2 Lahwi tuꞌ yalni yaꞌ rey David tato chikutxbꞌalaxiko sunil ebꞌnaj nan konhobꞌal ay xol ebꞌnaj Israel, issikꞌlaxilo xol ebꞌnaj tuꞌ ebꞌnaj hosom chꞌen, chiꞌokniko yinh iswatxꞌebꞌanil Yatut Komam Dios. 3 Iskutxbꞌanpaxiko yaꞌ David chꞌen hierro chiꞌokniko lawuxhal yinh pulta, iskutxbꞌanpaxiko yaꞌ chꞌen bronce, chꞌen bronce tuꞌ matxa chibꞌischa hanta yalil chꞌen, yuto kaw nimankano chꞌen kutxikoj. Iskutxbꞌanpaxiko yaꞌ teꞌ aqꞌinteꞌ yebꞌ teꞌ patzabꞌ cedro, matxa xin chibꞌischa hanta teꞌ, 4 yuto haꞌ ebꞌnaj sidonio yebꞌ ebꞌnaj Tiro initi teꞌ cedro tuꞌ tet yaꞌ rey David. 5 Istxumni yaꞌ David hakaꞌ tiꞌ: «Haꞌ naj Salomón, inkꞌaholan nichꞌan tzehto naj, haꞌ xin Yatut Komam Jahawil chiwatxꞌi tuꞌ kaw kꞌul chu sikꞌlebꞌil yu isbꞌinahi yebꞌ yu yalaxiko ismay yul sunil sat yibꞌanhqꞌinal tiꞌ, yuxin yilal inkutxbꞌankanikojan sunil tzet chiꞌokniko yinh iswatxꞌebꞌanil,» xhi yaꞌ ischukil. Yuxin hayet yalanhto maxhto chikam yaꞌ rey David iskutxbꞌankaniko yaꞌ sunil tzet chiꞌokniko yinh iswatxꞌebꞌanil Yatut Komam yinh kaw niman.

6 Yawten yaꞌ rey David yaꞌ Salomón iskꞌahol, yalni yaꞌ tet yaꞌ tato haꞌ yaꞌ chiwatxꞌenkanh Yatut Komam Jahawil, isDiosal Israel. 7 Yalni yaꞌ David tet yaꞌ Salomón: «Hach inkꞌahol, ekꞌ yinh wanmahan inwatxꞌenkanhan Yatut Komam Jahawil, inDiosalan, huneꞌ yatut bꞌay kaw chibꞌina isbꞌi. 8 Yajaꞌ yal Komam Jahawil wetan hakaꞌ tiꞌ: “Hach tiꞌ kaw nimanxa ischikꞌil anma xamalto hawu yinh ej nimeta howal, yuxin matxa tajach chawakanh watutan bꞌay chibꞌina inbꞌihan, yuto kaw nimanxa ischikꞌil anma xamalto hawu. 9 Wal xin chipitzkꞌa huneꞌ hakꞌahol, naj tuꞌ chiyilaꞌ naj aqꞌankꞌulal, yuto haninan chiwaqꞌan aqꞌankꞌulal tet naj, haꞌ ej konhobꞌ ayko yinhla ishoyanil naj machi howal chaqꞌaꞌko yinh naj, yuxin Salomón chiꞌok isbꞌiho naj, chiwaqꞌnihan aqꞌankꞌulal yebꞌ xewilal tet konhobꞌ Israel yulbꞌal tiempo chꞌok naj reyal.^a 10 Haꞌ naj chiꞌanikanh watutan bꞌay chibꞌina inbꞌihan, inkꞌaholan chuko naj, kat wokan ismamo naj. Haninan chiwakojan naj isreyalo Israel yinh sunilbꞌal ej tiempo,” xhi Komam wetan.^b 11 Yuxin, wal tinanh kꞌahol haꞌojabꞌ Komam Jahawil chiꞌok hawetbꞌihoj, kat yanayo isyaxil tawibꞌanh, kat hawanikanh Yatut Komam Jahawil, haDiosal, hakaꞌ yu yalnikano Komam tawinh. 12 Haꞌojabꞌ Komam Jahawil chꞌaqꞌni yitzꞌatil hawiꞌ yebꞌ hahelanil, haxinwal hayet chachok yahawo Israel chakꞌubꞌa ischejbꞌanil Komam Jahawil, haDiosal. 13 Hak tuꞌ xin kꞌul chꞌeliko tzet chawatxꞌe tato chayije chejbꞌanile yebꞌ kuybꞌanile chaqꞌ Komam Jahawil, hunteqꞌan ischakano yaꞌ Moisés tet konhobꞌ Israel. Wal tinanh xin kawxe habꞌa, hako yip hawanma, mach chaxhxiwi, mach chipax hawip. 14 Hanintiꞌan xawaqꞌ wanmahan inkutxbꞌanikojan tzet chiꞌokniko yinh iswatxꞌebꞌanil Yatut Komam Jahawil, kutxbꞌabꞌilxako 100 (hokꞌal) mil talento chꞌen oro wuhan, yebꞌ huneꞌ millón talento chꞌen plata, kutxbꞌabꞌilxapaxiko chꞌen bronce yebꞌ chꞌen hierro yinh kaw niman, matxa chonhqꞌoji kobꞌisni yalil. Xaꞌinkutxbꞌapaxikojan te teꞌ chiꞌoknikoj yebꞌ chꞌen chꞌen, tato ayto mach chiqꞌoji hachxa chatzꞌajbꞌa. 15 Txꞌiꞌal ebꞌnaj munlawom ayko takꞌatanh, ay ebꞌnaj kꞌupom chꞌen, ay ebꞌnaj albañil, ay ebꞌnaj polom teꞌ, aypaxo ebꞌnaj kaw helan yinh watxꞌe nha. 16 Wal chꞌen oro, chꞌen plata, chꞌen bronce yebꞌ chꞌen hierro kutxbꞌabꞌilxakoj, kaw nimankano chꞌen, matxa chonhqꞌoji kobꞌisni chꞌen; yuxin wal tinanh ahanhwanoj, kat hawok munil, haꞌ Komam Jahawil chiꞌok hawetbꞌihoj,» xhi yaꞌ David tet iskꞌahol.

17 Yalnipaxo yaꞌ rey David tet ebꞌnaj iswiꞌehal xol ebꞌnaj Israel tato chikolwa ebꞌnaj yinh yaꞌ Salomón iskꞌahol. Yalni yaꞌ tet ebꞌnaj hakaꞌ tiꞌ: 18 «¿Tom mach ayoko Komam Jahawil, koDiosal jetbꞌihoj? Haꞌ Komam chꞌaqꞌni aqꞌankꞌulal sunil yul ismajul Israel tiꞌ yuto haꞌ Komam aniko ej konhobꞌ ay sat txꞌo txꞌotxꞌ tiꞌ yul inqꞌabꞌan. Haꞌ hunteqꞌan anma tuꞌ okkano yalanh yip Komam yebꞌ yalanh yip iskonhobꞌ Israel. 19 Yuxin aweko yul heyanma hesaynilo Komam Jahawil, koDiosal. Ahanhwewanoj, kat heyok hewatxꞌenokanh Yatut Komam Jahawil, koDiosal, bꞌay chiꞌehikꞌo isKaxhahil istrato Komam, yebꞌ munlabꞌal yet Komam, haꞌ yinh Yatut Komam Jahawil tuꞌ chibꞌina isbꞌi,» xhi yaꞌ David.