—As iwekanh isbꞌisil anma Israel, cheyicheti heyinikanh isbꞌisil tuꞌ bꞌey Beerseba masanta bꞌey Dan, lahwi tuꞌ kat heyul heyalno wetan, yunhe wohtanhenan hanta isbꞌisil konhobꞌ Israel, xhi yaꞌ.

3 Yajaꞌ taqꞌwi naj Joab tet yaꞌ rey David:

—Haꞌojabꞌ Komam Dios chꞌaqꞌni chꞌibꞌo isbꞌisil anma Israel 100 (hokꞌal) elto yibꞌanhilo anma ay tinanh, haꞌ sunil anma tuꞌ yul haqꞌabꞌ aykoj. Mam rey, ¿tzet yinh xin chawoche chiꞌah isbꞌisil anma? ¿Tzet yinh xin hak tuꞌ hatxumni? Yu huneꞌ tiꞌ chiꞌok komul hanhonh Israelonh tiꞌ sata Komam Dios, xhi naj Joab.

4 Yajaꞌ mach yabꞌeto yaꞌ rey David tzet yal naj Joab, yuxin isyije naj Joab huneꞌ chejbꞌanile tuꞌ, isto naj sunil yulajla ismajul txꞌotxꞌ Israel. Haxa yet xalahwi yinikanh naj isbꞌisil ebꞌnaj Israel, ismeltzo naj iskꞌatanh yaꞌ rey David bꞌey Jerusalén. 5 Yaqꞌni naj Joab isbꞌisil ebꞌnaj Israel, ay huneꞌ millón, yok 100 mil isbꞌisil ebꞌnaj winaj tzꞌajanxa yinh ishabꞌilal, kꞌulxa isto yinh howal. Haxa ebꞌnaj Judá ay 470 mil isbꞌisil ebꞌnaj winaj tzꞌajanxa yinh ishabꞌilal, kꞌulxa isto yinh howal. 6 Yajaꞌ wal ebꞌnaj levita yebꞌ ebꞌnaj Benjamín mach bꞌislax ebꞌnaj, yuto mach ischah iswiꞌ naj Joab huneꞌ chejbꞌanile yaqꞌ yaꞌ rey David tuꞌ, kaw yahbꞌeta yul sat naj.

7 Hakpax tuꞌ yul sat Komam Dios mach kꞌulo huneꞌ chejbꞌanile yal yaꞌ rey David tuꞌ, yuxin yati Komam huneꞌ isyaꞌtajil yibꞌanh konhobꞌ Israel. 8 Yu huneꞌ tuꞌ yuxin yal yaꞌ rey David tet Komam:

—Mamin, kaw mawako inmulan yul hasat yuto manwatxꞌehan huneꞌ tiꞌ, yuxin chinqꞌanan tawet tato chawaqꞌ tanho inmulan hanin hachejabꞌ intiꞌan, yuto hakaꞌ hunu mak machi isnabꞌal, hak tuꞌ mawute hinbꞌahan waniko inmulan tawet, xhi yaꞌ.

9 Istzotel Komam Jahawil tet yaꞌ Gad ischejabꞌ Komam, yaꞌ chiꞌaqꞌni isnabꞌal yaꞌ rey David, yalni Komam hakaꞌ tiꞌ: 10 «Asiꞌ iskꞌatanh yaꞌ David kat hawilni tet yaꞌ: “Hak tiꞌ chiyute yalni Komam: Ay oxebꞌ tzet chiwalan tawet, sikꞌlelo bꞌaytet chawoche chinwatxꞌehan,” xhi Komam, kachi.»

11 Isto yaꞌ Gad sata yaꞌ David, yalni yaꞌ:

—Hak tiꞌ chiyu yalni Komam Jahawil: 12 “Sikꞌleloj bꞌaytet chawoche; tom oxebꞌ habꞌil wahil, makato oxebꞌ ixahaw bꞌay chilannhetikꞌa hawaykꞌay yul isqꞌabꞌ ebꞌnaj ayko ishowal tawinh, kat kexistejnikamo ebꞌnaj yu yespada, mato oxebꞌ tzꞌayik isyaꞌtajil yu yespada Komam Jahawil sat sunil txꞌotxꞌ Israel tiꞌ, yuto chul yángel Komam Jahawil yaqꞌayo isyaꞌtajil yul sunil ej konhobꞌ ay yul ismajul txꞌotxꞌ Israel tiꞌ,” kachi, xhi Komam. Yuxin ilah bꞌaytet chawoche, kat inpajtzenan tet Komam chejnheintijan, xhi yaꞌ.

13 Istaqꞌwi yaꞌ rey David tet yaꞌ Gad:

—Kaw niman bꞌiskꞌulal chiwabꞌehan yul wanmahan, ekꞌbꞌalto kꞌul ta yul isqꞌabꞌ Komam Jahawil chinaykꞌayan, yuto kaw niman iskꞌulchꞌanil iskꞌul Komam sikꞌlebꞌil, sata ta chinaykꞌayan yul isqꞌabꞌ ebꞌnaj winaj, xhi yaꞌ.

14 Yuxin yati Komam Jahawil huneꞌ isyaꞌtajil yibꞌanh ebꞌnaj Israel; iskamilo 70 (lahonhebꞌ iskanhwinaj) mil ebꞌnaj. 15 Yaniti Komam Jahawil yángel istanhtzenilo Jerusalén, yajaꞌ hayet lanhan istanhtzenilo anma tuꞌ yilniti Komam, isnahni isbꞌa yinh tzet iswatxꞌe tuꞌ, yalni Komam tet yángel tuꞌ: «Yetzanxa, linhbꞌa haqꞌabꞌ,» xhi Komam. Haꞌ yángel Komam Jahawil tuꞌ, linhankanh naj bꞌay chiswatxꞌelo naj Ornán jebuseo istrigo. 16 Haxa yet istꞌanhxito yaꞌ rey David, yilnito yaꞌ yángel Komam aykanh xolbꞌal satkanh yebꞌ txꞌo txꞌotxꞌ, iqꞌbꞌil yespada yul isqꞌabꞌ, lanhan xin yetkꞌulnhento huneꞌ espada tuꞌ yinh Jerusalén. Yay jahno yaꞌ David yebꞌ ebꞌnaj ichamta winaj Israel tzujan yintaj, yay xulno ebꞌnaj sat txꞌotxꞌ, ayko xilqꞌape qꞌaqꞌiꞌ yet bꞌiskꞌulal yinh ebꞌnaj. 17 Yalni yaꞌ David tet Komam Dios:

—Mamin, haninan inchejan bꞌislaxo konhobꞌ, yuxin haninan ay inmulan yinh huneꞌ tiꞌ, yinh kaw yeli haninan inwatxꞌehan istxꞌojal, yuxin haꞌ anma tiꞌ machi ismul, lahan hakaꞌ noꞌ meꞌ. Mamin, hach inDiosalan wibꞌanhojabꞌan chawayo isyaꞌtajil yebꞌ yibꞌanh makta ay yul yatut inmaman, matxahojabꞌ xin chawayo isyaꞌtajil tiꞌ yibꞌanh hakonhobꞌ, xhi yaꞌ.

18 Yalni yángel Komam Jahawil tet yaꞌ Gad tato chiyal yaꞌ, ta chiꞌahto yaꞌ David, kat islatzꞌbꞌankanh yaꞌ chꞌen chꞌen ismexhahil yet xahanbꞌal tet Komam Jahawil bꞌay chiswatxꞌelo naj Ornán jebuseo istrigo. 19 Yahto yaꞌ David hakaꞌ yu ischejni Komam Jahawil yalaꞌ yaꞌ Gad. 20 Wal naj Ornán lanhan iswatxꞌenilo naj istrigo yebꞌ kanhwanh iskꞌahol, yajaꞌ hayet yilni ebꞌnaj yángel Komam Jahawil, yebꞌanto isbꞌa ebꞌnaj iskꞌahol naj Ornán tuꞌ. 21 Hayet apni yaꞌ rey David bꞌay ay naj Ornán, yilnito naj yaꞌ David, isbꞌejni naj Ornán iswatxꞌen istrigo, yay jahno naj sata yaꞌ.

22 Yalni yaꞌ David tet naj:

—Aqꞌ bꞌay chawatxꞌelo hatrigo tiꞌ, inloqꞌoꞌan yu chinwatxꞌenkanhan ismexhahil yet xahanbꞌal tet Komam Jahawil, chintohlahan tawet yinh kaw hakaꞌtikꞌa istohol, yu isbꞌejni yay huneꞌ isyaꞌtajil tiꞌ yibꞌanh konhobꞌ, xhi yaꞌ.

23 Istaqꞌwi naj Ornán tet yaꞌ David:

—Mam rey oknojabꞌiko txꞌotxꞌ hawu, kat hawatxꞌen tzet chawoche, chiwaqꞌnihan noꞌ wakax chiꞌok xahanbꞌalil, chiwaqꞌnipaxojan teꞌ chichakꞌnilti trigo siꞌal tawet, kat waqꞌnipaxojan ixim trigo yinh yebꞌalqꞌabꞌehal tet Komam Dios tawet. Wal xin sunil chiwaqꞌan tawet, xhi naj tet yaꞌ rey David.

24 Istaqꞌwi yaꞌ David tet naj Ornán:

—Machoj, wal xin chintohlahan tawet yinh kaw hakaꞌtikꞌa istohol, yuto mach chu waltenan tet Komam Jahawil tzet ye tuꞌ mach wetojan yehi, yebꞌ mach chu innhusnihan no noqꞌ tet Komam tato maxhto loqꞌbꞌilo noꞌ wuhan, xhi yaꞌ.

25 Hak tuꞌ yu isloqꞌni yaꞌ David huneꞌ txꞌo txꞌotxꞌ yinh 600 siclo chꞌen oro tet naj Ornán. 26 Iswatxꞌenkanh yaꞌ rey David huneꞌ ismexhahil yet xahanbꞌal tet Komam Jahawil bꞌey tuꞌ, yalten yaꞌ isxahanbꞌal tet Komam yebꞌ yebꞌalqꞌabꞌe yet aqꞌankꞌulal, istxahli yaꞌ tet Komam Jahawil, ispajtzen Komam istxah yaꞌ, yaniti Komam qꞌaꞌ tit yul satkanh isnhusnito isxahanbꞌal yaꞌ David tuꞌ. 27 Istzotel Komam Dios Jahawil tet naj ángel, iskꞌubꞌanto naj yespada yul yatut.

28 Hayet yilni yaꞌ rey David tato ispajtze Komam Jahawil istxah yaꞌ bꞌey bꞌay chiswatxꞌelo naj Ornán jebuseo istrigo, yaqꞌni yaꞌ isxahanbꞌal tet Komam bꞌey tuꞌ. 29 Wal qꞌap mantiado iswatxꞌe yaꞌ Moisés bꞌey txꞌotxꞌ desierto yebꞌ mexha bꞌay chinhuslax xahanbꞌal tet Komam Dios hata bꞌey Gabaón bꞌey huneꞌ nahat yekanh haꞌ tuꞌ ayahtoj. 30 Yajaꞌ xin machi to yaꞌ David txahlo tet Komam Dios Jahawil bꞌey tuꞌ, yuto xiw yaꞌ isto tet yespada yángel Komam Jahawil.