Txah chiqꞌanni iskolwal Komam Dios yinh howal
Salmo tzꞌibꞌnhebꞌilkano yu yaꞌ rey David tet naj yahaw yinh bꞌit
20
¡Mam rey, yabꞌehojabꞌ Komam Jahawil hatxah yet chihul isyaꞌtajil tawibꞌanh!¡Haꞌojabꞌ isbꞌi Komam, isDiosal jichmam Jacob chachkolni!
2 Yaqꞌabꞌti Komam iskolwal tawinh,
chitit yul yatut bꞌey konhobꞌ Sión.
3 Isnabꞌabꞌti Komam sunil hayebꞌalqꞌabꞌ,
yebꞌ ischabꞌabꞌ Komam yinh tzalahilal haxahanbꞌal chanhus yibꞌanh chꞌen chꞌen latzꞌbꞌilkanh.
4 Haꞌojabꞌ Komam chꞌaqꞌni yijaꞌ isbꞌa sunil tzet chawoche,
yebꞌ sunil tzet chiꞌekꞌ yinh hanabꞌal.
5 Hanhonhtiꞌanh chonhtzalahanh yet chaxhqꞌoji yinh ebꞌnaj ayko ishowal tawinh.
Chijakanhanh qꞌap bandera yu yalaxiko ismay Komam Dios, koDiosal.
Ispajtzehojabꞌ Komam sunil tzet chaqꞌan yinh hatxah.a
6 Wal tinanh chijohtanheloj ta haꞌ Komam chikolwa yinh yaꞌ rey saybꞌililoj,
yu isqꞌoji yinh ebꞌnaj ayko ishowal yinh.
Haꞌ Komam chipajtzen yul satkanh yinh tzet chisqꞌan yaꞌ rey.
Haꞌ yip iswatxꞌqꞌabꞌ Komam chikolwa yinh yaꞌ.
7 Ay ebꞌnaj tiꞌ yinh iscarruaje yet howal bꞌay chikawxi iskꞌul,
aypaxo ebꞌnaj tiꞌ ischeh yet howal ayko yipo iskꞌul, yaj wal hanhonh tiꞌ,
haꞌ Komam Jahawil, koDiosal, ayko yipo janma.
8 Haꞌ hunteqꞌan ebꞌnaj tuꞌ chipáxilo yip yoj, kat yaykꞌayi,
yaj wal hanhonh tiꞌ linhanonhtikꞌa, mach chonhpax jintaj.
9 ¡Mamin, kolwahanh yinh yaꞌ rey isqꞌoji yinh ebꞌnaj ayko ishowal yinh!
¡Mamin, pajtze tzet chikoqꞌananh yet chiꞌeliko jawanh tawinh!