6 Yaniko yaꞌ rey David ebꞌnaj yinh ismunil yinh hunun majan hatatikꞌa istxolal ebꞌnaj ichmame iskꞌahol yaꞌ Leví, haꞌ ton ebꞌnaj tiꞌ: Yaꞌ Gersón, naj Coat, naj Merari. 7 Ebꞌnaj iskꞌahol yaꞌ Gersón haꞌ ebꞌnaj tiꞌ: Naj Laadán, yebꞌ naj Simei. 8 Haxa ebꞌnaj iskꞌahol naj Laadán, haꞌ ebꞌnaj tiꞌ; naj Jehiel, naj bꞌabꞌel, tzujan tuꞌ naj Zetam, yebꞌ naj Joel, oxwanh ebꞌnaj. 9 Ebꞌnaj iskꞌahol naj Simei oxwanh ebꞌnaj; naj Selomit, naj Haziel yebꞌ naj Harán, haꞌ ebꞌnaj tuꞌ iswiꞌehal yinh ebꞌnaj yikꞌal naj Laadán. 10 Haxa ebꞌnaj iskꞌahol naj Simei kanhwanh ebꞌnaj, haꞌ ton ebꞌnaj tiꞌ; naj Jahat, naj Zina, naj Jeús yebꞌ naj Bería. 11 Naj Jahat, haꞌ ton naj bꞌabꞌel, naj Zina, naj iskabꞌ; wal naj Jeús yebꞌ naj Bería mach txꞌiꞌalo yuninal ebꞌnaj, yuxin huneꞌnhe majan yuko ebꞌnaj yinh ismunil.

12 Haxa ebꞌnaj iskꞌahol naj Coat kanhwanh ebꞌnaj, haꞌ xin ebꞌnaj tiꞌ: Naj Amram, naj Izhar, naj Hebrón, yebꞌ naj Uziel. 13 Haꞌ ebꞌnaj iskꞌahol naj Amram, haꞌ ebꞌnaj tiꞌ: Yaꞌ Aarón, yebꞌ yaꞌ Moisés. Yaꞌ Aarón sikꞌlaxilo yaꞌ yebꞌ xin sunil yikꞌal yu Komam Dios yu yok yilno tzetaj ye tuꞌ yet Komam Dios, chisnhusni ebꞌyaꞌ pom sata Komam Jahawil, chimunla ebꞌyaꞌ yinh ismunil Komam, chisqꞌanni ebꞌyaꞌ iskꞌulal yibꞌanh anma yinh isbꞌi Komam yinh sunilbꞌal ej tiempo. 14 Haxapaxo ebꞌnaj iskꞌahol yaꞌ Moisés, ischejabꞌ Komam Dios, ok ebꞌnaj isbꞌisilo ebꞌnaj Leví.

15 Ebꞌnaj iskꞌahol yaꞌ Moisés, haꞌ ton naj Gersón, yebꞌ naj Eliezer. 16 Iskꞌahol naj Gersón, haꞌ ton naj Sebuel, iswiꞌehal yuko yinh ebꞌnaj yikꞌal naj Gersón. 17 Iskꞌahol naj Eliezer, haꞌ ton naj Rehabías, yahawil naj yinh ebꞌnaj yikꞌal naj Eliezer. Huneꞌnhechꞌan iskꞌahol naj Eliezer tuꞌ, wal naj Rehabías xin kaw txꞌiꞌal isbꞌisil iskꞌahol naj. 18 Iskꞌahol naj Izhar, haꞌ xin naj Selomit, iswiꞌehal yuko naj yinh ebꞌnaj yikꞌal naj Izhar. 19 Haxa ebꞌnaj iskꞌahol naj Hebrón, haꞌ ebꞌnaj tiꞌ; naj Jerías, naj bꞌabꞌel, iswiꞌehal yeko yinh ebꞌnaj yikꞌal naj Hebrón, naj Amarías, naj iskabꞌ, naj Jahaziel, naj yox, naj Jecamán, naj iskanh. 20 Haxa ebꞌnaj iskꞌahol naj Uziel, haꞌ ebꞌnaj tiꞌ: naj Micaía, naj bꞌabꞌel, iswiꞌehal yeko yinh ebꞌnaj yikꞌal naj Uziel, naj Isías, naj iskabꞌ. 21 Ebꞌnaj iskꞌahol naj Merari haꞌ ebꞌnaj tiꞌ: Naj Mahli yebꞌ naj Musi. Ebꞌnaj iskꞌahol naj Mahli, haꞌ xin yaꞌ Eleazar yebꞌ naj Cis. 22 Yaꞌ Eleazar tuꞌ machi hunu iskꞌahol yaꞌ yet iskam yaꞌ, wal xin iskutzꞌinnhe yaꞌ aya. Haꞌ xin ebꞌnaj iskꞌahol naj Cis mohyi yebꞌ ebꞌix; ayto yu isbꞌa ebꞌnaj yebꞌ ebꞌix. 23 Haxa ebꞌnaj iskꞌahol naj Musi oxwanh ebꞌnaj, haꞌ ebꞌnaj tiꞌ: Naj Mahli, naj Edar, yebꞌ naj Jeremot. 24 Haꞌ ebꞌnaj tuꞌ yikꞌal yinh ebꞌnaj iskꞌahol yaꞌ Leví yebꞌ xin haꞌ ebꞌnaj ok iswiꞌehalo yinh yikꞌal hakaꞌtikꞌa yalni yet yah isbꞌi ebꞌnaj. Sunil ebꞌnaj tuꞌ bꞌislax yinh hununtajil, bꞌislax ebꞌnaj huntakꞌal habꞌil yebꞌ ebꞌnaj xapalkꞌon yinh huntakꞌal habꞌil, haꞌ xin ebꞌnaj tuꞌ munla yinh ismunil Komam Dios, Jahawil, yul Yatut Komam.

25 Yuto yal yaꞌ rey David: «Haꞌ Komam Jahawil, isDiosal Israel chꞌaqꞌni aqꞌankꞌulal tet konhobꞌ Israel tiꞌ, chixin ehikꞌo Komam bꞌey Jerusalén yinh sunilbꞌal ej tiempo. 26 Yuxin matxa chiyijikꞌo ebꞌnaj levita qꞌap mantiado chiꞌalaxkanh yatuto Komam, yebꞌ munlabꞌal chiꞌokniko yinh ismunil,» xhi yaꞌ.

27 Hakaꞌtikꞌa yu yalni yaꞌ rey David yinh islahobꞌal, hak tuꞌ yu yijni isbꞌa, isbꞌislax ebꞌnaj levita 20 (hunkꞌal) habꞌil yebꞌ ebꞌnaj xapalkꞌon yinh huntakꞌal habꞌil. 28 Ebꞌnaj tuꞌ ayko ebꞌnaj yalanh ischejbꞌanil ebꞌnaj iskꞌahol yaꞌ Aarón yet chimunla ebꞌnaj yul Yatut Komam, yebꞌ bꞌey yamaqꞌil Yatut Komam yebꞌ yulaj cuarto, chissajnhen ebꞌnaj sunil munlabꞌal yet Komam. Haꞌ xin ebꞌnaj chiwatxꞌen hunteqꞌanxa munil yul Yatut Komam. 29 Haꞌ ebꞌnaj xin chiwatxꞌen ixim pan yebꞌ ixim harina, ixim kaw kꞌul chꞌaqꞌlax yebꞌalqꞌabꞌehal tet Komam, chiswatxꞌenpaxo ebꞌnaj ixim pan wonhkꞌox machi yanhal, chiswatxꞌen ebꞌnaj ixim pan chiwatxꞌi yul xhaltin, yebꞌ ixim chiqꞌanbꞌi. Haꞌ ebꞌnaj xin chiꞌilni sunil tzet chimalelaxi yebꞌ tzet chibꞌislax yul Yatut Komam. 30 Yebꞌ xin haꞌ ebꞌnaj chiꞌaqꞌni yuchꞌandios tet Komam hunun sakꞌayal yul Yatut Komam, kat isbꞌitni ebꞌnaj tet Komam, haktikꞌapax tuꞌ yet qꞌejbꞌiyal. 31 Chiyalten ebꞌnaj xahanbꞌal tet Komam Jahawil yinh tzꞌayik sábado, yebꞌ yet unin ixahaw, yebꞌ yinh hunteqꞌanxa qꞌinh kaw ay yelapnoj. Ebꞌnaj tuꞌ chꞌok ebꞌnaj yinh istxolal hakaꞌtikꞌa isbꞌisil ebꞌnaj hakaꞌtikꞌa yalni chejbꞌanile. 32 Haꞌ ebꞌnaj xin chitanhenpaxo Tabernáculo bꞌay chischah isbꞌa Komam Dios yebꞌ ebꞌnaj Israel, chistanhenpaxo ebꞌnaj Ehobꞌal kaw Txahul. Ayko ebꞌnaj tuꞌ yalanh ischejbꞌanil ebꞌnaj iskꞌahol yaꞌ Aarón yet chimunla ebꞌnaj yul Yatut Komam Jahawil, ebꞌnaj tuꞌ yuxhta isbꞌa.