Haꞌ Komam Dios Yahawil yebꞌ kaw aykano yip
97
¡Tzalahojabꞌ sunil txꞌo txꞌotxꞌ tiꞌ!¡Yebꞌ sunil konhobꞌ ayayo istiꞌ haꞌ mar yuto Yahawil Komam Dios!
2 Hoyaniko qꞌejholo yebꞌ moyan yinh Komam,
yul istzꞌonhobꞌal chil Komam yinh tzet chiꞌeliko anma yinh kaw istoholal yebꞌ isyelal.
3 Ayko huneꞌ qꞌaꞌ sata Komam chinhusnito ebꞌnaj ayko ishowal yinh,
hoyaniko yinh Komam.
4 Hayet chijepla kꞌuh yu Komam sunil yul sat yibꞌanhqꞌinal tiꞌ chisajbꞌikaniloj,
kat isluylunkanh txꞌo txꞌotxꞌ yu xiwkilal.
5 Kat yulikanh ej witz sata Komam hakaꞌ yulito noꞌ ixkabꞌ,
Komam yahaw txꞌotxꞌ.a
6 Haꞌ satkanh halni istoholal chiswatxꞌe Komam.
Sunil konhobꞌ ay yul sat yibꞌanhqꞌinal chiꞌilni isqꞌaqꞌal yip Komam.
7 Wal anma chiyiyo isbꞌa sata ej tioxh yebꞌ makta kaw ay yelapno chute isbꞌa
yu chisjahbꞌa isbꞌa sata tioxh tuꞌ,
chiꞌilaxayoj kat yokkano yinh txꞌixwilal.
Sunil tzet chihal-lax diosal chꞌay jahno sata Komam.
8 Mamin, wal konhobꞌ Sión,
yebꞌ konhobꞌ ay yul ismajul txꞌotxꞌ Judá
kaw chitzalakano yinh istoholal chawatxꞌe.
9 Yuto hach tiꞌ Mam Wahawil,
kaw aykano hawelapnoj.
Kaw ayachkanokanh yibꞌanh txꞌo txꞌotxꞌ yebꞌ yibꞌanh tzet chihal-lax diosal.
10 Mamin, sunil mak chachocheni chisyah istxꞌojal.
Chatanhe yebꞌ chawil anma yijem tawet,
kat hakolnilo yul isqꞌabꞌ ebꞌnaj txꞌoj isnabꞌal.
11 Kaw chijepla sajilqꞌinal yinh anma chiwatxꞌen iskꞌulal.
Haxa anma kꞌul isbꞌeybꞌal aynhetikꞌa tzalahilal tet.
12 ¡Hex chewatxꞌe iskꞌulal tzalahanhwe yinh Komam,
kat hebꞌitnhen isbꞌi Komam kaw aykano yelapnoj!