Hunteqꞌan konhobꞌ ok yalanh yip yaꞌ rey David
18
Lahwi hunteqꞌan tiꞌ xin, isqꞌoji yaꞌ rey David yinh ebꞌnaj filisteo, yokkano ebꞌnaj yalanh yip yaꞌ, yinilo yaꞌ konhobꞌ Gat yebꞌ ej yaldeahil yul isqꞌabꞌ ebꞌnaj filisteo tuꞌ. 2 Isqꞌojipaxo yaꞌ David yinh ebꞌnaj Moab, yok ebꞌnaj yaqꞌno istohlabꞌal tet yaꞌ. 3 Isqꞌojipaxo yaꞌ David yinh naj Hadad-ezer, isreyal konhobꞌ Soba bꞌey Hamat, yet lanhan isto naj ismajnoyo txꞌo txꞌotxꞌ iskawilal haꞌ Éufrates. 4 Yinilo yaꞌ David mil carruaje tet naj rey Soba tuꞌ, yebꞌ hujebꞌ mil ebꞌnaj soldado chiꞌekꞌ yibꞌanh cheh, yok 20 (hunkꞌal) mil ebꞌnaj chiꞌekꞌ yu yoj yet chiyaqꞌni howal, ischejni yaꞌ ismaqꞌlaxo qꞌaho yoj noꞌ cheh chinhikꞌnikꞌo carruaje yet howal, kachanxanhe xin 100 (hokꞌal) noꞌ cheh tuꞌ yakano yaꞌ. 5 Hayet ayko howal tuꞌ yapni ebꞌnaj sirio ay bꞌey Damasco kolwal yinh naj Hadad-ezer isreyal Soba, yajaꞌ qꞌoji yaꞌ David yinh ebꞌnaj sirio tuꞌ, ispotxꞌnikamo yaꞌ 22 mil ebꞌnaj. 6 Lahwi tuꞌ yanito yaꞌ David campamento xol ebꞌnaj sirio ay bꞌey Damasco, yok ebꞌnaj sirio tuꞌ, ischejabꞌ yaꞌ David, yaqꞌni ebꞌnaj istohlabꞌal tet yaꞌ, yuto haꞌ Komam Jahawil kolwa yinh yaꞌ David, yuxin bꞌajxanhetuꞌwal chito yaꞌ, chiqꞌoji yaꞌ.7 Yiqꞌnipaxo yaꞌ David chꞌen escudo oro, chꞌen iqꞌbꞌil yu ebꞌnaj ischejabꞌ naj rey Hadad-ezer. Yinito yaꞌ David chꞌen bꞌey Jerusalén. 8 Isqꞌojipaxo yaꞌ David yinh hunteqꞌan iskonhobꞌ naj rey Hadad-ezer, haꞌ ton konhobꞌ Tibhat yebꞌ konhobꞌ Cun, kaw xin niman chꞌen bronce yiqꞌ yaꞌ bꞌey hunteqꞌan konhobꞌ tuꞌ. Haꞌ xin chꞌen bronce tuꞌ okniko yu yaꞌ rey Salomón yet yaqꞌni watxꞌeꞌ yaꞌ huneꞌ niman pila yebꞌ ispilalil Yatut Komam Dios yebꞌ hunteqꞌan munlabꞌal bronce yaqꞌ watxꞌe yaꞌ yul Yatut Komam.
9 Hayet yabꞌen naj Toi, isreyal konhobꞌ Hamat tato istanhtzelo yaꞌ David issoldado naj Hadad-ezer, 10 ischejnito naj iskꞌahol, haꞌ ton naj Adoram iskꞌatanh yaꞌ rey David yunhe yaqꞌni naj iskawil iskꞌul yaꞌ rey David yebꞌ yunhe isqꞌanni naj iskꞌulal yibꞌanh yaꞌ, yuto yaqꞌ yaꞌ howal yinh naj Hadad-ezer, isqꞌoji yaꞌ yinh naj, yuto haꞌ naj rey Toi ayko howal xol naj yebꞌ naj Hadad-ezer, yinito naj Adoram tuꞌ munlabꞌal oro, yebꞌ plata, yebꞌ bronce tet yaꞌ. 11 Yaqꞌni yaꞌ rey David sunil chꞌen oro; chꞌen plata yebꞌ chꞌen bronce tuꞌ tet Komam Dios yebꞌ sunil chꞌen yilo yaꞌ tet konhobꞌ ay yul ismajul txꞌotxꞌ Edom, txꞌotxꞌ Moab, txꞌotxꞌ Amón yebꞌ chꞌen yilo yaꞌ tet ebꞌnaj filisteo yebꞌ tet ebꞌnaj Amalec.
12 Haktikꞌapax tuꞌ xin naj Abisai, yunin ix Sarvia, istanhtzelo naj 18 (waxajlahonhebꞌ) mil ebꞌnaj edomita bꞌey akꞌal chiyij Atzꞌam. 13 Yanipaxto yaꞌ rey David campamento bꞌey txꞌotxꞌ Edom, yok sunil ebꞌnaj ah Edom tuꞌ ischejabꞌo yaꞌ David, yuto haꞌ Komam chikolwa yinh yaꞌ bꞌajxanhetuꞌwal chito yaꞌ.
Ebꞌnaj ay yelapno ye ismunil yinta yaꞌ rey David
14 Ok yaꞌ David isreyalo sunil txꞌotxꞌ Israel, iswatxꞌen yaꞌ istoholal yinh sunil anma Israel. 15 Haꞌ xin naj Joab, yunin ix Sarvia, haꞌ naj yahaw yinh issoldado yaꞌ David. Haxa naj Josafat, iskꞌahol naj Ahilud haꞌ naj istzꞌibꞌlom yaꞌ rey. 16 Haxa yaꞌ Sadoc, iskꞌahol yaꞌ Ahitob yebꞌ yaꞌ Ahimelec, iskꞌahol yaꞌ Abiatar haꞌ ebꞌyaꞌ sacerdote, haxa naj Savsa, haꞌ naj tzꞌibꞌlom. 17 Haxa naj Benaía, naj iskꞌahol yaꞌ Joiada, yahaw yeko naj yinh ebꞌnaj cereteo yebꞌ yinh ebꞌnaj peleteo, haxa ebꞌnaj iskꞌahol yaꞌ rey David yahawilpaxo konhobꞌ Israel ye ebꞌnaj, chikolwa ebꞌnaj yinh yaꞌ David.