4 Yokto ix ah Tecoa tuꞌ sata yaꞌ rey David, yay jahno ix, yay xulno ix sat txꞌotxꞌ yu yinayo isbꞌa ix sata yaꞌ rey, yalni ix tet yaꞌ:

—Mam rey, kolwahanh winhan, xhi ix. 5 Isqꞌambꞌen yaꞌ tet ix:

—¿Tzet hawehi? xhi yaꞌ.

Istaqꞌwi ix:

—Mamin, yinh kaw yeli hanintiꞌan hunix hinan, payxa kam wichamilan. 6 Hanin hachejabꞌ intiꞌan ay kawanh wuninan winaj, yajaꞌ hayet hunel yaqꞌlekanh howal ebꞌnaj xol ismunil, machi mak xin pohni xol ebꞌnaj, iskam huneꞌ naj yu hunxa naj. 7 Yuxin tinanh ebꞌnaj ayto yu isbꞌa yebꞌ wunin tuꞌan kaw ayko ishowal ebꞌnaj winhan, chiyalni ebꞌnaj tato chiwakojan naj potxꞌnikamo yuxhta tuꞌ yul isqꞌabꞌ ebꞌnaj, yunhe ismaqꞌnikamo ebꞌnaj naj yalni. Ta hak tuꞌ matxa mak tet chikankano istxꞌotxꞌ ismam naj, yuto haxanhechꞌan naj, yebꞌ xin matxam mak chꞌok yipo inkꞌulan, yebꞌ matxa hunuxa yuninal wichamilan chiꞌaqꞌni bꞌinaho isbꞌi bꞌaqꞌinh yul sat yibꞌanhqꞌinal tiꞌ, xhi ix.

8 Yalni yaꞌ rey David tet ix:

—Asiꞌ hawatut matzet chal hakꞌul, chinwatxꞌeyojan huneꞌ tiꞌ, xhi yaꞌ.

9 Yalnipaxo ix ah Tecoa tuꞌ tet yaꞌ:

—Mam rey, haꞌ ismul naj wunin tuꞌan aykꞌayojabꞌ wibꞌanhan yebꞌ yibꞌanh mak ay wuhan, yaj machojabꞌ chiꞌaykꞌay tawibꞌanh yebꞌ yibꞌanh mak ayko yalanh hachejbꞌanil, xhi ix.

10 Istaqꞌwi yaꞌ rey tet ix:

—Ta ay mak txꞌoj istzotel tawinh, chawiti insatajan bꞌey tiꞌ, hak tuꞌ xin matxa mak chachpitnikoj, xhi yaꞌ tet ix.

11 Yalnipaxo ix hunelxa:

—Mam rey, kaw chiwalan tawet tato chaqꞌan tet Komam Jahawil, haDiosal ta matxa chiꞌahwejna anma isqꞌanni kamo wunin tuꞌan, machojabꞌ tzet chiꞌutelax naj, xhi ix.

Istaqꞌwi yaꞌ rey tet ix:

—Chiwaqꞌ bꞌinahojan Komam Jahawil yet chiwalnihan tato machi hunu xil iswiꞌ naj chiꞌaykꞌay sat txꞌotxꞌ, xhi yaꞌ rey tet ix.

12 Yalnipaxo ix tet yaꞌ rey tuꞌ:

—Mam rey, ayto hanikꞌxa tzet chiwoche walaꞌan tawet, abꞌeninoj, xhi ix.

—Hala, xhi yaꞌ.

13 Yalni ix tet yaꞌ:

—Mam rey, ¿tzet yinh xin hak tuꞌ hatxumni yinh iskonhobꞌ Komam Dios tiꞌ? Hakaꞌ hawalni tiꞌ tawinh chilowi, yuto mach chawaqꞌtij hakꞌahol nahat aykantoj. 14 Yinh kaw yeli sunilonh chonhkami, lahanonh hakaꞌ ha haꞌ chitixhlaxto sat txꞌotxꞌ, matxa chu jinikanh. Komam Dios mach chu yinilo isqꞌinal mak maxhto istzꞌayikalo iskami. Haꞌ huneꞌ chiyoche Komam ta chito ilaxoti hunu mak nahat aykantoj. 15 Mam rey, makinhulan walaꞌan tawet yuto chinisxibꞌtehan anma, yajaꞌ hanin hachejabꞌ intiꞌan ok yinh innabꞌalan wulan tasataj tiꞌ kꞌuxantaxka hawabꞌento tzet chiwalan. 16 Yuxin tato chawabꞌeto tzet chiwalan mam rey, chinhakolilojan yul isqꞌabꞌ ebꞌnaj chiyoche kinistanhtzelojan yebꞌ wunintiꞌan sat txꞌo txꞌotxꞌ yaqꞌ Komam Dios komajulojanh. 17 Mam rey, haꞌojabꞌ ispaj tzet chinqꞌanan tawet tiꞌ chiꞌaqꞌni yaqꞌlobꞌal wanmahan, hanin hachejabꞌ intiꞌan, yuto hach tiꞌ mam rey, hawohta hatxumnilo bꞌaytet kꞌul yebꞌ bꞌaytet txꞌoj, lahan hach hakaꞌ hunu yángel Komam Dios. Haꞌojabꞌ Komam Jahawil, haDiosal chiꞌok hawetbꞌihoj, xhi ix tet yaꞌ.

18 Isqꞌambꞌen yaꞌ rey David tet ix:

—Tinanh xin ay huneꞌ tzet chinqꞌambꞌehan tawet, yajaꞌ matzet chawebꞌa wetan, sunil chawalilo yinh isyelal, xhi yaꞌ.

Yalni ix tet yaꞌ:

—¿Tzet chawoche chaqꞌambꞌe wetan, mamin? xhi ix.

19 Isqꞌambꞌen yaꞌ rey:

—¿Machmi taj naj Joab kach chejni hawalno huneꞌ tiꞌ? xhi yaꞌ.

Istaqꞌwi ix tet yaꞌ:

—Mam rey, sunil tzet maxawal tiꞌ machi mak chu yekꞌto yinh iswatxꞌ, maka yinh ismek, kaw yeli, haꞌ naj Joab, hachejabꞌ chejnheintijan takꞌatanh tiꞌ, yalni naj wetan yinh tzet chu intzotelan tawet. 20 Yunhe yixtanhwiloj hawu, yuxin kinischejtijan naj Joab, hachejabꞌ, kat ishelni isbꞌa tzet ayko yinh hanabꞌal. Wal hach tiꞌ xin kaw helan hach hakaꞌ hunu yángel Komam Dios, hawohtaj sunil tzet chiwatxꞌi sat txꞌo txꞌotxꞌ tiꞌ, xhi ix.

21 Hak tuꞌ yu yawtelax naj Joab yu yaꞌ rey, yalni yaꞌ tet naj:

—Kꞌultikꞌa, hakaꞌ hawalni tiꞌ, as iti naj tzeh Absalón tuꞌ, xhi yaꞌ tet naj Joab.

22 Hayet yabꞌen naj Joab yalni yaꞌ rey hakaꞌ tuꞌ, yay jahno naj, yay xulno naj sat txꞌotxꞌ, yu yinayo isbꞌa sata yaꞌ rey tuꞌ. Isqꞌanni naj iskꞌulal Komam Dios yibꞌanh yaꞌ rey David, yalni naj tet yaꞌ:

—Wal tinanh mam rey, chiwohtanhelojan tato ay welapnojan yul hasat, maxawabꞌen tzet manqꞌanan tawet, hanin hachejabꞌ intiꞌan, xhi naj.

23 Lahwi tuꞌ xin isto naj Joab bꞌey konhobꞌ Gesur yu yiniti naj naj Absalón, hak tuꞌ xin yu yapni naj Absalón bꞌey Jerusalén. 24 Hayet yapni naj Absalón bꞌey Jerusalén yalni yaꞌ rey David hakaꞌ tiꞌ: «Tojabꞌ naj Absalón bꞌey yatut, mach isye isbꞌa naj wetan,» xhi yaꞌ rey David tuꞌ. Hak tuꞌ yu isto naj Absalón yatut, mach xin yil naj ismam.

25 Xol sunil ebꞌnaj Israel machi hunuxa naj winaj kaw kawla winaj hakaꞌ naj Absalón, kaw chibꞌina naj yul sunil txꞌotxꞌ Israel tuꞌ yu iskawla winajil, machi hunu istzakaꞌil isnimanil naj aykoj. 26 Hunta el chiꞌilaxilo xil iswiꞌ naj yinh hunun habꞌil, yuto kaw al yeko xil iswiꞌ naj chabꞌe, haꞌ xil iswiꞌ naj tuꞌ xin, kanhebꞌ libra yalil, malebꞌil yu malbꞌal chiꞌokniko yu ebꞌnaj rey. 27 Ay xin oxwanh iskꞌahol naj Absalón tuꞌ yebꞌ huneꞌ iskutzꞌin naj chiyij Tamar, kaw xin kawla ix ix.

28 Yulbꞌal kabꞌ habꞌil eh naj Absalón bꞌey Jerusalén tuꞌ, mach yil naj yinh yaꞌ rey. 29 Lahwi tuꞌ yanito naj Absalón tuꞌ yiqꞌomal naj Joab yunhe yinito naj naj yilno yaꞌ rey, yajaꞌ xin mach isje naj Joab. Yanipaxto naj yiqꞌomal naj yinh iskayel, yajaꞌ mach isjepaxto naj. 30 Yuxin yal naj Absalón tet ebꞌnaj ischejabꞌ hakaꞌ tiꞌ:

—Kaw heyohtaj tato istiꞌla intxꞌotxꞌan ay istxꞌotxꞌ naj Joab, yuxin asiꞌwej, kat heyanayo qꞌaꞌ xol iscebada naj sat istxꞌotxꞌ, xhi naj.

Hak tuꞌ yu isto ebꞌnaj ischejabꞌ naj Absalón, yanoto qꞌaꞌ xol iscebada naj Joab tuꞌ. 31 Hayet yabꞌenilo naj Joab huneꞌ tuꞌ, isto naj tzotelo tet naj Absalón, yalni naj tet naj hakaꞌ tiꞌ:

—¿Tzet yinh xin yato ebꞌnaj hachejabꞌ qꞌaꞌ xol incebadahan? xhi naj.

32 Istaqꞌwi naj Absalón tuꞌ:

—Inchejan hal-laxo tawet tato chachtit inkꞌatanhan, yunhe hato haqꞌambꞌeno tet inmaman tzet yinh xin kach ischejto yaꞌ iqꞌwal winhan bꞌey konhobꞌ Gesur. Yinh kaw yeli ekꞌbꞌalto kꞌul ta kinkanan bꞌey tuꞌ. Hanintiꞌan chiwochehan wilaꞌan inmaman, ta ay inmulan chisje inmaqꞌlaxkamojan, xhi naj Absalón.

33 Hak tuꞌ yu isto naj Joab yilno yaꞌ rey yunhe yalni naj tzet yal naj Absalón. Lahwi tuꞌ yawtelax naj Absalón yu yaꞌ rey. Hayet yapni naj yay jahno naj, yay xulno naj sat txꞌotxꞌ sata yaꞌ rey, ischahni yaꞌ rey naj, istzꞌohni yaꞌ isqꞌotx naj.