—Ilkꞌanabꞌ tinanh, hanintiꞌan, ayiniktijan yul huneꞌ nha cedro ayko yich. Walpaxo isKaxhahil istrato Komam yul mantiado ayiktoj, xhi yaꞌ.

3 Istaqꞌwi yaꞌ Natán tet yaꞌ:

—Watxꞌe tzet chal hawanma, yuto ayko Komam Dios hawetbꞌihoj, xhi yaꞌ.

4 Yajaꞌ yinhtikꞌa huneꞌ aqꞌbꞌal tuꞌ xin tzotel Komam Jahawil tet yaꞌ Natán, yalni Komam tet yaꞌ: 5 «As tzotelanh tet inchejabꞌan, yaꞌ David, kat hawalni tato hanin Yahawilintiꞌan, chiwalan hakaꞌ tiꞌ: “David, ¿tom chawatxꞌe hunun nha bꞌay chinehayojan?” xhi Komam. 6 Yalnipaxo Komam: “Yinh kaw isyelal yettaxtikꞌa yet winiltijan konhobꞌ Israel sat txꞌotxꞌ Egipto masanto tinanh, maxhto bꞌay chinehikꞌojan yul hunu nha, wal xin yulnhe qꞌap mantiado kinehikꞌojan. 7 Yinh sunilbꞌal tiempo yet wekꞌan yebꞌ ebꞌnaj Israel, machi hunelo inqꞌanan tet ebꞌnaj ijbꞌalom, ebꞌnaj wakojan istanhemalo inkonhobꞌan hakaꞌ tiꞌ: ‘¿Tzet yinh mach hewatxꞌekanh hunu watutan cedro chꞌok yich?’ Mach kinchihojan.^a 8 Yuxin chawal tet yaꞌ David, yaꞌ inchejabꞌ tuꞌan hakaꞌ tiꞌ: ‘Asiꞌ, hak tiꞌ yalni Komam Jahawil kaw aykano yip. Haninan, kaxhwilojan tanhe meꞌ, kaxhwanikojan yahawilo inkonhobꞌ Israelan. 9 Ayinikojan hawetbꞌihoj yinh bꞌayejtuꞌwal kach ekꞌi, intanhtzenilojan sunil ebꞌnaj ayko ishowal tawinh tasataj. Wanikojan hamay hakaꞌ yalaxiko ismay ebꞌnaj nime winaj ay yelapnoj ay yul sat yibꞌanhqꞌinal tiꞌ. 10 Yebꞌpaxo xin chiwaqꞌan hetxꞌotxꞌ bꞌay chexehi, hex inkonhobꞌtiꞌan. Machi xin hunu mak chexiniloj, matxa xin chexyeta ebꞌnaj ayko ishowal teyinh hakaꞌ yet yichebꞌanil, 11 yet wanikojan ebꞌnaj juez ijbꞌalomal yinh inkonhobꞌan, haꞌ ton Israel. Yajaꞌ wal tawet xin chiwaqꞌan xewilal yunhe matxa howal chako hunteqꞌanxa konhobꞌ ayko ishowal tawinh. Chiwalnipaxojan hawabꞌeꞌ tato haꞌ hakꞌahol chiꞌok reyal haselelo bꞌaqꞌinh. 12 Haxa yet chiꞌapni istiempohal bꞌay chachkami, kat hamujlax bꞌay mujan hamam, haninan chiwakojan huneꞌ hakꞌahol tuꞌ reyal haseleloj, chiwanikojan sunil yul isqꞌabꞌ. 13 Haꞌ naj xin chiwatxꞌenkanh watutan, kat wanikojan huneꞌ munil reyalil tet yikꞌal iskꞌahol hakꞌahol yinh sunilbꞌal tiempo.^b 14 Haninan chinokan ismamo naj, kat yok naj inkꞌaholojan, yajaꞌ tato chiswatxꞌe naj istxꞌojal, chiwayojan isyaꞌtajil yibꞌanh naj, kat waqꞌnihan yijaꞌ naj yu teꞌ kꞌax, maka hakaꞌ chu yaqꞌni naj mame tzꞌum yijaꞌ iskꞌahol. 15 Yajaꞌ matxa chinhekꞌilojan iskꞌulchꞌanil inkꞌulan yinh naj, hakaꞌ yu inhekꞌnilojan iskꞌulchꞌanil inkꞌulan yinh yaꞌ Saúl, hakaꞌ yu winilojan yaꞌ Saúl yinh hasat. 16 Haꞌ hamunil yinh reyalil tiꞌ yebꞌ ebꞌnaj hakꞌahol chiꞌok haseleloj, chiwaqꞌan teyet yinh sunilbꞌal tiempo,’ kachi tet yaꞌ David,” xhi Komam.»

17 Yal yaꞌ Natán sunil tuꞌ tet yaꞌ rey David hakaꞌtikꞌa yu yilni yaꞌ yinh sajsatil, yebꞌ hakaꞌtikꞌa yu yabꞌen yaꞌ tzet yal Komam. 18 Hayet yabꞌen yaꞌ rey David hunteqꞌan tzotiꞌ tuꞌ, yokto yaꞌ yul qꞌap mantiado aykanh yatuto Komam Jahawil, yok yaꞌ sata Komam, yalni yaꞌ hakaꞌ tiꞌ: «Mamin, ¿tom ay yelapno wichmaman yebꞌ inmaman yebꞌ inmiꞌan yuxin chawaqꞌ huneꞌ munil kaw ay yelapno tiꞌ wetan yu wokan reyal yinh Israel? 19 ¿Tom xin hanikꞌnhechꞌan yelapno huneꞌ tiꞌ hawalni, hawalnipaxkanoj tato inkꞌaholan chiꞌok reyal inselelojan bꞌaqꞌinh? ¡Mamin, machi hunu naj winaj chiwatxꞌen hakaꞌ tzet chawatxꞌe! 20 Mam Wahawil, matzet tzꞌaj walaꞌan tawet, yuto kinhawohtajan hanin hachejabꞌ intiꞌan. 21 Hawatxꞌe sunil tzet kaw chikꞌay kokꞌul jilni, hakaꞌtikꞌa yu hawalnikanoj, yuto hak tuꞌ el yinh hakꞌul yunhe wohtanhenilojan hanin hachejabꞌ intiꞌan. 22 Mam Wahawil, inDiosalan, kaw nimankano hawelapnoj, machi hunuxa dios tasataj, hunchꞌan Dios aya, hachnhechꞌan hakaꞌtikꞌa yu jabꞌenanh sunil, yu kotxikinanh. 23 Wal hakonhobꞌ Israel tiꞌ, machi hunuxa konhobꞌ hakaꞌ; hanhechꞌan kaw ay yelapnoj xol sunil konhobꞌ ay yul sat yibꞌanhqꞌinal tiꞌ yul hasat, hakolilo yul isqꞌabꞌ isyaꞌtajil, hawaniko hakonhobꞌoj, hawaniko ismay, hayeni nimeta kꞌaybꞌalkꞌule yebꞌ tzetaj kaw ay yelapnoj tet. Hakolilo konhobꞌ Israel tiꞌ sat txꞌotxꞌ Egipto, hatanhtzenilo ej konhobꞌ, yebꞌ hunteqꞌan isdiosal anma tuꞌ yinh sat. 24 Mam Wahawil, hach hawako konhobꞌ Israel hakonhobꞌoj yinh sunilbꞌal tiempo, hach xin isDiosal ebꞌnaj.

25 »Wal tinanh xin Mam Wahawil, inDiosalan, yijabꞌ isbꞌa sunil tzet halbꞌilkano hawu winhan, hanin hachejabꞌ intiꞌan, yebꞌpaxo yinh inkꞌaholan chiꞌok reyal inselelojan bꞌaqꞌinh. 26 Kaw niman yelapno habꞌi yinh sunilbꞌal tiempo, kat yal-laxi tato hach tiꞌ Yahawil kaw aykano yip, isDiosalpaxo ebꞌnaj Israel. Haꞌ ebꞌnaj inkꞌaholan chiꞌok reyal inselelojan bꞌaqꞌinh, aynhehojabꞌnhetikꞌa ismunil ebꞌnaj yinh reyal tuꞌ yul hasat yinh sunilbꞌal tiempo. 27 Mamin, hach tiꞌ Yahawil kaw aykano yip, isDiosal ebꞌnaj Israel, hawal yabꞌe istxikin hachejabꞌ hakaꞌ tiꞌ: “Haꞌ ebꞌnaj hakꞌahol chꞌok ebꞌnaj reyal haseleloj yet bꞌaqꞌinh,” kachi. Yuxin hanin hachejabꞌ intiꞌan chitit yinh wanmahan inqꞌannihan huneꞌ tiꞌ tawet. 28 Mam Wahawil, hach tiꞌ Dios hach, haꞌ tzet chawala kaw yeli, kaw hantanhe iskꞌulal hawaltekano wetan, hanin hachejabꞌ intiꞌan. 29 Mamin, ayo hakꞌulal yibꞌanh inkꞌaholan chꞌok reyal inselelojan bꞌaqꞌinh, haxinwal aynhetikꞌa yinh sunilbꞌal tiempo yinh hasat, yuto hach halnhekano huneꞌ tuꞌ. Mam Wahawil, inDiosalan, yu iskꞌulchꞌanil hakꞌul yuxin chawayo hakꞌulal yibꞌanh ebꞌnaj inkꞌaholan yinh sunilbꞌal ej tiempo,» xhi yaꞌ rey David tet Komam Dios.