Bꞌitnojonhwe tet Komam Dios yinh tzalahilal
95
¡Titanhwej kat kobꞌitni yinh kaw tzalahilal tet Komam Dios!¡Bꞌitnojonhwe tet Komam Kokolomal,
hakaꞌ hunu chꞌen chꞌen bꞌay chijebꞌa kobꞌa!
2 ¡Jaqꞌaꞌwe yuchꞌandiosal tet Komam Dios yet chikokutxbꞌan kobꞌa sataj!
¡Kat kobꞌitnhen bꞌit tet Komam yu janiko ismay!a
3 Yuto Komam Dios Jahawil,
haꞌ Dios kaw aykano yelapno yehi.
Haꞌ Komam haꞌ yahawil yeko yinh sunil tzet chihal-lax diosal.
4 Yul isqꞌabꞌ Komam ayko nimeta holan kaw nahat yehayto yich ay sat txꞌo txꞌotxꞌ tiꞌ,
yetpaxo Komam ye hunteqꞌan nimeta witz kaw nahat yekanh.
5 Yet Komam ye haꞌ mar yuto haꞌ Komam watxꞌenhe haꞌ,
haꞌ isqꞌabꞌ Komam watxꞌenhe txꞌo txꞌotxꞌ tiꞌ.
6 Titanhwej, jaqꞌaꞌweko ismay Komam Dios,
jiqꞌaweyo kobꞌa tet, kat jay jahno sataj, yuto haꞌ Komam watxꞌenhehonh.
7 Yuto haꞌ Komam koDiosal, hanhonh tiꞌ xin iskonhobꞌ jehi.
Hakaꞌta ismeꞌ Komam jehi, yuxin tanhebꞌilonh yu.
Tinanh chal Komam jet hakaꞌ tiꞌ, jabꞌewe tzet chala:
8 «Tinanh, machojabꞌ chelutꞌnhe heyanma hakaꞌ yute isbꞌa heyichmam bꞌey txꞌotxꞌ Meriba,
yebꞌ hakaꞌ yute isbꞌa ebꞌnaj bꞌey txꞌotxꞌ Masah sat txꞌotxꞌ desierto.b
9 Haꞌ bꞌey tuꞌ kinyakojan ebꞌnaj heyichmam tuꞌ yinh ilwebꞌal,
waxanhka xin kaw txꞌiꞌal kꞌaybꞌalkꞌule inyehan tet ebꞌnaj.
10 Kaw 40 (kawinaj) habꞌil yaqꞌ hunteqꞌan anma tuꞌ chíwaho inkꞌulan.
Walnihan hakaꞌ tiꞌ: “Hunteqꞌan anma tiꞌ,
hanhetikꞌa yinh istxꞌojal ayko yanma.
Maxhtikꞌa chisyije tzet chiwalan,” kinchihan.
11 Yuxin kaw tit inhowalan waqꞌni bꞌinaho inbꞌihan,
walnikanojan tato mach chiꞌok anma tuꞌ yinh huneꞌ xewilal chiwaqꞌan,»c xhi Komam.