—¿Tzet yinh xin iqꞌbꞌil hunteqꞌan tiꞌ hawu? xhi yaꞌ.

Istaqꞌwi naj Siba:

—Haꞌ noꞌ burro tiꞌ mawitijan noꞌ yunhe yahto hawuninal yibꞌanh noꞌ yebꞌ hawetbꞌi, wal ixim pan yebꞌ teꞌ lobꞌehal tiꞌ yet ebꞌnaj hasoldado ye teꞌ, haꞌ xin vino tiꞌ chukꞌ ebꞌnaj yet chisikikanh ebꞌnaj yinh isbꞌel sat txꞌotxꞌ desierto, xhi naj.

3 Isqꞌambꞌen yaꞌ rey David tet naj:

—¿Bꞌaytuꞌwal ay naj Mefi-boset, iskꞌahol naj hawahawil? xhi yaꞌ. Istaqꞌwi naj Siba tet yaꞌ:

—Aykano naj bꞌey Jerusalén yuto yal naj hakaꞌ tiꞌ: “Tinanh, haꞌ ebꞌnaj Israel chinyakanikojan ebꞌnaj yahawil selelo inmam ichaman,” xhi naj.^a

4 Yalni yaꞌ rey David tet naj Siba:

—Wal tinanh hawet chukaniko sunil tzet ay naj Mefi-boset, xhi yaꞌ.

Yay jahno naj Siba sata yaꞌ rey David, yalni naj:

—Mam rey, kanojinan kꞌulal yul hasat, xhi naj.

5 Haxa yet yapni yaꞌ rey David bꞌey Bahurim yelti huneꞌ naj sata yaꞌ, yalnito naj tzꞌaktiꞌ yibꞌanh yaꞌ David. Huneꞌ naj tuꞌ Simei isbꞌi naj, ayto yu isbꞌa naj yebꞌ yaꞌ kamom rey Saúl. Naj Simei tuꞌ, iskꞌahol naj Gera ye naj. 6 Chisqꞌojnito naj chꞌen yinh yaꞌ rey David yebꞌ yinh ebꞌnaj chejabꞌ; ayko xin konhobꞌ Israel yebꞌ ebꞌnaj soldado kaw helan yinh iswatxꞌqꞌabꞌ yaꞌ yebꞌ yinh ismekqꞌabꞌ yaꞌ rey David tuꞌ. 7 Chalni naj Simei tzꞌaktiꞌ yinh yaꞌ rey David hakaꞌ tiꞌ: «Elanh bꞌey tiꞌ, elanh, hach tiꞌ maqꞌom hach kamo anma, kaw txꞌoj hachkanoj. 8 Haꞌ tinanh lanhan yaqꞌni Komam Dios ispaj selel tawet yu hamaqꞌkamo yuninal yaꞌ kamom rey Saúl, hawokkano reyal selelo yaꞌ. Wal tinanh xin haꞌ naj hakꞌahol Absalón chiꞌok reyal haseleloj. Lanhan hawaqꞌlen isyaꞌtajil yu hatxꞌojal, yuto maqꞌomkamo anma hach,» xhi naj.

9 Hayet yabꞌen naj Abisai, naj yunin ix Sarvia yalni naj Simei hakaꞌ tuꞌ, yalni naj tet yaꞌ rey David:

—Mam rey ¿tzet yinh xin chachistzꞌaktiꞌnhe huneꞌ naj lahan hakaꞌ metx kamom txꞌiꞌ tiꞌ? Chinqꞌanan tawet ta chinachatojan winolojan iswiꞌ huneꞌ naj tiꞌ, xhi naj.

10 Istaqꞌwi yaꞌ rey David:

—Hex yunin ix Sarvia, machi heyok yinh huneꞌ tiꞌ. Tato chinistzꞌaktiꞌnhehan huneꞌ naj tiꞌ, ham Komam Dios chejnhe naj. ¿Tom chu kokachni Komam Dios yinh tzet chiswatxꞌe? xhi yaꞌ.

11 Yalnipaxo yaꞌ David tet naj Abisai yebꞌ tet issoldado hakaꞌ tiꞌ:

—¿Ta haꞌtikꞌa inkꞌaholan chiꞌaniko howal winhan, hatokꞌanabꞌ xin hunu ebꞌnaj Israel titna yinh yaꞌ Benjamín mach chako ishowal winhan, kat kinistzꞌaktiꞌnhenan? Wal xin yilaꞌxam naj, haꞌ Komam Dios chejnhe naj, yu chinistzꞌaktiꞌnhenan naj. 12 Wal xin kꞌuxantaxka istzꞌay iskꞌul Komam winhan yinh isyaꞌtajil chiwaqꞌletiꞌan, kat yanayo iskꞌulal wibꞌanhan selelo tzꞌaktiꞌ chiwabꞌehan yal-lax tiꞌ, xhi yaꞌ.

13 Isto yaꞌ rey David yebꞌ issoldado yinh isbꞌel, istopaxo naj Simei yinh istzalanil witz tuꞌ yetkꞌulal yaꞌ rey David. Chistzꞌaktiꞌnhen naj yaꞌ rey David yebꞌ sunil anma tzujan yintaj. Chisqꞌojniti naj chꞌen yinh yaꞌ rey, kat istixhnipaxti naj pojoj yinh yaꞌ. 14 Haꞌ yaꞌ rey yebꞌ sunil mak tzujan yintaj kaw sikinaxa yet yapni bꞌey huneꞌ xewobꞌal.^b

15 Wal naj Absalón okto naj yul konhobꞌ Jerusalén yebꞌ ebꞌnaj Israel ayiko yetbꞌihoj, yebꞌ naj Ahitofel. 16 Yelto naj Husai arquita, yamigo yaꞌ rey David ischahno naj Absalón tuꞌ, yalni naj hakaꞌ tiꞌ:

—¡Tzalahojonhwe yinh koreyal! ¡Tzalajonhwej! xhi naj.

17 Yalni naj Absalón tet naj Husai:

—¿Tom hak tiꞌ chu hapajtzen iskꞌulal iskꞌul hawamigo? ¿Tzet yinh xin mach kachto yinta hawamigo tuꞌ? xhi naj.

18 Istaqꞌwi naj Husai:

—Mach kintohan, yuto yilal inkanan iskꞌatanh mak chissayiko Komam Dios yebꞌ anma Israel isreyaloj. 19 ¿Mak tet chinokan chejabꞌoj? ¿Tom tet iskꞌahol wamigohan? Hakaꞌ yu waqꞌni chejaꞌ hinbꞌahan tet hamam, hak tuꞌ chu waqꞌni chejaꞌ hinbꞌahan tawet, xhi naj.

20 Lahwi tuꞌ isqꞌambꞌen naj Absalón tet naj Ahitofel:

—Hala tzet wal juni, xhi naj.

21 Yalni naj Ahitofel tet naj:

—Wayanh yebꞌ ebꞌix iskabꞌ yixal hamam, ebꞌix yakano yaꞌ tanhe nha, hak tuꞌ chu yohtanhenilo sunil anma Israel tato chachkankano txꞌojal yul sat hamam, hak tuꞌ chu yiqꞌnikanh yip sunil ebꞌnaj ayko hawetbꞌihoj, xhi naj.

22 Iswatxꞌenkanh ebꞌnaj qꞌap mantiado yibꞌanh yakꞌalil palacio, yokto naj Absalón wayo yebꞌ ebꞌix iskabꞌ yixal yaꞌ rey David yul qꞌap, yabꞌenilo sunil anma Israel huneꞌ tuꞌ. 23 Haꞌ yinh huneꞌ tiempohal tuꞌ, hayet chistzꞌajbꞌan naj Ahitofel iskꞌul hunu maka lahan hakaꞌto haꞌ Komam Dios chihalni, yuxin isyije yaꞌ rey David yabꞌeꞌ tzet yal naj Ahitofel tuꞌ, hakpax tuꞌ naj Absalón.