Bꞌit yuto qꞌoji ischejabꞌ Komam Dios yinh ebꞌnaj ayko ishowal yinh
Salmo tiꞌ, Masquil,a tzꞌibꞌnhebꞌil yu yaꞌ rey David tet naj yahaw yeko yinh bꞌit
18
Mam Jahawil, chintzalahan tawinh, yuto tawinh chitit wipan.2 Mam Jahawil, lahan hach hakaꞌ huneꞌ niman chꞌen,
yebꞌ hakaꞌ nimeta nha yet howal bꞌay chinkol hinbꞌahan, hach inKolomalan.
Hach inDiosalan, tawinh chitit wipan, yuxin tawinh chikawxi inkꞌulan.
Chinhakolan hakaꞌ chu ispahni chꞌen escudo flecha.
Kaw ay yip huneꞌ kolbꞌanile chitit tawet, kaw nahat yekanh bꞌay chinhakꞌubꞌahan.
3 Kinahwihan tet Komam Jahawil, Komam istzan yal-lax kꞌul-la tzotiꞌ yinh,
inkolchalojan tet ebꞌnaj ayko ishowal winhan.
4 Yoche naj kamikal kinyaqꞌaꞌ aykꞌayojan yul islatzꞌabꞌ,
kaw kinxiwan tet yip naj aqꞌomkamo anma tuꞌ.
5 Kinishojnayojan naj, yunhe waykꞌayan yul istxꞌanh naj chiꞌinito anma yul kambꞌal.
6 Yinh ej isyaꞌtajil tuꞌ ah wawan tet Komam. Inqꞌannihan ta chikolwa Komam Dios winhan.
Yabꞌen Komam yapni yel wawan bꞌey Yatut,
apni yul innuqꞌan yul istxikin Komam.
7 Yekꞌ huneꞌ niman txixkabꞌ kaw how,
isbꞌilikanh isxeꞌ nimeta witz yu ishowal Komam.
8 Elti nhubꞌ yul istxam Komam,
yelti qꞌaꞌ yul istiꞌ, yelpaxti tzaqꞌaqꞌ yul istiꞌ Komam.
9 Ishajni Komam satkanh, yayiloj Komam,
nimeta qꞌej moyan ayko yalanh yoj.
10 Ayahto yibꞌanh huneꞌ querubínb isto purlahi,
isto masnah yibꞌanh jaqꞌeqꞌ.
11 Yebꞌanto isbꞌa xol qꞌejholo hakaꞌ qꞌap qꞌap ishoyiko yinh,
yebꞌ qꞌej moyan ay bꞌey satkanh iqꞌbꞌil nhabꞌ yu.
12 Yu isqꞌaqꞌal Komam, yuxin elti jepla kꞌuh bꞌay ay tuꞌ,
istit nimeta sajbꞌat yebꞌ tzaqꞌaqꞌ xol moyan.
13 Isnhirla yul satkanh yu Komam Jahawil,
Komam kaw aykano yip abꞌelax yul isnuqꞌ.
Istit nimeta sajbꞌat yebꞌ tzaqꞌaqꞌ ayko qꞌa yinh.
14 Isqꞌojnito Komam islitꞌ yinh ebꞌnaj ayko ishowal winhan, yelkanh ebꞌnaj,
yaniti Komam kꞌuh istanhkanilo ebꞌnaj.
15 Hak tuꞌ yu yixtanhwahti yich haꞌ mar,
yixtanhwipaxo xeꞌ txꞌo txꞌotxꞌ yu ishowal Komam, yebꞌ yu yip xobꞌ istxam Komam.c
16 Yaniti Komam isqꞌabꞌ wetan yul satkanh,
kinyinahtijan xol ha haꞌ kaw nime yich.
17 Kiniskolan Komam tet ebꞌnaj kaw ay yip, ayko ishowal winhan;
ebꞌnaj chichiwa iskꞌul winhan. Hunteqꞌan ebꞌnaj tuꞌ kaw ekꞌbꞌal yip ebꞌnaj insatajan.
18 Hunteqꞌan ebꞌnaj tuꞌ ok bꞌulna ebꞌnaj winhan,
yet kaw ayinikojan yinh ej isyaꞌtajil,
yajaꞌ xin haꞌ Komam Jahawil kolwa winhan.
19 Kinyiltijan Komam, kinyanikojan bꞌay haman,
yaqꞌni Komam inkolbꞌanilan yuto xahan ayinan yu.
20 Haꞌ Komam Jahawil Wahawan aqꞌni ispaj selel istoholal chinwatxꞌehan,
machi inmulan, yuxin hak tuꞌ yu ispajtzen Komam wetan.
21 Hanintiꞌan ayinnhetikꞌakojan yul isbꞌeh Komam Jahawil.
Machi hunelo tiꞌ inmanhkꞌohan tzet chal Komam.
22 Aynhetikꞌako ischejbꞌanil Komam yinh innabꞌalan,
maxhtikꞌa hunelo tiꞌ wintanhekaniltojan ischejbꞌanil Komam.
23 Xaꞌinpohilo hinbꞌahan yinh istxꞌojal,
machi nichꞌano intxꞌojalan sata Komam.
24 Yu machi nino istxꞌojal chiꞌekꞌ yinh innabꞌalan yuxin haꞌ Komam Jahawil aqꞌni iskꞌulal ispaj selelo wetan.
25 Mamin, haꞌ mak chitzꞌay iskꞌul yinh yet anmahil, chitzꞌaypaxo hakꞌul yinh.
Haꞌ mak chiwatxꞌen istoholal, istoholal chawatxꞌepaxo yinh.
26 Haꞌ mak chiwatxꞌen iskꞌulal, haꞌ iskꞌulal chawatxꞌepaxo yinh.
Wal mak subꞌcham anma, kaw how chawute habꞌa yinh.
27 Haꞌ konhobꞌ ayko yalanh isyaꞌtajil chaxhkolwa yinh,
yajaꞌ wal mak chiyikanh isbꞌa chawilo ispixan.
28 Mam Jahawil, hach inDiosalan,
hakaꞌ yok qꞌaꞌ yinh chꞌen lámpara,
hach chawaqꞌ sajilqꞌinal wetan xol qꞌejholo.
29 Yu hach chachkolwahi,
yuxin chintanhtzelojan ebꞌnaj ayko ishowal winhan,
kat inpalkꞌonan satakꞌto iskꞌubꞌal iskonhobꞌ ebꞌnaj.
30 Kaw toholkano isbꞌeybꞌal Komam Dios,
yuxin sunil tzet chiyal Komam kaw toholpaxoj.
Hakaꞌ escudo yehiko Komam yinh sunil mak chikawxi iskꞌul yinh Komam.
31 ¿Mak hunuxa dios yibꞌanhilo Komam Dios?
¿Mak huneꞌ niman chꞌen hakaꞌ Komam Dios bꞌay chikokol kobꞌa?
32 Haꞌ Komam Dios chiꞌaqꞌni wipan.
Haꞌ chikolwa winhan yunhe toholnhetikꞌa inbꞌeybꞌalan.
33 Haꞌ Komam chiꞌaqꞌni yip wojan inbꞌelwihan yinh ejla witz yinh anhe,
hakaꞌ isbꞌelwi noꞌ sajche.d
34 Haꞌ Komam chinkuynihan inkolni hinbꞌahan yinh howal.
Haꞌ chiꞌaqꞌni yip inqꞌabꞌan inqꞌojnitojan chꞌen litꞌ nabꞌa bronce.
35 Mamin, yu ayachiko wenhelojan chinhakolan,
hawatxꞌqꞌabꞌpaxo iqꞌnhe hinan. Yu iskꞌulchꞌanil hakꞌul hawaqꞌ wipan.
36 Hach anheinikojan yul huneꞌ bꞌeh nimejal sat,
yuxin mach chinaykꞌayan.
37 Intzumbꞌehan ebꞌnaj ayko ishowal winhan,
istzujchayo ebꞌnaj wuhan masanta kam ebꞌnaj sunil wuhan, inmeltzohan xin.
38 Kaw inxitkantojan ebꞌnaj, hak tuꞌ xin matxa yu yahwano ebꞌnaj,
iskankano ebꞌnaj yalanh wojan.
39 Hawaqꞌ wipan, inqꞌojihan yinh ebꞌnaj,
yaypaxo jahno ebꞌnaj ayko ishowal winhan yinh insatan.
40 Yelpaxokanh ebꞌnaj chichiwa iskꞌul winhan yinh insatan.
Hak tuꞌ yu intanhtzenilojan ebꞌnaj chiyahwa winhan.
41 Isqꞌan ebꞌnaj kolwal yinh, yaj machi mak kolni ebꞌnaj.
Awi ebꞌnaj tet Komam yaj mach ispajtze Komam tet ebꞌnaj.
42 Kaw kokꞌ wuteyojan ebꞌnaj hakaꞌ pojoj chiyijto jaqꞌeqꞌ.
Inqꞌojilojan ebꞌnaj hakaꞌ yel tzꞌotzꞌew yulaj bꞌeh.
43 Mamin, kinhakolan tet ishowal anma ay yul konhobꞌ.
Kinhawanikojan yahawilo yinh ej konhobꞌ,
chisyijen anma wetan, anma mach ohtabꞌilo wuhan.
44 Hayet yabꞌen anma tuꞌ tzet walan, isyijen wetan.
Iskꞌahol anma nan konhobꞌal yakto isbꞌa yalanh wipan.
45 Anma nan konhobꞌal paxilo yip isluylunkanh,
yelkanh bꞌay majanikto tuꞌ.
46 ¡Itzitz Komam Dios Jahawil! ¡Hal-laxojabꞌ tzotiꞌ kꞌul yinh Komam,
Komam hakaꞌ nime chꞌen kaw ay yip! Aqꞌlaxojabꞌ bꞌinaho isbꞌi Komam Dios inKolomalan.
47 Chaqꞌ Komam isyaꞌtajil tet mak ayko ishowal winhan,
kat yinayo isbꞌa ej konhobꞌ wetan yu Komam.
48 Haꞌ Komam chinkolnihan tet ebꞌnaj ayko ishowal winhan,
yebꞌ xin chiniskolan Komam tet ebꞌnaj txꞌoj chiꞌahwejna winhan.
Mamin, hach chinhakolan tet ebꞌnaj kaw how iswiꞌ.
49 Yuxin chiwalan kꞌul-la tzotiꞌ tawinh Mamin yulaj ej konhobꞌ,
kat xin inbꞌitnhenan habꞌi.e
50 Hach chaxhkolwa winhan inqꞌojihan yinh ebꞌnaj ayko ishowal winhan,
hanin rey intiꞌan sikꞌbꞌil inilojan hawu.
Kaw chayekanilo iskꞌulal hakꞌul winhan, hanin David intiꞌan,
yebꞌ tet yuninal wuninalan yinh sunilbꞌal ej tiempo.