—Ay kawanh ebꞌnaj winaj ay yul huneꞌ konhobꞌ, huneꞌ naj kaw qꞌalom, hunxa naj xin kaw mebꞌaꞌ. 2 Naj qꞌalom tuꞌ, kaw txꞌiꞌal ismeꞌ naj yebꞌ iswakax naj. 3 Wal naj mebꞌaꞌ xin huneꞌnhe nichꞌan ismeꞌ naj, loqꞌbꞌil noꞌ yu naj, haꞌ naj xin aqꞌni chꞌibꞌo noꞌ yul yatut yinta yuninal. Haꞌ tzet chislo naj, haꞌ chislo noꞌ, ha haꞌ yul isvaso naj, haꞌ chukꞌ noꞌ, haꞌ istxam iskꞌul naj chiway noꞌ. Kaw xahan ay noꞌ yu naj hakaꞌ isxahanil chil naj iskutzꞌin. 4 Haꞌ yinh huneꞌ tzꞌayik xin apni huneꞌ naj nahat ispeto istukleꞌ naj qꞌalom tuꞌ, yajaꞌ xin mach ispotxꞌ naj qꞌalom hunu ismeꞌ maka iswakax iskꞌuxuꞌ naj, wal xin haꞌ ismeꞌ naj mebꞌaꞌ tuꞌ bꞌey naj yiqꞌaꞌtij, ispotxꞌni naj noꞌ, iskꞌuxuꞌ naj apni tukwal tuꞌ, xhi yaꞌ Natán.

5 Hayet yabꞌen yaꞌ rey David huneꞌ tuꞌ istit ishowal yaꞌ yinh naj qꞌalom inilo ismeꞌ naj mebꞌaꞌ, yalni yaꞌ tet yaꞌ Natán:

—Chiwaqꞌ bꞌinahojan isbꞌi Komam Jahawil chiwalnihan tato haꞌ naj inilo ismeꞌ naj mebꞌaꞌ tuꞌ, yilal iskam naj, 6 kat yaqꞌni naj kanhkꞌonh noꞌ nixhte meꞌ selelo noꞌ, yuto mach tzꞌay iskꞌul naj yinilo ismeꞌ naj mebꞌaꞌ tuꞌ, xhi yaꞌ rey.^a

7 Yalni yaꞌ Natán tet yaꞌ rey David tuꞌ:

—Hachton huneꞌ naj tuꞌ. Hak tiꞌ yalni Komam Jahawil, koDiosal hanhonh Israelonh tiꞌ tawet: “Haninan kach insikꞌilojan kach wanikojan isreyalo Israel, kach inkolnilojan yul isqꞌabꞌ yaꞌ Saúl.^b 8 Wanikojan yatut yaꞌ hawahawil tuꞌ yebꞌ ebꞌix yixal yaꞌ yul haqꞌabꞌ, kach wanikojan yahawilo txꞌotxꞌ Israel yebꞌ txꞌotxꞌ Judá, ta xin hanikꞌnhe tuꞌ chawabꞌe, chiwaqꞌpaxojan yaqꞌbꞌil tawet. 9 Yajaꞌ ¿tzet yinh xin hayah intzotiꞌan, hawatxꞌen istxꞌojal insatajan? Hamaqꞌkamo naj Urías heteo yu yespada ebꞌnaj amonita, hawinilo yixal naj yok ix hawixaloj. 10 Yu huneꞌ tuꞌ, yuxin machi bꞌaqꞌinhal tiꞌ chishekꞌilo isbꞌa howal yul hawatut xol hawuninal, yu hayahkan intzotiꞌan, hawinilo yixal naj Urías heteo hawiqꞌni ix. 11 Hanin Yahawintiꞌan chiwalan tato haꞌtikꞌa hawuninal chiꞌiniti isyaꞌtajil tawibꞌanh, chiwinilojan ebꞌix hawixal tawet, kat wanikojan ebꞌix yul isqꞌabꞌ hakꞌahol, kat isway naj yebꞌ ebꞌix yet tzꞌayikal. 12 Hach tiꞌ ewantajil hawatxꞌe istxꞌojal, wal hinan xin, yet tzꞌayikal chinyelojan istxꞌojal chiwatxꞌelax yinh ebꞌix hawixal tuꞌ yinh sat sunil Israel,” xhi Komam, xhi yaꞌ Natán.^c

13 Istaqꞌwi yaꞌ rey David tet yaꞌ Natán:

—Kaw yeli maꞌok inmulan yul sat Komam Jahawil, xhi yaꞌ. Yalni yaꞌ Natán tet yaꞌ David:

—Yajaꞌ mayaqꞌ nimankꞌulal Komam Jahawil yinh hamul, xin mach chachkamoj; 14 yajaꞌ yu txꞌoj istzotel ebꞌnaj ayko ishowal yinh Israel yinh Komam Jahawil yu tzet hawatxꞌe tuꞌ, yuxin haꞌ nichꞌan hakꞌahol tolto pitzkꞌa tuꞌ, chikami, xhi yaꞌ Natán tet yaꞌ rey David.

15 Lahwi tuꞌ ismeltzo yaꞌ Natán yatut. Yaniti Komam Jahawil huneꞌ howla yabꞌil yinh nichꞌan yuninal yaꞌ David yebꞌ ix yixal naj Urías. 16 Yok yaꞌ rey David txahlo yinh nichꞌan iskꞌahol tuꞌ tet Komam Dios, mach xin waꞌ yaꞌ yu istxahli, sunilbꞌal aqꞌbꞌal xin ayayo yaꞌ sat txꞌotxꞌ. 17 Isto ebꞌnaj ischejabꞌ yaꞌ, ebꞌnaj ichamxa ilwal yinh yaꞌ yunhe yalni ebꞌnaj tet yaꞌ tato chiꞌahwano yaꞌ sat txꞌotxꞌ, yajaꞌ xin mach isjekanh yaꞌ, yebꞌ mach waꞌpaxo yaꞌ yinta ebꞌnaj tuꞌ.

18 Haxa yinh ishuj tzꞌayik xin iskam nichꞌan iskꞌahol yaꞌ, yajaꞌ wal ebꞌnaj chejabꞌ, xiw ebꞌnaj yalni tet yaꞌ rey David tato kam nichꞌan unin, yuto istxum ebꞌnaj hakaꞌ tiꞌ: «Hayet itzitzto naj nichꞌan tiꞌ maxhtikꞌa yabꞌe yaꞌ rey tiꞌ tzet jalah, hajxamta chijalaꞌ tato makam naj nichꞌan tiꞌ, tzimi chiꞌeliko iskꞌul yaꞌ, yuxin machi jalilo aytaxka tzet chu yaꞌ,» xhi ebꞌnaj.

19 Yajaꞌ hayet yilni yaꞌ rey tuꞌ tato chitzotel ebꞌnaj chejabꞌ tuꞌ tet hunun, istxumnilo yaꞌ tato kam nichꞌan iskꞌahol yaꞌ. Isqꞌambꞌen yaꞌ tet ebꞌnaj:

—¿Tom makam inkꞌaholtuꞌan? xhi yaꞌ.

—Hoꞌ makam naj, xhi ebꞌnaj.

20 Hayet yabꞌen yaꞌ huneꞌ tuꞌ, yahwano yaꞌ sat txꞌotxꞌ, yaxhni yaꞌ, yanahto yaꞌ anh xuqꞌ sam xol xil iswiꞌ, ishelni yaꞌ xil isqꞌap, isto yaꞌ yul Yatut Komam Jahawil, yu yinayo isbꞌa yaꞌ sata Komam, lahwi tuꞌ yapni yaꞌ yatut, isqꞌanni yaꞌ tzet chislo, yilaxti tzet chislo yaꞌ, iswaꞌ yaꞌ. 21 Isqꞌambꞌen ebꞌnaj ischejabꞌ yaꞌ tet:

—Mam rey, ¿tzet yinh xin hak tuꞌ chawute? Yet itzitzto nichꞌan hakꞌahol tuꞌ mach haje waꞌoj, yebꞌ kaw chachoqꞌi, yajaꞌ hayet hawabꞌeni ta kam naj, hawahwanoj sat txꞌotxꞌ, hawaꞌi, xhi ebꞌnaj tet yaꞌ.

22 Istaqꞌwi yaꞌ:

—Hayet itzitzto naj, mach kinwaꞌan yu intxahlihan, kinoqꞌan inqꞌannihan tet Komam Dios ta chitzꞌay iskꞌul winhan, chiyaqꞌni kawxo naj. 23 Yajaꞌ wal tinanh xin ta xakam naj, ¿tzetto chiꞌoknikoj ta mach chinwaꞌan yu intxahlihan? ¿Tom chu waqꞌni meltzohojan naj hunelxa? Haninan chintohan bꞌay ay naj tuꞌ, maxhtaj naj chihul inkꞌatanhan, xhi yaꞌ.

24 Lahwi tuꞌ yalni yaꞌ rey David tet ix Betsabé tato niman chiyute iskꞌul ix yinh iskamikal yunin tuꞌ. Isway yaꞌ yebꞌ ix, ispitzkꞌati hunxa yuninal yaꞌ yebꞌ ix. Haꞌ nichꞌan winaj unin pitzkꞌa tuꞌ, Salomón yako yaꞌ isbꞌihoj. Kaw xin chitzala Komam Jahawil yinh nichꞌan unin tuꞌ. 25 Ischejniti Komam Jahawil yaꞌ Natán yalaꞌ tet yaꞌ rey David tato kaw chitzala Komam yinh nichꞌan unin tuꞌ, yuxin Jedidías ok isbꞌiho nichꞌan unin tuꞌ.^d

26 Wal naj Joab yebꞌ ebꞌnaj soldado Israel, ayto ebꞌnaj yanoko howal yinh ebꞌnaj amonita bꞌey konhobꞌ Rabá. Lanhan isqꞌoji ebꞌnaj yinh iskonhobꞌ isreyal ebꞌnaj amonita. 27 Ischejnito naj Joab huneꞌ ischejabꞌ yalno tet yaꞌ rey David hakaꞌ tiꞌ: «Hoybꞌilxayo konhobꞌ Rabá juhanh, maxinhoychayo ha haꞌ chiꞌokilo yul konhobꞌ tiꞌ juhanh. 28 Yuxin chiwaltojan tawet mam rey tato chakutxbꞌako hunteqꞌanxa ebꞌnaj soldado kankanoj, kat hatit yebꞌ ebꞌnaj hawanoko howal yinh konhobꞌ Rabá tiꞌ, kat haqꞌoji yinh, ta mach xin haninan chinqꞌojihan yinh, kat waniko inbꞌihan yinh, yajaꞌ mach chiwochehan hakaꞌ tuꞌ,» xhito naj Joab.

29 Hak tuꞌ yu iskutxbꞌaniko yaꞌ rey David ebꞌnaj soldado, isto yaꞌ yebꞌ ebꞌnaj yaqꞌaꞌko howal yinh konhobꞌ Rabá, isqꞌoji ebꞌnaj yinh konhobꞌ tuꞌ. 30 Yinilo yaꞌ iscorona naj isreyal konhobꞌ Rabá tuꞌ yinh iswiꞌ. Huneꞌ corona tuꞌ oro, 76 (wajlahonhebꞌ iskanhwinaj) libra yalil, ay xin hunteqꞌan chꞌen chꞌen kaw kꞌulchꞌan jilni ayko yinh yelawiloj; yanahto ebꞌnaj huneꞌ corona tuꞌ yinh iswiꞌ yaꞌ rey David. Kaw xin niman tzet ye tuꞌ kaw ay istohol ay yul konhobꞌ Rabá yilo yaꞌ rey David. 31 Haxa anma kantokano yul konhobꞌ, yito yaꞌ rey David, yaniko yaꞌ ebꞌnaj munil yu chꞌen sierra, yebꞌ yu chꞌen piocha, yebꞌ xin yu chꞌen eche, yanipaxiko yaꞌ ebꞌnaj nhusuꞌ ladrillo yul horno. Haktikꞌapax tuꞌ utelax hunteqꞌanxa konhobꞌ amonita yu yaꞌ rey David. Lahwi tuꞌ ismeltzo yaꞌ rey yebꞌ ebꞌnaj issoldado Israel bꞌey Jerusalén.