Chisyelo isqꞌaqꞌal yip Komam yinh tzettaj iswatxꞌe
Salmo tzꞌibꞌnhebꞌil yul yaꞌ rey David tet naj yahawil yeko yinh bꞌit
19
Haꞌ satkanh chiyenilo isqꞌaqꞌal yip Komam Dios,haꞌ satkanh tuꞌ, haꞌ chihalnilo yinh tzettaj iswatxꞌe Komam.a
2 Huneꞌ tzꞌayik chitzotel tet hunxa tzꞌayik,
huneꞌ aqꞌbꞌal chitzotel tet hunxa aqꞌbꞌal,
chalnilo ishelanil Komam.
3 Waxanhka xin machi hunu tzotiꞌ chiꞌabꞌelaxi,
machi hunu mak chiꞌabꞌen yul nuqꞌe tuꞌ.
4 Sunil yul sat yibꞌanhqꞌinal tiꞌ elto huneꞌ yul nuqꞌe tuꞌ,
apnita tzotiꞌ tuꞌ bꞌay chikachnakan apno txꞌo txꞌotxꞌ.
Haꞌ bꞌey satkanh, haꞌ tuꞌ ay yehobꞌal tzꞌayik yu Komam Dios.b
5 Hakaꞌ hunu naj tzeh chimohyi chiꞌelti yul yatut, hak tuꞌ yul yoj tzꞌayik,
maka hakaꞌ hunu naj chaqꞌ anhe chito yinh isbꞌel yinh tzalahilal.c
6 Chiꞌahilo tzꞌayik bꞌay chꞌahiloj,
kat istohi masanta chiꞌapni bꞌay chitokanoj.
Machi hunu tzet chu yebꞌanto isbꞌa tet isqꞌaqꞌal tzꞌayik.
7 Haꞌ iskuybꞌanil Komam kaw tohol, chistxum isbꞌa janma yu,
yuto chaqꞌ akꞌ qꞌinale. Tzet chal Komam kaw tꞌinhan yehi,
chiyaqꞌ isnabꞌal anma komontanhe.
8 Haꞌ ischejbꞌanil Komam kaw toholkano, chaqꞌ tzalahilal yul janma.
Haꞌ Istzotiꞌ Komam machi nino istxꞌojal yinh, chaqꞌ issajilqꞌinal yul kosat.d
9 Haꞌ koxiw tet Komam chisajbꞌi janma yu,
aynhetikꞌa xin yinh sunilbꞌal ej tiempo.
Haꞌ tzet chal Komam kaw yeli, kaw toholkanoj.e
10 Kaw ekꞌbꞌal yochebꞌanil Istzotiꞌ Komam sata chꞌen oro kaw kꞌul,
ekꞌbꞌal ischiꞌal yibꞌanh iskabꞌil noꞌ ajan.f
11 Haꞌ chinkuynihan, hanin kinhachejabꞌ intiꞌan.
Yet chinyijenan kaw ay iskꞌulal chaqꞌ wetan.
12 ¿Mak hunu tiꞌ chitxumchalo yu yinh issukal chakoj?
Mamin, aqꞌ nimankꞌulal yinh ej inmulan mach chinnatijan.
13 Kolwahanh winhan, machojabꞌ chiwikanh hinbꞌahan yinh istxꞌojal hanin kinhachejabꞌ intiꞌan,
machojabꞌ chiqꞌoji huneꞌ tuꞌ winhan.
Hak tuꞌ xin machi nino istxꞌojal winhan,
yebꞌ xin mach chinaykꞌayan yinh winilo hinbꞌahan tawintaj.g
14 ¡Haꞌ tzet chiwalan yebꞌ tzet chiꞌekꞌ yinh innabꞌalan kꞌulojabꞌ yul hasat, Mam Wahawil.
Hach huneꞌ niman chꞌen bꞌay chinkol hinbꞌahan, hach Inkolomalan!