—Ilkꞌanabꞌi, hanintiꞌan yul nha kaw kꞌul, bꞌay ayinan, cedronhe teꞌ ayko yinh, wal isKaxhahil istrato Komam Jahawil xin yalanh qꞌap cortina ayiktoj, xhi yaꞌ. 2 Istaqꞌwi yaꞌ Natán tet yaꞌ David:

—Watxꞌe sunil tzet chꞌekꞌ yinh hawanma yuto haꞌ Komam Dios ayko hawetbꞌihoj, xhi yaꞌ.

3 Yajaꞌ yinhtikꞌa huneꞌ aqꞌbꞌal tuꞌ tzotel Komam Dios tet yaꞌ Natán, yalni Komam: 4 «Asiꞌ, kat hawalni tet yaꞌ David, inchejabꞌan, tato haninan chiwalan hakaꞌ tiꞌ: “Hach tiꞌ, mach chawatxꞌekanh nha bꞌay chinehayojan, 5 yuto hanintiꞌan yettaxtikꞌa winilojan konhobꞌ Israel sat txꞌotxꞌ Egipto, maxhto hunelo chinehayojan yul nha masanto tinanh, wal xin yulajnhe qꞌap mantiado chilakinehayojan. 6 Sunil bꞌay xakinekꞌan yebꞌ ebꞌnaj Israel, machi hunelo tiꞌ inqꞌanan hunu nha bꞌay chinehayojan tet ebꞌnaj yahaw, ebꞌnaj wakojan ijbꞌalomal yinh inkonhobꞌan; mach bꞌay walan tet ebꞌnaj: ‘¿Tzet yinh xin mach cheyakanh hunu nha cedro bꞌay chinehan?’ Mach walan huneꞌ tuꞌ,” xhi Komam. 7 Yalnipaxo Komam: “Yuxin wal tinanh, hal tet yaꞌ David, inchejabꞌan hakaꞌ tiꞌ: Haꞌ Komam Jahawil, yahaw yinh sunil, chalni tawet hakaꞌ tiꞌ, Hanintiꞌan kach wilojan yet ayachiko tanhe meꞌ, yu hawok yahawilo konhobꞌ Israel, inkonhobꞌan. 8 Ayinikojan hawetbꞌihoj bꞌajxanhetuꞌwal kach ekꞌi, intanhtzelojan ebꞌnaj ayko ishowal tawinh yinh hasat, kaw ay yelapno kach elkaniko wuhan hakaꞌ ebꞌnaj nime winaj kaw ay yelapno sat txꞌo txꞌotxꞌ tiꞌ. 9 Yebꞌpaxo xin xaꞌinsayan bꞌay chꞌehayo Israel inkonhobꞌan, haꞌ bꞌey tuꞌ xin chꞌehayo yinh hunelnhe, matxa chihekꞌlax bꞌey tuꞌ, matxa xin chiꞌetalax yu ebꞌnaj txꞌoj hakaꞌ yet yalanhtokanoj, 10 yet wanikojan ebꞌnaj juez yahawilo yinh Israel inkonhobꞌan. Chiwinayojan ebꞌnaj ayko ishowal tawinh, chiwaqꞌnihan hawohtanheloj tato haꞌ hawuninal chꞌok reyal haseleloj. 11 Haxa yet chꞌapni istzꞌayikal bꞌay chachkami, kat insaynikojan hunu ebꞌnaj hakꞌahol chꞌok reyal haseleloj. Haninan xin chiwaqꞌ chꞌibꞌojan ismunil naj yinh reyal. 12 Haꞌ naj hakꞌahol tuꞌ chꞌanikanh watutan, haninan xin chiwakojan naj yinh yahawil yinh sunilbꞌal tiempo.^a 13 Haninan chinokan ismamo naj, haꞌ naj xin chꞌok inkꞌaholojan, mach xin chiwilojan iskꞌulal inkꞌulan yinh naj hakaꞌ yu winilojan iskꞌulal inkꞌulan yinh yaꞌ ok reyal tasataj yet bꞌabꞌelal. 14 Chiwakojan naj hakꞌahol tuꞌ yul watutan yinh sunilbꞌal tiempo, kat yok naj yahawo yinh inkonhobꞌan, machi xin mak chu yinilo naj reyal,” kachi,» xhi Komam tet yaꞌ Natán.

15 Yalni yaꞌ Natán sunil hunteqꞌan tiꞌ tet yaꞌ rey David hakaꞌtikꞌa yu yilni yaꞌ yebꞌ hakaꞌtikꞌa yu yabꞌen yaꞌ.

16 Yokto yaꞌ rey David sata Komam Jahawil, yalni yaꞌ: «Mamin, hach tiꞌ Wahawilan, inDiosalan; ¿tzet welapnojan yebꞌ tzet yelapno inmaman yuxin chinhawakojan yul huneꞌ ehobꞌal tiꞌ? 17 Yebꞌ xin ¿tom hanikꞌnhechꞌan huneꞌ tiꞌ yul hasat Mamin yinh tzet chawaqꞌ wetan? Yebꞌpaxo xin makaxhtzotel yibꞌanhilo inkꞌaholan yinh tzet chitohuli, tato haꞌ chꞌok reyal inselelojan bꞌaqꞌinh, yinh hakaꞌ tuꞌ chal yelapnoj kaw niman welapnojan yul hasat, Mam Wahawil. 18 Matzet tzꞌaj walaꞌan yibꞌanhilo inmayan lanhan hawaniko tiꞌ, hanin hachejabꞌ intiꞌan, wal xin hach kinhawohtajan. 19 Mam Wahawil, yu iskꞌulal hakꞌul winhan, hanin hachejabꞌ intiꞌan, yebꞌ yu hak tuꞌ chꞌel yinh hawanma chayelo tzetaj kaw ay yelapno tiꞌ winhan, chayenilo hawip. 20 Mam Wahawil, machi hunuxa mak hakaꞌ hach tiꞌ, yebꞌ xin machi hunuxa Dios hakaꞌ hach tiꞌ, yuto machi hunuxa mak chiwatxꞌen tzetaj chijabꞌehanh yu kotxikinanh. 21 ¿Aymi xin hunuxa konhobꞌ sat txꞌo txꞌotxꞌ tiꞌ hakaꞌ hakonhobꞌ Israel? Machi hunuj. Hach konhhakolanh yu jokkanojanh hakonhobꞌoj, yu huneꞌ tuꞌ yuxin kaw niman yu habꞌinakanoj, hayenilo hawip yebꞌ nimeta kꞌaybꞌalkꞌule. Hatzumbꞌenilo nime konhobꞌ sata hakonhobꞌ, hakolnilo sat txꞌotxꞌ Egipto. 22 Hach hawakaniko konhobꞌ Israel hakonhobꞌoj yinh sunilbꞌal ej tiempo, hach tiꞌ xin Mam Wahawil, hach tiꞌ isDiosal. 23 Wal tinanh xin Mam Wahawil, haꞌ tzet hawal winhan hanin hachejabꞌ intiꞌan, yebꞌ yinh inkꞌaholan yijabꞌ isbꞌa yinh sunilbꞌal tiempo hakaꞌ hawalni tiꞌ. 24 Mamin, hach tiꞌ ayachnhetikꞌa, yebꞌ chibꞌinakano habꞌi yinh sunilbꞌal ej tiempo, kat yal-lax tawinh hakaꞌ tiꞌ: “Komam Yahawil yinh sunilal, Yahawil yinh Israel, isDiosal Israel,” xhi. Aynhetikꞌako xin yiptzen isbꞌa yatut hachejabꞌ, hanin David, intiꞌan. 25 Yuto hach tiꞌ Mamin, hach inDiosalan maxawaqꞌ wohtanhelojan hanin hachejabꞌ intiꞌan tato hach chawakanh huneꞌ nha, haꞌ inkꞌaholan chiꞌok reyal inselojan bꞌaqꞌinh, yuxin ayinikojan txahlo tasataj.^b 26 Wal tinanh xin Mam Wahawil, hach maxawal hunteqꞌan iskꞌulal tiꞌ winhan, hanin hachejabꞌ intiꞌan. 27 Haꞌ tinanh xin maꞌel yinh hakꞌul hawanayo isyaxil yibꞌanh inkꞌaholan, hanin hachejabꞌ intiꞌan, yu yehikꞌo naj, yebꞌ yuninal yuninal yinh sunilbꞌal tiempo tasataj, yuto hach tiꞌ Mam Wahawil hawayo hakꞌulal yibꞌanh naj yebꞌ ebꞌnaj titna yinh naj, chawanipaxayo hakꞌulal yibꞌanh ebꞌnaj yet bꞌaqꞌinh yinh sunilbꞌal ej tiempo,» xhi yaꞌ rey David.