Huneꞌ aw yu iskolnilo Komam tet isyaꞌtajil yebꞌ huneꞌ bꞌit chihalni tzotiꞌ kꞌul yinh Komama
Salmo tzꞌibꞌnhebꞌilkano yu yaꞌ rey David tet naj yahaw bꞌit
22
Hach inDiosal, hach inDiosal, ¿Tzet yinh xin chinhabꞌejkanojan?¿Tzet yinh yuxin nahat hawehilo yu mach chinhakolan?
¿Tzet yinh xin mach chawabꞌe tzet chiwalan yet yeliko wawan tawinh?
2 Mamin, hach inDiosalan, yet tzꞌayikal kaw chinawihan tawet,
yajaꞌ mach chapajtze tzet chiwalan,
yet aqꞌbꞌal xin kaw mach chinxewninojan.
3 Yaj wal hach tiꞌ Mamin, kaw machi nino istxꞌojal tawinh.
Chaxhisbꞌitnhe wet Israelan.
4 Ebꞌnaj jichmamanh tawinh kawxi iskꞌul ebꞌnaj,
kach yechman ebꞌnaj, hakolni ebꞌnaj.
5 Eliko yaw ebꞌnaj tawet, hakolni ebꞌnaj.
Yu kawxi iskꞌul ebꞌnaj tawinh,
yuxin mach el istxꞌixobꞌal ebꞌnaj.
6 Yajaꞌ wal intiꞌan, lahan hinan hakaꞌ hunu noꞌ tzojoy,
man anmahojan chiwabꞌehan.
Chinetalaxan yu ebꞌnaj, chitzebꞌipaxo konhobꞌ winhan.
7 Haꞌ mak chinilnihan chibꞌuchwa winhan,
kat kinyetzꞌenan, chisyumni iswiꞌ, chalni:
8 «Huneꞌ naj tiꞌ kaw chikawxi iskꞌul naj yinh Komam Dios yalni, yuxin iskolabꞌ Komam naj.
Kaw xahan ay naj yu Komam Dios yalni, yuxin iskolabꞌ Komam naj,» xhi ebꞌnaj.b
9 Mamin, kinpitzkꞌahan, yu hak tuꞌ el yinh hakꞌul.
Hach hawaqꞌ kawxo inkꞌulan tawinh yettaxtikꞌa chito kintxutxwihan yinh inmiꞌan.
10 Yettaxtikꞌa maxhto chinpitzkꞌahan tanhebꞌil hinan hawu.
Yettaxtikꞌa maxhto chinpitzkꞌahan inDiosalxatikꞌahan hawehi.
11 Mach chinhabꞌejkanojan yinh ej isyaꞌtajil chihul wibꞌanhtiꞌan
yuto machi hunuxa mak chu kiniskolnihan.
12 Hoybꞌilayo hinan yu ebꞌnaj ayko ishowal winhan,
lahan ebꞌnaj, hakaꞌ noꞌ howla wakax ay bꞌey txꞌotxꞌ Basán.c
13 Chako ebꞌnaj yul isnuqꞌ, chiꞌawi ebꞌnaj hakaꞌ noꞌ bꞌalam,
chishajni istiꞌ, kat istit lemna winhan.
14 Wal hinan, lahan hinan hakaꞌ ha haꞌ chitixhlaxtoj.
Sunil inbꞌajilan matxa ayoko yul yehobꞌal.
Wal wanmahan xaxitmokanto chiwabꞌehan, xaꞌulito yul inkꞌulan chiwabꞌehan hakaꞌ yulito noꞌ ixkabꞌ.
15 Matxa wipan, lahan hinan hakaꞌ tajin txꞌotxꞌ.
Wal waqꞌan chiꞌahkanto lakꞌno yul ishomal intiꞌan.
¡Kinhawanikanayojan xol ispojojal txꞌo txꞌotxꞌ hakaꞌ hunu kamom!
16 Hoybꞌil hinan yu ebꞌnaj txꞌoj,
wejaniko ebꞌnaj winhan hakaꞌ metx txꞌiꞌ, istzilnito ebꞌnaj wojan yebꞌ inqꞌabꞌan.
17 Sunil isbꞌajil innimanilan chisje inbꞌisnihan.
Wal ebꞌnaj txꞌoj tuꞌ tꞌanhaniko ebꞌnaj winhan,
chinyilnihan ebꞌnaj yu yilni tzet chiwuhan.
18 Ispohnikanh ebꞌnaj xil inqꞌapan yinh,
yilwenpaxo ebꞌnaj mak kꞌul yinhbꞌal yinito xil inqꞌap tuꞌan.d
19 Yajaꞌ hach Mamin, machojabꞌ chaxhhitzilo inkꞌatanhan.
¡Aqꞌ wipan, Mamin! ¡Hulanh yinh anhe kinhakoloꞌan!
20 Kolinan yul isqꞌabꞌ kamikal tet chꞌen espada.
Mach chinhachah kamojan yu hunteqꞌan ebꞌnaj hakaꞌ metx txꞌiꞌ.
21 Kolinan yul istiꞌ hunteqꞌan ebꞌnaj hakaꞌ noꞌ bꞌalam,
kolinpaxojan tet yukꞌaꞌ ebꞌnaj, hakaꞌ noꞌ wakax.
22 Chaxhwalikꞌojan tet ebꞌnaj wuxhtajan,
chaxhinbꞌitnhenan xol ebꞌnaj yet chiskutxbꞌan isbꞌa ebꞌnaj.e
23 Hex cheyiyo hebꞌa tet Komam, bꞌitnhewe isbꞌi Komam.
Aweko ismay Komam hex yuninal jichmam Jacob.
Xiwanhwe tet Komam, hex yuninal jichmam Israel.f
24 Yuto mach yintanhelto Komam,
mach chisnahulnhepaxto Komam isbꞌiskꞌulal makta chiꞌaqꞌlax ekꞌoyaꞌ.
Mach chiyebꞌapaxto sat Komam yet chiꞌeliko yaw ebꞌnaj yinh Komam,
chabꞌen Komam tzet chal ebꞌnaj.
25 Mamin, yinh sat sunil anma chiskutxbꞌa isbꞌa tawinh chaxhinbꞌitnhehan.
Haꞌ sunil tzet waltehan tawet chinyijehan yinh sat sunil mak chiyiyo isbꞌa tawet.
26 Haꞌ anma matzet aya, chiwaꞌ yinh kaw kꞌul, masanto kaw chinoh iskꞌul.
Ebꞌnaj chisaywa yinh Komam Jahawil, isbꞌitnheꞌojabꞌ ebꞌnaj Komam,
ayojabꞌ xin iskawil ebꞌnaj sunilbꞌal ej tiempo.
27 Sunil anma ay yul sat yibꞌanhqꞌinal tiꞌ chisnati Komam,
kat yul iskꞌatanh Komam Jahawil.
Sunil yikꞌal ebꞌnaj ay yul ej nimeta konhobꞌ chiyiyo isbꞌa sata Komam.
28 Yuto Komam Dios, Jahawil,
yahaw yeko Komam yinh sunil ej konhobꞌ.
29 Sunil ebꞌnaj ay yelapno yul sat yibꞌanhqꞌinal tiꞌ chiwaꞌ ebꞌnaj, kat yaniko ismay Komam.
Chiꞌay jahno sata Komam sunil yuninal anma,
maxhtikꞌa chu iskolnilo yanma tet kamikal yuto pojoj ay yet isnimanil.g
30 Haꞌ yuninal anma chꞌay jahno sata Komam,
chihal-laxo istzotiꞌal Komam Jahawil tet anma chito hul yinh sunilbꞌal ej tiempo.
31 Chihuli kat yalnikꞌo istoholal Komam.
Chiyalikꞌo tet anma chito pitzkꞌahi yinh tzet iswatxꞌe Komam.