5 Lahwi tuꞌ yapni naj Joab yatut yaꞌ rey David, yalni naj tet yaꞌ: «Wal tinanh kaw maxawako ebꞌnaj hasoldado yinh txꞌixwilal, ebꞌnaj kaxhkolni yebꞌ hawuninal yebꞌ hawixal yebꞌ ebꞌix hakabꞌ ixale. 6 Haꞌ tinanh chayeloj tato machi yelapno ebꞌnaj yahawil yeko yinh hasoldado, yebꞌ xin ebꞌnaj hasoldado machi yelapno yul hasat, yuto chaxahannhe mak ayko ishowal tawinh, kat hayahni mak xahan chaxhilni. Tinanh chiwohtanhelojan tato kaw ekꞌbꞌal chaxhtzalahi tato itzitz naj Absalón tuꞌ waxanhka makonhkamanh kosunilanh. 7 Wal xin ahanhwanoj, kat hawelto tzotelo tet ebꞌnaj hasoldado ok tzujno tawintaj yunhe istzala iskꞌul ebꞌnaj. Yajaꞌ tato mach chaxheltoj, chiwaqꞌ bꞌinahojan isbꞌi Komam Dios chiwalnihan tato machi hunu ebꞌnaj hasoldado chikankano takꞌatanh huneꞌ aqꞌbꞌal tiꞌ. Ta hak tuꞌ, yinh kaw yeli ekꞌbꞌal txꞌoj huneꞌ isyaꞌtajil tiꞌ sata isyaꞌtajil xaꞌay tawibꞌanh yichitax hawichiti yinh hatzehal,» xhi naj Joab tet yaꞌ.

8 Hak tuꞌ yu yahwano yaꞌ rey David, yok tzꞌonhno yaꞌ bꞌey ispultahil konhobꞌ. Hayet yabꞌen sunil ebꞌnaj Israel ayko yetbꞌiho yaꞌ rey huneꞌ tuꞌ, isto ebꞌnaj isyeno isbꞌa sata yaꞌ.

Walpaxo ebꞌnaj Israel ayko yetbꞌiho naj Absalón xin yinhxa anhe paxto ebꞌnaj yul qꞌap ismantiado. 9 Sunil xin hunun majan ebꞌnaj Israel halni tet hunun hakaꞌ tiꞌ: «Haꞌ yaꞌ rey David konhkolnilo yul isqꞌabꞌ ebꞌnaj ayko ishowal jinh yebꞌ yul isqꞌabꞌ ebꞌnaj filisteo, tzujan tuꞌ xin elkanh yaꞌ tet iskꞌahol Absalón. 10 Wal naj Absalón, naj jako koreyaloj xakam naj xol howal, tinanh xin, ¿tzet chijechma? ¿Tzet yinh xin mach chonhto jiqꞌaꞌti yaꞌ David koreyaloj?» xhi ebꞌnaj.

11 Sunil tzet yal ebꞌnaj Israel yabꞌelo yaꞌ rey David, yuxin yato yaꞌ ischejabꞌ yalno tet yaꞌ sacerdote Sadoc yebꞌ tet yaꞌ Abiatar tato chꞌok ebꞌyaꞌ isqꞌambꞌelo tet ebꞌnaj ichamta winaj Judá hakaꞌ tiꞌ: «¿Tzet yinh xin cheyechma heto heyinoti yaꞌ rey David, kat heyinapno yaꞌ yul ispalacio, hakaꞌ yalni sunil ebꞌnaj Israel tiꞌ?» xhi. 12 Yalnipaxto yaꞌ rey tet ebꞌyaꞌ sacerdote hakaꞌ tiꞌ: «Mach kꞌuloj tato haꞌ ebꞌnaj chito yinh islahobꞌal yinoti yaꞌ rey, yuto wet konhobꞌ hinbꞌahan yebꞌ ebꞌnaj,» xhito yaꞌ rey tet ebꞌyaꞌ sacerdote. 13 Yalnipaxo yaꞌ tet naj Amasa hakaꞌ tiꞌ: «Hanhonh tiꞌ juxhtato kobꞌa, huneꞌnhe haꞌ kochikꞌil, wal tinanh chaxhwakojan yahawilo insoldadohan yinh sunilbꞌal tiempo selelo naj Joab. Tato mach chaxhwakojan hakaꞌ walnitiꞌan xin yaqꞌabꞌayo Komam Dios isyaꞌtajil wibꞌanhan,» xhi yaꞌ.

14 Hak tuꞌ yu istzalakanh ebꞌnaj Judá yinh yaꞌ rey David, ishunbꞌan ebꞌnaj isnabꞌal, yalnito ebꞌnaj tet yaꞌ hakaꞌ tiꞌ: «Meltzanh bꞌey Jerusalén, yebꞌ sunil ebꞌnaj ayko ismunil yul isqꞌabꞌ hawu,» xhi ebꞌnaj. 15 Ismeltzo yaꞌ rey David tuꞌ yebꞌ issoldado, yapni ebꞌnaj istiꞌ haꞌ Jordán. Isto ebꞌnaj Judá ischahno yaꞌ bꞌey konhobꞌ Gilgal, yebꞌ yunhe iskolwa ebꞌnaj yinh yaꞌ yu isqꞌaxpon yaꞌ yibꞌanh haꞌ Jordán.

16 Hakpax tuꞌ naj Simei, iskꞌahol naj Gera, to naj yinh anhe chawal yinh yaꞌ rey David yinta ebꞌnaj ah Judá. Naj Simei tuꞌ, benjaminita, haꞌ yul konhobꞌ Bahurim ay naj. 17 Tzujanpaxo huneꞌ mil ebꞌnaj benjaminita yinta naj Simei tuꞌ. Tzujanpaxo naj Siba,^a ischejabꞌ yuninal yaꞌ Saúl; tzujanpaxo 15 (holanhwanh) iskꞌahol naj, yebꞌ xin 20 (hunkꞌalwanh) ischejabꞌ naj, isqꞌaxponikꞌto sunil ebꞌnaj tuꞌ yibꞌanh haꞌ Jordán sata yaꞌ rey David. 18 Yekꞌto ebꞌnaj bꞌay kawil yehati yich haꞌ, yu iskolwa ebꞌnaj ischahnikꞌto yuninal yaꞌ rey David yibꞌanh haꞌ, yebꞌ yunhe isyijen ebꞌnaj tzet chiyal yaꞌ rey tuꞌ. Haxa yet isqꞌaxponikꞌto ebꞌnaj haꞌ Jordán tuꞌ, yay jahno naj Simei, iskꞌahol naj Gera sata yaꞌ rey David. 19 Yalni naj tet yaꞌ hakaꞌ tiꞌ:

—Mam rey, kaw chinqꞌanan tawet tato chawaqꞌ nimankꞌulal winhan, machi xin chanati inmulan wakojan tawet yet hawel bꞌey Jerusalén. Machojabꞌ chitit hahowal winhan. 20 Hanin hachejabꞌ intiꞌan kaw wohtajan tato txꞌoj wute hinbꞌahan tawinh; haninan xin bꞌabꞌel makintitan chawal tawinh xol sunil mak yikꞌal yaꞌ José, xhi naj.

21 Yalni naj Abisai, yunin ix Sarvia hakaꞌ tiꞌ:

—Naj Simei tiꞌ, yilal iskam naj yuto istzꞌaktiꞌnhe naj yaꞌ rey, sikꞌbꞌiliko yu Komam Dios, Jahawil, xhi naj.^b

22 Istaqꞌwi yaꞌ rey David:

—Hex yunin ix Sarvia, machi heyok yinh huneꞌ tiꞌ, ¿tzet yinh xin chewiꞌnhe hebꞌa yinh tzet chiwalan? Wal xin machi mak chikam yinh huneꞌ tzꞌayik tiꞌ, yuto wohtajan ta chinokan isreyalo Israel hunelxa, xhi yaꞌ.

23 Yaqꞌni bꞌinaho yaꞌ rey David isbꞌi Komam Dios yalni yaꞌ tet naj Simei:

—Mach chaxhkami, xhi yaꞌ.

24 Hakpax tuꞌ naj Mefi-boset, naj iskꞌahol yaꞌ kamom Saúl, to naj chawal yinh yaꞌ rey David. Hataxtikꞌa yet istokano yaꞌ rey David, matxatikꞌa istxꞌah naj yoj, matxatikꞌa hunelo yilo naj xil istiꞌ, matxa xin istxꞌahpaxo naj xil isqꞌap masanto yet ismeltzo yaꞌ rey David yinh aqꞌankꞌulal. 25 Hayet yelti naj Mefi-boset ischahno yaꞌ rey bꞌey Jerusalén, yalni yaꞌ rey tet naj:

—Mefi-boset, ¿tzet yinh xin mach kachto wintajan? xhi yaꞌ.

26 Istaqꞌwi naj Mefi-boset tet yaꞌ:

—Mam rey, hanin hachejabꞌ intiꞌan kaw hawohtaj tato mach kꞌulo ye wojan, yuxin inchejan naj inchejabꞌan yaqꞌaꞌkanh isxhila inchehan yu intohan takꞌatanh walnihan, yajaꞌ mach isyije naj yinh tzet walan. 27 Yul naj yanoko leqꞌtiꞌal winhan tawet mam rey, yajaꞌ hach tiꞌ lahan hach hakaꞌ hunu yángel Komam Dios, yuxin watxꞌe tzet chal hakꞌul winhan. 28 Wal xin sunil yuninal inmaman yet ay iskam hawu, mam rey, yajaꞌ tzꞌay hakꞌul winhan hanin hachejabꞌ intiꞌan kinhawanikojan waꞌo takꞌatanh sat hamexha. Wal xin mach intzanojan waqꞌni kabꞌo hinbꞌahan inqꞌannihan hunuxa tzet ye tuꞌ tawet, xhi naj.

29 Istaqꞌwi yaꞌ rey David tet naj:

—Matxa tzet tzꞌaj walaꞌan yinh huneꞌ tuꞌ, yuto xawalan tato chapohkanh txꞌo txꞌotxꞌ tawinh yebꞌ naj Siba hachejabꞌ, xhi yaꞌ.

30 Istaqꞌwi naj Mefi-boset tet yaꞌ:

—Mam rey okojabꞌ txꞌotxꞌ sunil yu naj Siba tuꞌ, tanhe kꞌul mayu hameltzo yul hapalacio hunelxa, xhi naj.

31 Wal naj Barzilai, naj ah Galaad, titna naj bꞌey Rogelim taqꞌlokano tet yaꞌ rey David, isqꞌaxponikꞌto naj yibꞌanh haꞌ Jordán yinta yaꞌ rey. 32 Naj Barzilai tuꞌ, ichamxa naj, 80 (kanhwinaj) habꞌilxa naj; haꞌ xin naj aqꞌni tzet isloh yaꞌ rey yebꞌ issoldado yet ay naj bꞌey Mahanaim, yuto kaw qꞌalom naj. 33 Yuxin yal yaꞌ rey David tet naj:

—Tonh wintajan bꞌey Jerusalén, haninan chaxhinlotzehan bꞌey tuꞌ, xhi yaꞌ rey David tet naj.

34 Istaqꞌwi naj Barzilai tet yaꞌ rey:

—Mamin, hanintiꞌan icham inxahan, hayebꞌxanhe tzꞌayik ayinan sat yibꞌanhqꞌinal tiꞌ, ¿tzet xin chito wubꞌan takꞌatanh bꞌey Jerusalén tuꞌ? 35 80 (kanhwinaj) habꞌil inxahan, matxa chu wabꞌenan isxuqꞌal tzet chilolaxi maka tzet chiꞌukꞌlaxi, matxa chiwabꞌehan yet chibꞌitni ebꞌnaj bꞌitnom yebꞌ ebꞌix bꞌitnom. Mamin, yinh hakaꞌ tuꞌ toxanhe chiwaqꞌ kabꞌo hinbꞌahan takꞌatanh. 36 Mamin, ¿tzet yinh xin chawala tato chintohan tawintaj, yu hapajtzen iskꞌulal inkꞌulan tawinh? Wal xin chinqꞌaxponikꞌtojan yibꞌanh haꞌ Jordán, kat inbꞌelwitojan hanikꞌoxa. 37 Chilahwi tuꞌ xin chinhachanitopaxojan watutan, toxanhe xin chiwechmahan inkaman, kat inmujlaxan yul inkonhobꞌan bꞌay mujan inmaman yebꞌ inmiꞌan. Wal xin tzujan naj Quimam inkꞌaholan, naj hachejabꞌ; haꞌ naj chito tawintaj, wal xin tzet choche hakꞌul, chawaqꞌ tet naj, xhi naj.

38 Yalni yaꞌ rey David:

—Tojabꞌ naj Quimam wintajan, chinwatxꞌehan iskꞌulal inkꞌulan yinh naj hakaꞌ hawalni tiꞌ. Sunil tzet chawoche haqꞌanaꞌ wetan chiwaqꞌan tet naj, xhi yaꞌ rey David tet naj.

39 Yekꞌto sunil ebꞌnaj tzujan yinta yaꞌ rey yibꞌanh haꞌ Jordán, yekꞌpaxto yaꞌ rey; lahwi tuꞌ istzꞌohni yaꞌ isqꞌotx naj Barzilai, istaqꞌlikano naj tet yaꞌ, ispaxto naj yatut. 40 Lahwi tuꞌ yapni yaꞌ rey bꞌey Gilgal, tzujan xin naj Quimam yinta yaꞌ yebꞌ ebꞌnaj Judá, yebꞌ yikta majan ebꞌnaj Israel. 41 Isto sunil ebꞌnaj Israel ischahno yaꞌ rey David tuꞌ, yalni ebꞌnaj tet yaꞌ hakaꞌ tiꞌ:

—¿Tzet yinh xin hanhe ebꞌnaj jet Israel yikꞌal yaꞌ Judá kach bꞌey inotij, iskolwa ebꞌnaj kach yinikꞌti yibꞌanh haꞌ Jordán, iskolwapaxo ebꞌnaj yinikꞌti hawixal yebꞌ hawuninal yebꞌ anma tzujan tawinta tiꞌ? xhi ebꞌnaj. 42 Istaqꞌwi ebꞌnaj Judá tet ebꞌnaj, yalni ebꞌnaj:

—Yuto ayto ju kobꞌahanh yebꞌ yaꞌ rey tiꞌ, yuxin konhbꞌeyanh jiqꞌatijanh yaꞌ, yuxin mach chitit hehowal yu huneꞌ tuꞌ; yuto maxhtaj yu yaꞌ rey tiꞌ yuxin chonhwaꞌanh, machi xin tzet lanhan kochahnihanh tet yaꞌ, xhi ebꞌnaj.

43 Istaqꞌwipaxo ebꞌnaj Israel tet ebꞌnaj Judá:

—Hanhonhtiꞌanh ekꞌbꞌalto lahonhel ay komajulanh yinta yaꞌ rey tiꞌ tesataj, yuto hanhonhtiꞌanh bꞌabꞌel honhanh tesataj, yuxin mach chu konhheyintanhenkanilojanh, yuto hanhonhanh bꞌabꞌel konhbꞌeyanh jiqꞌatijanh yaꞌ rey tiꞌ, xhi ebꞌnaj.

Kaw xin ekꞌbꞌal how istzotiꞌ ebꞌnaj Judá sata tzet yal ebꞌnaj Israel.