Txꞌiꞌal konhobꞌ okkano yalanh yip yaꞌ rey David
8
Lahwi tuꞌ, yaniko yaꞌ rey David howal yinh ebꞌnaj filisteo, isqꞌoji yaꞌ yinh ebꞌnaj, yokkano ebꞌnaj yalanh yip yaꞌ. Iskolnilo yaꞌ txꞌotxꞌ Meteg-ama yul isqꞌabꞌ ebꞌnaj filisteo tuꞌ. 2 Isqꞌojipaxo yaꞌ yinh ebꞌnaj moabita, ischejni yaꞌ yay pajno sunil ebꞌnaj sat txꞌotxꞌ. Yok yaꞌ ismalen ebꞌnaj yu txꞌanh txꞌanh, haꞌ ebꞌnaj kankano yul kabꞌ txꞌanhil aqꞌlaxkamo ebꞌnaj, haxa ebꞌnaj kankano yul yet yox txꞌanhil xin mach aqꞌlaxkamo ebꞌnaj. Hak tuꞌ yu yinh sunil ebꞌnaj moabita, yokkano ebꞌnaj yalanh ischejbꞌanil yaꞌ rey David, yokpaxo ebꞌnaj yinh tohlabꞌal tet yaꞌ.3 Lahwi tuꞌ isqꞌojipaxo yaꞌ rey David yinh naj isreyal Soba, haꞌ ton naj Hadad-ezer, iskꞌahol naj Rehob, yet lanhan isto naj Hadad-ezer tuꞌ iskolnolo istxꞌotxꞌ ay bꞌey haꞌ niman Éufrates. 4 Yaꞌ rey David yito yaꞌ preso 1,700 ebꞌnaj soldado ah Soba ayahto yibꞌanh cheh, yebꞌ 20 (hunkꞌal) mil ebꞌnaj soldado chibꞌelwi yu yoj. Isqꞌahnito yaꞌ rey David tuꞌ yoj sunil ischeh ebꞌnaj chiꞌokniko yinh howal, kachanxanhe xin noꞌ nhikꞌnhe 100 (hokꞌal) carruaje matxa isqꞌahilto yaꞌ yoj noꞌ.
5 Yapni ebꞌnaj sirio ay bꞌey Damasco kolwal yinh naj Hadad-ezer, isreyal txꞌotxꞌ Soba, yajaꞌ qꞌoji yaꞌ rey David tuꞌ yinh ebꞌnaj sirio, ispotxꞌnikamo yaꞌ 22 mil ebꞌnaj. 6 Iswatxꞌenkanh yaꞌ David tuꞌ iscampamento bꞌey Damasco yet Siria, yokkano ebꞌnaj sirio yalanh yip yaꞌ, yaqꞌni ebꞌnaj istohlabꞌal tet yaꞌ David. Bꞌajxanhetuꞌwal to yaꞌ David yinh howal, haꞌ yaꞌ qꞌoji, yuto haꞌ Komam Jahawil kolwa yinh yaꞌ.
7 Lahwi tuꞌ yinilo yaꞌ rey David chꞌen escudo oro, chꞌen okniko yu ebꞌnaj ischejabꞌ naj rey Hadad-ezer, yinito yaꞌ David chꞌen bꞌey Jerusalén. 8 Yinipaxilo yaꞌ niman chꞌen bronce bꞌey konhobꞌ Beta yebꞌ konhobꞌ Berotai, iskonhobꞌ naj rey Hadad-ezer.
9 Hayet yabꞌen naj Toi, isreyal txꞌotxꞌ Hamat tato qꞌoji yaꞌ rey David yinh ebꞌnaj issoldado naj rey Hadad-ezer, 10 ischejni naj Toi iskꞌahol, haꞌ ton naj Joram, isqꞌanaꞌ iskꞌulal yibꞌanh yaꞌ rey David yebꞌ yu istioxhli naj tet yaꞌ yinh tzalahilal, yuto qꞌoji yaꞌ David yinh naj rey Hadad-ezer, yuto ayko ishowal naj Hadad-ezer yinh naj rey Toi. Hayet isto naj Joram yilaꞌ yaꞌ rey David tuꞌ iqꞌbꞌil chꞌen munlabꞌal plata, chꞌen oro yebꞌ chꞌen bronce yu naj, sabꞌehal tet yaꞌ rey David. 11 Yaqꞌni yaꞌ rey David chꞌen plata, chꞌen oro yebꞌ chꞌen bronce tuꞌ tet Komam Jahawil, yebꞌ xin yaqꞌpaxo yaꞌ tet Komam chꞌen yilo yaꞌ tet hunteqꞌan konhobꞌ okkano yalanh yip yaꞌ. 12 Haꞌ ton chꞌen yilo yaꞌ tet ebꞌnaj sirio, yebꞌ ebꞌnaj moabita, amonita, yebꞌ tet ebꞌnaj filisteo, yebꞌ tet ebꞌnaj amalecita yebꞌ tet naj Hadad-ezer, iskꞌahol naj Rehob, isreyal txꞌotxꞌ Soba.
13 Hak tuꞌ yu isbꞌinakano yaꞌ rey David. Hayet ismeltzo yaꞌ rey yanoko howal yinh ebꞌnaj sirio tuꞌ, yaniko yaꞌ howal yinh ebꞌnaj edomita ay bꞌey akꞌal chiyij isbꞌi Atzꞌam, isqꞌoji yaꞌ yinh ebꞌnaj, ismaqꞌnikamo yaꞌ 18 (waxajlahonhebꞌ) mil ebꞌnaj edomita tuꞌ. 14 Iswatxꞌenkanh yaꞌ iscampamento yul sunil txꞌotxꞌ Edom, yok sunil ebꞌnaj edomita tuꞌ ischejabꞌo yaꞌ rey David. Bꞌajxanhetuꞌwal to yaꞌ rey David yaqꞌaꞌ howal, haꞌ yaꞌ chiqꞌoji, yuto Komam Jahawil kolwa yinh yaꞌ.
Ebꞌnaj chischej yaꞌ rey David
15 Yaꞌ rey David ok yaꞌ reyal yinh sunil txꞌotxꞌ Israel, haꞌ xin istoholal yebꞌ iskꞌulal iswatxꞌe yaꞌ yinh ej yet konhobꞌ tuꞌ. 16 Haꞌ xin naj Joab, yunin ix Sarvia, haꞌ naj ayko yahawilo yinh ebꞌnaj issoldado yaꞌ David. Naj Josafat, iskꞌahol naj Ahilud chitzꞌibꞌnhen tzet chiyu yaꞌ rey David tuꞌ. 17 Haꞌ xin yaꞌ Sadoc, iskꞌahol yaꞌ Ahitob yebꞌ yaꞌ Ahimelec, iskꞌahol yaꞌ Abiatar ayko sacerdotehal. Haꞌ xin naj Seraías, istzꞌibꞌlom yaꞌ. 18 Haꞌ xin naj Benaía, iskꞌahol naj Joiada ayko yahawilo ebꞌnaj cereteo, yebꞌ ebꞌnaj peleteo, haxa ebꞌnaj iskꞌahol yaꞌ rey David tuꞌ xin iswiꞌehal yeko ebꞌnaj xol ebꞌnaj yahawil Israel.