Huneꞌ komajul saybꞌililoj
Salmo tzꞌibꞌnhebꞌil yu yaꞌ rey David
16
Mamin, hach chinhatanhehan.Tawinh chikawxi inkꞌulan.
2 Hach wanmahan, hawal tet Komam Jahawil: «Hach Wahawilan, haꞌ sunil tzet iskꞌulal ay wetan, tawet chitita,» kachi.
3 Haꞌ mak hawetxa yehi, yebꞌ mak yijem tawet yul sat yibꞌanhqꞌinal tiꞌ,
haꞌ bꞌay kaw chintzalahan.
4 Haꞌ mak chiyo isbꞌa tet ej tioxh, kaw chiꞌahkanokanh isyaꞌil chabꞌe.
Machi bꞌaqꞌinhal chinokan xol ebꞌnaj yet chispotxꞌni ebꞌnaj no noqꞌ xahanbꞌalil tet ej istioxh tuꞌ.
Machi bꞌaqꞌinhal chiwaqꞌ bꞌinahojan isbꞌi istioxh ebꞌnaj tuꞌ.
5 Mam Wahawan, hachton inmajulan.
Hach chawaqꞌ sunil isyaxil wetan, hach tzabꞌnhe winhbꞌalan.a
6 Kaw iskꞌulal chahlo wuhan,
hanta issaqꞌalil inmajulan aqꞌlax wetan.
7 Mamin, chaxhinbꞌitnhehan, yuto hach chinhawijbꞌahan.
Chaxhtzotel yinh innabꞌalan yinh yet aqꞌbꞌalil yu kinhakuynihan.
8 Mamin, hach ayachiko wuhan insatajan.
Yu ayachiko yinh inwatxꞌqꞌabꞌan,
machi hunu tzet chinaqꞌni aykꞌayojan.
9 Yuxin kaw chitzala wanmahan, yebꞌ chibꞌitni intiꞌan,
hakpax tuꞌ innimanilan chixew yinh aqꞌankꞌulal.
10 Yuto mach chabꞌejkano wanmahan xol kamom.
Mach chachahpaxo qꞌajoꞌto innimanilan, hanin saybꞌil hinan hawu.b
11 Haye huneꞌ bꞌeh yet qꞌinale wetan. Kaw ay tzalahilal takꞌatanh,
yebꞌ issaqꞌalil yinh sunilbꞌal tiempo bꞌey hawatxꞌqꞌabꞌ.