Akꞌ bꞌit chiꞌalaxiko tet Komam Dios
96
Bꞌitnhewe akꞌ bꞌit tet Komam Dios Jahawil; sunil hex ay yul sat yibꞌanhqꞌinal tiꞌ,bꞌitnanhwe tet Komam.
2 Bꞌitnanhwe tet Komam Jahawil kat heyalni kꞌul-la tzotiꞌ yinh.
Hununojabꞌ tzꞌayik heyalnikꞌo kolbꞌanile chaqꞌ Komam.
3 Halwekꞌo issaqꞌalil ismay yebꞌ kꞌaybꞌalkꞌule chiswatxꞌe Komam tet ej nixhte konhobꞌ
yebꞌ tet txꞌotxꞌ nime konhobꞌ.
4 Yuto kaw niman yelapno Komam, yuxin yet ay isbꞌitnhelax isbꞌi.
Kaw aykano yelapno sata hunuxa mak chal-lax diosal.
5 Hunteqꞌan istioxh ej konhobꞌ matzet chaliloj,
yajaꞌ wal Komam haꞌ watxꞌenhe satkanh.
6 ¡Kaw hoyaniko isqꞌaqꞌal yip Komam yinh!
¡Chisye yip yebꞌ iskꞌulchꞌanil yul yatut!
7 Hex konhobꞌlaj, aweko ismay Komam halwej ta kaw ay yelapnoj yebꞌ ta kaw ay yip.
8 Halwe kꞌul-la tzotiꞌ yinh Komam yuto yet ay yalaxiko ismay.
Hulanhwe yebꞌ heyofrenda yul yamaqꞌil Yatut Komam.
9 Iweyo hebꞌa tet Komam Dios Jahawil, yul yatut kaw kꞌulchꞌan.
Sunil hex ay yul sat yibꞌanhqꞌinal tiꞌ, xiwanhwe tet Komam Dios.a
10 Halwe tet anma ay yulajla konhobꞌ hakaꞌ tiꞌ:
«Haꞌ Komam Dios haꞌ Jahawil.
Haꞌ Komam anhekanayo isxeꞌal txꞌo txꞌotxꞌ yunhe machi bꞌili txꞌotxꞌ.
Haꞌ Komam chiꞌilni yinh tzet chiꞌeliko hunun konhobꞌ yinh kaw istoholal,» kexchi.
11 Tzalahojabꞌ satkanh yebꞌ txꞌo txꞌotxꞌ yinh Komam.
Bꞌilojabꞌkanh haꞌ mar yebꞌ sunil tzet ay xol haꞌ.
12 Tzalahojabꞌ txꞌo txꞌotxꞌ bꞌay ay ej tzꞌunubꞌ,
tzalahojabꞌpaxo teꞌ qꞌebꞌtaj, haxonojabꞌ isqꞌabꞌ teꞌ yu tzalahilal.
13 Sunil hunteqꞌan tuꞌ tzalahojabꞌ yinh sat Komam chihuli.
Hoꞌ chul Komam kat yok Yahawilo yinh yul sat yibꞌanhqꞌinal.
¡Chilni Komam yinh tzet chiꞌeliko anma yinh kaw istoholal yebꞌ yinh isyelal!