—Asiꞌ yulaj sunil ismajul hunun majan ebꞌnaj Israel chiꞌichiti bꞌey Dan masanta bꞌey Beerseba, kat hawinikanh isbꞌisil yunhe wohtanhenilojan hanta isbꞌisil anma ay bꞌey tuꞌ, xhi yaꞌ. 3 Istaqꞌwi naj Joab tet yaꞌ:

—Mam rey, haꞌojabꞌ Komam Jahawil, koDiosal chiꞌaqꞌni chꞌibꞌo isbꞌisil anma 100 elto yibꞌanhilo anma ay tinanh katto hawilnoj, yajaꞌ ¿tzet yinh xin chawoche hawohtanhelo hanta isbꞌisil anma tiꞌ? xhi naj.

4 Yajaꞌ haꞌ tzet yal yaꞌ rey tuꞌ qꞌoji yibꞌanh tzet yal naj Joab yebꞌ ebꞌnaj iswiꞌehal yinh ebꞌnaj soldado, yuxin el ebꞌnaj iskꞌatanh yaꞌ rey David, isto ebꞌnaj yinokanh isbꞌisil konhobꞌ Israel. 5 Isqꞌaxpon ebꞌnaj haꞌ Jordán, iswatxꞌenkanh ebꞌnaj iscampamento bꞌey Aroer yinh yetkꞌulal sur yinh konhobꞌ ayayo yul yiktabꞌal yakꞌalil Gad, iskawilal Jazer. 6 Lahwi tuꞌ isto ebꞌnaj bꞌey Galaad yebꞌ bꞌey txꞌotxꞌ qꞌaxan txꞌotxꞌ, chiyij Hodsi. Lahwi tuꞌ istopaxo ebꞌnaj bꞌey Dan, yekꞌ ebꞌnaj yulaj konhobꞌ ayko yinhla ishoyanil Sidón. 7 Istopaxo ebꞌnaj bꞌey niman konhobꞌ Tiro yebꞌ bꞌey sunilal yul iskonhobꞌ ebꞌnaj heveo, yebꞌ ebꞌnaj cananeo, yapnikano ebꞌnaj bꞌey Beerseba bꞌey txꞌotxꞌ Neguev, yul ismajul Judá. 8 Lahwi yekꞌkano ebꞌnaj sunil yul hunteqꞌan konhobꞌ tuꞌ, ismeltzo ebꞌnaj bꞌey Jerusalén yulbꞌal bꞌalonhebꞌ ixahaw yok 20 (hunkꞌalxa) tzꞌayik. 9 Yaqꞌni naj Joab isbꞌisil sunil ebꞌnaj Israel tet yaꞌ rey David, 800 mil isbꞌisil ebꞌnaj winaj Israel kꞌul isto yinh howal, walpaxo ebꞌnaj Judá xin, 500 mil isbꞌisil ebꞌnaj.

10 Hayet lahwi yinikanh yaꞌ rey David isbꞌisil anma tuꞌ yok yinh iskꞌul yaꞌ, yalni yaꞌ tet Komam Dios Jahawil hakaꞌ tiꞌ:

—Mamin, kaw wako inmulan yul hasat yinh huneꞌ tiꞌ, wal tinanh xin chinqꞌanan ta chawaqꞌ nimankꞌulal winhan yinh inmultiꞌan, yuto kaw inlutꞌnhe hinbꞌahan winikanhan isbꞌisil anma tiꞌ, xhi yaꞌ.

11 Haxa yet hunxa tzꞌayik yinh sahabꞌ sakꞌayal yet xaꞌahwano yaꞌ rey David, istzotel Komam Dios tet yaꞌ Gad, yaꞌ ischejabꞌ Komam Dios, ischejabꞌpaxo yaꞌ rey David. Yalni Komam tet yaꞌ Gad hakaꞌ tiꞌ: 12 «Asiꞌ, hal tet yaꞌ David: Hak tiꞌ yalni Komam Jahawil hakaꞌ tiꞌ: “Ay oxebꞌ isyaꞌtajil tiꞌ chiwalan tawet, sikꞌle hunu bꞌaytet chawoche chiwatijan tawibꞌanh,” kachi,» xhi Komam. 13 Isto yaꞌ Gad iskꞌatanh yaꞌ rey David, yalni yaꞌ tet yaꞌ yinh tzet yal Komam Dios, yalni yaꞌ hakaꞌ tiꞌ:

—¿Bꞌaytet chawoche? ¿Chimhawoche ta chihul hujebꞌ habꞌil wahil sat txꞌotxꞌ Israel tiꞌ? ¿Mato chawoche chiqꞌoji ebꞌnaj ayko ishowal tawinh, kat kach istzumbꞌenikꞌo ebꞌnaj, kat hawelkanh, chawebꞌanto habꞌa oxebꞌ ixahaw tet ebꞌnaj? ¿Mato chawoche chihul oxebꞌ tzꞌayik isyaꞌtajil yibꞌanh konhobꞌ Israel tiꞌ, kat iskamilo anma yu? Txumu, kat hasaynilo bꞌaytet chawoche, chawalni wetan, kat waqꞌnihan ispaj tet Komam Jahawil chejnheintijan, xhi yaꞌ.

14 Istaqꞌwi yaꞌ rey David tet yaꞌ Gad, yalni yaꞌ:

—Kaw chisomchakanh yul inwiꞌan tinanh yu huneꞌ niman isyaꞌtajil, yaj xin chitxumchalo wuhan tato ekꞌbꞌalto kꞌul jaykꞌayanh yul isqꞌabꞌ Komam Jahawil, yuto kaw kꞌul iskꞌul Komam sata ta chonhaykꞌayanh yul isqꞌabꞌ ebꞌnaj winaj, xhi yaꞌ rey.

15 Haxa hunxa tzꞌayik yinh sahabꞌ yaniti Komam Dios huneꞌ howla yabꞌil yinh anma Israel masanta yinh istzꞌayikal bꞌay yal Komam. Huneꞌ howla yabꞌil tuꞌ ichiti bꞌey Dan masanta bꞌey Beerseba, iskam 70 mil anma Israel yu huneꞌ howla yabꞌil tuꞌ. 16 Haxa yet yanito yángel Komam Dios isqꞌabꞌ yibꞌanh konhobꞌ Jerusalén yu istanhtzeniloj, isnahni isbꞌa Komam yinh tzet lanhan yuni tuꞌ, yuxin yal Komam tet naj ángel hakaꞌ tiꞌ: «Kꞌuxanxanahi, linhbꞌa haqꞌabꞌ, matxa chawayo isyaꞌtajil yibꞌanh konhobꞌ,» xhi Komam.

Huneꞌ naj ángel tuꞌ linhankanh naj bꞌay chixanhlaxilti istrigo naj Arauna, naj jebuseo. 17 Hayet yilni yaꞌ rey David naj ángel chitanhtzenilo anma tuꞌ, yalni yaꞌ tet Komam Dios Jahawil hakaꞌ tiꞌ:

—Haninan ay inmulan. ¿Tzet ismul hunteqꞌan anma tiꞌ? Yuxin chinqꞌanan tawet, wibꞌanhojabꞌan chiꞌaykꞌay isyaꞌtajil tiꞌ, yebꞌ yibꞌanh mak ay wuhan, xhi yaꞌ rey tuꞌ.

18 Yinhtikꞌa huneꞌ tzꞌayik tuꞌ apni yaꞌ Gad iskꞌatanh yaꞌ rey David, yalni yaꞌ hakaꞌ tiꞌ: «Asiꞌ bꞌay lanhan iswatxꞌelaxilo istrigo naj Arauna, naj jebuseo, kat hawatxꞌenkanh huneꞌ yet xahanbꞌal tet Komam Jahawil bꞌey tuꞌ,» xhi yaꞌ. 19 Yahto yaꞌ rey David bꞌey tuꞌ, isto yaꞌ hakaꞌtikꞌa yu yalni yaꞌ Gad, hatatikꞌa ischejbꞌanil yaꞌ yu Komam Jahawil. 20 Hayet yilnito naj Arauna istit yaꞌ rey David yebꞌ ebꞌnaj ischejabꞌ, isto naj ischahno yaꞌ, yay jahno naj, yay xulno naj sat txꞌotxꞌ sata rey. 21 Yalni naj Arauna tet yaꞌ hakaꞌ tiꞌ:

—Mam rey ¿Tzet chul hawubꞌ inkꞌatanhan, hanin hachejabꞌ intiꞌan? xhi naj.

Istaqꞌwi yaꞌ rey David tet naj:

—Manhulan takꞌatanh, yuto chiwochehan inloqꞌoꞌan hatxꞌotxꞌ bꞌay chawatxꞌelo hatrigo tiꞌ, yuto chinwatxꞌekanhan hunu yet xahanbꞌal, bꞌay chiwaqꞌan inxahanbꞌalan tet Komam Dios Jahawil, yunhe yekꞌayo huneꞌ kamikal hul yibꞌanh konhobꞌ tiꞌ, xhi yaꞌ.

22 Yalni naj Arauna tet yaꞌ:

—Mam rey, aqꞌ haxahanbꞌal hakaꞌ chawoche, ay noꞌ wakax bꞌey tiꞌ chiyu hawaqꞌni yinh xahanbꞌalil, aypaxo teꞌ maqꞌbꞌal trigo yebꞌ teꞌ yugo chiꞌok siꞌal. 23 Sunil tiꞌ, mam rey, chiwaqꞌan tawet, ¿tzettam saqꞌal tato chitzꞌay iskꞌul Komam Dios tawinh chiyabꞌen tzet chaqꞌana? xhi naj.

24 Istaqꞌwi yaꞌ rey tet naj:

—Machoj, mach chinchahan matanil sunil tiꞌ tawet, wal xin mach chu waqꞌnihan tet Komam Dios Jahawil tzet ye tuꞌ bꞌaytet mach wetojan, xhi yaꞌ rey David tuꞌ.

Hak tuꞌ yu isloqꞌni yaꞌ rey David huneꞌ txꞌotxꞌ yebꞌ noꞌ wakax yinh 50 (lahonh yoxkꞌal) siclo chꞌen plata. 25 Iswatxꞌenkanh yaꞌ David huneꞌ bꞌay chiꞌahto xahanbꞌal, yaniko yaꞌ isxahanbꞌal tet Komam Dios Jahawil, yaqꞌnipaxo yaꞌ isyebꞌalqꞌabꞌ yet aqꞌankꞌulal. Yabꞌen Komam tzet isqꞌan yaꞌ, yok linhno iskam anma Israel. Hak tuꞌ yu yel huneꞌ howla yabꞌil xol anma Israel.