Txah chiqꞌanni iskolwal Komam Dios tet ebꞌnaj txꞌoj
Salmo tzꞌibꞌnhebꞌil yu yaꞌ rey David
17
Abꞌe Mam Jahawil, haꞌ tzet chinqꞌanan tawet tiꞌ,haꞌ istoholal. Hajbꞌa hatxikin yet chintxahlihan tawet,
yuto machi leqꞌtiꞌal chiꞌelti yul intiꞌan.
2 Hach chawal yinh tzet chinelikojan,
yuto hach hawohta istoholal.
3 Hach hawohta tzet chiꞌekꞌ yul wanmahan, kinhawilnihan yet aqꞌbꞌalil.
Yet kinhawilwenan machi xin istxꞌojal ilchalo winhan hawu.
Mach chiwalan hunu tzet ye tuꞌ tiꞌ maxhtaj haꞌ yehi.
4 Haꞌ yinh isbꞌeybꞌal anma,
chinpohilo hinbꞌahan xol hakaꞌ yalni hatzotiꞌ, yuto kaw txꞌoj isbꞌeybꞌal ebꞌnaj.
5 Hach chawil inxalabꞌan yinh habꞌeh, yunhe machi elto yolna wojan.
6 Mamin, tawet chiꞌahwawan,
yuto hach chapajtze tzet chinqꞌanan.
Hajbꞌa hatxikin yinh tzet chiwalan.
7 Yelo issaqꞌalil iskꞌulchꞌanil hakꞌul winhan,
hach tiꞌ chakol makta chisayni iskolbꞌanil tawinh,
tet mak ayko ishowal yinh.
8 Tanhe hinan hakaꞌ hayaꞌilnhen istioxhal isbꞌaqꞌ hasat,
kꞌubꞌa hinan hakaꞌ chute noꞌ miꞌe chiyo nixhte yunin yalanh xikꞌ.
9 Tanhe hinan tet ebꞌnaj txꞌoj ayko ishowal winhan,
yebꞌ tet ebꞌnaj chinsaynihan yunhe kinismaqꞌnikamojan.
10 Hunteqꞌan ebꞌnaj tuꞌ,
mach chitzꞌay nino iskꞌul ebꞌnaj yinh yet anmahil,
kaw leqꞌtiꞌ istzotel ebꞌnaj, chiyikanh isbꞌa.a
11 Kaw ayko ebꞌnaj yilni koxalabꞌanh bꞌay chonhekꞌanh,
kaw tꞌanhannhetikꞌako ebꞌnaj jinhanh yunhe konhisqꞌojnayojanh ebꞌnaj sat txꞌotxꞌ.
12 Lahan ebꞌnaj hakaꞌ noꞌ bꞌalam choche iskꞌuxuꞌ chibꞌe,
hakaꞌ noꞌ tzehla bꞌalam aynhetikꞌako ismajwahi.
13 Mam Wahawil, ahanhwanoj,
elanhto hawaqꞌako howal yinh ebꞌnaj ayko ishowal winhan.
Kolinan yu hawespada tet ebꞌnaj txꞌoj.
14 Mamin, kolinan yebꞌ sunil hawip tet ebꞌnaj.
Kolinan tet ebꞌnaj yinhnhe tzet ay yul sat yibꞌanhqꞌinal tiꞌ choche yaqꞌaꞌ tzalaho iskꞌul.
Kaw nohna yatut ebꞌnaj yu isqꞌalomal,
kaw nohna iskꞌul yuninal ebꞌnaj,
yebꞌ xin chabꞌekanh yinh yuninal iskꞌahol ebꞌnaj.
15 Haxa haninan xin Mamin, yu isyelal chiwilikojan hasat.
Kaw chitzala inkꞌulan yet chiꞌel inwayanhan, kat wokan tasataj.