Qꞌoji yaꞌ David yinh ebꞌnaj sirio yebꞌ yinh ebꞌnaj amonita
10
Haxa yet yekꞌto tiempo xin iskam isreyal ebꞌnaj amonita, haxa xin naj Hanún iskꞌahol naj Nahas, ok selelo yinh reyal.a 2 Hayet yabꞌen yaꞌ rey David huneꞌ tuꞌ yalni yaꞌ: «Wal tinanh yilal kꞌul chiwute inkꞌulan yinh naj Hanún, iskꞌahol naj Nahas, hakaꞌ iskꞌulal yute iskꞌul ismam naj winhan,» xhi yaꞌ. Tzujan tuꞌ ischejnito yaꞌ rey David ischejabꞌ yaqꞌno isnimanbꞌal iskꞌul naj Hanún yu iskamikal ismam. Haxa yet yapni ebꞌnaj ischejabꞌ yaꞌ rey David bꞌey istxꞌotxꞌ ebꞌnaj amonita, 3 yalni ebꞌnaj iswiꞌehal yeko yinh ebꞌnaj amonita tet naj Hanún isreyal ebꞌnaj: «Mam rey, ¿tom chawayto yul hawanma tato mahul ebꞌnaj ischejabꞌ yaꞌ rey David tiꞌ yaqꞌaꞌ isnimanbꞌal hakꞌul yu iskamikal hamam yu kaw ay yelapno hamam yul sat yaꞌ? Machoj, wal xin tonhe mahul ebꞌnaj yilaꞌ kokonhobꞌ tiꞌ yunhe konhistanhtzenilo ebꞌnaj,» xhi ebꞌnaj.4 Yalni naj Hanún tet ischejabꞌ ta chitzabꞌlaxayo ischejabꞌ yaꞌ rey David, yok ebꞌnaj iskꞌupnolo yikta xil istiꞌ ebꞌnaj, yokpaxo ebꞌnaj iskꞌupnolto istel xil isqꞌap ebꞌnaj masanta yinh isyutz ebꞌnaj, ischejlaxtopaxo ebꞌnaj. 5 Hayet yal-lax huneꞌ tuꞌ tet yaꞌ rey David, yanito yaꞌ ischejabꞌ ischahno ebꞌnaj, yuto kaw txꞌixobꞌal yil-lax ebꞌnaj, yalnito yaꞌ David hakaꞌ tiꞌ: «Kananhwekano yul konhobꞌ Jericó masanto chichꞌibꞌ xil hetiꞌ, katto heyul bꞌey konhobꞌ tiꞌ hunelxa,» xhi yaꞌ David tet ebꞌnaj chejabꞌ tuꞌ.
6 Haxa yet yilni ebꞌnaj amonita tuꞌ tato kan ebꞌnaj txꞌojal yul sat yaꞌ rey David, yuxin to ebꞌnaj tzotelo tet ebꞌnaj sirio, istohlan ebꞌnaj 20 (hunkꞌal) mil ebꞌnaj soldado ay bꞌey Bet-rehob yebꞌ bꞌey Soba. Istitpaxo huneꞌ mil ebꞌnaj issoldado naj rey Maaca yebꞌ 12 (kabꞌlahonhebꞌ) mil ebꞌnaj soldado ah konhobꞌ Is-tob. 7 Hayet yabꞌenilo yaꞌ David huneꞌ tuꞌ, yanito yaꞌ naj Joab, yinh howal yebꞌ ebꞌnaj soldado Israel, ebꞌnaj kaw helan yinh howal. 8 Isto ebꞌnaj ah Amón tuꞌ yanoko howal yinh ebꞌnaj Israel, istxolbꞌan isbꞌa ebꞌnaj istiꞌ ispultahil iskonhobꞌ; wal ebꞌnaj soldado sirio tit bꞌey Soba yebꞌ bꞌey Rehob yebꞌ ebꞌnaj tit bꞌey Is-tob yebꞌ bꞌey Maaca nan istxolbꞌa isbꞌa ebꞌnaj yintalto konhobꞌ tuꞌ. 9 Haxa yet yilni naj Joab tato watxꞌebꞌil isbꞌa ebꞌnaj yaniko howal yinh ebꞌnaj Israel sataj konhobꞌ yebꞌ yinhla konhobꞌ, issaynilo naj ebꞌnaj soldado Israel kaw helan, iswatxꞌen isbꞌa ebꞌnaj yaniko howal yinh ebꞌnaj sirio. 10 Wal hunteqꞌanxa ebꞌnaj soldado Israel xin, haꞌ naj Abisai ok yahawilo ebꞌnaj, naj yuxhta isbꞌa yebꞌ naj Joab. Haꞌ xin naj Abisai yebꞌ issoldado aniko howal yinh ebꞌnaj amonita. 11 Yalni naj Joab tet naj Abisai hakaꞌ tiꞌ: «Tato chiqꞌoji ebꞌnaj sirio tiꞌ winhan chachtit kolwal, yaj tato chiqꞌoji ebꞌnaj amonita tawinh kat intopaxojan kolwal tawinh. 12 Ako yip hawanma, Jaqꞌaꞌweko jip kokolni kokonhobꞌ, hanhonh konhiskonhobꞌ koDiosal tiꞌ. ¡Iswatxꞌehojabꞌ Komam Jahawil hakaꞌ tzet choche iskꞌul!» xhi naj Joab.
13 Yaniko naj Joab yebꞌ issoldado howal yinh ebꞌnaj sirio, yelkanh ebꞌnaj tet naj Joab tuꞌ. 14 Hayet yilni ebꞌnaj amonita yelkanh ebꞌnaj sirio, yelpaxokanh ebꞌnaj tet naj Abisai, yokto ebꞌnaj iskolno isbꞌa yul iskonhobꞌ. Isbꞌejni naj Joab yaniko howal yinh ebꞌnaj, ismeltzo naj Jerusalén.
15 Hayet yilni ebꞌnaj sirio ta qꞌoji ebꞌnaj Israel yinh ebꞌnaj, iskutxbꞌanpaxiko isbꞌa ebꞌnaj yu yaniko howal yinh ebꞌnaj Israel hunelxa. 16 Yanito naj rey Hadad-ezer yawtemal ebꞌnaj sirio ay isqꞌaxebꞌikꞌto haꞌ niman Éufrates, istit ebꞌnaj, iskutxbꞌan isbꞌa ebꞌnaj bꞌey konhobꞌ Helam. Haꞌ xin naj Sobac ayko yahawilo ebꞌnaj issoldado naj Hadad-ezer tuꞌ. 17 Wal yaꞌ rey David yabꞌelo yaꞌ tato iskutxbꞌa isbꞌa ebꞌnaj sirio hunelxa, hak tuꞌ xin yu iskutxbꞌanpaxiko yaꞌ David ebꞌnaj soldado Israel, isto ebꞌnaj; isqꞌaxponikꞌto ebꞌnaj yibꞌanh haꞌ Jordán, yapni ebꞌnaj bꞌey Helam. Hayet yapni ebꞌnaj bꞌey tuꞌ yaniko ebꞌnaj sirio howal yinh ebꞌnaj. 18 Yajaꞌ elkanh ebꞌnaj sirio tuꞌ tet ebꞌnaj Israel, isqꞌoji ebꞌnaj yinh ebꞌnaj. Ispotxꞌnikamo ebꞌnaj Israel 40 (kawinaj) mil ebꞌnaj sirio tuꞌ, yebꞌ 700 ebꞌnaj ayahto yul carruaje; ispotxꞌnipaxokamo ebꞌnaj naj Sobac, yahawil yinh ebꞌnaj ah sirio tuꞌ. 19 Hayet yilni sunil ebꞌnaj rey chikolwa yaqꞌni howal yinta naj rey Hadad-ezer tato qꞌoji ebꞌnaj Israel yinh ebꞌnaj, yok ebꞌnaj yinh aqꞌankꞌulal yebꞌ ebꞌnaj Israel, yokkano ebꞌnaj ischejabꞌo ebꞌnaj Israel, hak tuꞌ xin yu isxiwkanh ebꞌnaj sirio tuꞌ, matxa kolwa ebꞌnaj yaqꞌni howal yinta ebꞌnaj amonita.