Tanhilo konhobꞌ Rabá yu yaꞌ rey David
20
Hayet huneꞌxa habꞌil yinh ixahaw yet chiꞌelto ebꞌyaꞌ rey yinh howal, yelto naj Joab yebꞌ ebꞌnaj soldado Israel yinh howal yetanto ebꞌnaj istxꞌotxꞌ ebꞌnaj amonita. Lahwi tuꞌ yapni ebꞌnaj bꞌey konhobꞌ Rabá, ishoynayo ebꞌnaj konhobꞌ tuꞌ, istanhilo konhobꞌ yu ebꞌnaj, yuchkꞌanto naj Joab konhobꞌ, wal yaꞌ rey David xin, kankano yaꞌ bꞌey Jerusalén. 2 Lahwi tuꞌ yapni yaꞌ rey David yinolo iscorona naj isreyal konhobꞌ Rabá yinh iswiꞌ. Huneꞌ corona tuꞌ oro, txꞌiꞌal chꞌen chꞌen kaw kꞌulejchꞌan jilni ayko yinh yelawiloj; huneꞌ corona tuꞌ huneꞌ talento yalil, haꞌ chaliloj 66 (wajebꞌ iskanhwinaj) libra. Yalaxiko huneꞌ corona tuꞌ yinh iswiꞌ yaꞌ rey David; kaw xin txꞌiꞌal tzetaj ye tuꞌ kaw ay istohol yilo ebꞌnaj yul konhobꞌ Rabá. 3 Yinilo yaꞌ rey David anma ay yul konhobꞌ tuꞌ, yaniko yaꞌ ebꞌnaj yinh munil yinh chꞌen sierra, yinh chꞌen chiꞌinilti sat ixim trigo, yebꞌ yinh chꞌen eche. Haktikꞌapax tuꞌ yute yaꞌ rey David sunil anma ay yul iskonhobꞌ ebꞌnaj amonita, lahwi tuꞌ ismeltzo yaꞌ David yebꞌ sunil anma tuꞌ bꞌey Jerusalén.Ispotxꞌ ebꞌnaj issoldado yaꞌ David ebꞌnaj winaj kaw nimej istel
4 Lahwi tuꞌ yok huneꞌ howal yebꞌ ebꞌnaj filisteo bꞌey Gezer; haꞌ xin naj Sibecai, ah Husa potxꞌnikamo naj Sipai, naj tuꞌ xin yikꞌal ebꞌnaj winaj nime istel ye naj. Hak tuꞌ yu yokkano ebꞌnaj filisteo yalanh yip ebꞌnaj Israel.
5 Tzujan tuꞌ yok huneꞌxa howal yinh ebꞌnaj filisteo, hayet hunel tuꞌ haxa naj Elhanán, iskꞌahol naj Jair maqꞌnikamo naj Lahmi, yuxhta naj Goliat, naj ay bꞌey konhobꞌ Gat, haꞌ yoj islanza naj Lahmi tuꞌ, lahan istel hakaꞌ teꞌ chꞌokniko yinh chembꞌal.a
6 Lahwi tuꞌ, yok huneꞌxa howal bꞌey Gat. Haꞌ yul konhobꞌ tuꞌ ay huneꞌ naj winaj kaw nimajalkano istel, wajebꞌ yiximal yoj yebꞌ wajebꞌ yiximal isqꞌabꞌ naj, hak tuꞌ xin 24 (kanhebꞌ iskawinaj) isbꞌisil yinh sunil; yikꞌal ebꞌnaj winaj nime istel ye naj. 7 Haꞌ huneꞌ naj tuꞌ, kaw chibꞌuchwa naj yinh ebꞌnaj Israel, yuxin potxꞌlaxkamo naj yu naj Jonatán; naj Jonatán tuꞌ, iskꞌahol naj Simea, yuxhta yaꞌ David ye naj. 8 Haꞌ hunteqꞌan ebꞌnaj tuꞌ yikꞌal ebꞌnaj winaj kaw nimej istel ay bꞌey konhobꞌ Gat ye ebꞌnaj, yajaꞌ tanhilo ebꞌnaj yu yaꞌ David yebꞌ yu ebꞌnaj issoldado.