Yaꞌ rey David yebꞌ ix Betsabé
11
Haxa yinh hunxa habꞌil yet istiempohal yelto ebꞌnaj rey yinh howal, ischejnito yaꞌ rey David naj Joab yebꞌ hunteqꞌanxa ebꞌnaj chejabꞌ, yebꞌ sunil ebꞌnaj soldado Israel yaqꞌaꞌko howal yinh ebꞌnaj amonita, istanhtzenilo ebꞌnaj ebꞌnaj amonita tuꞌ, ishoynayo ebꞌnaj huneꞌ niman konhobꞌ Rabá, yajaꞌ wal yaꞌ rey David kankano yaꞌ yul konhobꞌ Jerusalén.2 Haxa yinh huneꞌ qꞌejbꞌiyalil xin, lanhan isxew yaꞌ rey David sat istxꞌat, yahwano yaꞌ, haꞌ xin yet lanhan yekꞌ yaꞌ yibꞌanh yakꞌalil ispalacio yilnito yaꞌ huneꞌ ix ix lanhan yaxhni, kaw xin kawla ix ix. 3 Ischejnito yaꞌ huneꞌ ischejabꞌ isqꞌambꞌeno mak anmahil ix, yal-lax tet yaꞌ tato haꞌ ix Betsabé, yixal naj Urías heteo, iskutzꞌin naj Eliam. 4 Ischejnito yaꞌ rey David ischejabꞌ yinoti ix, yapni ix sata yaꞌ, isway yaꞌ yebꞌ ix. Lahwi tuꞌ issajnhen isbꞌa ix, ispaxto ix yatut.
5 Ispitzkꞌati yunin ix, ischejni ix hal-laxo tet yaꞌ rey David tato ayxa tzet ye ix. 6 Hayet yabꞌen yaꞌ rey David huneꞌ tuꞌ ischejni yaꞌ hal-laxo tet naj Joab tato chiyati naj naj Urías heteo iskꞌatanh yaꞌ rey David. Isyijen naj Joab tuꞌ, yaniti naj naj Urías iskꞌatanh yaꞌ rey. 7 Hayet yapni naj Urías iskꞌatanh yaꞌ rey David isqꞌambꞌen yaꞌ hanikꞌ ye naj Joab yebꞌ ebꞌnaj soldado yebꞌ hanikꞌ yeko howal. 8 Lahwi tuꞌ yalni yaꞌ David tet naj Urías: «Asiꞌ hawatut, kat hatxꞌahni hawoj,» xhi yaꞌ.
Hayet yelti naj Urías yul yatut yaꞌ rey David, ischejni yaꞌ yaqꞌlaxo itah kaw kꞌul sabꞌehalo tet naj.a 9 Yajaꞌ wal naj Urías mach to naj yatut, wal xin kankano naj wayo istiꞌ ispultahil palacio iskꞌatanh ebꞌnaj soldado chitanhen ispalacio yaꞌ rey David. 10 Haxa yet hunxa tzꞌayik yal-lax tet yaꞌ David tato mach to naj Urías wayo yatut. Isqꞌambꞌen yaꞌ rey David tet naj Urías hakaꞌ tiꞌ:
—¿Tom mach nahato hapeto? ¿Tzet yinh xin machi kachto wayo hawatut? xhi yaꞌ.
11 Istaqꞌwi naj Urías tet yaꞌ David:
—Mam rey, ¿tzet kinchihan chintohan xewo watutan, kat inwaꞌan, kat inwayan yebꞌ wixalan, wal Kaxha yet istrato Komam Jahawil, yebꞌ ebꞌnaj wet Israelan, yebꞌ ebꞌnaj Judá, yul qꞌap mantiado aya? ¿Tzet kinchihan chintohan xewo watutan, yet satla cheqꞌanh chiway naj Joab, naj wahawilan yebꞌ ebꞌnaj soldado? Wal xin mach chintohan xewo watutan, xhi naj.
12 Yalni yaꞌ rey David tet naj Urías:
—Kananhkano hunxa aqꞌbꞌal bꞌey tiꞌ, haxa yet hekal chachtohi, xhi yaꞌ.
Iskankano naj Urías huneꞌ aqꞌbꞌal tuꞌ yebꞌ hunxa tzꞌayik bꞌey Jerusalén. 13 Yawten yaꞌ rey David naj Urías tuꞌ waꞌo iskꞌatanh, yaqꞌni yaꞌ vino tet naj, yukꞌtzenkanh yaꞌ naj. Haxa yet qꞌejbꞌiyal xin isto naj Urías wayo sat istxꞌat iskꞌatanh ebꞌnaj issoldado yaꞌ rey David, mach xin to naj yatut.
14 Haxa yet issajbꞌilo yinh hunxa tzꞌayik istzꞌibꞌnhen yaꞌ rey David huneꞌ carta tet naj Joab, yanito yaꞌ huneꞌ carta tuꞌ yinta naj Urías yet ismeltzo naj yinh howal. 15 Yanayto yaꞌ yul hum hakaꞌ tiꞌ: «Ako naj Urías tiꞌ sataj bꞌay kaw ayko yip howal, kat heyanikano naj ischukil, yunhe iskam naj,» xhito yaꞌ yul hum.
16 Yuxin hayet ishoynayo naj Joab konhobꞌ Rabá yebꞌ issoldado, yaniko naj naj Urías bꞌay yohta naj ta ayayo ebꞌnaj soldado kaw helan, ebꞌnaj bꞌay chiyaqꞌ ebꞌnaj howal tuꞌ. 17 Yelti ebꞌnaj yul iskonhobꞌ tuꞌ, yaniko ebꞌnaj howal yinh naj Joab, ispotxꞌnikamo ebꞌnaj haywanh ebꞌnaj issoldado yaꞌ rey David, iskampaxo naj Urías, naj heteo.
18 Lahwi tuꞌ yanito naj Joab ischejabꞌ yalno tet yaꞌ rey David yinh tzet eliko howal. 19 Yalni naj Joab tet naj: «Yajaꞌ hayet chilahwi hawalni hanikꞌ maꞌeliko howal tiꞌ, 20 ta chitit ishowal naj rey, kat yalni hakaꞌ tiꞌ: “¿Tzet yinh xin kaw kexhitziko yinh konhobꞌ tuꞌ? ¿Tom mach chetxumu ta chiyu yaniti ebꞌnaj qꞌojbꞌal teyinh yibꞌanh iskꞌubꞌal konhobꞌ? 21 ¿Tom xato nahul heyu yinh yet isqꞌojnayti huneꞌ ix ayahto yibꞌanh chꞌen kꞌubꞌ qꞌaxep chꞌen molino yibꞌanh naj Abimelec, iskꞌahol yaꞌ Jerobaal bꞌey konhobꞌ Tebes, iskam naj yu ix? ¿Tzet yinh xin kaw kexhitziko yinh sat iskꞌubꞌal konhobꞌ tuꞌ?” ta xhi yaꞌ rey tuꞌ, kat hawalni hakaꞌ tiꞌ: “Haꞌ hunpaxo naj Urías, naj heteo makami, naj hachejabꞌ, mam rey,” kachi,» xhi naj Joab.
22 Hak tuꞌ yu isto naj chejabꞌ, yapni naj iskꞌatanh yaꞌ rey David, yalni naj tet yaꞌ hakaꞌtikꞌa yu yalni naj Joab tuꞌ tet naj. 23 Yalni naj tet yaꞌ rey David tuꞌ:
—Elti ebꞌnaj ay yul konhobꞌ tuꞌ yaqꞌaꞌko howal jinhanh, etza xin qꞌoji ebꞌnaj jinhanh, yajaꞌ konhok tzujnojanh yinta ebꞌnaj masanta apni ebꞌnaj istiꞌ ispultahil iskonhobꞌ. 24 Yajaꞌ ebꞌnaj iqꞌbꞌil islitꞌ ayahto yibꞌanh chꞌen kꞌubꞌ tuꞌ yayti ebꞌnaj isbꞌaqꞌ teꞌ litꞌ jinhanh, ispotxꞌnikamo ebꞌnaj haywanh hasoldado yebꞌ iskampaxo naj Urías heteo, naj hachejabꞌ, xhi naj.
25 Istaqꞌwi yaꞌ rey David tet naj:
—Hal tet naj Joab tato mach chiyiqꞌ bꞌiskꞌulal naj yu huneꞌ tuꞌ, hak tuꞌ howal tiꞌ, yilal ay mak chikami. Wal xin mach chexpax teyintaj, iqꞌwe heyip cheyaniko howal yinh huneꞌ konhobꞌ tuꞌ masanto chexqꞌoji yinh, xhi yaꞌ David tet naj chejabꞌ tuꞌ.
26 Hayet yabꞌen ix Betsabé tato kam yichamil ix, yok ix yinh bꞌiskꞌulal yu iskamikal yichamil tuꞌ. 27 Hayet yekꞌto istzꞌayikal isbꞌiskꞌulal ix, yanito yaꞌ rey David yiqꞌomal ix, yapni ix yatut yaꞌ, yok ix yixalo yaꞌ, ispitzkꞌa huneꞌ iskꞌahol yaꞌ yebꞌ ix. Yajaꞌ wal yul sat Komam Dios mach kꞌulo tzet iswatxꞌe yaꞌ rey David.