—Wal tinanh chinsayilojan 12 (kabꞌlahonhebꞌ) mil ebꞌnaj soldado, kat intohan yebꞌ ebꞌnaj intzujuyojan yaꞌ David yinh huneꞌ aqꞌbꞌal tiꞌ. 2 Hak tuꞌ xin yet kaw matxa yip yaꞌ yu sikilal, kat wapni lemnahan yibꞌanh yaꞌ, kat isxiwkanh issoldado yaꞌ, kat yelkanh ebꞌnaj. Haxanhe xin yaꞌ rey David tuꞌ chikankano ischukil, kat inmaqꞌni kamojan yaꞌ. 3 Hak tuꞌ xin chu yok sunil konhobꞌ Israel hawetbꞌihoj, yuto hanhe yaꞌ rey David tuꞌ chinmaqꞌkamojan, kat yok sunil anma tuꞌ yinh aqꞌankꞌulal, xhi naj Ahitofel.

4 Haꞌ tzet yal naj Ahitofel tuꞌ, kaw ischah iswiꞌ naj Absalón yebꞌ ebꞌnaj ichamta winaj Israel. 5 Yalni naj Absalón:

—Wal tinanh tijabꞌpaxo naj Husai, arquita, kat jabꞌeni tzet xhipaxo naj, xhi naj.

6 Hayet yapni naj Husai iskꞌatanh naj Absalón, yalni naj Absalón tuꞌ tet naj yinh tzet yal naj Ahitofel. Yalni naj Absalón tet naj:

—¿Chimkoyije tzet chal naj tiꞌ, mato machoj? Wal xin halah tzet chꞌelikoj, xhi naj.

7 Istaqꞌwi naj Husai tet naj Absalón hakaꞌ tiꞌ:

—Haꞌ tzet yal naj Ahitofel tuꞌ, mach kꞌuloj, xhi naj.

8 Yalnipaxo naj hunxa tzotiꞌ hakaꞌ tiꞌ:

—Hach tiꞌ kaw hawohtaj tato kaw helan hamam yinh howal yebꞌ ebꞌnaj issoldado. Haꞌ tinanh xin kaw lemanti ishowal yaꞌ, hakaꞌ istit ishowal hunu noꞌ miꞌe oso yet chiꞌilaxilo yunin noꞌ iskꞌatanh. Yebꞌpaxo xin kaw ay isnabꞌal yaꞌ hamam tuꞌ yinh howal, yuxin mach chikan yaꞌ xol anma yinh huneꞌ aqꞌbꞌal tiꞌ. 9 Wal xin ebꞌabꞌilmi isbꞌa yaꞌ yul hunu chꞌen nhachꞌen, maka hunuxa bꞌaya. Ta xin chitanhilo haywanho hasoldado yul isqꞌabꞌ yaꞌ, kat yekꞌ isqꞌumal, chimyalaꞌ anma tato sunil ebꞌnaj ayko hawetbꞌiho chiꞌaykꞌay yul isqꞌabꞌ hamam. 10 Hak tuꞌ xin chu isxiwokanh ebꞌnaj kaw ay yip yanma hakaꞌ noꞌ bꞌalam, yuto sunil konhobꞌ Israel kaw yohtaj tato kaw helan hamam yinh howal yebꞌ xin haꞌ chiꞌiptzen issoldado. 11 Yuxin chiwalan tawet ta chakutxbꞌako sunil ebꞌnaj Israel ay bꞌey konhobꞌ Dan masanta bꞌey konhobꞌ Beerseba hawetbꞌihoj, kat xin hato yinh howal. Haꞌ ebꞌnaj tuꞌ kaw txꞌiꞌal isbꞌisil ebꞌnaj hakaꞌ isbꞌisil arena ay istiꞌ haꞌ mar. 12 Bꞌajxanhetuꞌwal xin ay hamam tuꞌ, kat japni lemna yibꞌanh, hakaꞌ chu yay txihtxon yal chew yibꞌanh txꞌo txꞌotxꞌ, kat komaqꞌnikamo sunil mak tzujan yinta yaꞌ, matxa hunu mak chikobꞌejtzo yinh itzitzal. 13 Yajaꞌ ta chiyebꞌa isbꞌa yaꞌ yebꞌ anma tzujan yinta yul hunu konhobꞌ, kosunil hanhonh Israelonh tiꞌ chijiqꞌ kolasu, kat kohatxniti sunil konhobꞌ tuꞌ yebꞌ chꞌen chꞌen, kat koqꞌojnikanto yulaj xabꞌ. Matxa hunu chꞌen chijakano bꞌey tuꞌ, xhi naj Husai tet naj Absalón.

14 Yuxin yal naj Absalón yebꞌ ebꞌnaj Israel hakaꞌ tiꞌ: «Kaw ekꞌna kꞌul sunil tzet yal naj Husai sata tzet yal naj Ahitofel,» xhi ebꞌnaj. Yalni ebꞌnaj hakaꞌ tuꞌ yuto Komam Dios etanto tzet yal naj Ahitofel, yunhe yaykꞌay isyaꞌtajil yibꞌanh naj Absalón yu Komam. 15 Yinh anhe xin to naj Husai yalaꞌ tet yaꞌ sacerdote Sadoc yebꞌ tet yaꞌ sacerdote Abiatar hakaꞌ tiꞌ: «Haꞌ naj Ahitofel, ok naj aqꞌokꞌule tet naj Absalón yebꞌ tet ebꞌnaj ichamta winaj Israel, wal hinan xin nan yu walnihan tet naj. 16 Yuxin yinh anhe cheyato tzotiꞌ tet yaꞌ rey David hakaꞌ tiꞌ: “Wal xin mach chaxhkan satla cheqꞌanh sat txꞌotxꞌ desierto, ekꞌanhto qꞌaxepxakꞌto haꞌ Jordán, haxinwal mach chaxhtanhtzelaxilo yebꞌ ebꞌnaj tzujan tawintaj,” kexchi,» xhi naj Husai tet ebꞌnaj sacerdote.

17 Wal naj Jonatán yebꞌ yaꞌ Ahimaas, hata bꞌey isnuqꞌ ha haꞌ bꞌey konhobꞌ En-rogel ay ebꞌnaj yintalto konhobꞌ. Machi xin chu isyeni isbꞌa ebꞌnaj yul konhobꞌ, yuxin haꞌ huneꞌ ix chejabꞌ to halno tet ebꞌnaj yinh tzet yal naj Husai. Lahwi tuꞌ, isto ebꞌnaj kawanh yalno tet yaꞌ rey David. 18 Yajaꞌ il-lax ebꞌnaj yu huneꞌ naj tzeh, isto naj yalno tet naj Absalón, yajaꞌ islahiko ebꞌnaj isto yinh anhe yapni ebꞌnaj bꞌey yatut huneꞌ naj ay bꞌey konhobꞌ Bahurim, ay xin huneꞌ kꞌuh tajin yul ay istiꞌ yatut huneꞌ naj tuꞌ, yebꞌan isbꞌa ebꞌnaj yul.

19 Haꞌ ix ix yahaw huneꞌ nha tuꞌ yiti ix huneꞌ qꞌap manta, islebꞌanto ix qꞌap yibꞌanh istiꞌ kꞌuh tuꞌ, islebꞌanpaxto ix sat ixim trigo yibꞌanh qꞌap, machi mak xin ilni tato haꞌ tuꞌ yebꞌa isbꞌa ebꞌnaj kawanh. 20 Lahwi tuꞌ yapni ebꞌnaj issoldado naj Absalón bꞌey yatut huneꞌ ix tuꞌ, isqꞌambꞌen ebꞌnaj tet ix:

—¿Bꞌaytuꞌwal ay yaꞌ Ahimaas yebꞌ naj Jonatán? xhi ebꞌnaj tet ix. Istaqꞌwi ix tet ebꞌnaj:

—Mayxatax ekꞌto ebꞌnaj bꞌey tiꞌ, xam ekꞌnato ebꞌnaj bꞌay kawil yehati yich haꞌ Jordán tuꞌ, xhi ix.

Isto ebꞌnaj saywal yinh ebꞌnaj kawanh tuꞌ, yajaꞌ mach ilcha ebꞌnaj yu ebꞌnaj, yuxin meltzo ebꞌnaj issoldado naj Absalón bꞌey Jerusalén. 21 Haxa yet xameltzo ebꞌnaj soldado, yahti ebꞌnaj kawanh yul kꞌuh, isto ebꞌnaj, yapni ebꞌnaj iskꞌatanh yaꞌ rey David yalni ebꞌnaj tet yaꞌ hakaꞌ tiꞌ: «Mamin, ahanhwe wano yinh anhe, kat heqꞌaxponikꞌto yibꞌanh ha haꞌ, yuto ok naj Ahitofel aqꞌokꞌule jinh tet naj Absalón,» xhi ebꞌnaj. 22 Hak tuꞌ yu yahwano yaꞌ rey David yebꞌ sunil mak tzujan yintaj, isto yaꞌ; maxhto xin chisajbꞌiloj yet isqꞌaxponikꞌto ebꞌnaj yibꞌanh haꞌ Jordán. Kaw sunil mak tzujan yinta yaꞌ rey David ekꞌto yibꞌanh haꞌ, machi hunu mak kankanoj. 23 Yajaꞌ wal naj Ahitofel, hayet yilni naj tato mach yabꞌeto naj Absalón tzet yal naj, yanikanh naj istzꞌum ischeh ispaxto naj yatut bꞌey iskonhobꞌ, iswatxꞌenkano naj tzet ay yul yatut, lahwi tuꞌ istꞌunhbꞌan isbꞌa naj. Hak tuꞌ yu iskam naj Ahitofel, ismujlax naj bꞌay mujan ismam.

24 Haxa yet yapni yaꞌ rey David bꞌey konhobꞌ Mahanaim, isqꞌaxpon naj Absalón haꞌ Jordán yebꞌ ebꞌnaj Israel tzujan yintaj. 25 Yaniko naj Absalón naj Amasa yahawilo issoldado selelo naj Joab. Naj Amasa tuꞌ, iskꞌahol huneꞌ naj Israel chiyij Itra ye naj. Naj Itra tuꞌ yiqꞌle naj ix Abigail, yunin ix Nahas, isnoh ix Sarvia, ismiꞌ naj Joab.

26 Haxa yet yapni ebꞌnaj Israel tzujan yinta naj Absalón bꞌey Galaad iswatxꞌenkanh ebꞌnaj iscampamento bꞌey tuꞌ. 27 Haxa yet yapni yaꞌ rey David bꞌey Mahanaim tuꞌ, istit naj Sobi, iskꞌahol naj Nahas ah Rabá ay yul ismajul txꞌotxꞌ Amón ischahno yaꞌ, yebꞌ naj Maquir, iskꞌahol naj Amiel ah Lodebar, yebꞌ naj Barzilai ah Rogelim ay yul ismajul txꞌotxꞌ Galaad. 28 Iqꞌbꞌil xin hunteqꞌan sabꞌehal yu ebꞌnaj tet yaꞌ rey David yebꞌ tet anma tzujan yinta yaꞌ. Iqꞌbꞌil txowe yu ebꞌnaj, yebꞌ pechꞌan, yebꞌ txꞌotxꞌ xi, yebꞌ ixim trigo, yebꞌ ixim cebada, yebꞌ ixim harina, yebꞌ ixim trigo qꞌanbꞌinaj, yebꞌ teꞌ habas, yebꞌ teꞌ lenteja, 29 yebꞌ noꞌ kabꞌ, yebꞌ crema, yebꞌ noꞌ queso, yebꞌ noꞌ meꞌ chiskꞌux ebꞌnaj, yuto yaꞌ rey David yebꞌ sunil mak tzujan yintaj, ispeto bꞌey txꞌotxꞌ desierto. Ebꞌnaj tuꞌ xin halni: «Kaw chinhohcha ebꞌnaj, yebꞌ kaw sikom ebꞌnaj, yebꞌ kaw chitaj istiꞌ ebꞌnaj yu ispeto ebꞌnaj bꞌey desierto,» xhi.