Pakꞌiko naj Absalón howal yinh yaꞌ rey David
15
Haxa yet yekꞌto tiempo xin yiqꞌni naj Absalón ej iscarruaje yet howal, yebꞌ ej ischeh, issaynipaxo naj 50 (lahonh yoxkꞌal) ebꞌnaj winaj chitanheni, kat yekꞌ yinh anhe sata naj. 2 Hunun tzꞌayik xin kaw sahabꞌ chiꞌahwano naj Absalón, kat xin isbꞌey naj istiꞌ ispultahil konhobꞌ. Haxa sunil anma Israel chibꞌey sata yaꞌ rey yu iswatxꞌenayo yaꞌ howal chiꞌah xol, chawtelo naj Absalón, kat isqꞌambꞌen naj tzet konhobꞌal aya, chispajtzen ebꞌnaj bꞌaytuꞌwal chititiko ebꞌnaj. 3 Chalni naj tet ebꞌnaj: «Haꞌ tzet cheyoche ay iswatxꞌebꞌanil, yajaꞌ machi mak chexchahni yu yaꞌ,» xhi naj. 4 Chalnipaxo naj: «Majaltam chinokan juesal yul konhobꞌ tiꞌ, kat hetit inkꞌatanhan, kat inbꞌutnihan howal texol, kat kexinwatxꞌenilojan yinh istoholal,» xhi naj. 5 Hayet chiꞌapni ebꞌnaj Israel iskꞌatanh naj Absalón yu yay jahno ebꞌnaj sata naj, chanito naj isqꞌabꞌ tet, kat islaqꞌnayo naj ebꞌnaj, chistzꞌohnipaxo naj isqꞌotx ebꞌnaj. 6 Hak tuꞌ chiyute naj yinh sunil ebꞌnaj Israel chibꞌey isqꞌanaꞌ yinh tet yaꞌ rey David, yu ismonteniko naj ebꞌnaj Israel tuꞌ yinh.7 Haxa yet yekꞌto kanhebꞌ habꞌil, yalni naj Absalón tet yaꞌ rey David:
—Chinqꞌanan tawet mam rey tato chinachatojan bꞌey Hebrón yunhe inyijenan tzet xawaltehan tet Komam Dios, 8 yuto yet ayinan yul konhobꞌ Gesur yul ismajul txꞌotxꞌ Siria, walnihan tet Komam Jahawil tato chinmeltzohan Jerusalén tiꞌ, chiwaqꞌan inxahanbꞌalan tet Komam, xhi naj.
9 Istaqꞌwi yaꞌ rey David:
—Kꞌultikꞌa, asiꞌ yinh aqꞌankꞌulal, xhi yaꞌ.
Hak tuꞌ yu isto naj Absalón bꞌey Hebrón tuꞌ. 10 Yanito naj tzotiꞌ tet hunun majan ebꞌnaj Israel hakaꞌ tiꞌ: «Hayet cheyabꞌen yoqꞌ chꞌen trompeta cheyalnoj tato xaꞌok naj Absalón isreyalo Hebrón,» xhi naj. 11 Hayet isto naj bꞌey Hebrón tuꞌ yawteko naj 200 ebꞌnaj ah Jerusalén yintaj, yajaꞌ xin mach yohtajo ebꞌnaj tzet chiꞌekꞌ yinh isnabꞌal naj Absalón. 12 Haxa yet ayko naj Absalón yaqꞌni isxahanbꞌal, ischejni naj iloxiti naj Ahitofela bꞌey yul konhobꞌ Gilo. Haꞌ naj Ahitofel tuꞌ, haꞌ naj chiꞌaqꞌni tzꞌajbꞌano iskꞌul yaꞌ rey David. Hak tuꞌ yu yiqꞌni yip naj Absalón yaniko howal yinh ismam, ischꞌibꞌ isbꞌisil anma ok tzujno yinta naj.
Yet yelkanh yaꞌ rey David tet naj Absalón
13 Ay xin huneꞌ naj chejabꞌ hul halno tet yaꞌ rey David tato sunil ebꞌnaj Israel ayxako yetbꞌiho naj Absalón. 14 Hayet yabꞌen yaꞌ huneꞌ tuꞌ yalni yaꞌ tet ebꞌnaj chimunla yintaj bꞌey Jerusalén:
—Tonhwej, elojonhwe yinh anhe tet naj Absalón, yuto kꞌuxantaxka matxa chu kokolni kobꞌa tet naj; chelahwekoj kꞌuxantaxka yul lemna naj jinh, kat konhismaqꞌnikamo naj, kat istanhtzenilo naj sunil anma ay yul konhobꞌ tiꞌ, xhi yaꞌ. 15 Yalni ebꞌnaj ischejabꞌ yaꞌ rey David tet hakaꞌ tiꞌ:
—Mam rey, hanhonh hachejabꞌ honhtiꞌanh hinanonhanh koyijenanh tzet chawal tiꞌ, xhi ebꞌnaj.
16 Hak tuꞌ yu yelkanh yaꞌ rey David yebꞌ yixal yebꞌ yuninal, yebꞌpaxo ebꞌnaj chimunla yinta yaꞌ yul palacio, haxanhe xin 10 (lahonhwanh) ebꞌix iskabꞌ yixal yaꞌ kankano ilno palacio. 17 Istopaxo anma ayko yetbꞌiho yaꞌ yintaj, haxa yet yapni ebꞌnaj istxam konhobꞌ tuꞌ yok linhno ebꞌnaj. 18 Yok ebꞌnaj chimunla yinta yaꞌ rey David tuꞌ iskꞌatanh, wal ebꞌnaj soldado chitanhen yaꞌ, bꞌabꞌi ebꞌnaj sata yaꞌ, haꞌ ton ebꞌnaj cereteo yebꞌ ebꞌnaj peleteo. Isbꞌabꞌipaxo 600 ebꞌnaj geteo sata yaꞌ, ebꞌnaj geteo tuꞌ tit ebꞌnaj yu yoj bꞌey konhobꞌ Gat. 19 Yalni yaꞌ David tet naj Itai, naj tit bꞌey Gat, naj geteo:
—¿Tzet yinh yuxin makaxhtit jintajanh? Kꞌulmi hameltzohi, kat hakan iskꞌatanh naj akꞌ rey tuꞌ, yuto hach tiꞌ nan konhobꞌal hach. 20 Tolto kach huli, yuxin mach chu walnihan tawet tato chaxhto jintajanh. Wal hanintiꞌan mach wohtajojan bꞌay kaw intokojan, yuxin kꞌul hameltzohi, kat hawinito ebꞌnaj hawet konhobꞌ. Haꞌ Komam Jahawil xin chiꞌanayo iskꞌulal tawibꞌanh, kat kaxhyilni, xhi yaꞌ rey David tuꞌ.
21 Istaqꞌwi naj Itai tet yaꞌ:
—Mam rey chiwaqꞌ bꞌinahojan isbꞌi Komam Dios chiwalnihan tato chintohan tawintaj, machi wokan yinh tato kꞌul chiwilan maka ta chinkaman, xhi naj.
22 Istaqꞌwi yaꞌ rey David tet naj:
—Kꞌultikꞌa chal tuꞌ, chaxhto jintajanh, xhi yaꞌ.
Isto naj Itai, naj geteo yebꞌ ebꞌnaj yet konhobꞌ naj, yebꞌ yixal naj yebꞌ yuninal naj yinta yaꞌ rey David. 23 Sunil anma Israel tuꞌ ok oqꞌoj yinh kaw ip. Yekꞌto sunil ebꞌnaj yebꞌ yaꞌ rey David yul haꞌ Cedrón, istokano ebꞌnaj yul isbꞌelal txꞌotxꞌ desierto.b 24 Tzujanpaxo xin yaꞌ sacerdote Sadoc yebꞌ ebꞌnaj levita, ebꞌnaj iqꞌnhe isKaxhahil istrato Komam Dios; yanayo ebꞌnaj isKaxhahil Komam tuꞌ iskꞌatanh yaꞌ sacerdote Abiatar. Haxa yet islahwi isto sunil anma ay yul konhobꞌ yinta yaꞌ rey David, islahobꞌalxa yok tzujno yaꞌ sacerdote Abiatar. 25 Yajaꞌ yal yaꞌ rey David tet yaꞌ Sadoc hakaꞌ tiꞌ:
—Aqꞌ meltzoho isKaxhahil istrato Komam Dios tiꞌ bꞌey konhobꞌ Jerusalén. Tato chitzꞌay iskꞌul Komam winhan chinmeltzohojan, kat wilnihan teꞌ Kaxha tiꞌ hunelxa yebꞌ Yatut Komam, haꞌ ton Tabernáculo. 26 Yajaꞌ ta xhi Komam wetan hakaꞌ tiꞌ: “Mach chitzala inkꞌulan tawinh,” ta xhi. Wal xin ayinan lah iswatxꞌehabꞌ tzet chisje iskꞌul winhan, xhi yaꞌ David. 27 Yalnipaxo yaꞌ David tet yaꞌ sacerdote Sadoc:
—¿Tom mach ischejabꞌ Komam Dios hawehi? Meltzanhto yinh aqꞌankꞌulal bꞌey yul konhobꞌ; kat hawinito hakꞌahol, yaꞌ Ahimaas, kat hawinipaxto yaꞌ Abiatar yebꞌ iskꞌahol, haꞌ ton naj Jonatán. 28 Wal hinan chinkanan sat cheqꞌanh sat txꞌotxꞌ desierto, masanta cheyati tzotiꞌ wetan yinh tzet chiyu yul konhobꞌ, xhi yaꞌ David.
29 Hak tuꞌ yu ismeltzo yaꞌ sacerdote Sadoc yebꞌ yaꞌ sacerdote Abiatar bꞌey konhobꞌ Jerusalén yebꞌ isKaxhahil istꞌinhanil istrato Komam Dios, iskankano ebꞌyaꞌ bꞌey tuꞌ. 30 Yahto yaꞌ rey David yinh istzalanil witz Olivo, chixin oqꞌ yaꞌ, ayko yenhel iswiꞌ yaꞌ yu bꞌiskꞌulal, machi xin isxanhabꞌ yaꞌ aykoj. Hakpax tuꞌ anma tzujan yinta yaꞌ ayko yenhel iswiꞌ yu bꞌiskꞌulal, chixin oqꞌi, chiꞌahto yinh istzalanil witz tuꞌ. 31 Lahwi tuꞌ yapni tzotiꞌ tet yaꞌ rey David hakaꞌ tiꞌ: «Ayko naj Ahitofel yetbꞌiho ebꞌnaj ayko yinta naj Absalón yinh yaniko howal tawinh,» xhi. Isqꞌanni yaꞌ David tet Komam Dios tato chetato Komam tzet chiꞌekꞌ yinh isnabꞌal naj Ahitofel.
32 Hayet yahapno yaꞌ rey David iswiꞌ witz tuꞌ yu yinayo isbꞌa yaꞌ tet Komam Dios, yul naj Husai arquita chawal yinh yaꞌ, tzilkixhtanhe xil isqꞌap naj aykoj, aypaxahto txꞌotxꞌ xol xil iswiꞌ naj. 33 Yalni yaꞌ rey David tet naj:
—Tato chaxhok tzujno wintajan lanhan hawaniko yalil ijatz wibꞌanhan. 34 Yajaꞌ tato chaxhto bꞌey Jerusalén kat hawalni tet naj Absalón: “Mam rey, okojinan hachejabꞌoj, hakaꞌ yu wokan ischejabꞌo hamam masanto tinanh,” kachi. Ta hak tuꞌ chawute, hak tuꞌ chu hasomchanto isnabꞌal naj Ahitofel. 35 Haꞌ tuꞌ aykano ebꞌyaꞌ sacerdote, yaꞌ Sadoc yebꞌ yaꞌ Abiatar, chꞌok ebꞌyaꞌ hawetbꞌihoj. Wal xin, sunil tzet chawabꞌe yul palacio chu hawalni tet ebꞌyaꞌ. 36 Haꞌ tuꞌ aypaxo ebꞌnaj iskꞌahol ebꞌyaꞌ sacerdote tuꞌ, yaꞌ Ahimaas yebꞌ naj Jonatán, haꞌ xin ebꞌnaj chꞌaniti tzotiꞌ wetan yinh tzet cheyabꞌe bꞌey tuꞌ, xhi yaꞌ David.
37 Hak tuꞌ yu isto naj Husai, naj yamigo yaꞌ rey David, bꞌey Jerusalén. Hayet lanhanxa apni naj yul konhobꞌ, yokpaxto naj Absalón.