2 Ay xin huneꞌ naj ischejabꞌ yuninal yaꞌ kamom Saúl chiyij Siba, ischejlax ilaxoti naj sata yaꞌ rey David. Hayet yapni naj Siba, isqꞌambꞌen yaꞌ rey David tet naj:

—¿Ham hach tiꞌ Siba? xhi yaꞌ. Istaqꞌwi naj:

—Hoꞌ, haninan hachejabꞌ intiꞌan, xhi naj.

3 Isqꞌambꞌen yaꞌ rey David tet naj:

—¿Aytom hunu yuninal yaꞌ kamom Saúl aytokꞌoj bꞌay chu inkolwahan yinh sat Komam Dios? xhi yaꞌ. Istaqꞌwi naj Siba:

—Ay huneꞌ iskꞌahol yaꞌ kamom Jonatán aytokꞌoj, yaj mach kꞌulo ye yoj iskabꞌil, xhi naj.

4 Yalni yaꞌ rey David:

—¿Bꞌaytuꞌwal ay naj? xhi yaꞌ. Istaqꞌwi naj Siba:

—Ay naj bꞌey yatut naj Maquir, iskꞌahol naj Amiel, bꞌey Lodebar, xhi naj.

5 Ischejni yaꞌ rey David ilaxoti naj bꞌey yatut naj Maquir, iskꞌahol naj Amiel bꞌey Lodebar. 6 Yapni naj Mefi-boset, iskꞌahol naj kamom Jonatán sata yaꞌ rey David, yay jahno naj sata yaꞌ yu yinayo isbꞌa naj tet yaꞌ. Haꞌ xin yaꞌ kamom Saúl, haꞌ yaꞌ ismam icham naj Mefi-boset tuꞌ. Isqꞌambꞌen yaꞌ rey tet naj Mefi-boset:

—¿Hachmi tiꞌ Mefi-boset? xhi yaꞌ. Istaqꞌwi naj:

—Hoꞌ, haninan, hachejabꞌ tiꞌ, xhi naj.^a

7 Yalni yaꞌ rey David tet naj:

—Mach chaxhxiwi, yuto chinkolwahan tawinh yu iskꞌulal iskꞌul hamam winhan. Chiwaqꞌ meltzohojan sunil istxꞌotxꞌ hamam icham Saúl tawet, sunilbꞌal tiempo xin chachwaꞌ inkꞌatanhan sat inmexhahan, xhi yaꞌ.

8 Hayet yabꞌen naj Mefi-boset hakaꞌ tuꞌ, yay jahno naj yalni naj tet yaꞌ rey David:

—Mamin, ¿tzet welapnojan hanin hachejabꞌ intiꞌan, yuxin chitzꞌay hakꞌul winhan? Hanintiꞌan lahan hinan hakaꞌ hunu kamom txꞌiꞌ, xhi naj.

9 Lahwi tuꞌ ischejni yaꞌ rey David ta chiꞌawtelaxikto naj Siba, ischejabꞌ yuninal yaꞌ kamom Saúl, yalni yaꞌ rey David tet naj:

—Sunil tzet yettikꞌa yaꞌ Saúl yebꞌ yuninal, chiwakanikojan yul isqꞌabꞌ naj iskꞌahol hawahawil tuꞌ. 10 Hach yebꞌ hakꞌahol yebꞌ ebꞌnaj chejabꞌ chaxhok hawatxꞌeꞌ istzꞌunubꞌ naj sat istxꞌotxꞌ, kat hakꞌubꞌankanh sat tzꞌunubꞌ tuꞌ, haxinwal aynhetikꞌa tzet chislo yuninal yaꞌ Saúl hawahawil, yajaꞌ wal naj Mefi-boset tiꞌ, haꞌ inkꞌatanhan chiwaꞌ naj sat inmexhahan yinh sunilbꞌal ej tiempo, xhi yaꞌ.

Wal naj Siba tuꞌ xin, 15 (holanhwanh) iskꞌahol naj, yok 20 (hunkꞌal) ischejabꞌ naj. 11 Yalni naj Siba tuꞌ:

—Mamin, sunil tzet chachej inwatxꞌetiꞌan, chinyijehan hakaꞌ hawalni tiꞌ, yuto hachejabꞌ wehan, xhi naj. Yalnipaxo yaꞌ rey David hakaꞌ tiꞌ:

—Wal naj Mefi-boset tiꞌ inkꞌatanhan chiwaꞌ naj sat inmexhahan hakaꞌ chu iswaꞌ ebꞌnaj inkꞌaholan, xhi yaꞌ.

12 Naj Mefi-boset tuꞌ, ay huneꞌ nichꞌan iskꞌahol naj chiyij Micaía. Sunil yuninal naj Siba tuꞌ ayko ischejabꞌo naj Mefi-boset tuꞌ. 13 Haꞌ xin bꞌey Jerusalén ay naj Mefi-boset, yuto iskꞌatanh yaꞌ rey David chiwaꞌ naj sat mexha yinh sunilbꞌal tiempo; txꞌoj xin ye yoj naj iskabꞌil.