunujonhanh chonhkananh sat txꞌotxꞌ Israel tiꞌ. 6 Yuxin chijochehanh chawako hujwanho yuninal yaꞌ Saúl yul koqꞌabꞌanh. Haꞌ ebꞌnaj hujwanh tuꞌ chikohojkamojanh ebꞌnaj sata Komam Dios Jahawil bꞌey Gabaa, iskonhobꞌ yaꞌ Saúl, yaꞌ issayiko Komam isreyalo Israel, xhi ebꞌnaj. Istaqꞌwi yaꞌ rey David tet ebꞌnaj:

—Kꞌultikꞌa, chiwakojan ebꞌnaj yul heqꞌabꞌ, xhi yaꞌ.

7 Yajaꞌ wal naj Mefi-boset, iskꞌahol yaꞌ Jonatán mach yako yaꞌ naj yul isqꞌabꞌ ebꞌnaj, yu huneꞌ tzet tꞌinhbꞌabꞌilkano yu yaꞌ David yebꞌ yaꞌ Jonatán yet yalanhtokanoj bꞌay yaqꞌ bꞌinaho yaꞌ David isbꞌi Komam Dios. Wal yaꞌ Jonatán tuꞌ, iskꞌahol yaꞌ Saúl ye yaꞌ. 8 Yaniko yaꞌ rey David tuꞌ kawanh yunin ix Rizpa, iskutzꞌin naj Aja yul isqꞌabꞌ ebꞌnaj. Haꞌ ebꞌnaj kawanh tuꞌ iskꞌahol yaꞌ Saúl ye ebꞌnaj, huneꞌ naj chiyij Armoni, hunxa xin naj Mefi-boset. Yanipaxiko yaꞌ howanh yunin ix Merab, iskutzꞌin yaꞌ Saúl, yul isqꞌabꞌ ebꞌnaj. Haꞌ xin naj Adriel ismam ebꞌnaj howanh tuꞌ. Naj Adriel, iskꞌahol naj Barzilai ah Mehola naj. 9 Yaniko yaꞌ rey David ebꞌnaj hujwanh tuꞌ yul isqꞌabꞌ ebꞌnaj Gabaón, ishojlaxkamo ebꞌnaj yinh iswiꞌ huneꞌ wonhan sata Komam Dios Jahawil, hak tuꞌ yu iskam ebꞌnaj ishujwanhil yinh istiempohal yichebꞌanil iskꞌuplaxkanh ixim cebada.

10 Wal ix Rizpa iskutzꞌin naj Aja, to ix istanheꞌ isnimanil ebꞌnaj hojlaxkamo tuꞌ, yinito ix huneꞌ qꞌap qꞌap yet bꞌiskꞌulal, islitxꞌbꞌanayo ix qꞌap yibꞌanh huneꞌ chꞌen chꞌen, yay hilno ix yibꞌanh. Iskankano ix istanheꞌ isnimanil ebꞌnaj bꞌey tuꞌ yulbꞌal yet ichiko iskꞌuplax ixim cebada masanto yet yok haꞌ nhabꞌ. Machi xin ischayo ix noꞌ chꞌik istꞌojoto isnimanil ebꞌnaj yet tzꞌayikal, haxa yet aqꞌbꞌalil mach ischako ix yul noꞌ xoltelajil noqꞌ iskꞌuxoꞌto isnimanil ebꞌnaj.

11 Haxa yet yal-lax tet yaꞌ rey David yinh ix Rizpa, iskutzꞌin naj Aja, ix iskabꞌ yixal yaꞌ kamom Saúl, 12 ischejnito yaꞌ David ilaxoti isbꞌajil isnimanil yaꞌ kamom Saúl yebꞌ isbꞌajil iskꞌahol, haꞌ ton yaꞌ Jonatán, bꞌey konhobꞌ Jabes yul ismajul Galaad. Haꞌ bꞌey tuꞌ mujbꞌil ebꞌnaj, yuto ebꞌnaj Jabes tuꞌ bꞌey elqꞌanoti isnimanil ebꞌnaj tꞌunhankanh iskawilal txonhbꞌal bꞌey Bet-sán. Yuto yet lahwi ispotxꞌnikamo ebꞌnaj filisteo yaꞌ Saúl yebꞌ yaꞌ Jonatán istꞌunhbꞌalaxkanokanh ebꞌyaꞌ. 13 Ischejni yaꞌ David ilaxoti isbꞌajil yaꞌ Saúl yebꞌ yaꞌ Jonatán bꞌay mujan tuꞌ, yinipaxti ebꞌnaj isbꞌajil isnimanil ebꞌnaj hujwanh hojlaxkamoj. 14 Ismujni ebꞌnaj isbꞌajil yaꞌ Saúl yebꞌ yaꞌ Jonatán bꞌay mujan ismam yaꞌ Saúl tuꞌ, haꞌ ton naj Cis. Mujlax ebꞌnaj bꞌey Zela sat istxꞌotxꞌ ebꞌnaj Benjamín. Hak tuꞌ yu isyijen ebꞌnaj chejabꞌ tuꞌ sunil tzet yal yaꞌ rey David. Lahwi tuꞌ yanayo Komam Dios iskꞌulal yibꞌanh txꞌotxꞌ Israel hakaꞌ yu isqꞌanni yaꞌ David.

15 Lahwi tuꞌ yaniko ebꞌnaj filisteo howal yinh ebꞌnaj Israel, isto yaꞌ rey David yebꞌ issoldado yinh howal tuꞌ. Hayet ayko howal tuꞌ xin issikꞌilo yaꞌ rey David, 16 ay xin huneꞌ naj filisteo kaw nimajal istel chiyij isbꞌi Isbi-benob. Haꞌ islanza naj tuꞌ bronce chꞌen, aymi 60 (oxkꞌal) libra yalil, aypaxiko huneꞌ espada kaw akꞌto yinh yikta naj. Kaw xin lanhanxa isqꞌoji naj Isbi-benob yinh yaꞌ rey David, 17 yajaꞌ xin apni naj Abisai, yunin ix Sarvia, kolwal yinh yaꞌ. Ispotxꞌnikamo naj Abisai naj Isbi-benob tuꞌ. Yuxin yal ebꞌnaj issoldado yaꞌ rey David hakaꞌ tiꞌ: «Mam rey, wal tinanh, matxa bꞌaqꞌinhal chaxhelto yinh howal jintajanh, yunhe mach chitanhtzelaxilo huneꞌ mak ayko yipo kokꞌulanh hanhonh Israelonh tiꞌanh,» xhi ebꞌnaj tet yaꞌ rey David.

18 Lahwi tuꞌ yokpaxo huneꞌxa howal xol ebꞌnaj Israel yebꞌ ebꞌnaj filisteo bꞌey Gob, isqꞌoji naj Sibecai, ah Husa yinh naj Saf, ispotxꞌnikamo naj naj. Naj Saf tuꞌ kaw nimajalkano istel naj, yuto yikꞌal ebꞌnaj nimeta winaj ye naj. 19 Haxa yet hunelxa xin okpaxo howal xol ebꞌnaj Israel yebꞌ ebꞌnaj filisteo bꞌey Gob, isqꞌoji naj Elhanán, iskꞌahol naj Jaare-oregim ah Belén yinh naj Goliat ah Gat, ispotxꞌnikamo naj naj. Haꞌ islanza naj tuꞌ lahan istel hakaꞌ istel te teꞌ bꞌay chibꞌaqꞌolaxiko txꞌal txꞌal yet chembꞌal.

20 Lahwi tuꞌ yaqꞌnipaxo ebꞌnaj howal bꞌey Gat, haꞌ bꞌey tuꞌ xin ay huneꞌ naj filisteo kaw nimajal istel, yikꞌal ebꞌnaj nime winaj ye naj. Huneꞌ naj tuꞌ kabꞌlahonhebꞌ yiximal isqꞌabꞌ naj yok kabꞌlahonhebꞌ yiximal yoj naj. 21 Kaw xin chibꞌuchwa naj yinh ebꞌnaj soldado Israel. Wal xin qꞌoji naj Jonatán, iskꞌahol naj Simea yinh naj, ismaqꞌnikamo naj naj. Naj Simea tuꞌ yuxhta isbꞌa naj yebꞌ yaꞌ rey David. 22 Ebꞌnaj kanhwanh winaj kaw nime istel tuꞌ yikꞌal anma nime winaj ekꞌlena bꞌey Gat ye ebꞌnaj; yajaꞌ potxꞌlaxkamo ebꞌnaj yu issoldado yaꞌ rey David, hak tuꞌ xin yu yaykꞌay ebꞌnaj yul isqꞌabꞌ yaꞌ rey David.