—Haꞌ huninan chintohan teyinta yinh howal, xhi yaꞌ.

3 Yajaꞌ taqꞌwi ebꞌnaj tet yaꞌ:

—Mam rey, mach chaxhto jintajanh. Wal honhtiꞌanh ta chonhkolchahanh, maka ta chikam yikta jetbꞌi tiꞌanh, matzet chal iskꞌul ebꞌnaj issoldado naj Absalón jinhanh, yuto hach chaxhissayikꞌo ebꞌnaj. Hach tiꞌ ekꞌbꞌal hawelapno sata 10 (lahonhebꞌ) mil honhtiꞌanh, yuxin kꞌul hakankano yul huneꞌ konhobꞌ tiꞌ. Hach xin chawato yaqꞌbꞌilxa ebꞌnaj soldado, xhi ebꞌnaj.

4 Istaqꞌwi yaꞌ rey David tet ebꞌnaj:

—Kꞌultikꞌa, chinyijehan hakaꞌ heyalni tiꞌ, xhi yaꞌ.

Yok linhno yaꞌ yinh ispultahil konhobꞌ; yilni yelto ebꞌnaj issoldado yinh hunun majan yinh 100 (hokꞌal), yebꞌ hunun majan yinh mil.

5 Yalni yaꞌ tet naj Joab yebꞌ tet naj Abisai yebꞌ tet naj Itai hakaꞌ tiꞌ: «Yu iskꞌulchꞌanil hekꞌul winhan, matzet cheyute naj tzeh Absalón inqꞌanaꞌan,» xhi yaꞌ. Sunil ebꞌnaj soldado abꞌeni yet yalni yaꞌ rey David huneꞌ tuꞌ tet ebꞌnaj yahawil soldado. 6 Hak tuꞌ yu isto ebꞌnaj yaqꞌno howal yebꞌ ebꞌnaj Israel tzujan yinta naj Absalón, yok howal bꞌey xolaj qꞌebꞌtaj yul ismajul yaꞌ Efraín.

7 Isqꞌoji ebꞌnaj issoldado yaꞌ rey David yinh ebꞌnaj Israel tzujan yinta naj Absalón. Yinh huneꞌ tzꞌayik tuꞌ kaw niman ebꞌnaj Israel kami, 20 mil ebꞌnaj ispotxꞌkamo ebꞌnaj issoldado yaꞌ rey David. 8 Kaw xin yiqꞌkanh yip howal tuꞌ sunil yul ismajul Israel, yuxin ekꞌbꞌal isbꞌisil ebꞌnaj Israel kꞌayikꞌoj iskam xolaj qꞌebꞌtaj sata ebꞌnaj potxꞌlaxkamo yu chꞌen espada. 9 Ischahnayo isbꞌa naj Absalón yebꞌ ebꞌnaj issoldado yaꞌ rey David; ayahto naj Absalón tuꞌ yibꞌanh huneꞌ noꞌ mula, ismeltzo naj yintaj, haxa yet yekꞌto noꞌ yalanh isqꞌabꞌ huneꞌ teꞌ hih, iskankano txꞌapno isnuqꞌ naj Absalón tuꞌ xol isqꞌabꞌ teꞌ hih. Wal noꞌ mula palan yelto noꞌ yalanh naj, iskankano tꞌunhno naj Absalón xol isqꞌabꞌ teꞌ. 10 Hayet yilni huneꞌ naj huneꞌ tuꞌ, isto naj yalno tet naj Joab, yalni naj hakaꞌ tiꞌ:

—Mawilan iskankano tꞌunhno naj Absalón xol isqꞌabꞌ huneꞌ teꞌ hih, xhi naj.

11 Istaqꞌwi naj Joab tet naj:

—Ta maxawil naj, ¿tzet yinh xin machi maxamaqꞌkamo naj? Ta maxamaqꞌkamo naj chimwaqꞌan 10 (lahonhebꞌ) siclo^a chꞌen melyu plata tawet yebꞌ hunu cinturón, xhi naj.

12 Istaqꞌwi naj tet naj Joab tuꞌ:

—Waxanhka chawaqꞌ mil siclo chꞌen plata wetan, machi low inqꞌabꞌan yinh iskꞌahol yaꞌ rey tuꞌ, yuto jabꞌehanh yalni yaꞌ tawet yebꞌ tet naj Abisai yebꞌ tet naj Itai hakaꞌ tiꞌ: “Cheyabꞌe, machi hunujex chu islow heqꞌabꞌ yinh naj Absalón,” xhi yaꞌ rey. 13 Yebꞌ xin ta manmaqꞌkamojan naj, winhmihan chilowi, yuto machi hunu tzet ye tuꞌ tiꞌ chu jebꞌan tet yaꞌ rey tuꞌ; ¿tom xin chito yu kinhakolnihan hach tiꞌ? xhi naj.

14 Istaqꞌwi naj Joab tet naj:

—Tzet chiꞌok chinkꞌayan intiempohan kaxhwechmanan hatzoteli, xhi naj.

Isto lemna naj Joab, yinito naj oxebꞌ lanza, isqꞌojnito naj yinh naj Absalón, isqꞌaxponikꞌto chꞌen yul yanma naj yuto itzitzto naj yet tꞌunhaniko naj xol isqꞌabꞌ teꞌ hih. 15 Lahwi tuꞌ yok hoyno 10 (lahonhwanh) ebꞌnaj chiꞌekꞌ tzujtzun yinta naj Joab; islahkꞌon ebꞌnaj naj Absalón. 16 Wal naj Joab tuꞌ xin yoqꞌtze naj chꞌen trompeta yunhe isbꞌejni ebꞌnaj issoldado yaꞌ rey David istzumbꞌen ebꞌnaj Israel yetbꞌi isbꞌa yebꞌ naj Absalón, hak tuꞌ yu islinhbꞌan naj Joab huneꞌ howal tuꞌ. 17 Lahwi tuꞌ yinayo ebꞌnaj isnimanil naj Absalón, yanayto ebꞌnaj isnimanil naj yul huneꞌ niman holan xol qꞌebꞌtaj, istenbꞌankanh ebꞌnaj huneꞌ niman tenan chꞌen yibꞌanh naj. Hayet yabꞌen ebꞌnaj Israel yetbꞌi naj Absalón huneꞌ tuꞌ, yelkanh ebꞌnaj, isto ebꞌnaj yulaj ismantiado.^b

18 Hayet itzitzto naj Absalón yaqꞌni watxꞌeꞌ naj huneꞌ chꞌen monumento bꞌey huneꞌ akꞌal chihal-lax Yakꞌal ebꞌnaj Rey. Yako isbꞌi naj yinh huneꞌ chꞌen tuꞌ yuto yal naj hakaꞌ tiꞌ: «Machi hunu inkꞌaholan bꞌay chibꞌinakano inbꞌihan,» xhi naj. Aytokꞌo huneꞌ chꞌen chꞌen tuꞌ tinanh.

19 Lahwi tuꞌ yalni yaꞌ sacerdote Ahimaas, iskꞌahol yaꞌ sacerdote Sadoc tet naj Joab hakaꞌ tiꞌ:

—Chinqꞌanan tawet tato chinachatojan, kat intohan yinh anhe walnojan tet yaꞌ rey David tato maswatxꞌe Komam Dios istoholal, iskolnilo Komam yaꞌ yul isqꞌabꞌ ebꞌnaj ayko ishowal yinh, xhi yaꞌ.

20 Istaqꞌwi naj Joab tet yaꞌ:

—Huneꞌ tzꞌayik tiꞌ, mach chu hato hawalnoj, nantojabꞌ hatohi, yuto haꞌ kaw iskꞌahol yaꞌ rey makami, xhi naj.

21 Yalni naj Joab tuꞌ tet huneꞌ naj etíope:

—Asiꞌ, kat hawalni tet yaꞌ rey tzet maxawil tiꞌ, xhi naj Joab.

Yay kꞌonhno naj yu yinayo isbꞌa naj sata naj Joab, lahwi tuꞌ isto naj yinh anhe yalno tet yaꞌ rey David. 22 Yalnipaxo yaꞌ sacerdote Ahimaas iskꞌahol yaꞌ Sadoc tet naj Joab hunelxa hakaꞌ tiꞌ:

—Chintohan intzujuyojan naj etíope yinh anhe, xhi yaꞌ. Istaqꞌwi naj Joab tet yaꞌ:

—¿Tzet chawiqꞌ yinh hato yinh anhe hawalno tet yaꞌ rey? ¿Tom ay sabꞌehal chaqꞌaꞌ yaꞌ tawet yu tzet chawal tet yaꞌ? xhi naj.

23 Istaqꞌwi yaꞌ:

—Machi wokan ta ay tzet chaqꞌ yaꞌ maka machoj, wal xin chintohan yinh anhe walaꞌan, xhi yaꞌ. Yuxin yal naj Joab tet yaꞌ:

—Asiꞌ yinh anhe chal tuꞌ, xhi naj.

Hak tuꞌ yu isto yaꞌ Ahimaas yinh anhe yulaj bꞌeh sat akꞌal, isbꞌabꞌikꞌo yaꞌ sata naj etíope. 24 Wal yaꞌ rey David, tzꞌonhanayo yaꞌ xolbꞌal kabꞌebꞌ ispultahil konhobꞌ, haxapaxo naj soldado chitanhen yaꞌ rey tuꞌ, ayahto naj yibꞌanh chꞌen kꞌubꞌ aykanh yibꞌanh ispultahil konhobꞌ. Hayet istꞌanhxito naj, yilnito naj tato ay huneꞌ naj lanhan yul yinh anhe. 25 Yalni naj tet yaꞌ rey yinh kaw ip. Istaqꞌwi yaꞌ rey hakaꞌ tiꞌ:

—Tato ischukil naj chuli, kꞌul chul naj yalaꞌ chal tuꞌ, xhi yaꞌ.

Hayet lanhan ishitziko naj tuꞌ, 26 yilnipaxto naj soldado huneꞌxa naj chul yinh anhe, yalni naj tet naj chitanhen ispultahil konhobꞌ yinh kaw ip hakaꞌ tiꞌ: «Lanhan yulpaxo huneꞌxa naj yinh anhe,» xhi naj. Yalni yaꞌ rey David hakaꞌ tiꞌ:

—Ay tzet chulpaxo naj yalaꞌ, xhi yaꞌ.

27 Yalnipaxo naj soldado:

—Haꞌ naj bꞌabꞌel kochnhe yaꞌ Ahimaas, iskꞌahol yaꞌ Sadoc chiwilan, xhi naj. Istaqꞌwi yaꞌ rey:

—Ta haꞌ yaꞌ Ahimaas chuli, kꞌul tzet chul yaꞌ yalaꞌ, chal tuꞌ, xhi yaꞌ.

28 Hayet yapni yaꞌ Ahimaas sata yaꞌ rey David, yay jahno yaꞌ, istioxhli yaꞌ tet yaꞌ, yalni yaꞌ yinh kaw ip hakaꞌ tiꞌ:

—Hal-laxojabꞌ kꞌul-la tzotiꞌ yinh Komam Dios koDiosal, yuto mayako Komam ebꞌnaj chiꞌaniko howal tawinh yul haqꞌabꞌ, xhi yaꞌ.

29 Isqꞌambꞌen yaꞌ rey tuꞌ:

—¿Hanikꞌ ye naj Absalón? xhi yaꞌ. Istaqꞌwi yaꞌ Ahimaas:

—Hayet makinischejnitijan naj Joab, hachejabꞌ, takꞌatanh tiꞌ, mawilnihan toxanhe chiwejcha anma, yajaꞌ mach wohtajojan tzet yuhi, xhi yaꞌ.

30 Yalni yaꞌ rey David tet yaꞌ:

—Okanhlinhno bꞌey tuꞌ lah, kat hawechmani, xhi yaꞌ. Yel yaꞌ sata yaꞌ rey tuꞌ, yok linhno yaꞌ bꞌay yal yaꞌ.

31 Lahwi tuꞌ yapni naj etíope, yalni naj tet yaꞌ rey:

—Mam rey, haꞌ chejbꞌanil chinhul walaꞌtiꞌan, kaw kꞌul. Wal tinanh makaxhiskolilo Komam Dios yul isqꞌabꞌ ebꞌnaj chiꞌaniko howal tawinh, xhi naj. 32 Isqꞌambꞌen yaꞌ tet naj etíope tuꞌ:

—¿Hanikꞌ ye naj Absalón? xhi yaꞌ. Istaqꞌwi naj etíope tuꞌ:

—Hakaꞌojabꞌ mayu istanhilo naj Absalón, hakojabꞌpax tuꞌ istanhilo ebꞌnaj chiꞌaniko howal tawinh, xhi naj.

33 Hayet yabꞌen yaꞌ rey yalni naj hakaꞌ tuꞌ, yok huneꞌ niman bꞌiskꞌulal yul yanma yaꞌ, yahto yaꞌ yul huneꞌ cuarto aykanh yibꞌanh ispultahil konhobꞌ, yok yaꞌ oqꞌoj. Hayet ayko yaꞌ isbꞌelwahto xin, yalni yaꞌ: «¡Hach inkꞌahol Absalón! ¡Hach inkꞌahol Absalón! ¡Majaltam haninan makinkaman haseleloj, hach inkꞌahol, hach inkꞌahol!» xhi yaꞌ.