2 Hak tuꞌ yu isbꞌejnikano ebꞌnaj Israel yaꞌ rey David, yok tzujno ebꞌnaj yinta naj Seba, iskꞌahol naj Bicri. Wal ebꞌnaj Judá ok tzujno yinta yaꞌ rey David, ebꞌnaj titna bꞌey haꞌ Jordán masanta bꞌey Jerusalén, mach isbꞌejkano ebꞌnaj tuꞌ yaꞌ David.

3 Haxa yet yapni yaꞌ rey David bꞌey yatut bꞌey Jerusalén, bꞌay aykano 10 (lahonhwanh) ebꞌix iskabꞌ yixal, ebꞌix yakaniko yaꞌ istanhemalo yatut yalanhtokanoj; yinito yaꞌ ebꞌix bꞌey huneꞌxa nha. Yaniko yaꞌ istanhemal ebꞌix, yajaꞌ matxa way yaꞌ yebꞌ ebꞌix. Haꞌ tuꞌ xin majchelaxkano ebꞌix, yaqꞌlax tzet chislo ebꞌix, iskankano ebꞌix hunixal yinh sunilbꞌal tiempo masanta kamto ebꞌix.

4 Lahwi tuꞌ yalni yaꞌ rey David tet naj Amasa:

—Kutxbꞌako sunil ebꞌnaj Judá, kat hawul yebꞌ ebꞌnaj yet oxe insatajan, xhi yaꞌ.

5 Isto naj Amasa iskutxbꞌanoko sunil ebꞌnaj Judá, yajaꞌ xin mach meltzo naj hakaꞌ yu yalni yaꞌ rey David. 6 Yuxin yal yaꞌ David tet naj Abisai hakaꞌ tiꞌ:

—Wal tinanh ekꞌbꞌal chonhekꞌyaꞌ yu naj Seba sata naj Absalón, yuxin asiꞌ yebꞌ ebꞌnaj insoldadohan hatzujuyo naj, yuto kꞌuxantaxka yapni naj yul hunu konhobꞌ ayko iskꞌubꞌal, kat yaniko naj howal jinh, xhi yaꞌ.

7 Isto naj Joab yebꞌ naj Abisai istzujuyo naj Seba, istopaxo ebꞌnaj cereteo yebꞌ ebꞌnaj peleteo, haꞌ ton ebꞌnaj soldado chitanhen yaꞌ rey David; istopaxo ebꞌnaj soldado kaw helan; el ebꞌnaj bꞌey konhobꞌ Jerusalén yu istzujnayo ebꞌnaj naj Seba, iskꞌahol naj Bicri. 8 Haxa yet yapni ebꞌnaj iskawilal huneꞌ chꞌen niman chꞌen bꞌey Gabaón, ischahnayo isbꞌa ebꞌnaj yebꞌ naj Amasa. Haꞌ xin naj Joab ayko xil isqꞌap naj yet howal, aypaxiko iscinturón naj bꞌay ayko yespada ayayto yul yatut; aykꞌaykano chꞌen yet isto naj tioxhloj. 9 Yanito naj Joab iswatxꞌqꞌabꞌ yinh xil istiꞌ naj Amasa istzꞌohnilo naj isqꞌotx naj, yalni naj tet naj:

—¿Hanikꞌ haweh wuxhtaj? xhi naj. 10 Yajaꞌ mach yil naj Amasa tato ay huneꞌ chꞌen espada iqꞌbꞌil yu naj Joab tuꞌ. Istejnito naj Joab chꞌen espada tuꞌ yul iskꞌul naj Amasa, yapni chꞌen yinh huneꞌ isbꞌajil ismotx naj, yelti hapna yul iskꞌul naj, yaykꞌay sat txꞌotxꞌ. Hunelnhe xin yaqꞌ naj Joab yinh naj, matxa yaqꞌ naj hunelxa, iskamilo naj. Lahwi tuꞌ isto naj Joab yebꞌ yuxhta Abisai istzujnoyo naj Seba, iskꞌahol naj Bicri. 11 Yok linhno huneꞌ issoldado naj Joab iskꞌatanh isnimanil naj Amasa, yalni naj hakaꞌ tiꞌ:

—Haꞌ mak chitzala yinh naj Joab yebꞌ yinh yaꞌ rey David okojabꞌ tzujno yinta naj Joab, xhi naj.

12 Iskankano pakꞌno isnimanil naj Amasa xol ischikꞌil yiktabꞌal bꞌeh, yuxin sunil ebꞌnaj chiꞌekꞌto yul bꞌeh, chꞌok linhno ebꞌnaj yet chiyilni ebꞌnaj isnimanil naj Amasa tuꞌ. Haxa yet yilni naj soldado, tato sunil ebꞌnaj chiꞌok linhno yilni, ishekꞌnilo naj isnimanil naj istiꞌ bꞌeh, islebꞌanayo naj huneꞌ qꞌap yibꞌanh naj. 13 Hayet lahwi ishekꞌnilo naj isnimanil naj Amasa yul huneꞌ bꞌeh tuꞌ, yekꞌto sunil ebꞌnaj issoldado naj Joab isto istzujnoyo naj Seba, iskꞌahol naj Bicri.

14 Wal naj Seba ekꞌ naj sunil yul ismajul hunun majan ebꞌnaj Israel masanta apnikano naj bꞌey Abel-bet-maaca. Iskutxbꞌan isbꞌa sunil ebꞌnaj ay bꞌey Barim, yok tzujno ebꞌnaj yinta naj Seba yul huneꞌ konhobꞌ tuꞌ. 15 Lahwi tuꞌ yapni naj Joab yebꞌ issoldado bꞌey Abel-bet-maaca, iswatxꞌen ebꞌnaj isqꞌoch bꞌay chiꞌahto yinh iskꞌubꞌal konhobꞌ tuꞌ, yunhe yaniko ebꞌnaj howal yinh. Sunil ebꞌnaj issoldado naj Joab ok ebꞌnaj yuchkꞌayo iskꞌubꞌal konhobꞌ tuꞌ. 16 Ay xin huneꞌ ix ix ay yul konhobꞌ tuꞌ, kaw ay yitzꞌatil iswiꞌ. Ahto ix yibꞌanh iskꞌubꞌal konhobꞌ tuꞌ, yahwi ix yinh kaw ip hakaꞌ tiꞌ:

—¡Abꞌewe tzet chiwalan tiꞌ inqꞌanaꞌan! Halwe tet naj Joab tato chihitzti naj, yuto chiwochehan chintzotelan tet naj, xhi ix.

17 Hayet ishitziko naj Joab iskꞌatanh ix, isqꞌambꞌen ix tet naj:

—¿Ham hach tiꞌ naj Joab? xhi ix. Istaqꞌwi naj:

—Hoꞌ haninan, xhi naj. Yalni ix tet naj:

—Ay huneꞌ inchejbꞌanilan tawet chawabꞌe nino tzet chiwalan, xhi ix. Istaqꞌwi naj:

—¿Tzet hachejbꞌanil? xhi naj.

18 Yalni ix tet naj:

—Yet payat chihal-laxi: “Sunil tzet cheyoche heqꞌambꞌeꞌ, qꞌambꞌewe bꞌey konhobꞌ Abel,” xhi, hak tuꞌ chu iswatxꞌayo hunu tzet ye tuꞌ. 19 Haꞌ kokonhobꞌ tiꞌanh kaw mach choche howal, kaw xin yijem tet Komam Dios xol sunil ej konhobꞌ ay sat txꞌotxꞌ Israel tiꞌ, haꞌ kokonhobꞌ tiꞌanh yinh kaw yeli kaw ay yelapnoj, miꞌe yeko yinh Israel; yuxin, ¿tzet yinh yuxin chawoche hatanhtzelo tzet ye tuꞌ yet Komam Dios Jahawil yehi? xhi ix.

20 Istaqꞌwi naj Joab tet ix:

—Mach hako tuꞌ intxumnihan, hakaꞌ hawalni tiꞌ, mach chintanhtzelojan hekonhobꞌ. 21 Wal xin ay huneꞌ naj ah chewal txꞌotxꞌ yikꞌal yaꞌ Efraín, haꞌ naj chikosayikꞌojanh yuto yako naj ishowal yinh yaꞌ rey David. Huneꞌ naj tuꞌ Seba isbꞌi naj, iskꞌahol naj Bicri ye naj. Tato cheyako naj yul koqꞌabꞌanh chonhelanh bꞌey hekonhobꞌ tiꞌ, kat kopaxtojan, xhi naj tet ix. Istaqꞌwi ix tet naj:

—Kꞌultikꞌa, haꞌ iswiꞌ naj chiqꞌojlaxolti tawet yibꞌanh iskꞌubꞌal konhobꞌ tiꞌ, xhi ix.

22 Isto ix yul sunil konhobꞌ; yok ix tzotelo yu yitzꞌatil iswiꞌ tet anma, ischejni ix yilaxolto iswiꞌ naj Seba, iskꞌahol naj Bicri. Lahwi tuꞌ xin isqꞌojlaxilto iswiꞌ naj yintalto iskꞌubꞌal konhobꞌ tet naj Joab. Hak tuꞌ xin yu yoqꞌtzen naj Joab chꞌen trompeta, ispaxto sunil ebꞌnaj tzujan yinta naj yul ismantiado. Ismeltzo naj Joab iskꞌatanh yaꞌ rey David bꞌey Jerusalén.

23 Hak tuꞌ yu yokpaxkano naj Joab yahawilo yinh ebꞌnaj soldado Israel. Haꞌ xin naj Benaía, iskꞌahol naj Joiada, ok yahawilo ebꞌnaj cereteo yebꞌ yinh ebꞌnaj peleteo. 24 Haꞌ xin naj Adoram ok yahawilo yinh ebꞌnaj chiꞌalaxiko yinh munil tet yaꞌ rey. Haꞌ xin naj Josafat, iskꞌahol naj Ahilud, chitzꞌibꞌnhen isbꞌi tzetaj chiyuhi. 25 Haꞌ xin naj Seva, haꞌ naj istzꞌibꞌlom yaꞌ rey, wal yaꞌ Sadoc yebꞌ yaꞌ Abiatar, haꞌ ebꞌyaꞌ sacerdote. 26 Haꞌ xin yaꞌ Ira ah Jair, sacerdotepaxo yeko yinh yaꞌ rey David.