Hak tuꞌ yu ischejnito yaꞌ David tuꞌ ischejabꞌ yaqꞌno yaqꞌlobꞌal iskꞌul naj Hanún yu iskamikal ismam; yajaꞌ hayet yapni ebꞌnaj ischejabꞌ yaꞌ David xol ebꞌnaj Amón iskꞌatanh naj Hanún, yu yaqꞌni ebꞌnaj yaqꞌlobꞌal iskꞌul naj. 3 Yalni ebꞌnaj iswiꞌehal xol ebꞌnaj Amón tet naj Hanún: «¿Ham hawalni tato chitzꞌay iskꞌul yaꞌ David yinh hamam, yuxin mayati yaꞌ ischejabꞌ yaqꞌaꞌ yaqꞌlobꞌal hakꞌul? Wal xin machoj. Ebꞌnaj tiꞌ mahul ebꞌnaj takꞌatanh yunhe yilni ebꞌnaj tzet yok kokonhobꞌ yebꞌ kotxꞌotxꞌ,» xhi ebꞌnaj.

4 Hak tuꞌ yu istzabꞌlaxayo ebꞌnaj ischejabꞌ yaꞌ rey David yu naj Hanún, yilaxilo xil istiꞌ ebꞌnaj, iskꞌuplaxilo istel xil isqꞌap ebꞌnaj masanta ahapno yalanh isyutz ebꞌnaj, lahwi tuꞌ ischejnitopaxo naj ebꞌnaj. 5 Hayet ismeltzo ebꞌnaj yapni tzotiꞌ tet yaꞌ David yinh tzet utelax ebꞌnaj tuꞌ, isto ischahomalo ebꞌnaj yu yaꞌ David, yuto kaw txꞌixobꞌal huneꞌ yaqꞌle ebꞌnaj tuꞌ. Ischejnito yaꞌ ischejabꞌ chahwal yinh ebꞌnaj, yalnito yaꞌ David tzotiꞌ hakaꞌ tiꞌ: «Chexkankano bꞌey Jericó masanto chichꞌibꞌ xil hetiꞌ, katto hetita,» xhi yaꞌ David.

6 Isnahni ebꞌnaj amonita tato chitit ishowal yaꞌ rey David yinh ebꞌnaj yu huneꞌ tuꞌ, yuxin yato naj Hanún yebꞌ ebꞌnaj amonita mil talento chꞌen plata bꞌey Mesopotamia, bꞌey Siria, bꞌey Maaca yebꞌ bꞌey Soba yu isloqꞌni ebꞌnaj carruaje yet howal, yebꞌ yunhe istit ebꞌnaj soldado chiyaqꞌ howal yibꞌanh cheh kolwaho yinh ebꞌnaj. 7 Istohlan ebꞌnaj 32 (kabꞌlahonhebꞌ iskawinaj) mil carruaje yet howal, istitpaxo naj isreyal Maaca yebꞌ issoldado, iswatxꞌen ebꞌnaj iscampamento satakꞌto Medeba, iskutxbꞌanpaxiko isbꞌa ebꞌnaj amonita yulajla iskonhobꞌ yu isto ebꞌnaj yinh howal.

8 Hayet yabꞌen yaꞌ rey David tato kutxanxako ebꞌnaj, ischejnito yaꞌ naj Joab yebꞌ sunil ebꞌnaj issoldado, ebꞌnaj kaw helan yinh howal. 9 Haꞌ ebꞌnaj amonita tuꞌ to yinh isbꞌel, iswatxꞌen isbꞌa ebꞌnaj yinh howal yul ispultahil huneꞌ niman konhobꞌ, wal ebꞌnaj rey apni kolwal xin, kankano ebꞌnaj yintalti konhobꞌ. 10 Yuxin hayet yilni naj Joab tato ayayo ebꞌnaj amonita ayko ishowal yinh sataj yebꞌ yinhla ishoyanil, issikꞌnilo naj ebꞌnaj soldado kaw helan xol ebꞌnaj soldado Israel yu yaniko ebꞌnaj howal yinh ebꞌnaj sirio. 11 Wal hunteqꞌanxa ebꞌnaj soldado Israel yako naj Joab ebꞌnaj yalanh ischejbꞌanil naj Abisai, naj yuxhta naj, ischejni naj ebꞌnaj yaniko howal yinh ebꞌnaj amonita. 12 Yalni naj Joab tet naj Abisai: «Tato ekꞌbꞌal yip ebꞌnaj sirio tiꞌ jibꞌanhanh, chachtit kolwal jinhanh, yajaꞌ tato ebꞌnaj amonita ekꞌbꞌal yip tesataj, chintohan kolwal teyinh. 13 Aweko yip heyanma kat janipaxiko yip janmahanh, kat kokolnilo kokonhobꞌ, haꞌ ton iskonhobꞌ Komam Jahawil, koDiosal, iswatxꞌehabꞌ Komam tzet choche iskꞌul,» xhi naj Joab.

14 Hak tuꞌ yu ishitziko naj Joab yebꞌ issoldado yu yaniko howal yinh ebꞌnaj sirio, yajaꞌ elkanh ebꞌnaj tet naj Joab. 15 Haxa yet yilni ebꞌnaj amonita tato elkanh ebꞌnaj sirio, yelpaxokanh ebꞌnaj tet naj Abisai, yuxhta naj Joab tuꞌ, yokto ebꞌnaj amonita iskoloꞌ isbꞌa yul iskonhobꞌ. Lahwi tuꞌ ismeltzo naj Joab yul konhobꞌ Jerusalén.

16 Haxa yet yilni ebꞌnaj sirio tato qꞌoji ebꞌnaj Israel yinh ebꞌnaj, yanito ebꞌnaj ischejabꞌ yinoti yet Siriohal ay isqꞌaxebꞌikꞌto haꞌ Éufrates; haꞌ xin naj Sofac, yahaw yinh ebꞌnaj issoldado naj rey Hadad-ezer. 17 Yajaꞌ hal-lax huneꞌ tuꞌ tet yaꞌ David, yuxin ischej yaꞌ kutxbꞌalaxoko sunil ebꞌnaj Israel hunelxa. Isto yaꞌ rey David yebꞌ issoldado, isqꞌaxponikꞌto ebꞌnaj yibꞌanh haꞌ Jordán, yapni ebꞌnaj iskꞌatanh ebꞌnaj sirio tuꞌ. Yalni yaꞌ David tato chiyako ebꞌnaj howal yinh ebꞌnaj. Hayet yaniko ebꞌnaj Israel howal yinh ebꞌnaj sirio tuꞌ ispajtzen ebꞌnaj howal yinh ebꞌnaj Israel. 18 Yajaꞌ yet tzujanxa yelkanh ebꞌnaj sirio tuꞌ tet ebꞌnaj Israel, istzujchayo ebꞌnaj yu ebꞌnaj Israel, ispotxꞌnikamo yaꞌ rey David hujebꞌ mil ebꞌnaj soldado sirio ayahto yibꞌanh cheh, ispotxꞌnipaxokamo yaꞌ 40 (kawinaj) mil ebꞌnaj soldado chiꞌekꞌ yu yoj, ispotxꞌnikano yaꞌ David tuꞌ naj Sofac, yahawil issoldado ebꞌnaj sirio. 19 Haxa yet yilni ebꞌnaj sirio, ischejabꞌ naj Hadad-ezer tato aykꞌay ebꞌnaj yu ebꞌnaj Israel, yaniko isbꞌa ebꞌnaj yinh aqꞌankꞌulal yul isqꞌabꞌ yaꞌ rey David, yok ebꞌnaj ischejabꞌo yaꞌ. Hak tuꞌ xin matxa kolwa ebꞌnaj sirio yaqꞌni howal yinta ebꞌnaj amonita.