Naj Amnón yebꞌ ix Tamar
13
Naj Absalón, iskꞌahol yaꞌ rey David, ay huneꞌ yanabꞌ naj kaw kawla ix, chiyij Tamar. Ay xin huneꞌxa iskꞌahol yaꞌ rey David tuꞌ chiyij Amnón, yajaꞌ xin kaw ayko yanma naj Amnón yinh ix Tamar. 2 Kaw xin ok isyabꞌil naj yu bꞌiskꞌulal yu kaw ayko yanma naj yinh yanabꞌ tuꞌ. Yajaꞌ istxum naj Amnón tato mach chu yaykꞌay ix yu naj, yuto kaw qꞌopo ix, maxhto hunu winaj chiyiqꞌle ix. 3 Ay xin huneꞌ yamigo naj Amnón tuꞌ chiyij Jonadab, iskꞌahol naj Simea. Naj Simea tuꞌ yuxhta isbꞌa naj yebꞌ yaꞌ rey David, yajaꞌ wal naj Jonadab kaw helan naj yinh istxꞌojal. 4 Ay xin huneꞌ tzꞌayikal tiꞌ ok naj Jonadab isqꞌambꞌe tet naj Amnón:—Hach iskꞌahol yaꞌ rey tiꞌ, ¿Tzet yinh xin hunun tzꞌayik habꞌajbꞌayoj chiwilan, matzet xin chawal wetan? xhi naj.
Istaqꞌwi naj Amnón tet naj:
—Kaw ayko wanmahan yinh ix Tamar, yanabꞌ naj Absalón, naj wuxhtajan, xhi naj.
5 Yalni naj Jonadab tet naj Amnón hakaꞌ tiꞌ:
—Wal tinanh kꞌul hawubꞌ chahilbꞌan habꞌa sat hatxꞌat, kat hawalni tato kaw yaꞌ hach ay; haxa yet chul hamam kaxhyilnoj, kat hawalni tet yaꞌ ta chischejti yaꞌ ix Tamar tuꞌ kach yilaꞌ yunhe iswatxꞌen ix tzet chaloh, kat yaqꞌni ix tawet, kat hawilni ix, kat haloni tzet chiswatxꞌe ix tuꞌ, xhi naj.
6 Ishilbꞌan isbꞌa naj Amnón tuꞌ sat istxꞌat, kꞌul yubꞌ naj yaqꞌni yaꞌbꞌinlo isbꞌa naj. Yapni ismam naj yilnoj, yalni naj tet ismam:
—Mam, kaw chinqꞌanan tawet tato chachejti ix Tamar, wanabꞌan, iswatxꞌe kabꞌebꞌo inpanan, haꞌ kaw ix xin chiꞌaqꞌni ixim inwabꞌaꞌan, xhi naj.
7 Hak tuꞌ yu ischejnito yaꞌ rey David ix Tamar yatut naj Amnón, yalni yaꞌ tet ix:
—As il naj Amnón bꞌey yatut, kat hawatxꞌen tzet chislo naj, xhi yaꞌ.
8 Hak tuꞌ yu isto ix Tamar yilno isnoh; hayet yapni ix, hilan naj sat txꞌat, yok ix issomno ixim harina, iswatxꞌen ix ixim pan sata naj Amnón tuꞌ. 9 Lahwi tuꞌ yinilti ix ixim yul xhaltin, yaqꞌni ix ixim iswabꞌ naj Amnón tuꞌ, yajaꞌ xin mach isje naj iswabꞌ ixim. Yalni naj tet ix: «Elojabꞌto sunil mak ayikti yul nha tiꞌ,» xhi naj. Hak tuꞌ yu yelti sunil mak ayikto yul nha tuꞌ. 10 Tzujan tuꞌ xin yalni naj tet ix:
«Iti ixim sat intxꞌattiꞌan, hach kaw hach xin chawaqꞌ ixim inwabꞌaꞌan,» xhi naj. Yinito ix ixim pan iswatxꞌe tuꞌ sat istxꞌat naj. 11 Hayet yaqꞌni ix ixim tet naj, yok yachno naj yinh ix, yalni naj tet ix:
—Wanabꞌ wayanh inkꞌatanhan, xhi naj tet ix.
12 Istaqꞌwi ix tet naj:
—Nohin machoj, mach chawute huneꞌ istxꞌojal tuꞌ, yuto huneꞌ tiꞌ machi bꞌay chiyu koxol hanhonh Israelonh tiꞌ, huneꞌ chawal tiꞌ kaw machiswalil. 13 Bꞌaytuꞌwal chu intohan yebꞌ huneꞌ txꞌixwilal tiꞌ hawalni, hakachpax tuꞌ chachkankano txꞌojal yul sat anma Israel. Wal xin chisje kinhaqꞌannihan hawixalo tet yaꞌ rey, mach chu ismanhkꞌon yaꞌ tzet chaqꞌana, xhi ix tet naj.
14 Yajaꞌ xin mach yabꞌeto naj Amnón tzet yal ix, matxa xin yu istziknilo isbꞌa ix yul isqꞌabꞌ naj, yuto ekꞌbꞌal yip naj yibꞌanh ix, hak tuꞌ yu isway naj yebꞌ ix.
15 Lahwi tuꞌ xin, isyahnikanh naj ix, kaw xin ekꞌnakano ok ishowal naj yinh ix sata yet ayko yanma naj yinh ix. Yalni naj tet ix:
—Ahanhwanoj kat hapaxtoj, xhi naj tet ix.
16 Istaqꞌwi ix tet naj:
—Machoj, yuto ta chinhatzumbꞌetojan, ekꞌbꞌalto txꞌoj huneꞌ tuꞌ sata tzet makinhawutetiꞌan, xhi ix.
17 Yajaꞌ xin mach yabꞌeto naj tzet yal ix; wal xin yawte naj ischejabꞌ, yalni naj tet naj:
—Ilto huneꞌ ix tiꞌ bꞌey tiꞌ kat hepebꞌankano pulta, xhi naj.
18 Hak tuꞌ yu yinilto naj chejabꞌ tuꞌ ix Tamar, ispebꞌankano naj pulta yet yelto ix tuꞌ. Ix Tamar, ayko huneꞌ xil isqꞌap ix kaw txꞌiꞌal yelawil, yuto hak tuꞌ jilni xil isqꞌap ebꞌix qꞌopo iskutzꞌin yaꞌ rey chakoj. 19 Hayet yelto ix yul yatut naj Amnón, yanahto ix tanh xol xil iswiꞌ, istzilnito ix xil isqꞌap ayko yinh, yanahto ix isqꞌabꞌ yibꞌanh iswiꞌ, isto ix, chixin oqꞌ ix yulaj bꞌeh.
20 Hayet yapni ix Tamar bꞌey yatut isnoh Absalón, yalni naj tet ix:
—Wanabꞌ, ¿tom hak tiꞌ makaxhyute naj Amnón hanoh tuꞌ? Wal tinanh xin matzet chawala yuto hanoh naj, mach chiꞌok bꞌiskꞌulal yinh hakꞌul yu huneꞌ tuꞌ, xhi naj tet ix.
Hak tuꞌ yu iskankano ix Tamar yinh bꞌiskꞌulal bꞌey yatut isnoh Absalón. 21 Hayet yabꞌen yaꞌ rey David huneꞌ tuꞌ kaw ok ishowal yaꞌ yinh iskꞌul. 22 Yajaꞌ wal naj Absalón matzet yal naj tet naj Amnón yinh huneꞌ tuꞌ, yajaꞌ xin kaw okkano ishowal naj yinh naj, yuto yeta naj ix Tamar.
Ispajtze naj Absalón tet naj Amnón yelkanh naj
23 Kabꞌxa habꞌil xin yuni huneꞌ tuꞌ, yinh istiempohal yet lanhan yinilo ebꞌnaj iskꞌamteꞌ naj Absalón xil noꞌ meꞌ bꞌey Baal-hazor, iskawilal konhobꞌ Efraín, yalni naj Absalón tet sunil ebꞌnaj iskꞌahol yaꞌ rey tato chito ebꞌnaj waꞌo yinta naj bꞌey tuꞌ. 24 Istopaxo naj tzotelo tet ismam, haꞌ ton yaꞌ rey David, yalni naj hakaꞌ tiꞌ:
—Mam, ayko ebꞌnaj inkꞌamteꞌan yiqꞌalo isxil inmeꞌan bꞌey Baal-hazor, yuxin chiwochehan tato chachto wintajan yebꞌ ebꞌnaj hachejabꞌ, xhi naj.
25 Istaqꞌwi yaꞌ rey David tet naj:
—Kꞌahol, machoj, machonhtohanh kosunilanh, haxinwal mach nimano tzet chakꞌayiloj, xhi yaꞌ.
Kaw xin eliko yaw naj Absalón yinh ismam yunhe isto yaꞌ yinta naj, yajaꞌ xin mach to yaꞌ. Isqꞌannikano yaꞌ rey David tuꞌ iskꞌulal Komam Dios yibꞌanh naj Absalón tuꞌ. 26 Tzujan tuꞌ yalnipaxo naj Absalón tet ismam:
—Ta mach chachto chal tuꞌ, tojabꞌ naj Amnón, naj wuxhtajan jintajanh, xhi naj.
Istaqꞌwi yaꞌ rey David tuꞌ:
—¿Tzet yinh xin chito naj hawalni? xhi yaꞌ.
27 Yajaꞌ yu kaw eliko yaw naj Absalón tet ismam tuꞌ, yuxin ischejto yaꞌ naj Amnón yinta naj Absalón tuꞌ, ischejnipaxto yaꞌ David sunil iskꞌahol yinta naj.
28 Yajaꞌ hayet yalanhto, yal naj Absalón tet ebꞌnaj iskꞌamteꞌ hakaꞌ tiꞌ: «Kaw kam cheyila, hayet kaw xatzala yanma naj Amnón yu teꞌ vino, kat walnojan teyet: “Aqꞌwe yinh naj Amnón kat hemaqꞌnikamo naj. Aweko yip heyanma, mach chexxiwi,” yuto haninan chiwalan,» xhi naj.
29 Yok ebꞌnaj iskꞌamteꞌ naj Absalón ismaqꞌnokamo naj Amnón hakaꞌtikꞌa yu yalni naj Absalón. Hayet yilni ebꞌnaj uxhtaje huneꞌ tuꞌ, yahto ebꞌnaj yibꞌanh ej ismula, yelkanh ebꞌnaj.
30 Hayet aytoko ebꞌnaj yinh isbꞌel yapni isqꞌumal tet yaꞌ rey David tato sunil ebꞌnaj iskꞌahol yaꞌ ispotxꞌkamo naj Absalón, ta matxa hunu ebꞌnaj kani. 31 Hayet yabꞌen yaꞌ rey David yal-lax hakaꞌ tuꞌ, istzilnilo yaꞌ xil isqꞌap, yay hilno yaꞌ sat txꞌotxꞌ yu bꞌiskꞌulal, hakpax tuꞌ ebꞌnaj ischejabꞌ yaꞌ, istzililo ebꞌnaj xil isqꞌap. 32 Yajaꞌ haꞌ naj Jonadab, iskꞌahol naj Simea, yuxhta yaꞌ rey David halni hakaꞌ tiꞌ:
—Mam rey, mach yeloj tato sunil ebꞌnaj hakꞌahol mapotxꞌlaxkamoj, wal xin hach kachannhe naj Amnón ispotxꞌkamo naj Absalón, yuto hak tuꞌ yu istxumni naj yinh naj Amnón yettaxtikꞌa yetan naj ix Tamar. 33 Mam rey, mach chawako yinh hakꞌul yinh tzet chihal-lax tuꞌ tato sunil ebꞌnaj hakꞌahol maꞌaqꞌlax kamoj. Wal xin hanhe naj Amnón makami. 34 Wal naj Absalón maꞌelkanh naj, xhi naj Jonadab.
Haxa yet istꞌanhxito naj tzeh ayko majwal, yilnito naj tato lanhan yul hunbꞌulan anma chiꞌayti yinh istzalanil witz yul bꞌeh ayko yintaj naj. 35 Yalni naj Jonadab tet yaꞌ rey David hakaꞌ tiꞌ:
—Mam rey, lanhan yul ebꞌnaj hakꞌahol, hakaꞌtikꞌa mayu walnihan tawet, hanin hachejabꞌ intiꞌan, xhi naj.
36 Hayet lahwi istzotel naj tuꞌ yapni ebꞌnaj iskꞌahol yaꞌ rey David, yok ebꞌnaj oqꞌoj. Yoqꞌpaxokanh yaꞌ rey David yebꞌ ebꞌnaj ischejabꞌ yu bꞌiskꞌulal yinh naj Amnón. 37 Wal naj Absalón elkanh naj, isto naj iskꞌatanh naj Talmai, iskꞌahol naj Amiud, isreyal konhobꞌ Gesur. Kaw xin hunun tzꞌayik yoqꞌ yaꞌ rey David yinh naj Amnón. 38 Hak tuꞌ xin yu yelkanh naj Absalón, yehayo naj oxebꞌ habꞌil bꞌey konhobꞌ Gesur. 39 Kaw xin chiyoche yaꞌ rey David yilaꞌ naj Absalón tuꞌ yet xaꞌekꞌto isbꞌiskꞌulal yaꞌ yinh naj Amnón.