Bꞌit yet tzalahilal yu qꞌoji yinh ebꞌnaj ayko ishowal yinh
Salmo tzꞌibꞌnhebꞌilkano yu yaꞌ rey David tet naj yahaw bꞌit
21
Mamin, kaw chitzala iskꞌul yaꞌ rey yuto chayelo hawip tet yaꞌ.Kaw chitzalapaxoj yuto hach chakol yaꞌ.
2 Hach hawaqꞌ tzet chiyoche yanma yaꞌ.
Mach hamanhkꞌo tzet isqꞌan yaꞌ tawet yinh istxah.
3 Chabꞌil yaꞌ hawu yinh sunil iskꞌulal hakꞌul,
hawahnato huneꞌ corona oro yinh iswiꞌ yaꞌ.
4 Isqꞌan yaꞌ iskawil tawet, hawaqꞌni tet yaꞌ yinh sunilbꞌal ej tiempo.
5 Yu isqꞌoji yaꞌ yinh howal hawu, yuxin kaw ay ismay yaꞌ,
kaw niman yelapno yaꞌ, chibꞌinaho yaꞌ hawu.
6 Kaw hawakanayo hakꞌulal yibꞌanh yaꞌ yinh sunilbꞌal ej tiempo.
Kaw nohkaniko tzalahilal yinh yaꞌ takꞌatanh.
7 Yu ayiko yanma yaꞌ rey tuꞌ yinh Komam Dios Jahawil;
yebꞌ yu iskꞌulal iskꞌul Komam kaw aykano yip, machi bꞌaqꞌinhal chiꞌaykꞌay yaꞌ.
8 Chitzujcha apno ebꞌnaj chichiwa iskꞌul tawinh yu yip haqꞌabꞌ,
kat hatzabꞌnayo ebꞌnaj chiyahwa tawinh.
9 Chawanikto ebꞌnaj yul horno bꞌay kaw kaj qꞌa qꞌaꞌ yet chaxhhul yebꞌ hahowal.
Haꞌ Komam Dios chitanhtzenilo ebꞌnaj tuꞌ yu ishowal,
kat istzꞌakanto ebꞌnaj xol qꞌa qꞌaꞌ.
10 Chakꞌaytzelo yuninal ebꞌnaj sat txꞌo txꞌotxꞌ tiꞌ,
kat hakꞌaytzenilo yuninal yuninal ebꞌnaj.
11 Waxanhka chiyoche ebꞌnaj yaqꞌleꞌ kaxhyetani,
kat isnahni ebꞌnaj istxꞌojal tawinh yunhe hawaykꞌayi, yaj mach chu yu ebꞌnaj.
12 Yaj hach chawaqꞌ xiwo ebꞌnaj,
kat yelkanh ebꞌnaj; chawilwento halitꞌ yinh issat ebꞌnaj.
13 ¡Mam Wahawil, kaw niman hawelapno yu hawip, Mamin!
¡Chijalanh tzotiꞌ kꞌul tawinh, kat kobꞌitnhenanh habꞌi yu sunil hawip!