Haꞌ Komam Dios juez yeko yinh sunil anma ay yul sat yibꞌanhqꞌinal tiꞌ
94
¡Mam Jahawil, hach tiꞌ Dios hach, yelo habꞌa,hach chawaqꞌ ispaj selel tet anma ay ismul!
2 Yuto hach tiꞌ juez haweko yinh sunil anma ay yul sat yibꞌanhqꞌinal.
¡Ahanhwanoj kat hawaqꞌni ispaj selel tet ebꞌnaj kaw kanhye chute isbꞌa!
3 ¿Mamin, hantato tiempo chiyaqꞌ tzalaho iskꞌul ebꞌnaj txꞌoj?
4 ¿Bꞌaqꞌinh chisbꞌej ebꞌnaj yalni tzotiꞌ kaw yaꞌ chiꞌoki?
Ebꞌnaj tuꞌ chako ebꞌnaj iswinajil yet chiswatxꞌen istxꞌojal.
5 Mamin, hunteqꞌan ebꞌnaj tuꞌ cheta ebꞌnaj hakonhobꞌ,
chaqꞌni ebꞌnaj isyaꞌtajil tet makta hawet yehi.
6 Ispotxꞌni ebꞌnaj ebꞌix hunix yebꞌ anma nan konhobꞌal,
ispotxꞌnipaxo ebꞌnaj nixhte unin machi ismam ismiꞌ.
7 Chalni ebꞌnaj:
«Mach chil Komam Dios tzet chikowatxꞌe tiꞌ,
mach chabꞌelo isDiosal yaꞌ Jacob,» xhi ebꞌnaj.
8 ¡Hex kaw lutꞌ heyanma yebꞌ hex kaw wiꞌe hex tiꞌ!
¿Bꞌaqꞌinh chihajcha henabꞌal?
9 Haꞌ Komam watxꞌenhe txikine,
¿tom mach chabꞌe Komam tzet chihal-laxi?
Haꞌ Komam watxꞌenhe isbꞌaqꞌ sate,
¿tom mach chil Komam heyalni?
10 ¿Tom mach chayo Komam isyaꞌtajil yibꞌanh ej konhobꞌ
yunhe iswatxꞌeniko Komam yinh istoholal?
¿Tom mach helano Komam,
Komam chiꞌaqꞌni helanile tet ebꞌnaj winaj?
11 Wal xin kaw yohta Komam ta hanhkꞌanhe issukal chiꞌekꞌ yinh isnabꞌal anma.
12 Mamin, saqꞌal yet anma chakacha,
chawaniko yinh istoholal, chawaqꞌni hakuybꞌanil tet,
13 yunhe ay aqꞌankꞌulal yul yanma yet chul isyaꞌtajil,
yajaꞌ wal tet anma chiwatxꞌen istxꞌojal xin
lanhan ishol-lax txꞌotxꞌ bꞌay chitokanoj.
14 Mach chisbꞌejkano Komam iskonhobꞌ,
mach chákano Komam ischukil makta yetxa Komam yehi.a
15 Chiyiqꞌni yip istoholal hunelxa,
kat yok tzujno anma kꞌul yinta istoholal tuꞌ.
16 ¿Mak chinkolnihan yul isqꞌabꞌ ebꞌnaj txꞌoj
yebꞌ ebꞌnaj ismachiswalilalnhetikꞌa chiswatxꞌe?
17 Ta mach kiniskolan Komam matxam hinan tinanh.
18 Hayet walnihan ta lanhanxa waykꞌayan,
hawul kolwaho winhan yu iskꞌulchꞌanil hakꞌul winhan.
19 Hayet kaw ay tzet ayko yinh inkꞌulan,
hawaqꞌni yip wanmahan yebꞌ tzalahilal wetan.
20 Hach tiꞌ Mamin, mach chachtzala yinh ebꞌnaj juez chiwatxꞌen istxꞌojal,
ebꞌnaj mach chiwatxꞌen istoholal hakaꞌ yalni ley.
21 Chetan ebꞌnaj anma mach ismul yebꞌ kꞌul isbꞌeybꞌal,
chiskawxeniko ebꞌnaj kamikal yibꞌanh.
22 Yajaꞌ wal hinan, haꞌ Komam Dios Jahawil chinkolnihan.
Haꞌ Komam Dios, inDiosalan chinebꞌanan, hakaꞌ chꞌen nime chꞌen.
23 Haꞌ Komam chitanhtzenkanilo ebꞌnaj txꞌoj,
yu istxꞌojal chiswatxꞌe ebꞌnaj.
Haꞌ Komam Dios koDiosal chitanhtzenkanilo ebꞌnaj.