Haꞌ mak chiꞌehayo sat txꞌotxꞌ wonhan yet Komam Dios
Salmo tzꞌibꞌnhebꞌil yu yaꞌ rey David
15
Mam Jahawil, ¿mak chu yehayo yul hawatut?¿Mak chu yehayo sat txꞌotxꞌ hawonhan?
2 Hanhe mak mach ekꞌ yinh istxꞌojal,
yebꞌ mak chiwatxꞌen istoholal,
yebꞌ mak chihalni isyelal yinh sunil yanma.
3 Mak mach chalni bꞌaltzotiꞌ,
yebꞌ mach chiswatxꞌe istxꞌojal yinh yet anmahil,
yebꞌ mak mach chaqꞌ tako iskꞌul yet anmahil.
4 Mak chiyahni istxꞌojal chiswatxꞌe anma.
Mak chitzala yinh anma chiyo isbꞌa tet Komam Dios.
Mak chisyije tzet chalte sata Komam Dios, waxanhka yaꞌta chiꞌekꞌ yu.
5 Mak chiꞌaqꞌni melyu kꞌamil, yaj machi yal chꞌen chisqꞌana
yebꞌ mak mach chischah melyu yu yaqꞌni isbꞌa yinh hunu leqꞌtiꞌal yinh mak machi ismul,
haꞌ mak chibꞌeybꞌalnhen tuꞌ, machi bꞌaqꞌinhal chiꞌaykꞌayi.a